- تىزىملاتقان
- 2013-11-21
- ئاخىرقى قېتىم
- 2014-1-5
- ھوقۇقى
- 30
- جۇغلانما
- 233
- نادىر
- 0
- يازما
- 27
 
- تۆھپە
- 47
- مۇنبەر پۇلى
- 165
- ئىشەنىچ
- 47
| 11
چاشقان
ئىشتىن چۈشۈپ بېكەتتە ئاپتوبۇس ساقلاپ تۇراتتىم، بىر چاغدا يولنىڭ گىرۋىكىدە بىر چاشقان پەيدا بولۇپ قالدى، ئۇ يولنىڭ ماشىنا مېڭىۋاتقان تەرىپىدىن ئۆزىنى قاچۇرۇپ بېكەتكە يېقىن جايدا خۇددى قاياققا مېڭىشىنى بىلمەۋاتقاندەك نەچچە قەدەم ئالدىغا ماڭغاندىن كېيىن يەنە قايتىپ كەلدى، ئۇنىڭ بۇ ھەركىتى بېكەتتىكىلەرنىڭ دىققىتىنى تارىتتى، ھەتتا يولدىن ئۆتۈپ كېتىۋاتقانلارمۇ قەدىمىنى ئاستىلىتىپ ھەيرانلىق ئىچىدە بۇ چاشقانغا قاراپ – قاراپ قويۇپ كېتىپ قالاتتى. چاشقان نەچچە مېتر دائىرە ئىچىدە يول گىرۋىگىنى بويلاپ ئالدىغا نەچچە قەدەم كەينىگە نەچچە قەدەم مېڭىپ يۈرەتتى.
بېكەتتە 5-6 ياشلار چامىسىدىكى بالىسى بىلەن ئاپتوبۇس ساقلاپ تۇرغان ئوتتۇرا ياشلىق بىر ئايال چاشقاننىڭ بۇ ھەرىكىتىنى كۆرۈپ بالىسىنىڭ قولىدىن يېتىلەپ بېرىپ چاشقانغا ھەيۋە قىلىپ بالىسى بىلەن بىللە چاشقاننى قوغلىدى، بىچارە چاشقان ئويلىمىغان يەردىن ھۇجۇم قىلىپ كەلگەن بۇ ئانا – بالا ئىككىسىدىن ھۈركۈپ قايسى تەرەپكە قېچىشنى بىلمەي قالدى، گەرچە ئانا – بالا ئىككىسى قوللىرىنى شىلتىپ ئۇنى قوغلىغان بولسىمۇ، ئۇ ھەرگىز يولدا كېتىپ بارغان ماشىنىلارنىڭ چاقى ئاستىغا ئۆزىنى ئاتمىدى، دەسلىۋىدە ھودۇققىنىدىن نىمە قىلىشنى بىلمەۋاتقاندەك قىلىپ گاھ ئالدىغا گاھ كەينىگە يۈگۈرگەن بولسىمۇ، بىر ئازدىن كېيىن ئۆزىنى ئوڭشىۋېلىپ يولنىڭ گىرۋىگىنى بويلاپ، ئۇدۇل ئالدىغا قاراپ قاچتى، بۇ جەرياندا ماشىنىلار ئۆتۈشۈپ كېتىۋاتقان تەرەپكە ھەرگىز يېقىن يولىمىدى، ئۇ ئانا – بالا ئىككىسى ئۇنى يەنە بىر ئاز قوغلىغاندىن كېيىن، ھاردۇق يەتتىمۇ ياكى ئۇلار ئارزۇ قىلغاندەك چاشقان ئۆزىنى ماشىنىنىڭ چاقى ئاستىغا ئاتمىدىمۇ، ئۇنى قوغلاشتىن يالتىيىپ بېكەتكە قايتىپ كەلدى.
