«رەنانىڭ تويى» فىلىمى توغرىسىدا
(بۇ فىلىمنى تەڭرىتاغ كىنو ئىستودىيەسى 1982 - يىلى ئىشلىگەن)
سىنارېست - گۇاڭ چۈنلەن، ئابلىمىت.
رېژىسسور - گۇاڭ چۈنلەن.
ئاساسلىق روللاردا:
رەنا - مېھرىگۈل ئەمەت.
ياسىن - ھەسەن.
شۆھرەت - فېردەۋس ئېزىز.
ئامىنە - ئايشەم كېرىم.
پاتەمخان - ئاپرېل سەمەت.
قادىر - كامىل تۇرسۇن قاتارلىقلار.
فىلىم ھەققىدە چۈشەنچە:
بۇ فىلىمدە نىكاھ ئەركىنلىكىنى قولغا كەلتۈرۈش ئاساسىي تېما قىلىنغان. ئايال باش قەھرىمان رەنا جانلىق، ئوچۇق - يورۇق، قىزغىن خاراكتېرگە ئىگە بولۇپ، تاماشىبىنلارغا چوڭقۇر تەسىر قالدۇرىدۇ. فىلىمدە 60 -، 70 - يىللاردىكى سىنپىي زىددىيەت ئەكس ئەتتۈرۈلگەن. كونا ۋە يېڭى ئىدىيە ئوتتۇرىسىدىكى توقۇنۇش گەۋدىلىك ئىپادىلەنگەن. ئۇيغۇرلارنىڭ قويۇق تۇرمۇش پۇرىقىغا ئىگە بولۇپ، گۇاڭ چۈنلەننىڭ ئۇيغۇرلار كىنوچىلىقى جەھەتتە موھىم ئورۇنغا ئىگە.
فىلىمنىڭ قىسقىچە ۋەقەلىكى:
گۈزەل سېسترا قىز رەنا ئوقۇتقۇچى ياسىن بىلەن تونۇشقاندىن كېيىن، بۇ ئىككى ياش بىر - بىرىنى ياخشى كۆرۈپ قالىدۇ. شۇڭا ياسىننىڭ ئائىلىسىدىكىلەر رەنانىڭ ئائىلسىگە بىر قانچە قېتىم ئەلچى ئېۋەتىدۇ. دەل شۇ پەيتتە ئاشۇ يۇرتتىكى سودىگەر شۆھرەت قادىرنىڭ تويىدا رەنا بىلەن ئۇچرىشىپ قېلىپ، قىزنىڭ گۈزەللىكىگە مەپتۇن بولۇپ، ئۇنى ياخشى كۆرۈپ قالىدۇ. شۆھرەت ئۆزى بىلەن بىللە يۈرۈۋاتقان قىز دوستى سوپىيەنى تاشلىۋېتىپ، يوشۇرۇن ھالدا رەنانى قوغلىشىدۇ. مەھەللىدىكى تام قوشنىسى پاتەمخان رەنانىڭ ئانىسى ئامىنىخانغا شۆھرەتنى ماختاپ، رەنانى ئۇنىڭغا بېرىشكە قارىتا قۇتراتقۇلۇق قىلىدۇ. ياسىن بىلەن قىلىدىغان توي يېقىنلىشىپ قالغاندا شۆھرەتلەر قولىدىكى پۇلىغا ۋە زوراۋانلىقىغا تايىنىپ، ئامىنىخاننى ئالداپ، رەنانى شۆھرەتكە بېرىشكە ماقۇل كەلتۈرىدۇ ھەمدە رەنانىڭ قوشۇلماي قېلىشىدىن ئەنسىرەپ، رەنانى چوڭ ئانىسىنىڭ قېشىغا ئەۋەتىۋېتىدۇ. شۆھرەت تويلۇقنى ئەكىلىپ بېرىدۇ. رەنا بۇ ئىشتىن خەۋەر تاپقاندىن كېيىن يۇرتىغا كېلىپ، شۆھرەت بىلەن بولغان توي ئىشىغا قارشى تۇرىدۇ. شۆھرەتنىڭ ھىيلىگەر، ساختا نىقابى ئاشكارىلانغاندىن كېيىن ئۇ سوپىيەنى ئۆلتۈرمەكچى بولغاندا قانۇن تەرىپىدىن قولغا ئېلىنىدۇ. ياسىن ۋە ئەلىلەرنىڭ تىرىشچانلىقى ئارقىسىدا شۆھرەت بىلەن بولغان توي ئەمەلدىن قالدۇرۇلۇپ، تويلۇقنى ياندۇرۇپ بېرىشىدۇ. ئاخىرىدا رەنا بىلەن ياسىننىڭ توي ئىشى بىرلىككە كىلىپ، ئەركىن نىكاھ ئىشى يولغا قويۇلۇپ، ئوقۇتقۇچى ياسىن بىلەن سېسترا رەنانىڭ تويى بولۇپ، مۇراد - مەقسىىتىگە يېتىشىدۇ.
يازغۇچى: ئابدۇمىجىت مۇھەممەتئېلى | 
[ئۇلانما كۆچۈرۈش]
يوللىغان ۋاقتى 2013-2-6 20:59:00
