ئەتىگەندىلا ئىشقا چۈشۈپ ئادىتىم بويىچە گېزىت ۋاراقلاشقا باشلىدىم. «شىنجاڭ گېزىتى»نىڭ 29-دېكابىردىكى «ئەدەبىيات گۈلزارى» بېتى قەلبىمنى بىر خىل شادلىققا تولدۇردى. چۈنكى بۇ سانغا مېنىڭمۇ بىر پارچە شېئىرىم بېسىلغان ئىدى. مەن ئۆزۈمنى خۇددى بىر ئىلىم-ھېكمەت سورۇنىدا مېھمان بولۇۋاتقاندەك ھېس قىلىشقا باشلىدىم. تۇيغۇمدا مەن بۇ يەردىكى قەلەم ئەھلىلىرى بىلەن شۇنداق قىزغىن سۆزلىشىۋاتاتتىم. كىم بىلسۇن؟ بۇ سورۇندا يەنە كېلىپ مېنىڭ قېشىمدىلا قەلبىنى كىر، قاسماق باسقان بىر شەرەپسىز، ئەدەپسىز مېھمان ئولتۇراتتى. بايىقى خۇشاللىقىم نەلەگىدۇر غايىب بولدى. ئەتىگەندىلا چىۋىن يەۋالغاندەك بولۇپ قالدىم. بۇ ئەدەپسىز، شەرەپسىز مېھماننىڭ ئىسمى گۈلبوستان پازىل ۋاسىلى ئىدى. نېمىشقىدۇر ئۇنىڭغا بىۋاسىتە گەپ قىلالمىدىم. شۇڭا كۆڭۈل غەشلىكلىرىمنى تورداشلار بىلەن بىللە يېشىشنى توغرا تاپتىم. بۇ شەرەپسىز مېھمان ھاجى ئابدۇغوپۇر شېرىپنىڭ «يار كېلەر ئايەم كۈنى» ماۋزۇلۇق شېئىرى ئاستىدىكى «ئايەم كۈنى» دېگەن شېئىرغا تېخىمۇ گۈزەل بولسۇن دەپ«ئوسما قويۇپ»،قەھرىتان قىشتا، بولۇپمۇ يېڭى يىلدا توڭۇپ قالمىسۇن دەپ «پوسما كىيدۈرۈپ» قويغان ئىدى. تۆۋەندە بۇ ئىككى ئەسەرنىڭ ئەسلىي نۇسخىسىنى يوللاپ قويدۇم. تورداشلارنىڭ كۆز-قاراشلىرىنى ئوتتۇرىغا قويۇپ بېقىشىنى ئۈمىد قىلىمەن.
ئايەم كۈنى
ھاجى ئابدۇغوپۇر شېرىپ
باغىدىن دەستە تىزىپ، يار كېلەر ئايەم كۈنى، بويىدىن خۇش ھىد چېچىپ، يار كېلەر ئايەم كۈنى.
تالى مەجنۇن چاچلىرى كۆزلىرى چەشمە بۇلاق، قەددىنى گۈلدەك ئېگىپ، يار كېلەر ئايەم يىل كۈنى.
ۋەسلىگە قانغاي بۇ دەم قاغجىراپ كەتكەن يۈرەك، سۈپسۈزۈك سۇدەك ئېقىپ، يار كېلەر ئايەم كۈنى.
ھۆر- پەرىدىن نەرى كەم ئاشىقىم بانۇ- سەنەم، زەر تاۋار كۆڭلەك كىيىپ، يار كېلەر ئايەم كۈنى.
ئاڭلىسۇن ئايەم سېنىڭ شادلىقىڭ، كۈلكەڭنى ھەم، چال دۇتارىڭنى شېرىپ، يار كېلەر ئايەم كۈنى.
«قەشقەر گېزىتى»نىڭ 2013-يىل 13-ئۆكتەبىر سانىدىن.
كۆچۈرۈلگەن شېئىر
يار كېلەر يېڭى يىل كۈنى
گۈلبوستان پازىل ۋاسىلى
زېمىستانغا ئوت يېقىپ، يار كېلەر يېڭى يىل كۈنى، بويىدىن خۇش ھىد چېچىپ، يار كېلەر يېڭى يىل كۈنى.
تالى مەجنۇن چاچلىرى جۈپ كۆزلىرى چەشمە بۇلاق، قەددىنى گۈلدەك ئېگىپ، يار كېلەر يېڭى يىل كۈنى.
ۋەسلىگە قانغاي ئۇشبۇ دەم قاغجىراپ كەتكەن يۈرەك، ئەينى توزدەك جىلۋە قىپ يار كېلەر يېڭى يىل كۈنى.
ئاڭلىسۇن ئالەم سېنىڭ يار، كۈيلىرىڭنى قانغۇچە، چال راۋاپنى ياڭرىتىپ يار كېلەر يېڭى يىل كۈنى.
«شىنجاڭ گېزىتى»نىڭ 2013-يىل 29-دېكابىر سانىدىن. | 
يوللىغان ۋاقتى 
بۇرۇن«پەرۋاز»ژۇرنىلىدا مۇشۇنداق ماقالىلەر دائىم ئېلان قىلىنىپ تۇراتتى.