شېئىرلار
تىرىشقانلار
ئازادجان ئىبراھىم
ئۆزلىرىگە قاتتىق تەلەپ قويالىسا، قەيسىرانە، ئىرادىلىك بولالىسا، ھەممە ئىشنى كۆڭۈل قويۇپ قىلالىسا، ئەلدىن كېيىن قالمايدىكەن تىرىشقانلار.
قولۇم قىسقا ماڭا ياردەم قىلىڭلار دەپ، ھالىمدىن دائىم خەۋەر ئېلىڭلار دەپ، ئاش ، نېنىمنى تەييار قىلىپ بېرىڭلار دەپ، ئېغىرىنى سالمايدىكەن تىرىشقانلار.
ئۆزۈمنىڭكى بىر ئۆزۈمگە يېتىدۇ دەپ، كەڭرى بولساڭ كۈنۈڭ خۇشال ئۆتىدۇ دەپ، پەسكەشلىكتىن يۈز ئىناۋەت كېتىدۇ دەپ، ئەلدىن پايدا ئالمايدىكەن تىرىشقانلار.
بىكار ياتماي مېھنەت قىلىپ ئىنتىلىشنى، باشقىلاردەك چىن ئىنسان بوپ يېتىلىشنى، كىچىكىدىن ئۆزىگە چىڭ ئۇل سېلىشنى، ھېچ ئىشقا تەڭ قىلمايدىكەن تىرىشقانلار.
2016-يىلى 1-ئاينىڭ 29-كۈنى ئۈرۈمچى
رەھمەت دېگىن
قول ئىلكىڭدە مال بىساتىڭ قالمىغاندا، رەقىپلىرىڭ نەزىرىنى سالمىغاندا، بەت نىيەتلەر ئارامىڭنى قويمىغاندا، ساڭا ياردەم قىلغانلارغا رەخمەت دېگىن.
ۋاپاسىزلار يېرىم يولدا تاشلىغاندا، كۆرەلمەسلەر ئىللىق چىراي ئاچمىغاندا، بۆلگۈنچىلەر ئارىسىغا قاتمىغاندا، سېنى يوقلاپ تۇرغانلارغا رەھمەت دېگىن.
ئۆيىمىزگە مېھمان بولۇپ كەلدىڭىز دەپ، بىزگە ئىللىق مېھرىڭىزنى بەردىڭىز دەپ، ياخشىلىقتا كۆپنى خۇرسەن قىلدىڭىز دەپ ، قولۇڭغا سۇ قۇيغانلارغا رەھمەت دېگىن.
نېمە دېسەم گېپىمنى ئاڭلايدۇ دەپ، باشتىن- ئاخىر خاتا يولدا ماڭمايدۇ دەپ، ئالتۇن كۆرسە كۆزقىرىنى سالمايدۇ دەپ، سېنى ياخشى كۆرگەنلەرگە رەھمەت دېگىن.
2016-يىلى 1-ئاينىڭ 29-كۈنى ئۈرۈمچى
راست سۆزلىسەڭ
ئالمىغاننى ئۆزگىلەرگە ئالدىم دېمە، ساغلام تۇرۇپ كېسەل بولۇپ قالدىم دېمە، ئەجىر قىلماي ھېرىپ ئاچتىم تالدىم دېمە، ھەممە ئادەم ئىشىنىدۇ راست سۆزلىسەڭ.
ئۆزگىلەرگە بىلمىگەننى سۆزلىمىگىن، يالغان سۆزلەپ بىر شۇملۇقنى كۆزلىمىگىن، مېنىڭ راست دەپ ئەلدىن نۇقسان ئىزدىمىگىن، دوست يارەنلەر چۈشىنىدۇ راست سۆزلىسەڭ.
ئاقنى كۆرسەڭ قارا دېمەي ئاق دېسەڭلا، ھەقىقەتنى ناھەق دېمەي ھەق دېسەڭلا، تېنى ساقنى كېسەل دېمەي ساق دېسەڭلا، ئاۋام ساڭا يۈكىنىدۇ راست سۆزلىسەڭ.
سۆزلىرىڭگە يالغانلارنى قاتمىساڭلا ، ئۆزگىلەرنىڭ كەينىدىن گەپ تاپمىساڭلا، ھەممە يەردە ئىززىتىڭنى ساقىساڭلا، دوستلار ساڭا ئىنتىلىدۇ راست سۆزلىسەڭ.
2016-يىلى 2-ئاينىڭ 2-كۈنى ئۈرۈمچى | 
نامسىز يوللىغان ۋاقتى 2016-3-7 23:07:38
