ياشلىقتىكى تاللاش
شىنجاڭ ئۇيغۇر ئاپتونوم رايونلۇق ئىتتىپاق كومىتېتىدىن
ئاينۇر مەخسەت
ياشلىق ھاياتتىكى ئەڭ گۈزەل مەزگىل . ئىنساننىڭ ئۆمرىدە قانچىلىك ئۇتۇقلارنى قولغا كەلتۈرەلىشى ياشلىقىدىكى تاللىشىغا باغلىق بولىدۇ . جۇڭخۇا مىللەتلىرىنىڭ ئۇلۇغ گۈللىنىشىنى ئەمەلگە ئاشۇرۇشتىن ئىبارەت قاينام-تاشقىنلىققا تولغان بۇ تارىخى مۇساپىدە ، شىنجاڭنىڭ ھالقىما تەرەققىياتى ۋە ئەبەدىي ئەمىنلىكىنى ئىلگىرى سۈرۈشتەك دەۋر ئېقىنىدا ، شىنجاڭدىكى نەچچە ئەۋلاد ئىرادىلىك ھەرمىللەت ياشلار قەيسىرانە كۈرەش قىلىپ ، بېشىدىن نۇرغۇن ئىسسىق-سوغۇقلارنى ئۆتكۈزۈپ ، تىرىشىپ ئىزدىنىپ ، دەۋرگە ماس قەدەمدە ۋەتەن بىلەن تەڭ ئىلگىرلەشنى تاللاپ ، ياشلىق باھارى ئارقىلىق ۋەتەننىڭ تەرەققىياتى ، شىنجاڭنىڭ گۈللىنىشى ئۈچۈن قان-تەر ئاققۇزۇپ ، شىنجاڭنىڭ تەرەققىيات-ئىلگىرلەش تارىخ سەھىپىسىدە ئۆزلىرىنىڭ شانلىق ئىزلىرىنى قالدۇردى . ئۇلار ئۇلۇغ ۋەتەننى ، گۈزەل يۇرتىنى قىزغىن سۆيدى ، ئۆزلىرىنىڭ جۇڭگولۇق ئىكەنلىكىدىن ئىپتىخارلاندى ، ئۇلار ئۆزىنىڭ گۈزەل ياشلىقىنى مەڭگۈ قىزغىن سۆيىدىغان يۇرت-ماكانىغا تەقدىم ئەتتى . لېكىن ، يېقىندىن بۇيان كەينى-كەينىدىن يۈز بەرگەن ئېغىر زوراۋانلىق ، تېررورلۇق ۋەقەلىرى بىزگە شۇنى ئاگاھلاندۇرىدىكى : چېگرا ئىچى ۋە سىرتىدىكى دۈشمەن كۈچلەرنىڭ بىزنى يوقىتىش غەرىزى تېخى يوقالغىنى يوق ، ۋەتەننى پارچىلاش قەستى ئۆزگەرگىنى يوق . ئاز ساندىكى ياشلار «ئۈچ خىل كۈچ » نىڭ كۈشكۈرتۈشى ، قايمۇقتۇرۇشى ۋە ئالدىشى بىلەن ، ۋەھىمە ، غېرىبلىق ، پۇشايمان ئىسكەنجىسىدە جىنايەت پاتقىقىغا چوڭقۇر پېتىپ ، خەلق بىلەن دۈشمەنلىشىش يولىنى تاللاپ ، ھەر مىللەت خەلقى نەپرەتلىنىدىغان جىنايەتچىلەرگە ئايلاندى . ئۇلارنىڭ ئىنسانىيەتكە ، جەمئىيەتكە قارشى ۋەھشى ماھىيىتى ۋە جىنايەتلىرى، زوراۋان ، بۆلگۈنچى ، تېررورچىلارنى «ئۈچ خىل كۈچ» نىڭ « زەمبىرەك يېمى » ۋە بىۋاستە زىيانكەشلىكىنىڭ قۇربانىغا ئايلاندۇرۇپ ، پۈتۈن ئىنسانىيەتنىڭ لەنەت-نەپرىتىگە ئۇچراتتى . ئۇلار ھاماقەتلەرچە « بۇنىڭ ھەممىسى ئېتىقاد ئۈچۈن» دېدى، لېكىن ئىسلام دىنى ۋەتەننى ، تىنچلىقنى سۆيۈشنى ، مېھىر-شەپقەت يەتكۈزۈپ ، ئۆز ئارا ياردەملىشىشنى