2013-يىللىق قۇربان ھېيتلىق تور سەنئەت كېچىلىكى بۈگۈن تورداشلارنىڭ ھۇزۇرىغا سۇنۇلىدۇ
بىز ئىنتېرنېتتا كۆكلەيمىز!
ئۆز مۇخبىرىمىز نىجات نىياز خەۋىرى، فوتوسى: تەڭرىتاغ تورى، ئۇلىنىش تورى ( www.ulinix.com) ، ئۈرۈمچى ئالماس كومپيۇتېر شىركىتى بىرلىكتە ئويۇشتۇرغان، مەركىزىي تېلېۋىزىيە ئىستانىسى تورى ھەمكارلاشقان 2013-يىللىق قۇربان ھېيتلىق تور سەنئەت كېچىلىكى 12-ئۆكتەبىر چۈشتىن كېيىن، ئۈرۈمچى ‹‹ئالمائاتا›› مۇزىكىلىق كۇلۇبىدا مۇۋەپپەقىيەتلىك سۈرەتكە ئېلىندى. بۇ قۇربان ھېيتلىق تور سەنئەت كېچىلىكى ئىككى كۈنلۈك جاپالىق كىرىشتۈرۈش باسقۇچىدىن كېيىن، بۈگۈن يەنى 14-ئۆكتەبىر ئۈرۈمچى ۋاقتى سائەت 12 دە تەڭرىتاغ ئۇيغۇرچە تورى، تەڭرىتاغ مۇنبىرى، بارمۇ مىكروبىلوگى، ئۇلىنىش تورى، خەۋەر تورى، مەركىزىي تېلېۋىزىيە ئىستانسىسى تورى قاتارلىق تور بېكەتلەردە كەڭ تورداشلار بىلەن يۈز كۆرۈشىدۇ.
بۇ قېتىملىق قۇربان ھېيتلىق تور سەنئەت كېچىلىكىنى ئۆتكۈزۈشنىڭ ئاساسىي مەقسىتى ئىنتېرنېت تورىنىڭ جەمئىيىتىمىزدە كەڭ ئومۇملاشقانلىقىدەك ئەۋزەللىكىدىن تولۇق پايدىلىنىپ، ئىنتېرنېت تورىنىڭ جەمئىيىتىمىزنىڭ ھەر قايسى ساھەلىرىدە ئويناۋاتقان رولىنى تولۇق نامايان قىلىش، تور ۋاسىتىسىنىڭ نوقۇل ھالدا خەۋەر، ئۇچۇر تارقىتىدىغان ۋاسىتە بولۇپلا قالماستىن بەلكى مانا مۇشۇنداق ئۆز دىيارىمىزدا ئۆتكۈزۈلۈۋاتقان خىلمۇ خىل پائالىيەت، كېچىلىكلەرنى بىۋاسىتە ياكى ۋاسىتىلىك ھالدا تور ۋاسىتىسى ئارقىلىقمۇ تارقاتقىلى بولىدىغانلىقىنى كەڭ خەلققە بىلدۈرۈش؛ قۇربان ھېيت مەزگىلىدە ئۆيىگە قايتالماي يىراق-يېقىندا، ئىشلەپچىقىرىشنىڭ بىرىنچى سېپىدە جاپالىق ئىشلەۋاتقان ھەر ساھە، ھەر كەسىپتىكى سۆيۈملۈك كىشىلىرىمىز، ئىچكىرى ئۆلكىلەردە، ھەتتا چەت ئەللەردە ئوقۇۋاتقان ئىستۇدېنت دوستلارغا ئىنتىرنېت تورى ئارقىلىق قۇربان ھېيتلىق سالام يوللاپ، ئۇلارنىڭ قۇربان ھېيتىنى تور ئېكرانى ئارقىلىق تەبرىكلەش، ئۇلارغا ئازراق بولسىمۇ يۇرت سۆيگۈسى ئاتا قىلىپ، ھېيت مەزگىلىدە مەنىۋى خۇشاللىققا ئىگە قىلىش، شۇنداقلا ئۇيغۇر تورچىلىقىدا تۇنجى قېتىم ئۆتكۈزۈلگەن قۇربان ھېيتلىق تور سەنئەت كېچىلىكى ئارقىلىق ئىنتىرنېت تورىنىڭ تارقىتىشتىكى ئەركىنلىكى، ۋاقىت ياكى زاماننىڭ چەكلىمىسىگە ئۇچرىمايدىغانلىقى، تورداشلارنىڭ ئۆزلىرى ياقتۇرىدىغان نومۇرلارنى مەيلى قايسى ۋاقىت بولۇشىدىن قەتئىينەزەر تاللاپ كۆرۈش ئىمكانىيىتىگە ئىگە بولۇشى، كۆرۈش جەھەتتە يۇقىرى ئۈنۈمگە ئېرىشىدىغانلىقىنى، شىركەت-كارخانىلارنىڭ نوقۇل ھالدا ئەنئەنىۋى تارقىتىش ۋاستىلىرىنىڭ تەشۋىقاتىغا مونۇپۇل بولۇپ قېلىشتەك چەكلىمىلىكنى بۆسۈپ تاشلاپ، يېڭى تارقىتىش ۋاسىتىلىرىگە مەبلەغ سېلىش ئارقىلىقمۇ ئۆزىنىڭ تەشۋىقات مەقسىتىگە يېتەلەيدىغانلىقىنى ئىسپاتلاشتىن ئىبارەت.
