سېغىز چايناش ۋە سالامەتلىك

taxna

	سېغىز چايناش ۋە سالامەتلىك (زەيتۇنگۈل ئابدۇۋايىت)      سېغىز تەبىئىي دەرەخ يىلىمى ياكى گىلىتسېرىنلىق دېۋىرقاي(سمولا)ماتېرىيال قىلىنىپ، ئۇنىڭغا شېكەر قىيامى، يالپۇز قاتارلىق تەم خۇرۇچلىرى قوشۇپ ياسىلىدۇ. سېغىز ھەم يېگىلى، ھەم ئوينىغىلى بولىدىغان بولغاچقا، ياشلار ۋە بالىلارنىڭ ياقتۇرۇشىغا ئېرىشكەن. ئۇنداقتا، سېغىز چايناشنىڭ سالامەتلىككە پايدىسى بارمۇ – يوق؟ ئالىملار سېغىز چايناش سالامەتلىككە پايدىلىق، دەپ قارايدۇ.       سېغىز چايناپ بېرىش ئارقىلىق ئەستە تۇتۇش ئىقتىدارىنى كۈچەيتكىلى بولىدۇ       ئەنگلىيىنىڭ نۇرتۇمبېرىيە ئۇنىۋېرسىتېتىدىكى تەتقىقاتچىلار بىر تۈركۈم پىدائىينى سېغىز چاينايدىغانلار، خىيالەن سېغىز چاينايدىغانلار ۋە سېغىز چاينىمايدىغانلاردىن ئىبارەت ئۈچ گۇرۇپپىغا ئايرىپ، ئەستە تۇتۇش ئىقتىدارىنى ئۆلچەش سىنىقى ئىشلىگەن. نەتىجىدە، سېغىز چاينايدىغانلار گۇرۇپپىسىدىكىلەرنىڭ ئەستە تۇتۇش ئىقتىدارى سېغىز چاينىمايدىغانلارنىڭكىدىن %35 يۇقىرى؛ خىيالىي سېغىز چاينايدىغانلارنىڭ ئەستە تۇتۇش ئىقتىدارى سېغىز چاينايدىغانلار گۇرۇپپىسىدىكىلەرنىڭكىگە يەتمىسىمۇ، لېكىن سېغىز چاينىمايدىغانلارنىڭكىدىن يۇقىرى بولۇپ چىققان. بۇنداق نەتىجىگە قارىتا، تەتقىقاتچىلار مۇنداق ئىككى خىل پەرەزنى ئوتتۇرىغا قويغان: بىرى، ئادەم سېغىز چاينىغاندا يۈرەك سوقۇشى تېزلىشىپ، چوڭ مېڭىنىڭ قان بىلەن تەمىنلىنىشى ئاشىدۇ، نەتىجىدە چوڭ مېڭىنىڭ ئەستە تۇتۇش ئىقتىدارى كۈچىيىدۇ؛ يەنە بىرى، ئادەم سېغىز چاينىغاندا ئاشقازان ئاستى بېزىنىڭ ئىنسۇلىن ئاجرىتىپ چىقىرىشى كۆپىيىپ، چوڭ مېڭىنىڭ ئەستە تۇتۇش ئىقتىدارى كۈچىيىدۇ. ياپونىيىدىمۇ مۇشۇنىڭغا ئالاقىدار بىر تۈرلۈك تەجرىبە ئىشلەنگەن بولۇپ، سېغىز چاينىغاندا مېڭىدىكى قاننىڭ ئېقىش مىقدارى ئېشىپ، مېڭە ھۈجەيرىلىرىنىڭ ئوزۇقلىنىش ھالىتىنىڭ ياخشىلىنىدىغانلىقى، نەتىجىدە ئەستە تۇتۇش ئىقتىدارىنىڭ كۈچىيىدىغانلىقى ئىسپاتلانغان. ئالاھىدە ياسالغان سېغىزنى چايناشنىڭ داۋالاش رولى بار        2006 – يىلى دانىيە ئالىملىرى كىشىلەر سېزىمچانلىقى ئېشىپ كېتىش كېسىلىنى