باھاردىكى خىسلەتتىن
مەخەت ئابدۇرېھىم
بىزدە شۇنداق ھېكمەت بار: يېلنىڭ بېشى باھاردىن،
قايىل شۇڭا كەڭ ئالەم باھاردىكى خىسلەتتىن.
كائىناتقا باغرىدىن قىلغاچ چەكسىز ئەقىدە،
ھۇزۇرلىنار ھاياتلىق باھار بەرگەن قىممەتتىن.
باھار بىلەن كەڭ زېمىن كىيەر گۈزەل يېشىل تون،
كۈن نۇرىدا سىماسى يالتىرايدۇ پارقىراپ.
ئۆستەڭلەردە سۈزۈك سۇ ئۆركەشلەيدۇ توختىماي،
قىرغاقلارنى سۆيۈشۈپ ئاقار ھەر يان شارقىراپ.
دەل- دەرەخلەر بىخ سۈرۈپ كۆزنى ئاچسا ھاياتقا،
گۈل-چېچەكلەر ۋىلىقلاپ كۈلۈپ تۇرۇپ ئېچىلار.
باھاردىكى شامالدا چاۋاك چالسا ياپراقلار،
ئۇسۇل ئويناپ مايسىلار بۇ سورۇنغا قېتىلار.
يۇلتۇزلارغا ماسلىشىپ باغلار ئېچىپ گۈل چىراي،
كاككۇك بىلەن زەينەپتەك خەندان ئۇرۇپ سايرىشار.
ھەر تەرەپتىن نەغمىچى قۇشلار كېلىپ شادلىنىپ،
بەزمە قۇرۇپ باغلاردا خۇشال ئويناپ يايرىشار.
ھۆسۈن تۈزۈپ كائىنات جىلۋە قىلدى رەڭمۇ- رەڭ.
خۇش تەبەسسۇم ئىلكىدە باقتى باھار يېقىملىق.
بەكمۇ كۆركەم ھەيۋەتلىك بىزەكلەندى تەبىئەت،
ياڭراق كۈيلەر ئەۋجىگە كۆتۈرۈلدى رېتىملىق.
مەن باھاردىن سۆيۈنۈپ،ۋەتەن ئەلگە كۆيۈنۈپ،
پاك دىلىمنى بىلدۈرۈپ قەسىدەمنى يازىمەن.
ئىش باشلىنار سەھەردىن بۇ ئەقىلنىڭ بەلگىسى،
باھار بەرگەن پۇرسەتتىن ئالتۇن گۆھەر قازىمەن. | 
يوللىغان ۋاقتى 2016-3-20 14:18:22