ۋەلى كېرىم كۆكئالىپنىڭ ‹‹مىراس ئەدەپلەر›› ناملىق كىتابى يېقىندا شىنجاڭ خەلق باش نەشرىياتى، شىنجاڭ خەلق سەھىيە نەشرىياتى تەرىپىدىن نەشر قىلىندى
يېقىنقى يىللاردىن بۇيان، خەلقىمىزنىڭ روھىيىتى ۋە ھايات تەرزىگە تىندۇرما بولغان مىللىي خاراكتېرى، ئىشەنچ-ئېتىقادى ئاساسىدا شەكىللەنگەن ئۆزىگە خاس ئۆرپ-ئادەت، ئەدەپ، ئەخلاق ۋە پەزىلەت يوسۇنلىرىنى تەتقىق قىلىپ، تۇرمۇشنىڭ ھەرقايسى ئىنچىكە ھالقىلىرىغا چېتىلىدىغان مەسىلىلەر ئۈستىدە چوڭقۇر ئىزدىنىپ، خەلقىمىزنىڭ ھايات پائالىيىتىگە ئەڭ باب كېلىدىغان ئەدەپ-ئەخلاق نورمىسىنى بېكىتىش ۋە ئۇنى كەڭ خەلق ئاممىسى ئارىسىغا ئومۇملاشتۇرۇش يولىدا تىنىمسىز ئىزدىنىۋاتقان ئىجتىھاتلىق قەلەمكەش ۋەلى كېرىم كۆكئالىپنىڭ «مىراس ئەدەپلەر» ناملىق يېڭى كىتابى يېقىندا شىنجاڭ خەلق باش نەشرىياتى، شىنجاڭ خەلق سەھىيە نەشرىياتى تەرىپىدىن نەشر قىلىپ تارقىتىلدى.
مەزكۇر ئەسەرنىڭ مەزمۇنى خەلقىمىز ئارىسىدا ئومۇملاشقان ئەدەپ ۋە پەزىلەت يوسۇنلىرى، ئائىلە مۇناسىۋەتلىرى، ياسىنىش ۋە يۈرۈش-تۇرۇش، يېمەك-ئىچمەك، ئىجتىمائىي مۇناسىۋەت، گەپ-سۆز، مېھماندارچىلىق، يوقلاش، سودا-تىجارەت،پاكىزلىق ۋە كۈندىلىك ئىش-پائالىيەتلەردىكى ھەرقايسى ئىنچىكە ھالقىلارغىچەچېتىلىدۇ. بۇلارنىڭ ھەر بىرىدە شەخسنىڭ روھىي قىياپىتى، مەدەنىيەت ساپاسى ۋە مىجەز-خاراكتېرى ئومۇميۈزلۈك ئەكس ئېتىدۇ.كىشىلىك ئەخلاقنى كۈچەيتىشتە ئەدەپ ۋە پەزىلەت يوسۇنلىرىغا دىققەت قىلىش، «باشقىلارنى ھۆرمەتلەش، ئۆزىنى تىزگىنلەش، لايىقىدا بولۇش، سەمىمىي بولۇش» پىرىنسىپى ئاساسىدا باشقىلار بىلەن ئالاقە قىلىش، ئەدەپسىز قىلىقلاردىن قەتئىي ساقلىنىش كۈچەپ تەكىتلىنىدۇ.
مەلۇمكى، ئادەم تۇغۇلغاندىن تارتىپ تۈرلۈك ئەدەپ ۋە قائىدە-يۇسۇنلارنى ئۆگىنىدۇ. شەخس نۇقتىسىدىن قارىغاندا، ئەدەپ ۋەپەزىلەت يوسۇنلىرى كىشىلەرنىڭ ئۆز-ئۆزىنى تەربىيەلەش ۋە ئەخلاقىي ساپاسىنى يۇقىرى كۆتۈرۈش، تاكامۇللاشتۇرۇش، تۇرمۇشىنى خاتىرجەم ۋە بەختلىك قىلىش، كىشىلىك مۇناسىۋىتىنى ياخشىلاش، ئىجتىمائىي كەيپىياتنى ساپلاشتۇرۇشتا مۇھىم رول ئوينايدۇ.
«مىراس ئەدەپلەر» ناملىق بۇ ئەسەر سىزنىڭ ئاتا-بوۋىلىرىمىزدىن مىراس قالغان ئەدەپ ۋە پەزىلەت يوسۇنلىرىنى ئۆگىنىش ۋە ئۆزلەشتۈرۈشىڭىزگە، پەرزەنتلىرىڭىزنى سۈپەتلىك تەربىيەلىشىڭىزگە كۈچلۈك ياردەمچى بولالايدۇ. شۇنداقلا سىزنىڭ ئۇرۇق-تۇغقانلىرىڭىز، ئەڭ يېقىن دوست-بۇرادەرلىرىڭىزگە ھەدىيە قىلىشتىكى ئەھمىيەتلىك سوۋغا بولالايدۇ. سىز بۇ كىتابتىن ئۆزىڭىز يوقىتىپ قويۇۋاتقان، سەل قاراپ كېلىۋاتقان ياكى سىزدە بولسىمۇ دادىل نامايان قىلالمايۋاتقان نۇرغۇن ئەدەپ، ئەخلاق، قائىدە-يوسۇنلار ۋە ئۇلارنى قانداق يوسۇندا ئېلىپ بېرىش، نېمىلەرگە دىققەت قىلىش كېرەكلىكى ھەققىدە قىممەتلىك ساۋاتلارغا، ئالتۇنغا تېگىشكۈسىز ئۇچۇرلارغا ئېرىشەلەيسىز.
* | 
نامسىز يوللىغان ۋاقتى 2014-6-15 13:54:11
يوللىغان ۋاقتى 2014-6-9 18:06:25