بۇ قېتىملىق قۇربان ھېيتلىق تور سەنئەت كېچىلىكىدە ناخشا، ئۇسسۇل، ئېتوت، سېھرىگەرلىك ماھارىتى قاتارلىق سەرخىل نومۇرلار تورداشلارنىڭ ھۇزۇرىغا سۇنۇلغان بولۇپ، بۇ كېچىلىكنىڭ باشقا كېچىلىكلەرگە ئوخشىمايدىغان پەرقى بۇ كېچىلىكتىكى ئارتىسلارنىڭ كۆپىنچىسى ئىستۇدېنتلاردىن تەشكىللەنگەن. بۇنىڭ ئاساسىي سەۋەبى، بىرىنچىدىن سەنئەت كېچىلىكلىرىدىكى مونۇپۇل قىلىۋېلىش شەكلىنى بۇزۇپ تاشلاپ، كەڭ ئىستۇدېنتلارغا سەھنە ھازىرلاپ بېرىش، شۇنداقلا كەڭ ئىستۇدېنتلارنىڭ، جەمئىيتىمىزدىكى نۇرغۇنلىغان ئىقتىدارلىق ياشلارنىڭ تولۇپ تاشقان قىزغىنلىقىنى، كەسىپ جەھەتتە ھازىرلىغان ئۇنىۋېرسال ساپاسىنى تور سەھنىسى ئارقىلىق كەڭ تورداشلارغا نامايان قىلىش.
بۇ قېتىملىق قۇربان ھېيتلىق تور سەنئەت كېچىلىكى ئۇيغۇر تورچىلىقىدىكى يەنە بىر يېڭى بۆسۈش ھېسابلىنىدىغان بولۇپ، يېڭىچە تارقىتىش ۋاسىتىسى، يېڭى نومۇر، يېڭى ئارتىسلار ، يېڭىچە ئۇسلۇب، يېڭىچە شەكىل تورداشلارنىڭ دىققىتىنى قوزغايدۇ. ئۇنىڭدىن باشقا كۆپ ھەر قايسى تور بېكەتلەردە تەڭ ۋاقىتتا تەڭرىتاغنىڭ جەنۇب-شىمالىي، ئىچكىرى ئۆلكىلەر، ھەتتا چەت ئەللەرگىچە تارقىتىلىشى دىيارىمىز شىنجاڭنىڭ قۇربان ھېيتتىكى خۇشاللىق تەنتەنىسىنى، تىنچ-خاتىرجەم قۇربان ھېيت ئۆتكۈزۈۋاتقانلىقىدەك تۇرمۇش كارتىنىسىنى ئەكس ئەتتۈرىدۇ.
بىز بۇ قېتىم ئۆتكۈزگەن قۇربان ھېيتلىق تور سەنئەت كېچىلىكى ئارقىلىق تەڭرىتاغ ئۇيغۇرچە تورىنىڭ خىزمەتلىرىنى يېقىندىن قوللاپ بەرگەن مۇناسىۋەتلىك ئورۇن ۋە رەھبەرلەرگە، تەڭرىتاغنىڭ جەنۇبىي ۋە شىمالىدىكى بارلىق ئىختىيارىي مۇخبىرلار، يازغۇچى، شائىرلار، فوتوگرافلارغا، ئەزىز دوستلارغا، بىزگە قىممەتلىك تەكلىپ-پىكىرلىرىنى بېرىپ كەلگەن بارلىق دوستلارغا ئايەملىك سالام يوللايمىز. ھەممەيلەننىڭ ئەزىز تېنىگە سالامەتلىك، ئائىلىسىگە بەخت-سائادەت، تۇرمۇشىغا خاتىرجەملىك، ئىشلىرىغا بەرىكەت تىلەيمىز.
بىۋاستە كۆرۈش ئادرېسى: http://i.ts.cn/kurban
كۆرۈش ئادرېسى: تەڭرىتاغ تورى uy.ts.cn ئۇلىنىش تورى : www.ulinix.com مەركىزىي تېلېۋىزىيە ئىستانىسى تورى:http://uyghur.cntv.cnتەڭرىتاغ مۇنبىرى: bbs.xjtsnews.com بارمۇ مىكروبىلوگى : http://www.barmu.cnخەۋەر تورى: http://www.hawar.cnماشىنا تورى:http://www.maxina.cn
| 
يوللىغان ۋاقتى 2013-10-14 13:38:51
يوللىغان ۋاقتى 2013-10-14 13:58:15