مۇھەببەتكە دەپنە قىلىنغان ئاياللار

suzuk

	سېنىڭ جېنىڭ مېنىڭ جېنىم بىر جان ئەمەسمۇ، سېنىڭ ئۈچۈن مېنىڭ جېنىم قۇربان ئەمەسمۇ..... ئەمىلىيەتتە جېنىنى قۇربان قىلىدىغانلارنىڭ كۆپىنچىسى ئاياللار.  ئاياللار مۇھەببەتتە ئەرلەردىن باتۇر. ئۇلارنىڭ مۇھەببەت-نەپرىتى ئېنىق، مۇھەببەتنى ھاياتلىق دەپ بىلىپ، ھەتتا جېنىنى پىدا قىلىشتىنمۇ يانمايدۇ. بىراق مۇھەببەت تولىمۇ ئاجىز، يەنە كېلىپ ناھايىتى ئۆزگىرىشچان، ئوخشىمىغان مەزگىلدە مۇھەببەتمۇ توختاۋسىز ئۆزگىرىپ تۇرغان بولىدۇ. مەڭگۈلۈك مۇھەببەت مەۋجۇت ئەمەس، مانا بۇ مۇھەببەتنىڭ ماھىيتى. ئىنساننىڭ تەبىئىتى. ئىككى ئادەم قانچىلىك قىزغىن مۇھەببەتلەشكەن بولىشىدىن قەتئىينەزەر، ھامان بىر كۈنى سوۋۇيدۇ. بۇ نۇرغۇن ئاياللار ئېتىراپ قىلىشنى خالىمايدىغان رەھىمسىز رېئاللىقتۇر. تولىستوينىڭ قەلىمىدىكى ئاننا ئاشنىسى ئۈچۈن ئېرى ۋە بالىسىدىن ۋاز كېچىدۇ، نام ئابرويى تۆكىلىپ، موسىكۋادا ئادەم كۆرمەيدىغان كۈننى كۆرىدۇ. ئۇ بارلىق ھېسياتىنى ۋرونىسكىيغا جەملەيدۇ. ۋرونىسكىيچۇ؟ ئۇمۇ ئاننا ئۈچۈن كۆپ قۇربانلىقلارنى بېرىدۇ، ئاننانى دەپ ئاپىسىدىنمۇ يۈز ئۆرۈيدۇ. ئاننا ئۆزلىرىنىڭ مۇشۇ جاپالاردا ئېرىشكەن مۇھەببەتتىنى مەڭگۈلۈك بولىدۇ دەپ ئىشەنگەن، تاتلىق بەختىمنى تاپتىم دەپ ئىشەنگەن. ئەمما ئۇ ھەرقانچە ئۇلۇغ مۇھەببەتنىڭمۇ سوۋۇيدىغانلىقىنى پەقەت ئويلاپ يېتەلمىگەن. مۇھەببەت سوۋۇغاندا ۋرونىسكىي ئاپىسى بىلەن يارىشىپ قالىدۇ. ئاننا ۋرونىسكىينىڭ ئۆزىگە قىلغان سوغۇق مۇئامىلىسىگە چىدىماي، چېچىلاڭغۇ، گۇمانخور، تېرىككەك بولۇپ قالىدۇ.  "ماڭا مۇھەببەت كېرەك، بىراق مۇھەببەت قالمىدى، ئەمدى ھەممە نەرسە تۈگەشتى" . ئاننا ئۆلۈم بىلەن ۋرونىسكىينىڭ مۇھەببىتىنى قايتۇرۇپ كەلمەكچى، ئۇنى جازالىماقچى بولىدۇ. ئۆزى ئۆلگەندىن كېيىن ۋرونىسكىينىڭ قانچىلىك ئازاپلىنىدىغانلىقىنى، ئۆزىنى ۋە مۇھەببىتىنى قانچىلىك پۇشايمان، ئۆكۈنۈش ئىچىدە ئەسلەيدىغانلىقىنى تەسەۋۋۇر قىلىپ، ئاخىرى ۋرونىسكىي بىلەن تۇنجى كۆرۈشكەن جايدا، ئۆزىنى رېلىسقا ئېتىپ ئۆلىۋالىدۇ. مەڭگۈلۈك مۇھەببەت مەۋجۇتمۇ؟ بەلكىم مەۋجۇت بولىشى مۈمكىن، بىراق چوقۇم ناھايىتى ئاز ئۇچرايدۇ. مۇھەببەتنىڭ سوۋۇشى ئۇنىڭ قىسمىتىدۇر. مۇھەببەت گويا دېڭىز دولقۇنىغا ئوخشايدۇ. غۇلاچلاپ كۆتۈرۈلگەن دولقۇن، مۇھەببەتنىڭ دەسلەپكى مەزگىللىرىدۇر. قەدىمكىلەر مۇھەببەتتىكى قىزغىن ھېسياتقا ئىشەنمىگەن. لەيلىنىڭ گۈزەللىكىنى بىلەن دېسەڭ مەجنۇننىڭ كۆزى بىلەن قارا. دېمەك لەيلىنىڭ گۈزەللىكى پەقەت "مەجنۇن" بولغاندىلا مەۋجۇت. مۇھەببەت سوۋۇغاندا مەيلى سىز ھۆر پەرىلەردەك گۈزەل بولۇڭ، ئۇمۇ كۆرۈپ زېرىككەن بولىدۇ. مۇھەببەت پات پات سوغۇق شاماللارنىڭ ھۇجۇمىغا ئۇچراپ تۇرىدۇ، بۇلارنىڭ ئىچىدە پۇلنىڭ شامىلى ھەممىدىن كۈچلۈك بولۇپ، مۇھەببەتنى يىلتىزىدىن قومۇرۋېتەلەيدۇ. ئەرلەرنىڭ بۇ جەھەتتىكى ئىپادىسى تېخىمۇ شەخسىيەتچى ۋە رەھىمسىزدۇر.  