مېھرابىڭدا مەن
مەخمۇت سەلەي(مەيپۇرۇچ)
ئولتۇرۇپ، ئۆرە تۇرۇپ مېھرابىڭدا مەن، يىلىنىپ ھەم يالۋۇرۇپ مېھرابىڭدا مەن. قەددى تاغدەك ئەر ئىدىم، ئىشقىڭ دەردىدە، ئۆز - ئۆزۈم تىزلاندۇرۇپ، مېھرابىڭدا مەن. ھەم داۋا ئىزلەپ يۈرۈپ، ئەلنىڭ دەردىگە، ئۇچۇرساممۇ مەيلى دەيمەن كۆپلەپ زەربىگە. يېتەرمىكىن دەپ يۈرمەيمەن نامەرد قەدرىمگە، يىغلىسام ياشتىن قۇرۇپ، مېھرابىڭدا مەن. گاھىدا چۆللەر ئارا قىلسام مۇناجەت، جاپالاردا سىنالغىنىم ئاددىي بىر ساۋات. ئەل كۆڭلىنى ۋە يۇرتۇمنى قىلىشچۈن ئابات، يىغلىسام ئاھلار ئۇرۇپ مېھرابىڭدا مەن. ئوڭ تەرەپ ھەم سول تەرەپ دەپ باقسام ھەرقايان، يەنە مەندىن ئىچكىرگىرەك ئۆتسىمۇ چايان. چاقسىمۇ گەر بىر كىمگە دەرد قىلماسمەن بايان، كەچمىشىم شۇ، كۆپنى كۆرۈپ مېھرابىڭدا مەن. ئولتۇرۇپ، ئۆرە تۇرۇپ، يارنى سۆيەرمەن، يىلىنىپ ھەم يالۋۇرۇپ ئوتتا كۆيەرمەن. يەتسەممۇ شۇ قىرىق ياشقا يالغۇز يۈرەرمەن، يارنى دەپ خىيال سۈرۈپ مېھرابىڭدا مەن...
بىلىمەن
بىلىمەن، شۇنچە كۆپ ۋەدىلىرىڭ بار، قولۇڭدىن كەلمىگەن ئىشلىرىڭ ئۈچۈن. ئېغىزىڭدىن خۇشبۇي ھىد تۆكۈلەر باھار. ئۆزۈڭگە ئىشەنگەن كىشىلىرىڭ ئۈچۈن. كىم مېنى سېنىڭدەك ئۆزگىچە ئاتار؟ قولدىن ھېچ ئىش كەلمەس ساددىلىقىمنى. كىم يەنە مېنىڭدەك ئوتۇڭدا يانار؟ بىلسىمۇ قانچە رەت ئالدىغىنىڭنى. بار يەنە ئادەملەر، بەلكىم بۇ بازار، يىراقتىن قارايدۇ بىزگە قىزىقىپ. بار يەنە بىرلىرى تاشلايدۇ چاۋار، ئوتۇڭدا كۆيگەننى ئۆرتەر ئىزىقىپ... بىلىمەن، شۇنچە كۆپ ۋەدىلىرىڭ بار، قولۇڭدىن كەلمىگەن ئىشلىرىڭ ئۈچۈن. ئالتۇن دەپ، ئاق تۇچتىن قاپلاپتۇ زەركار، ھەسرەت يەپ ئۇپرىغان چىشلىرىڭ چۈشۈپ...
سۆزۈڭ سەنئەتكە ئايلانسۇن
كۈنۈڭ ھەرىكەتكە ئايلانسۇن، نېنىڭ بەرىكەتكە ئايلانسۇن. كۆرگەنلىرىڭ كۆپ بولسۇن، سۆزۈڭ سەنئەتكە ئايلانسۇن. كۆرگەنلىرىڭ كۆپ بولسۇن، سۆيگەنلىرىڭ يۇرت بولسۇن، ساڭا ھەر كىم دوست بولسۇن، كۆزۈڭ پەرق ئەتكە ئايلانسۇن. ساڭا ھەر كىم دوست بولسۇن، دۈشمىنىڭگە مۇشت ئۇرسۇن. سېنى ساقلاپ پوست تۇرسۇن، يەنە ھەمدەردكە ئايلانسۇن. ئادەم يوقتۇر ئۆچمەنسىز، مىللەت يوقتۇر كۆچمەنسىز، سەنئەت يوقتۇر سۆزمەنسىز، سۆزۈڭ سەنئەتكە ئايلانسۇن...
مەنبە: ئۆز ئىجادىيىتىم | 
يوللىغان ۋاقتى 2013-3-8 12:38:44
