رۇستەم قاراسۇ ئىجادىيتى
دادامنىڭ تەرى
دېھقان دادام جاپاكەش دادام، ماڭا بەردى ياڭاق ھەم بادام، باغرىغا چىڭ باسسا دەپ بالام، ئىپار پۇرار دادامنىڭ تەرى.
تامچە-تامچە ئاققۇزۇپ تەرنى، ئەل قىلدۇردى زەي شورلۇق يەرنى، تەڭ قىلمايمەن نەچچە مىڭ سەرنى، ئالتۇن تۇغار دادامنىڭ تەرى.
بوستان بولدى قاقاس تۇپراقلار، شىلدىرلىغان گۇۋاھ ياپراقلار، يەنە گۇۋاھ زىھنى ئويغاقلار، داستان تۇغار دادامنىڭ تەرى.
يەردىن ئىلىپ ئەلگە بېرىدۇ، تامالاردىن ئەمما نېرىدۇ، دېھقان دىسە ھەممە بىلىدۇ، ئەلگە باھار دادامنىڭ تەرى.
ئانىلار
ئانا دىگەن سۆز زەپ يېقىملىق، ئانا ئەتكەن ئاش بەك تېتىملىق. ئانىلارنىڭ باغرىدا پەرزەنت، تېلىققىچە كۈلىدۇ ۋىلىق.
بەرىكەت بار ئانا بار ئۆيدە، شاد-خۇراملىق شۇ ئۆيدە كۈندە. ئانىسىز ئۆي غەمگە مۇپتىلا، يېتىم يىغلار تېۋىشسىز ئۈندە.
تونورلاردا ئانىلار ھىدى، راھەت يىسەك ياققان ھەر نېنى. كېچە-كۈندۈز بالام غېمى دەپ، سەرىپ قىلار يۈرەك قېنىنى.
ئانا ئۇلۇغ ئانا مېھرىبان، جان ئانىلار كۆكتىكى چولپان. مېھرى قۇياش شۇڭا ئانىلار، بۈيۈكلىكنىڭ تەختىگە سۇلتان.
رۇستەم قاراسۇ...ئالاتاۋدا يېزىلدى | 
يوللىغان ۋاقتى 2014-1-17 16:39:34