فىرانسىيىلىك داڭلىق يازغۇچى سېتىندالنىڭ قەلىمىدىكى بوۋارى خانىم ئاشنىسىنىڭ كۆڭلىنى ئېلىش ئۈچۈن، رومانتىك كەيپىيات يارىتىش، ھەشەمەتلىك تۇرمۇشنى داۋاملاشتۇرۇش ئۈچۈن ئېرىنىڭ مال دۇنياسىنى بۇزۇپ چېچىپ خەجلىگەن ئازدەك يۇقىرى ئۆسۈملۈك قەرز ئالىدۇ. كېيىن جازانىخورلار قەرز قىستاپ كەلگەندە، ئامالسىزلىقتىن غەيرەتكە كېلىپ ئىلگىرى كېيىن بولۇپ ئىككى ئاشنىسىدن ياردەم سورىغاندا ھەرئىككىسىنىڭ رەت قىلىشىغا ئۇچرايدۇ. مۇقىم كىرىمى بار، كىشىلىك مۇناسىۋەتكىمۇ ماھىر بولغان كاتىپ ئاشنىسى بوۋارى خانىمدىن تېزرەك قۇتۇلۇش ئۈچۈن، قايتىپ خەۋىرىنى كۈتۈشنى ئېيتىپ قويۇپ، ئاخىرى سۇغا چۈشكەن تاشتەك جىم بولىۋالىدۇ. يەنە بىر قورۇقى، ئورمانلىرى بار بولغان باي ئاشنىسى بولسا، سوغۇققانلىق بىلەن ئوچۇق قىلىپلا " مەندە بۇنىڭغا بېرىدىغان پۇل يوق" دەيدۇ. مانا مۇشۇ ئادەم تېخى بىر مىنۇتنىڭ ئالدىدىلا بوۋارى خانىمنى مەڭگۈ سۆيىدىغانلىقىنى ئېيتقان ئادەم بولۇپ، پۇلغا كەلگەندە قىزغىن مۇھەببىتىدىن ئەسەرمۇ قالمايدۇ. بوۋارى خانىم ئۆزىنى قاتتىق ھاقارەتلەنگەندەك ھېس قىلىدۇ. ھېسياتچان يۈرىكى پارە پارە بولۇپ، ھەممىدىن رايى قايتىپ ئاخىر زەھەر يەپ ئۆلىۋالىدۇ. زەھەر قوزغىلىپ، بوۋارى خانىم ئازاپ بىلەن جان بېرىۋاتقاندا ئاشنىلىرى ھېچ ئىش بولمىغان ئۆيلىرىدە خاتىرجەم ئۇيقۇسىنى ئۇخلايدۇ.  ھەي ئېچىنارلىق ئاياللار.... رېئاللىققا قايتىپ كېلەيلى، مۇھەببەت ئىشەنچلىكمۇ؟ مۇھەببەتلەشكەن ھېسيات ئاجايىپ شېرىن بولىدۇ، بىراق بۇ خىل سېزىم ھامان ئاخىرلىشىدۇ. مۇھەببەتنىڭ سوۋۇشى ئۇنىڭ بىردىبىر نەتىجىسىدۇر. شۇڭا پەقەت مۇھەببەت بولسىلا يېتەرلىك ئەمەس. شۇنداقلا مۇھەببەت بەختنىڭ بىردىنبىر شەرتى ئەەمس. مۇھەببەت ئىككى ئادەمنىڭ بىرلىشىشىلا ئەمەس، ئۇنى يەنە بىرلىكتە يېتىشتۇرۈش، قۇرۇش، قوغداش كېرەك. مۇھەببەت ئۈچۈن ھەرقانداق ئىشنى قىلىشتىن يانماسلىق، ھەرقانداق بەدەل تۆلەشتىن يانماسلىق قارشى تەرەپنىلا ئەمەس، ئۆزىنىمۇ ۋەيران قىلىدۇ. مۇھەببەت بىر خىل مەۋھۇم بەخت. بۇنداق بەخت تۇرمۇشتىكى ئۇششاق چۈششەك ئىشلارنىڭ ئۇزۇن مۇددەتلىك زەربىسىگىمۇ بەرداشلىق بېرەلمەيدۇ. ئەگەر ئەر ئايال ئىناق ئۆتمەكچى بولسا چوقۇم قارشى تەرەپكە تەپەككۇر ئەركىنلىكى، ھېسيات ئەركىنلىكى ۋە ھەرىكەت ئەركىنلىكى بېرىشى كېرەك. تېخىمۇ مۇھىمى ئۆزىنى ھۆرمەتلەش، ئۆزىنى سۆيۈش، چىداملىق بولىشى، مۇھەببەتتە ئۆزىنى يوقىتىپ قويماسلىقى، مۇھەببەتنى دەپ تىراگىدىيىگە ئايلانماسلىقى كېرەك. مۇھەببەتتە ئۆزىنى دەپنە قىلغان ئاياللارغا شۇنى ئېيتقۇم كېلىدۇ " ھەي ئايال، ئاۋال ئۆزۈڭنى سۆيگىن، ئاندىن ئۆزگىنى!" تەرجىمە قىلىندى.

