دورا چۈشەندۈرمىسىنى قانداق قىلىپ توغرا ئوقۇش كېرەك؟
جاۋاب: دورا چۈشەندۈرمىسى دورىنى قانداق ئىشلىتىشكە يېتەكلەش ئاساسلىرىنىڭ بىرسى بولۇپ، قانۇنىي كۈچكە ئىگە. دورىنى ئىشلىتىشتىن ئىلگىرى دورا چۈشەندۈرمىسىنى توغرا ئوقۇپ چۈشىنىش بىخەتەر دورا ئىشلىتىشنىڭ ئالدىنقى شەرتى.
ئالدى بىلەن دورىنىڭ نامىنى ئىگىلەش كېرەك. مۇنتىزىم دورا چۈشەندۈرمىسىنىڭ ھەممىسىدە دورىنىڭ ئورتاق نامى، تاۋار نامى، ئىنگلىزچە ئاتىلىشى، خىمىيىلىك نامى )رېتسېپسىز دورىلارنىڭ خىمىيىلىك نامى بولمايدۇ( يېزىلغان بولىدۇ. ئىشلەتكۈچى ئادەتتە دورىنىڭ ئەسلىي نامىنى، ئورتاق نامىنى بىلىۋالسىلا، دورىنى تەكرار ئىشلىتىشتىن ساقلىنالايدۇ. چۈنكى، بىر خىل دورىنىڭ پەقەت بىرلا ئورتاق نامى )يەنى دۆلەت بەلگىلىگەن قانۇنىي نامى( بولىدۇ، تاۋارنىڭكىدەك كۆپ نامى بولمايدۇ. ماس كېلىشى جەھەتتە رېتسېپسىز دورا ئىشلەتكۈچى بىمار ئۆزىنىڭ كېسەللىكىگە شۇ دورىنىڭ مۇۋاپىق كېلىدىغان - كەلمەيدىغانلىقىغا ھۆكۈم قىلىپ، دورىگەرنىڭ ياردىمىدە تاللاپ سېتىۋالسا بولىدۇ.
ئىككىنچىدىن، دورىنىڭ ئىشلىتىلىش ئۇسۇلىنى، يەنى تاماقتىن ئىلگىرى ياكى كېيىن، ئۇخلاشتىن ئىلگىرى، كۈندە بىر قېتىم ياكى ئۈچ قېتىم، ئىچىلىدىغانلىقى ياكى سىرتتىن ئىشلىتىلىدىغانلىقى ۋە ياكى ئوكۇل قىلىنىدىغانلىقى قاتارلىقلارنى ئېنىق بىلىۋېلىش كېرەك.
ئۈچىنچىدىن، دورىنىڭ ئىشلىتىلىش مىقدارىغا دىققەت قىلىش، چۈشەندۈرمىسىدە بەلگىلەنگىنى بويىچە ئىچىش كېرەك. ئادەتتە چۈشەندۈرمىسىدىكى ئىشلىتىلىش مىقدارى چوڭلارغا ئىشلىتىش مىقدارى بولۇپ، ياشانغانلار، بالىلارغا توغرا سۇندۇرۇپ ھېسابلاپ ئىشلىتىش كېرەك.
ئالاھىدە مۇھىمى شۇكى، چۈشەندۈرمىسىنى ئوقۇغاندا پەرھىزى، ناچار تەسىرى، دورىلارنىڭ ئۆزئارا تەسىرى، دىققەت قىلىنىدىغان ئىشلارغا ئالاھىدە ئەھمىيەت بېرىش، ئېنىق بولمىسا دورىگەر ياكى ۋراچتىن مەسلىھەت سوراش كېرەك.
باكتېرىيىگە قارشى تۇرغۇچى دورىلارنى نامۇۋاپىق ئىشلىتىشتىن ساقلىنىش ئۈچۈن قانداق قىلىش كېرەك؟
باكتېرىيىگە قارشى تۇرغۇچى دورىلارنىڭ ئادەتتە ھەر خىل ۋىرۇستىن يۇقۇملىنىشقا، مىكوپلازما ياكى خلامىدىيىدىن يۇقۇملىنىشقا ئۈنۈمى بولمايدۇ. زۇكام، يۇقىرى نەپەس يولى يۇقۇملىنىش قاتارلىقلارنىڭ كۆپىنچىسى ۋىرۇسلۇق يۇقۇملىنىش بولىدۇ. باكتېرىيىدىن ياكى ئىككىلەمچى باكتېرىيىدىن يۇقۇملانغانلىقى ئېنىق بېكىتىلگەندىن باشقا، ئانتىبىئوتىكلارنى ئىشلىتىش كۆرسەتكۈچى ئىنتايىن ئاز ئۇچرايدۇ.
كېسەللىك ئەھۋالى ئېغىر ياكى باكتېرىيىدىن يۇقۇملانغان دەپ قارالغانلاردىن باشقىلىرىغا، كېسەللىك سەۋەبى ئېنىق بولمىغان كېسەللەرگە ئانتىبىئوتىكلارنى قالايمىقان ئىشلىتىشكە بولمايدۇ. ئۇنداق بولمىغاندا تىپىك كلىنىكىلىق ئالامەتلەر يوشۇرۇنۇۋېلىنىدۇ ۋە كېسەللىك قوزغاتقۇچلارنى تەكشۈرۈش تەسكە توختاپ، توغرا دىئاگنوز قويۇشقا ۋە داۋالاشقا تەسىر يېتىدۇ.
باكتېرىيگە قارشى تۇرغۇچى دورىلارنى يەرلىك ئورۇنغا ئىشلىتىشتىن ئامالنىڭ بارىچە ساقلىنىش كېرەك. ئۇنداق بولمىغاندا، زىيادە سەزگۈرلۈك رېئاكسىيىسى ۋە دورىغا چىدامچانلىق يۈز بېرىدۇ.
باكتېرىيىگە قارشى دورىلارنىڭ مىقدارى مۇۋاپىق بولۇشى، داۋالاش مۇددىتى يېتەرلىك، ئۇزاق بولۇشى كېرەك. مىقدارى بەك كىچىك بولغاندا داۋالاش مەقسىتىگە يېتەلمەيلا قالماستىن، ئاسانلا دورىغا بولغان چىدامچانلىق يۈز بېرىدۇ. مىقدارى بەك كۆپ بولۇپ كەتسە، زىيادە ئىسراپ بولۇپ كېتىپلا قالماستىن، بەزىلىرى ئەكسىچە ئېغىر دەرىجىدىكى ناچار تەسىرلەرنى پەيدا قىلىدۇ؛ داۋالاش مۇددىتى قىسقا بولسا، كېسەل ئاسانلا قايتا قوزغىلىدۇ ياكى سوزۇلما خاراكتېرلىككە ئۆزگىرىدۇ، مەسىلەن: تۇبېركۇلوزغا قارشى دورىلارنىڭ داۋالاش مۇددىتى يېتەرلىك بولمىسا، كۆپىنچە قايتا قوزغىلىدۇ.
مەنبەسى: شىنجاڭ خەلق سەھىيە نەشرىياتى كىتابلىرىدىن ئۈزۈندە ئېلىندى
تور ئادرېسى:
http://xjpsp.com
يوللىغان ۋاقتى 2011-4-13 18:19:29
