پىراق(ئالىم ئىمىن تۇرسۇنغا مەرسىيە)

jivaa

	چىمەنگۈل ئاۋۇت  پىراق   (مەرھۇم ئىمىن تۇرسۇن بوۋامنىڭ ھۆرمىتىگە بېغىشلايمەن.)   قار يېغىۋاتىدۇ... مەن  بوۋامنىڭ ياشاڭغىرىغان كۆزلىرىگە قارىدىم. يىغلىغىنىمنى بىلىندۈرمەي دەپ بۇ غېرىپ ئۆينىڭ تاملىرىغا تۇمان بولۇپ تارىدىم... _ تۇيۇمدا كەيگەن تاشكەنت بۆكىنى، ياشلىقىمدىكى شىم كەمزۇلنى، كېچىدەك قارا يىپەك گالاستۇكۇمنى، ياقۇت كۆزلۈك قىسقۇچنى... سىز بىلەن توي قىلىدىغان، ئۆزىڭىز ياخشى كۆرىدىغان ھېلىقى يىگىتكە ئارمىغان قىلىمەن، سىلەر ئۇنى مەن قەدىرلىگەندەك قەدىرلەيسىلەر بۇنى بىلىمەن...   بوۋام توختىماي سۆزلەۋاتىدۇ، ئۆتكەن ئۆمرىدىن نېمىلەرنىدۇر ئىزدەۋاتىدۇ. چۆچەكلەردە. يېرىلىڭ تاشىم دېسە، تاشمۇ يېرىلاتتى. مانا مەن بۈگۈن  يېرىل يۈرىكىم دېدىم، يۈرىكىم يېرىلمىدى. مېنىڭ پەريادىم ئاپئاق قارغىمۇ بىلىنمىدى.   يۈكۈنۈپ تۇرۇپ ئۇنىڭ قوللىرىنى سىيلىدىم، بىزنىڭ تويىمىز بولىدىغان كۈننى قانچە سورىسىمۇ دېمىدىم. بىزنىڭ تويىمىز بولىدۇ، شۇ كۈنى قىسمەت بورىنى ئۆزىنى تاملارغا ئۇرىدۇ. ئۇ مېنىۋالغان رىيازەت دۇلدۇلى، سېلى بەرگەن مۇھەببەتنى يۈدۈپ كىشنەيدۇ. ئۇنىڭ كەڭ ئالقانلىرى، قەھىرلىك كۆزلىرى، مېھىرلىك سۆزلىرى، مېنى يىغىدىن توختىتىدۇ، شامال قايرىغان يېشىل رومىلىم، ئۇنىڭ ئېتىنى ئۈركىتىدۇ....   بىزنىىڭ تويىمىز بولىدۇ، بىزنىڭ ئۆيىمىز بولىدۇ، بىزنىڭ كەڭ ئېتىزىمىز بولىدۇ، بىزنىڭ كەڭ ئاسمىنىمىز بولىدۇ. ئۇ يېنىمدا ئولتۇرۇپ، يەنە ماڭا خەت يازىدۇ. بالىلىرىمىز يۈرىكىمىزنى قازىدۇ....   بوۋام كۆلۈمسىرىگىنىچە ئۇخلاپ قالدى، مەن ئىشىكنى ئاۋايلاپ يېپىپ چىقىپ كەتتىم. سېنى سېغىنغان يۈرىكىمنى باھار قالغاچلىرىغا دان ئەتتىم!   2011-2.28 ئۈرۈمچى

orkixi

	مەرھۇمنىڭ ياتقان يېرى جەننەتتە بولسۇن

نازى

	چىمەنگۈلنىڭ  قويۇق ھەسرەت پىراققا تولغان بۇ شېئىرى قەلبىمنى يەنە بىر قېتىم داۋالغۇتتى.

adem

	يەنە بىر تەۋەررۈك كىشىمىزدىن ئايرىلىپتۇق تە. ئاللاھ ئۇ كىشىگە رەھمەت قىلغاي

阿巴斯

	ئاللا مەرھۇمنىڭ ياتقان يىرىنى جەننەتتە قىلسۇن!

afiyfiy

	شېئىرنىڭ گۈزەللىكىنى يەنە بىر قېتىم ھېس قىلدىم.

tomoquk

	ياتقان يىرى جەننەتتە بولسۇن چىمەنگۈلنىڭ تەۋرەتكەن قەلىمنىڭ ئىزىدىن گۈل ئۈنسۈن!

yaz~quxi

	شېئىرنى ئوقۇپ قەلبىم زىلزىلىگە كەلدى... چەكسىز بىر مېھىر بىلەن يۇغۇرۇلۇپ كەتكەن تەگسىز مۇڭ - ھەسرەت يېيىلىپ تۇرغان مىسرالاردىن، يۇمشاققىنا سۆزلەر باغرىدا ئۇزاقلارغىچە ئەللەيلەندىم...

pariay

	مەرھۇمنىڭ ياتقان يىرى جەننەتتە بولغاي ! مەرھۇمغا ئاتاپ يېزىلغان بۇ شېئىرلار ئادەمنىڭ يۈرەك باغرىنى ئەزگۈسى ،،، چىمەنگۈلنىڭ قەلىمىگە بەرىكەت تىلەيمەن !

muellip

	بىز ئەلۋەتتە ئاللاھنىڭ ئىگىدارچىلىقىدىمىز،چوقۇم ئاللاھنىڭ دەرگاھىغا قايتىمىز!ھەر بىر جان ئۆلۈمنىڭ تەمىنى تېتىغۇچىدۇر! رەھمەتلىك ئىمىن تۇرسۇن ئەپەندى مەن ئەڭ ھۆرمەت قىلىدىغان ئالىملارنىڭ بىرى ئىدى.2008-يىلى 11-ئايدا مەكتىپىمىزگە ئىلمىي مۇھاكىمە يىغىنىغا قاتناشقىلى كەلگەندە يۈز تۇرانە كۆرۈشۈپ،پاراڭلىشىپ ئۇنىڭغا بولغان ھۆرمىتىم تېخىمۇ ئاشقان ھەم خاتىرە سۈرەتلەرگە چۈشكەن ئىدۇق.شۇ چاغنىڭ ئۆزىدە بوۋىمىز ھاسا تاياققا تايىنىپ ماڭىدىغان، كۆپرەك ھەرىكەت قىلسا نەپسى قىيىنلىشىدىغانلىقىغا قارىماستىن بىز بىلەن ھەمسۆھبەت بولۇپ،توختىماي سورالغان سوئاللارغا تىرىكمەستىن جاۋاب بەرگەن ئىدى... بۇ خەۋەرنى تۇيۇقسىز ئاڭلاپ كۆڭلۈم شۇنداق يېرىم بولدى.ئۇنىڭ بوۋىلارغا خاس ئىللىق  چىرايى،ئالىملارغا خاس سالاپىتى،ئېغىر_بېسىق مىجەزى،تەمكىنلىك بىلەن سۆزلەشلىرىنى ئۆمۈر بويى ئۇنۇتمايمەن.ئاللاھ ئۇ كىشىنىڭ بۇ دۇنيادا بىلىپ_ بىلمەي قىلغان گۇناھلىرىنى مەغپىرەت قىلغاي! ئاخىرەتلىكىنى ئاسان قىلغاي!ئالىم بوۋىمىزنىڭ روھى نۇرلار ئىچىدە ياتقاي! ئۇنىڭغا دۇئا قىلىپ تۇرايلى قېرىنداشلار!