taranqi

	مۇشۇنداق ئېسىل تەرجىمە  تەرمىلەر بولسا داۋاملىق يوللاپ تۇرارسىز ...

sarwinaz

	ئۆزىنى قەدىرلىمىگەن ئادەم باشقىلارنىڭ قەدىرلىشىگە ئېرىشەلمەيدۇ.

arkiya

	راست دەيسىز ، مېنىڭ ئەتراپىمدىمۇ ئەنە شۇنداق <مۇھەببەتكە دەپنە قىلىنغان ئاياللار> مەۋجۇت ... ئۇلار ئۆز سۆيگىنى تەرىپىدىن ھەرقانچە خورلۇققا ئۇچراپ ، دەپسەندە قىلىنسىمۇ ، ئۇنىڭدىن ئايرىلىپ قېلىشنى خالىماي ، خۇددى كوچىدىكى ئىگىسى باغلاپ قاياققا ئېلىپ ماڭسا كەينىدىن ماڭىدىغان كۈچۈكلەردەك تۇرمۇش كەچۈرىۋاتىدۇ . بەزىدە ئۇلارغا قاراپ شۇنداق ئىچىم ئاچچىق بولىدۇ . مۇھەببەت ئادەمنىڭ كۆزىنى كور ، قۇلىقىنى پاڭ قىلىپ قويامدۇ ، بىلمىدىم ؟ ئۇلارغا شۇنچە قىلغان نەسىھەتلىرىڭىزمۇ قۇلىقىغا كىرمەيدىكەن ... بۇ تېمىنى بەك ياخشى يوللاپسىز ، بولسا ئەنە شۇنداق قىز - ئاياللىرىمىز كاللىسىنى بىر سىلكىۋېتىپ ، ئۆزىنى سۆيۈشنى ئۆگىنىۋالسا ئەجەپ ئەمەس ...

rayhan

	توغرا،بۇ ئىنسانلارنىڭ بىردىنبىر ئاجىزلىقى ،بولۇپمۇ ئاۋۋال ئىنتىلىدۇ،ئاندىن ئېرىشىدۇ،ئەڭ ئاخىرىدا تاشلايدۇ.ئۇنىڭدىن كۆرە ئىككىنچى باسقۇچقا ئۆتكىچىلا توختاپ قېلىپ كۆڭلىدە مۇھەببەتنى چىن يۈرىكى بىلەن تونۇپ ئۇنى كۆڭلىدە قەدىرلەپ ئۆتسىلا بولدى،ئۇنى ئەمەلىيەتتە ئىپادىلەيمەن دەپ جاندىن كېچىش ئاقىلانىلىك ئەمەس بۇ ھەم رېئال تۇرمۇشقا لاھىق كەلمەيدۇ؛