داۋالاش رولىغا ئىگە بىر خىل سېغىزنى چاينىغاندا، ئۇنىڭ تەركىبىدىكى دورىنىڭ بەدەنگە قوبۇل قىلىنىش ئۈنۈمىنىڭ ئوخشاش رولغا ئىگە دورىنى بىۋاسىتە ئىچكەندىكىنىڭ ئۈچ ھەسسىسىگە باراۋەر بولىدىغانلىقىنى بايقىغان. بۇ تەتقىقات نەتىجىسى شۇنىڭدىن دېرەك بېرىدۇكى، بۇنىڭدىن كېيىن دورىلىق ئۈنۈمىگە ئىگە سېغىزلارنى ئىشلەپچىقىرىشقا بولىدۇ. مەسىلەن: زۇكامنى داۋالايدىغان سېغىز، باش ئاغرىقىنى داۋالايدىغان سېغىز ۋە غەلىتە پۇراقنى يوقىتىدىغان سېغىز قاتارلىقلار. تەتقىقاتچىلارنىڭ قارىشىچە، بۇ تەلەپكە يېتىش ئۈچۈن يەنە بىر قانچە يىل تىرىشچانلىق كۆرسىتىشكە توغرا كېلىدىكەن. ئەمما ئۇلار ھازىر ھېچبولمىغاندا مۇنداق بىر تۈرلۈك يېڭى تەتقىقات نەتىجىسىگە ئېرىشكەن، يەنى ئۇلار كىشىلەرنىڭ مېڭىسىنى سەگەك تۇتۇشىغا ياردەم بېرىدىغان بىر خىل سېغىزنى تەتقىق قىلىپ ياساپ چىققان. سېغىز چايناپ بېرىش چىشنىڭ ساغلاملىقىغا پايدىلىق       سېغىز ئاساسىي ماددىسىنىڭ يېپىشقاقلىقى ئىنتايىن كۈچلۈك بولۇپ، چىش سىرتقى يۈزىدىكى يېمەكلىك قالدۇقلىرىنى ئۆزىگە چاپلاشتۇرۇپ چىقىرىۋېتەلەيدۇ، چايناش ھەرىكىتىدىن پەيدا بولىدىغان مېخانىكىلىق غىدىقلاش يەنە شۆلگەينىڭ ئاجرىلىپ چىقىشىنى كۆپەيتىدىغانلىقتىن، ئېغىز بوشلۇقى چايقىلىدۇ. شۇڭا سېغىز چايناشنىڭ ئېغىز بوشلۇقىنى تازىلاش رولى بولىدۇ. شۇنىڭ بىلەن بىللە، سېغىز چايناپ بەرگەندە، يۈز قىسمىنىڭ قان ئايلىنىشى ئىلگىرى سۈرۈلۈپ، يۈز مۇسكۇللىرى چېنىقىپ، چىش ۋە ئىڭەكنىڭ يېتىلىشىنى ئىلگىرى سۈرۈش رولى بولىدۇ. ھازىر ئالەم ئۇچقۇچىلىرى ئالاھىدە ياسالغان، يېيىشكە بولىدىغان بىر خىل سېغىزدىن ئالەم بوشلۇقىغا چىققاندا چىش تازىلاش قورالى سۈپىتىدە پايدىلانماقتا. دائىم سېغىز چايناپ بېرىش ھۆسن تۈزەشكە پايدىلىق       ئامېرىكىنىڭ لوس – ئانژېلىس يۈز تېرىسى مېدىتسىنا مەركىزىنىڭ مۇدىرى، دوكتور فوكس كلىنىكىلىق تەجرىبە ئارقىلىق، ھەر كۈنى 20 ~ 15 مىنۇت سېغىز چاينىغان كىشىلەرنىڭ بىر قانچە ھەپتىدىن كېيىن يۈزىدىكى قورۇقلارنىڭ ئازىيىشقا باشلىغانلىقىنى، چىرايىنىڭ تېخىمۇ قىزىرىپ ئۆزگىرىۋاتقانلىقىنى بايقىغان. بۇ شۇنىڭ ئۈچۈنكى، نەرسە