بۇ يازمىنى ئاخىرىدا sarwi تەھرىرلىگەن. ۋاقتى 2013-3-14 12:31
مەن كەتتىم
خوش! دېدىم كەينىمگە يېنىشلاپ بېقىپ،
كۆزۈمدىن مارجاندەك ياشلىرىم ئېقىپ.
مەن كەتتىم، كەلمەسمەن يېنىڭغا ئەمدى،
كەلمەسمەن، قەلبىڭگە گۈلخانلار يېقىپ!
تىلغىسا تىلغىسۇن قەلبىمنى ھەسرەت،
كېتەرمەن، يېنىڭغا كەلمەسمەن پەقەت.
ئەسلىمە، ئامرىقىم مېنى سەن زىنھار،
بىر مەنلا قايغۇرۇپ ئۆتەي تائەبەت.
يۈرىكىڭ پۈتۈلگەن بولسا گەر تاشتىن،
ئېرىمەس دەريادەك ئاققان كۆز ياشتىن.
كەچسەڭ گەر كېچىۋەر! مەنمۇ چىدارمەن،
نە قىسمەت ئۆتمىگەن ئىدى بۇ باشتىن.
بۇ شېئىرىم مەڭگۈلۈك ئەسلىمە بولسۇن،
خالىساڭ تاشلىماي ساقلاپ قويارسەن.
چاچلىرىڭ كۈمۈشتەك ئاقارغان چاغلار،
ئېھتىمال، ئۇنتالماي مېنى ئويلارسەن.
چېچەكلەر ئاچمىدى گۈزەل ئارمانلار،
بەندىلەر تەقدىرگە چارىسىز ئىكەن.
ۋە لېكىن ئۆچمەسكەن يۈرەكتىكى ئوت،
ئۆلمەسكەن يالقۇنلۇق مۇھەببەت دېگەن!
كۆرەرمەن ئەگەر مەن ھاياتلا بولسام،
چاچلىرىڭ ئاقارغان ئاشۇ كۈنلەرنى.
تۇتارمەن ئېھتىمال مۇڭلارغا چۆكۈپ -
ئولتۇرغان ۋاقتىڭدا قىزىل گۈللەرنى.
سەن بەلكىم پۇرارسەن يېنىش - يېنىشلاپ،
ئامرىقىم، مەن ساڭا تۇتقان گۈللەرنى.
ئۇشبۇ دەم ئىككىمىز قايتىپ ياشلىققا،
ئەسلەرمىز سۆيگۈگە تولغان كۈنلەرنى.
تىزارمەن شۇ ئىسسىق ياشلىرىم بىلەن،
ئامرىقىم، سەن ئۈچۈن بىر تىزىق مارجان.
ياسارمەن شېئىرىمدا ساڭا قەسىرلەر،
قەلبىمنى چۇلغىغاچ قايناق ھاياجان!
گۈللەرنى تىزارمەن ساڭىلا ئاتاپ،
نەزمىلەر يازارمەن ساڭا بېغىشلاپ.
سەن ئۈچۈن ياڭرىغان مۇڭلۇق ناخشامدا،
تۇرارمەن نىگارىم سېنى باغاشلاپ!
پاك سۆيگۈم سەن ئۈچۈن ئەسلىمە بولسۇن،
چىدىساڭ نىگارىم ئۇنتۇغىن تامام.
بىلگىنكى سەن تامام ئۇنتۇپ كەتسەڭمۇ،
مەن مەڭگۈ ئۇنۇتماي ئەسلەرمەن ھامان!
مەن سېنى ئەسلەرمەن مەڭگۈ تائەبەت،
نامىڭنى قەلبىمگە يېزىپ قويارمەن.
شېئىرىمدىن سەن ئۈچۈن گۈلدەستە ياساپ،
بىر كۈنلەر بوينۇڭغا ئېسىپ قويارمەن!
مەنبە: ئۆزۈم
| 
يوللىغان ۋاقتى 