0998bahar

	ئاياللار ئۈچۈن ئۆز سۆيگىنى ۋە ئەقىدە قىلغان ئادىمى تەرىپىدىن  ئالدىنىش ۋە  ئەخماق قىلىنىشتىن ئارتۇق ئازاپ بولمىسا كېرەك لېكىن،  تۇرمۇش ئادەمنىڭ ھىسسىياتىغا، ئىرادىسىگە باقمايدۇ، ئۆزى ئۈچۈن ئەمەس، ئەتراپىدىكىلەر ۋە ئائىلىسىدىكىلەرنىڭ بەختى ۋە خاتىرجەملىكى ئۈچۈن  بەزىدە  ئارقىيە ئېيتقاندەك  تاياققا ماڭغان كۈچۈكلەرگە ئوخشاپ قالىدىغان ۋاقىتلار مەۋجۇت بولىشى مۈمكىن.   ھىسسىيات  جۈملىسىدىن ئەمەس ئەقىل  تەرىپىدىن ئويلىساق بۇنداق ئاياللار ئەڭ ھۆرمەتكە سازاۋەر،  شۇنداقلا ئۆز غۇرۇرى بەدىلىگە نۇرغۇن  ئەھمىيەتلىك   نەتىجىلەرنى روياپقا چىقارغانلار بولىدۇ.

مۇبارەك

	شۇڭا چىن رېئال تۇرمۇش ۋەقەلىرى سۆزلەنگەن يازمىلاردىكى ئەقىللىق ئاياللار ئوبرازىنى ياقتۇرىمەن، ئەلۋەتتە ئەمىلىيەتتىمۇ ھەم شۇنداق. مۇھەببەتكە ھەرخىل تەبىر بېرىپ باقتۇق. كىمدۇر بىرى ‹ مۇھەببەت ئۇ بەك قىسقا، خۇددى بىرخىل چىش ئاغرىقىدەك...› دەپرەك شېئىر يېزىپتىكەن. مەيلى ئايال ياكى ئەر بولسۇن مۇھەببەت ئۈچۈن يولىدا قۇربانلىق بېرەلىشى كېرەك. يازمىدا ئاساسلىق ئاياللار ھەققىدە سۆزلەنگەن ئىكەن. ئاياللار ئاجىز كېلىدۇ، خۇددى دەپ ئۆتۈلگەندەك بەزىلىرى رېئاللىققا يۈزلەنمەمدۇ ياكى ئەقىل كۆزى توسۇلۇپ قالغانمۇ...ئىشقىلىپ تولا چاغلاردا ئەرزىمەس كىشىلەر ئۈچۈن بىكاردىن-بىكار ئۆز قەدرىنى چۈشۈرۈپ، تولىمۇ بىچارە ھالەتكە كېلىپ قالىدۇ. بۇنداق شارائىتتا مۇھەببەتنىڭ نە كۇرسى؟! ئۇنىڭ ئۈچۈن بېرىلگەن قۇربانلىقنىڭ نە قىممىتى؟!... ئىملاسى توغرا، ياخشى تەرجىمە قىلىنغان تېما. تەرجىمە ئىگىسىگە رەھمەت.

jiuxing

	ئەرلەردىنمۇ تېما يوللايدىغانلار يوقمۇ

tanhabayawan

	مۇشۇنداق ئېسىل تەرجىمە  تەرمىلەر بولسا داۋاملىق يوللاپ تۇرارسىز ...

qinar

	ئەرلەر ئەقىل تىپىغا،ئاياللار ھىسىيات تىپىغا مەنسۇپ.شۇڭا ئاياللار ھىسىياتنى بەك مۇھىم بىلىدۇ.مىنىڭچە ھەقىقى مۇھەببەت بار، بىراق مەڭگۈلۈك بولىشى ناتايىن.مۇھەببەت پەرۋىشكە مۇھتاج.قىز ئاياللارنىڭ مۇھەببەتنى پەرۋىش قىلىپ مول مىۋىلەرگە ئىرىشىشنى،ھىسىياتنىڭ قۇربانىغا ئايلىنىپ كەتمەسلىكىنى ،ئۆزىنىمۇ قەدىرلەشنى ئۇەۇنىۋېلىشىنى ئۈمۈت قىلىمەن.