چاينىغاندا چىش چوڭراق كۈچ سەرپ قىلىدۇ، نەتىجىدە چايناش مۇسكۇلى جىددىي ھالدا قىسقىرايدۇ، يۈز مۇسكۇللىرىمۇ جىددىي ھالدا ھەرىكەتلىنىدۇ. نەتىجىدە بۇ ئورۇنلاردىكى مۇسكۇللار چېنىقىپ، مۇسكۇل تالالىرى توملىشىپ، تەرەققىي قىلىدۇ – دە، ئادەمنىڭ يۈزى بارغانسېرى تولغان ھالەتكە كېلىدۇ، يۈز تېرىسىمۇ چىڭىيىدۇ. شۇنىڭ بىلەن بىللە، دائىم سېغىز چايناپ بەرسە قاننىڭ ئايلىنىشى ئىلگىرى سۈرۈلىدۇ. قاننىڭ ئايلىنىشى كۆپەيسە، تېرىنىڭ ئوزۇقلۇق بىلەن تەمىنلىنىشىمۇ تەبىئىي ھالدا ياخشىلىنىدۇ – دە، ئادەمنىڭ چىرايى بارغانسېرى قىزىرىپ، روھلۇق كۆرۈنىدۇ. سېغىز چايناپ بېرىش ئارقىلىق ئورۇقلىغىلى بولىدۇ       ئەنگلىيىدە ئېلان قىلىنغان بىر تۈرلۈك تەتقىقات دوكلاتىدا سېغىز چايناش بىلەن ئادەم بەدىنىنىڭ ئېنېرگىيە سەرپىيات مۇناسىۋىتى ھېسابلاپ چىقىلغان. ئۇنىڭدا ئادەم بىر سائەت سېغىز چاينىسا، 11 كالورىيە ئىسسىقلىق خورايدۇ، دەپ كۆرسىتىلگەن. بۇ سان قارىماققا ئانچە كۆپ بىلىنمەسلىكى مۇمكىن، ئەمما كۈن بويى سېغىز چاينايدىغان كىشىلەرگە نىسبەتەن ئېيتقاندا، ئۇلار ھىچقانداق ئىش قىلمىسىمۇ ئورۇقلاپ، بەدىنىدىكى 11 قاداق گۆشنى يوقىتالايدۇ.        سېغىزنىڭ يۇقىرىقىدەك سالامەتلىككە پايدىلىق تەرەپلىرى بولسىمۇ، لېكىن ئۇنىڭ بەزى پايدىسىز تەرەپلىرىمۇ بار. سېغىزنىڭ پايدىلىق رولىنى تېخىمۇ ئوبدان جارى قىلدۇرۇش ئۈچۈن، سېغىز چايناشتا تۆۋەندىكى بىر قانچە نۇقتىغا دىققەت قىلىش لازىم:       1. تۆۋەن شېكەرلىك، شېكەرسىز سېغىزلارنى تاللاپ، بەدەنگە قوبۇل قىلىنىدىغان ئىسسىقلىقنىڭ زىيادە كۆپ بولۇپ كېتىشى ۋە چىشنى قۇرت يېيىشتىن ساقلىنىش كېرەك.       2. تەركىبىدە سىماپ بار ماتېرىياللاردىن پايدىلىنىپ چىشنى زاماسكىلاتقان كىشىلەر ئەڭ ياخشىسى سېغىز چاينىماسلىقى لازىم، بولمىسا زاماسكا تەركىبىدىكى سىماپ ئاجرىلىپ چىقىپ سالامەتلىككە زىيان يەتكۈزىدۇ.       3. كۈتۈلمىگەن ئەھۋال يۈز بېرىشتىن ساقلىنىش ئۈچۈن، ئەڭ ياخشىسى، كىچىك بالىلارغا سېغىز چايناتقۇزماسلىق كېرەك.      4. سېغىز چايناش ۋاقتى ھەر قېتىمدا 20 مىنۇتتىن ئېشىپ كەتمەسلىكى لازىم.  مەنبە: ئۆز ماكان مۇنبىرى