چاشقان بىر مەيدان قوغلاپ تۇتۇشنىڭ ئاخىرلاشقىنى كۆرۈپ، خۇددى دېمىنى ئېلىۋالماقچى بولغاندەك يولنىڭ گىرۋىكىدە بىر ھازاغىچە جىم تۇردى، بۇ چاغدا ئۇ خۇددى بېكەتتە ئاپتوبۇس ساقلاپ تۇرغانلاردىن كېلىدىغان خەتەرنىڭ بار يوقلىقىنى كۆزىتىۋاتقاندەك ئىدى، ئۇ خېلىغىچە جىم تۇرغاندىن كېيىن، قۇيرۇقىنى دىڭ تۇتۇپ خۇددى شەھەر كوچىلىرىنى سەيلە قىلىۋاتقاندەك يەنە ئۇياقتىن بۇياققا مېڭىشقا باشلىدى. ئۇ بۇ چاغدا يەڭگىل نەپەس ئېلىۋاتقاندەك ئىدى. بېكەتتە تۇرغانلار ئۇنىڭ بۇ ئوينىشىنى تاماشا قىلىپ ئۇنىڭغا قاراپ تۇردى. بىر چاغدا بىر بالا نەدىندۇر تېپىپ كەلگەن تاياقنى كۆتۈرۈپ چاشقاننى ئۇرۇشقا باشلىدى، ئەمما ئۇ چاشقاننىڭ ھەرىكىتى چاققان بولغاچقا بالىنىڭ نەچچە قېتىم ئۇنىڭغا قارىتىپ ئۇرغان تايىقى ئۇنىڭغا تەگمىدى، گەرچە ئۇ چاققان ھەرىكەت قىلىۋاتقان بولسىمۇ، ئەمما ئۆزىگە توغۇرلىنىپ كېلىۋاتقان تاياقتىن ھودۇقۇشقا باشلىدى، دەسلىۋىدە ھېلىقى ئانا – بالا ئىككىسىدىن قۇتۇلۇشقا ئىشلەتكەن يول بويىچە جېنىنىڭ بارىچە قاچتى، بىراق ئۇ بالىمۇ بوش كەلمەي تايىقىنى ھاۋادا پۇلاڭلىتىپ ئۇنىڭ كەينىدىن ئىز بېسىپ قوغلاپ كەلدى، چاشقاننىڭ بۇ قېتىمقى قوغلاپ تۇتۇشتىن قېچىپ قۇتۇلالمايدىغانلىقىغا كۆزى يەتتى، مۇشۇ چاغدا مەن كۆزۈمنى چىمىلدىتىشقىمۇ پېتىنالماي ئۇ چاشقانغا قاراپ تۇردۇم، كۆڭلۈمدە ” بۇ بىچارە چاشقان بۇ قېتىم تۈگىشىدىغان بولدى“ دەپ ئويلۇدۇم، بېكەتتە تۇرغانلارمۇ بويۇنلىرىنى سوزۇشۇپ ئۇ چاشقاننىڭ مىڭىسىنىڭ قېتىغىنىڭ چىقىپ كېتىشىنى كۆرۈشنى ساقلاۋاتقاندەك ئۇنىڭغا قاراپ تۇرۇشقان ئىدى.
بىر چاغدا نەگە مېڭىشنى بىلمەي قاپسىلىپ قالغان بۇ چاشقانغا يولدىكى يۇندا قۇدۇقى ئۇچراپ قالدى،بۇنى كۆرگەن چاشقان چەبدەسلىك بىلەن يۇندا قۇدۇقىنىڭ ئېغىزىدىكى تۈشۈكچىدىن كىرىپ كېتىپ كۆزدىن غايىپ بولدى.مەن ئۇھ“ دېگىنىمچە يەڭگىل نەپەس ئالدىم، ئادەملەر توپى ئىچىدىن بىرسى ”ۋىي-ي-ي“ دەپ ۋاقىراپ تاشلىدى، يەنە كىملەردۇر خۇرسىنغان ھالدا ئېغىر نەپەس ئالدى، ھېلىدىن بېرى تايىقىنى كۆكتە پۇلاڭلىتىپ چاشقان قوغلاپ يۇرگەن ئۇ بالا ئاچچىغىدىن پوكاندەك قىزىرىپ كەتكەن بولۇپ، توختىماي ھاسىرايىتتى.
ئاپتوبۇس ساقلاپ تۇرغانلار ئىچىدە جىم –جىتلىك قايتا ھۆكۈم سۈردى، ھەر كىم ئۆز كاللىسىدا بايىقى خەتەرلىك كۆرۈنۈشنى خىيال قىلىپ، بىرسى نىمىلەرگىدۇ خۇرسىنسا، يەنە بىرى بىر نىمىلەرنى تەسەۋۋۇر قىلاتتى. بۇ چاغدا يولدا كېتىۋاتقان ماشىنىلارنىڭ شاۋقۇن – سۈرەنلىرى ھېچ كىمنىڭ قولىقىغا كىرمەيىتتى.