تەشەببۇس قىلىدىغان دىن . ئۇلار يەنە «بۇلارنىڭ ھەممىسى مىللەت ئۈچۈن » دېدى ، لېكىن ئۇلار ناھايىتى قەبىھ ۋاستىلەر بىلەن بىگۇناھلارنى خالىغانچە ئۆلتۈرۈپ ، ئەسەبىيلىشىپ ، ئېچىنىشلىق پاجىئەلەرنى كەلتۈرۈپ چىقىرىپ ، خەلقنى غەزەپلەندۈرۈپ ، مىللىتىمىزنىڭ نامىنى بۇلغىدى . بۇلارنىڭ ھەممىسى دۈشمەن كۈچلەرنىڭ ۋەتەننى پارچىلاش ، ۋەتەننىڭ بىرلىكىنى بۇزۇش ، مىللەتلەر ئىتتىپاقلىقىغا بۇزغۇنچىلىق قىلىشتىن ئىبارەت ھەقىقىي سىياسىي مۇددىئاسىنى تولۇق ، ئەينەن ئاشكارىلاپ بەردى . بىز بىر ئۇچۇم تېررورچىلارنىڭ قانۇن-تۈزۈمنىڭ ئىززەت-ئابرويىنى ئەيمەنمەستىن ئاياغ ئاستى قىلىشىغا يول قويمايمىز ، خەلقنىڭ مەنپەئەتىنى خالىغانچە ئاياغ ئاستى قىلىشىغا يول قويمايمىز .شانلىق ئۇتۇقلىرىمىزنى زوراۋانلارنىڭ پىتنە-ئىغۋا توقۇپ ھاقارەتلىشىگە تېخىمۇ يول قويمايمىز . بىز دۈشمەنگە قارشى بىر سەپتە تۇرۇپ ، ئىرادىمىزدىن سېپىل ھاسىل قىلىپ ، تېررورچى–بۆلگۈنچى ئۇنسۇرلارنىڭ بارلىق بۇزغۇنچىلىق ھەرىكەتلىرىگە قىلچە يۇمشاق قوللۇق قىلماي ، قاتتىق قول بولۇپ ، قەتئىي قاتتىق زەربە بېرىپ ، جەمئىيەتنىڭ مۇقىملىقىنى قوغدىشىمىز كېرەك .
يېڭى دەۋرىدىكى شىنجاڭ ياشلىرى ئەينى ئۇرۇش دەۋرىدىكى قان كېچىپ جەڭ قىلغان ئىنقىلابنى باشتىن كەچۈرۈپ باقمىغان، شىنجاڭنىڭ تىنچ يول بىلەن ئازاد بولغاندىكى ھەرمىللەت خەلقىنىڭ قاينام تاشقىنلىققا تولغان ، كىشىنى تەسىرلەندۈرىدىغان شۇ كۆرۈنۈشلەرنى بىۋاسىتە ھېس قىلىپ باقمىغان ، ئۇلاردا كونا ۋە يېڭى جەمئىيەتنى سېلىشتۇرالايدىغان بىۋاستە كەچۈرمىش كەم. سېلىشتۇرۇش بولمىغاچقا ، جەمئىيەت مۇقىملىقىنىڭ مۇھىملىقىغا ، تىنچ-ئامانلىقنىڭ ئاسان قولغا كەلمەيدىغانلىقىغا بولغان چۈشەنچە چوڭقۇر ئەمەس ، سېلىشتۇرۇش بولمىغاچقا ، بۈگۈنكىدەك ياخشى شارائىتنىڭ ئاسان قولغا كەلمىگەنلىكىنى چۈشىنىپ يېتەلمەيدۇ .ۋەتەننىڭ بىرلىكى ، خەلقنىڭ ئازادلىقى ، سوتسىيالىستىك تۈزۈمنىڭ ئورنىتىلىشى شىنجاڭنىڭ تەرەققىي قىلىپ ئىلگىرىلىشىنى ئالدىنقى شەرت بىلەن تەمىنلىدى . جەمئىيەتنىڭ مۇقىملىقى ، مىللەتلەرنىڭ ئىتتىپاقلىقى شىنجاڭدىكى ھەرمىللەت ياشلىرىنىڭ ئۆسۈپ يېتىلىش ۋە تەرەققىياتىنىڭ ئاساسى . جەمئىيەت مۇقىملىقىدا ياشلار