huxbuy365

	سېغىز چايناشنى توختىتىپ قويغانتىم داۋاملاشتۇرىۋاسام بولغۇدەك. ھەممە ئادەم زىيانلىق دەپ....

qolpan

	مەنمۇ  سېغىز توغرىسىدا بەزى گەپلەرنى ئاڭلىغاندىن كېيىن چاينىماس بولغانتىم ، ئۇنىڭ ئۈستىگە قىزلارنىڭ ماكاشلاپ ھەتتا ئاممىۋى سورۇنلاردىمۇ سېغىز چاينىغىنىنى كۆرسەم  كۆزۈمگە بىر قىسمىلا كۆرۈنەتتى ..... شۇڭا پەقەت چاينىمايتىم  ، بىراق بۇنىڭ  پايدىسى كۆپكەن ئەمەسمۇ  ، ئادەم يوق يەردە بولسىمۇ چايناپ قۇيارمەن بولمىسا .........

gulseri

	مەن سىغىزغا بەك ئامراقتىم ،،،،،،،ئەپسۇس،

yiganagul-2

	ۋاي خۇدايىم ،  ئەمىسە ئورۇقلاپ كىتىدىغان ئىش بولسا مەن چاينىمىسام بولغىدەك  . مۇشۇ تاپتا  ، ئورۇقلاپ جان ئاران قالغان تۇرسا ، توۋا خۇدايىم ، ئورۇقلىتىدۇ دەڭ تېخى .

gvzal3.8

	مېنىڭ سومكامدىن، يانچۇقۇمدىن، تارتمامدىن زادىلا سېغىز ئۈزۈلمەيدۇ، سېغىز چاينىمىسام خۇددىي بىر نەرسىنى  يۈتتۈرۈپ قويغاندەك، ئۇياق-بۇياققا قاراپ قاتتىق بىئارام بولىمەن    بىراق، ئاممىۋىي سورۇندا، كوچىدا ئاغزىمنى يۇمۇپ ماڭىمەن، ئىمكان بار چاينىمايمەن [s:2]

narazi

	چاينىغانلار چوقۇم ئاممىۋى سورۇندا چاينىمىغان ياخشى ئادەمنىڭ كۆزىگە غەلىتە كۆرۈنىدىكەن

tiwip

	بەزى ئاياللار باركى ، ئەرخەق بار ئاممىۋى سورۇندا ، ئاغزىنى كالاچتەك كىرىپ، "ھوڭگۇل"چىشلىرىنى چىقىرىپ، "چاس-چاس"قىلىپ چايناپ كىتىشلىرى بار. بۇنداقلارنى كۆسەم  دۆدىن قوققاندەك قاچىمەن !

rayhan

	بۇ 7قەۋەتتىكىtiwip يوللىغان 2011-03-22 13:57 غا قارتىلغان  :   بەزى ئاياللار باركى ، ئەرخەق بار ئاممىۋى سورۇندا ، ئاغزىنى كالاچتەك كىرىپ، "ھوڭگۇل"چىشلىرىنى چىقىرىپ، "چاس-چاس"قىلىپ چايناپ كىتىشلىرى بار. بۇنداقلارنى كۆسەم  دۆدىن قوققاندەك قاچىمەن ! ماۋۇ گەپ راس،يوللاردا ،سورۇنلاردا سېىغىز  چاينىسا باشقىلارغا ھەقىقەتەن غەلىتە تەسىر بېرىپ قويىدۇ.

ahu

	بۇ 5قەۋەتتىكىgvzal3.8 يوللىغان 2011-03-22 11:52 غا قارتىلغان  :   مېنىڭ سومكامدىن، يانچۇقۇمدىن، تارتمامدىن زادىلا سېغىز ئۈزۈلمەيدۇ، سېغىز چاينىمىسام خۇددىي بىر نەرسىنى  يۈتتۈرۈپ قويغاندەك، ئۇياق-بۇياققا قاراپ قاتتىق بىئارام بولىمەن    بىراق، ئاممىۋىي سورۇندا، كوچىدا ئاغزىمنى يۇمۇپ ماڭىمەن، ئىمكان بار چاينىمايمەن [s:2] سېغىزغا خۇمار بولۇپ قاپسىز ئۇنداقتا.مەن ئۇزاق چاينىيالمايمەن،بېشىم ئاغرىپ كېتىدۇ.ئۇنىڭ ئۈستىگە 15مىنۇتتىن ئۇزاق چاينسىا ئادەم دۆت بولۇپ قالىدۇ دەپ ئۇقۇغان ئىدىم بىر ماتىرىيالدا.