باھارغا تەلپۈنۈش！

ئۇيغۇرh

باھارغا تەلپۈنۈش

( نەسىر )

ئۇيغۇرنىسا روزى سايىت

قۇشلارنىڭ يېقىملىق سايراشلىرىنى سېغىندىڭىزمۇ ؟
سەھەردىكى گۈل بەرگىدە يالتىراپ تۇرغان شەبنەم تامچىلىرىنى ئەسكە ئالالامسىز ؟
ئەگەر ئېتىز بويلىرىدا يامغۇردىن كېيىنكى نەم توپىنىڭ ھىدى نېرۋىلىرىڭىزنى سەگەكلەشتۈرۈپ ، روھىڭىزغا ئازادىلىك بېغىشلىغىنىدا ، چېكەتكىلەرنىڭ چىرىلداشلىرى  يەنە سىزنى بىزارلىق ھېس قىلدۇرارمۇ ؟
ئەگەر مەندىن سورىسىڭىز، مەن ، ياق ، دەيمەن . چۈنكى ، - باھارنى سېغىندىم !
خۇددى بىر ئاشىق ،مەشۇقىنىڭ يوللىرىغا ئىنتىزار بولغاندەك ، باھارنى زارىقىپ كۈتتۈم ...
ئەتىيازنىڭ مەيىن شاماللىرى مەڭزىلىرىمنى سۆيۈپ ئۆتكىنىدە ، قانداق تۇيغۇدا بولغان بولغىيتتىم ؟!
قىشنىڭ شىۋىرغانلىق ئۇزۇن كېچىلىرىنى ، چىرايلىق مەڭزىلىرىمنى ئالقانلىرىم ئارىسىغا ئېلىپ ، دەرىزە تۈۋىدە ئايغا بېقىپ ئۆتكۈزدۈم.
كىچىكلىكىمىزدە،‹‹كاككۇك باھارنى چىللاپ كېلىدۇ...›› دېيىشەتتۇق .شۇڭلاشقىمىكىن ھەممىدىن بەكرەك كاككۇكنىڭ سايرىشىغا ئىنتىزار بولدۇم .
   باھارنىڭ ئاشىقى ئىدىم . رەڭگارەڭ ئېچىلغان گۈللەر ئارىسىدا كېپىنەكتەك ئۇچۇپ يۈرسەم دەيتتىم .
باھارنى ياخشى كۆرەتتىم. قۇشلارنىڭ سايراشلىرىغا جۈر بولسام دەيتتىم .
باھارغا دوست ئىدىم .ئۇماڭا ئىلھام ۋە ھوزۇر بېرەتتى .مەن باھارنىڭ زوقىدا شېئىر-قوشاقلارنى توقۇيتتىم .
مانا بۈگۈن،نورۇز كەلدى، دەيدۇ .نورۇز بوۋاي باھارنى ئېلىپ كەپتۇدەك .بەرىكەتلىك داستىخىنىنى كەڭيايغىنىچە ، يۇرت – مەھەللىلەرگە مول – ھوسۇل ، ئاسايىشلىق ،ۋە بەخىت – سائادەتتىلەۋاتقانمىش .ئەمدىلا بىخ چىقارغان يۇمران نوتىلار بەللىرىنى ئېغاڭلاتقىنىچە ئۇسسۇلغا چۈشكەنمىش .
قۇشلار ئۇياقتىن –بۇياققا ئۇچۇشقىنىچە ،توختىماستىن ۋىچىرلىشىپ ، ‹‹ بۈگۈن ھەممىگە بايرام، ئىنسانلارغىمۇ بايرام ، تەبىئەتكىمۇ بايرام ، بىز جانىۋارلارغىمۇ بايرام ››دىيىشىۋاتقۇدەكمىش .
مەيىن شاماللار مېھىربېلەن ھەر بىر مەڭىزلەرنى سىيپاپ ئۆتكىنىدە ،ئۇلارنىڭ قۇلىقىغا ، ‹‹ بۈگۈن ئەمگەكبايرىمى ، ئىناقلىق بايرىمى ، ساۋاپلىق بايرىمى ، تەبىئەت بايرىمى ›› دەپشىۋىرلاۋاتقانمىش .
   ئەي دوستۇم ، يەنە نېمىگە قاراپ تۇرىسىز ،ئىشىك – دەرىزىلىرىڭىزنى ئېچىپ ، باھارنىڭ سالقىن شاماللىرىنى ئۆيىڭىزگە باشلاڭ.بوسۇغىلىرىڭىزنى سىرىپ – سۈپۈرۈپ ،نورۇز بوۋاينى تۆرگە چىللاڭ . شۇ تاپتا نورۇزبوۋاي ئۆي –ئۆيلەرگە كىرىپ پەتىلىگەچ ،  ‹‹باھار كەلدى ! نورۇز كەلدى ! بۈگۈن نورۇز ! ›› دەۋاتقۇدەك .

                                2016-يىلى17-مارت