ئەڭ چوڭ پايدا ئالغۇچى ، جەمئىيەت مۇقىمسىز بولسا ياشلار ئەڭ چوڭ زىيانكەشلىككە ئۇچرىغۇچىدۇر . لېكىن ، بىزدەك ئسلاھات ئېچىۋېتىش بىلەن ماس قەدەمدە ئۆسۈپ يېتىلىۋاتقان بىر ئەۋلاد ھەرمىللەت ياشلىرى بەختىيارلىق ئىچىدە ۋەتىنىمىز چوڭ ئائىلىسىنىڭ ئىللىقلىقىدىن بەھىر ئېلىپ ، ئاتا-بوۋىلىرىمىزنىڭ جاپالىق قان-تەر بەدىلىگە تېگىشكەن ئالەمشۇمۇل ئۆزگۈرۈشلەر ۋە تەرەققىيات مېۋىلىرىدىن بەھىر ئېلىش بىلەن بىرگە ، ۋەتەننىڭ بىرلىكىنى قوغداش بىلەن ۋەتەننى پارچىلاش ، مىللەتلەر ئىتتىپاقلىقىغا بۇزغۇنچىلىق قىلىشتەك ھايات-ماماتلىق سىياسىي كۈرەشكە دۇچ كەلمەكتىمىز . شىنجاڭدىكى ھەرمىللەت ياشلار تىنچلىقنى سۆيۈپ ، ۋەتەننىڭ بىرلىكى ۋە مىللەتلەر ئىتتىپاقلىقىنى قوغداپ ، تەستە قولغا كەلگەن تەرەققىيات مېۋىسىنى قەدىرلەپ ، قەلبىدە كىچىك ‹‹ياشلار ئارزۇسى›› ۋە چوڭ ‹‹ جۇڭگو ئارزۇسى ›› نى تۇرغۇزۇپ ، جۇڭگو ئارزۇسىنى تىرىشىپ ئەمەلگە ئاشۇرۇش ئۈچۈن دادىل قەدەملەر بىلەن ئالغا ئىلگىرلەشنى ئۆز زىممىسىگە ئېلىشى لازىم .
مەركەز شىنجاڭ خىزمىتى سۆھبەت يىغىنىنىڭ ئېچىلىشى ھەر مىللەت خەلقىنى خۇشاللىققا چۆمدۈردى ۋە ئىلھاملاندۇردى، پارتىيە مەركىزى كومىتېتى ، گوۋۇيۈەننىڭ شىنجاڭ خىزمىتىگە يۈكسەك كۆڭۈل بۆلۈشى ، شىنجاڭدىكى ھەر مىللەت خەلقىگە سەمىمىي غەمخورلۇق قىلىشى ، خەلق قۇرۇلۇشىغا زور دەرىجىدە مەبلەغ سېلىشى ، شىنجاڭغا ساھەلەر بويىچە ياردەم بەرگۈچى ئۆلكە-شەھەرلەرنىڭ خالىس ياردىمى ، تەڭرىتېغىنىڭ جەنۇب-شىمالىدا كىشىنى ھاياجانغا سالىدىغان تارىخىي ئۆزگىرىشلەرنى بارلىققا كەلتۈرمەكتە ، گۈزەل شىنجاڭ قۇرۇش ئەمەلىي ھەرىكەتلەر بىلەن قەدەممۇ قەدەم رېئاللىققا ئايلانماقتا .ياشلىقتىكى تاللاش ، غايىغا ئىنتىلىش ۋە ئەمەلگە ئاشۇرۇش يولىدا توغرا بولغان ھايات يۆنىلىشىنى تاللاپ ، يۇرت-ماكانىمىزنى قۇرۇپ ، ۋەتەنگە تۆھپە قوشۇپ ، خەلق ئۈچۈن خىزمەت قىلىش جەريانىدا دەۋرگە مۇناسىپ بولغان نەتىجىلەرنى قولغا كەلتۈرۈپ ، ‹‹جۇڭگو ئارزۇسى ››نى ئەمەلگە ئاشۇرۇش ئۈچۈن توختاۋسىز كۈرەش قىلىپ ، دادىل ئالغا ئىلگىرلىشىمىز لازىم !
| 
يوللىغان ۋاقتى 2013-7-9 14:07:32
يوللىغان ۋاقتى 2013-7-9 15:47:55
يوللىغان ۋاقتى 2013-7-12 11:20:59