بىر ئايال بار كۈ تىمەن
ئابلا ئىسھاق پەروزان
جۇلالىرى ئالماس كۆزدەك چاقنىغان،
يۈرىكىمدە چېچەك يېرىپ پارلىغان .
شەبنەملىرى سۆيۈپ دىلنى ھارمىغان،
ھاياتىمدا بىر ئايال بار كۈتىمەن .
نېسىۋەمگە بەرگەن مىڭلاپ تەبەسسۈم ،
شاھزادىدەك پاكىز شۇڭا يۈرۈشۈم .
مېھىرلەنگەن ئەرلەرگە خاس كۈلۈشۈم .
مېھرى ئىللىق بىر ئايال بار كۈتىمەن .
تاڭ يۇلتۇزى كەبى سۆيگەن كۆزۈمگە ،
سۆيگۈ - ۋاپا نۇرى بېرىپ سۆزۈمگە .
دەريا كەبى ئېقىپ كىرگەن ئۆمۈرگە ،
ئىشقى دەريا بىر ئايال بار كۈتىمەن .
زۇلمەت قارا چىشلىرىنى يارسىمۇ ،
جاپا - مېھنەت بەللىرىنى قارسىمۇ .
جىمى ئازاب ئۇنى ئىزدەپ بارسىمۇ،
كۈلۈپ تۇرغان بىر ئايال بار كۈتىمەن .
سۆيگۈ مېھىر يالقۇنىدا تاۋلىنىپ ،
بالا بىلەن ئەرگە مەھكەم باغلىنىپ .
بۇ ھاياتنىڭ ئوتلىرىدا داغلىنىپ ،
كۆيۈپ تۇرغان بىر ئايال بار كۈتىمەن .
ئۇ بولغاچقا لەۋلىرىمدە ناخشىلار ،
ئۇنىڭ بىلەن مېنى بىلەر ياخشىلار .
ياندا بولسا ئۇ،پاھ! گۈزەل باخچىلار ،
تىلتۇمارىم بىر ئايال بار كۈتىمەن .
پەرىشتىنىڭ ئۆزى ئىكەن كۈزەتسەم ،
ئۇنىڭ بىلەن كۈلكە دىلغا مۇجەسسەم ،
ھاياتىمغا ئاتا قىلغان كۈچ - بەردەم .
قەلبىم سۆيگەن بىر ئايال بار كۈتىمەن .
2012 – يىلى 7- مارت
شەھرى ئۈرۈمچى | 
يوللىغان ۋاقتى 