مۇشۇ چاغدا بىرسى توساتتىن:
ـــ قاراڭلار، ھېلىقى چاشقان يەنە تۇرىدۇ، ـــ دەپ ۋاقىرىدى، بۇ گەپنى ئاڭلاپ باياتىن بېرى خۇددى يېلى چىقىپ كەتكەن توپتەك سالپىيىپ قالغان بۇ ئادەملەرگە قايتىدىن جان كىردى، بەزىلەرنىڭ گۈلقەقەلىرى ئېچلىپ چىرايى ئاپتاپتەك يورۇپ كەتتى.
ھېلىقى چاشقان يۇندا قۇدۇقىدىكى قاراڭغۇلۇقتىن زېرىكتى بولغاي، ھېلىلا كىرىپ كەتكەن تۆشۈكتىن قايتىپ چىققان ئىدى، ئۇ بايىقى قورقۇنۇچلۇق مىنۇتلارنى ئسېىدىن چىقارغاندەك يولنىڭ گىرۋىكىدە ئۇياقتىن – بۇياققا مېڭىپ ئويناشقا باشلىدى، بىر چاغدا بېكەتتە ئاپتوبۇس ساقلاپ تۇرغانلاردىن ئىككىسى كېلىپ بىر –بىرىگە ماسلىشىپ ئۇنى قوغلىدى، بىرسى ئالدى تەرەپتىن، بىرسى كەينى تەرەپتىن قوغلىدى، بۇ قېتىم چاشقان ئۆزىگە قالدۇرۇلغان بۇ كىچىككىنە دائىرىدە ئىككى كىشىنىڭ قوغلىشىدىن ئۆزىنى قاچۈرۈپ جان –جەھلى بىلەن ئالدى – كەينىگە قاچتى، ئەمما ئۇنىڭ ئالدىدىمۇ كەينىدىمۇ يول قالمىغان ئىدى، شۇنداقتىمۇ ئۇ ئاشۇ كىچىكىنە دائىرىنى خۇددى ساراڭ بولغاندەك پىقىراۋەردى، ھېلىقى ئىككى كىشىمۇ بىر – بىرىگە يېقىنلىشىپ قورشاۋ دائىرىنى تېخىمۇ كىچىكلەتتى، ئەمدىلىكتە چاشقانغا ماشىنىلارنىڭ چاقىغا ئۆزىنى ئېتىشتىن باشقا يول قالمىغان ئىدى، شۇنداقتىمۇ ئۇ توختىماي يۈگۈردى، جېنىنىڭ بارىچە يۈگۈردى، ئەتراپتا تاماشا كۆرۈپ تۇرغانلار بۇ ئاجايىپ كۆرۈنۈشتىن ھوزۇر ئېلىپ چۇقان – سۈرەن سېلىشاتتى، ئۇلارنىڭ ئىچىدە نەچچىسىنىڭ كۆز چانىقى چاشقاننىڭ پىقىرىشىغا ئەگىشىپ پىقىرايىتتى.
بىر چاغدا ياندىكى ماشىنىدىن ئۆزىنى قاچۇرىمەن دەپ يولنىڭ گىرۋىكىگە قارىتىپ رول ئۇرغان بىر ماشنىدا تېز سۈرەتتە كەلگىنىچە چاشقاننىڭ ئۈستىدىن بېسىپ ئۆتۈپ كەتتى، چاشقاندىن چاچراپ چىققان قىپ -قىزىل قان ئۇنى ئىز بېسىپ قوغلاۋاتقان ھېلىقى ئىككى كىشىنىڭ ئىشتىنىنى بويىۋەتتى، ھېلىدىن بېرى ۋاڭ – چۇڭ كۆتۈرۈپ تاماشا كۆرىۋاتقان كىشىلەر قايناۋاتقان قازانغا سۇ قويغاندەك جىملا بولدى، ھېلىقى ماشىنا نىمە ئىش بولغانلىقىنى سەزمەستىن ئۇچقاندەك كېتىپ قالدى، بۇ چاغدا ھەممەيلەننىڭ كۆزى ماشىنىڭ چاقى ئاستىدا يەنچىلىپ يەرگە چاپلىشىپ كەتكەن ھېلىقى چاشقانغا چۈشتى، يەردە قۇچقاچتەك چوڭلۇقتىكى مويدىن باشقا ھېچ نەرسىنى پەرىق ئەتكىلى بولمايىتتى، ھەتتا قان دېغىمۇ كۆرۈنمەيىتتى.
2013-يىلى 12-ئاينىڭ 30-كۈنى
|
|
يوللىغان ۋاقتى 
داۋامىنى ئەمدى ئوقۇپ باقاي!
