ئائىلە تەربىيىسى ھەققىدە

zakira

  ئەسسالامۇ ئەلەيكۇم ! يېڭى يىلىڭلارغا مۇبارەك بولسۇن !
      

                     ئائىلە تەربىيىسى ھەققىدە ئۇمومى چۈشەنچە
     ئائىلە تەربىيىسى پۈتكۈل خەلق مائارىپى سېستىما قۇرۇلمىسىنىڭ مۇھىم تەشكىلىي قىسمى بولۇپ ، ياش-ئۆسمۈرلەرنى ساغلام ئۆسۈپ يېتىلدۈرىدىغان مۇھىم ھالقا . ئۇ ، ئۆزىگە خاس رولغا ۋە ئالاھىدىلىككە ئىگە . شۇڭا ئۇنى مەكتەپ تەربىيىسىنىڭ ئورنىغا دەسسىتىشكە بولمايدۇ .
      ئەمەلىي تۇرمۇشتا بەزى بالىلارنىڭ تەپەككۇرى جانلىق ، بەزى بالىلارنىڭ قاشاڭ كېلىدۇ ؛ بەزىلىرى ئەدەپلىك بولسا، بەزىلىرى ئەدەپسىز كېلىدۇ ؛ بەزى بالىلار  ئەقىل جەھەتتە ئۆزگىچە بولسا ، بەزى بالىلار ئادەتتىكىچە بولىدۇ . مانا بۇلارنىڭ ھەممىسى ئائىلە تەربىيىسى بىلەن مۇناسىۋەتلىك بولغان بولىدۇ . لېكى يەنە بەزى ئاتا- ئانىلار ئائىلە تەربىيىسىنى قارغۇلارچە ئېلىپ بارىدۇ  . بەزى ئاتا -ئانىلار بالىمىز < ئەقىللىق > بالا بولدى دەپ قاراپ ، ئۆز -ئۆزىدىن پەخىرلىنىدۇ ، يەنە بەزىلىرى  بالىسىنىڭ ئۆگۈنىشتە ناچارلىقىنى كۆرۈپ ، بالىمىز < يارىماس > بالا بولىدىغان  بولدى ، دەپ كۆڭلىنى يېرىم قىلىدۇ ؛ يەنە بەزى ئاتا -ئانىلار  < دەرەخ يوغىنىسا تۈزلىندۇ ، بالا چوڭ بولغانسېرى ياخشى ئادەم بولىدۇ > دەپ قاراپ ، بالىسىنى كېچىكىدىن باشلاپ ئەتىراپلىق تەربىيەلەشكە سەل قارايدۇ ياكى بولىشىغا قويىۋېتىدۇ ؛ يەنە بەزى ئاتا -ئانىلار ئائىلە تەربىيىسىدە ئۇرۇپ تىللاشنى بالا تەربىيەلەشنىڭ ۋاستىسى قىلىۋالىدۇ ۋە باشقىلار . مانا بۇلار ئاتا - ئانىلارنىڭ بالىسىغا قويغان تەلەپلىرىنىڭ ھەر خىل ئىكەنلىكىنى تۇلۇق چۈشەندۈرۈپ بېرىدۇ . ئەمەليەت شۇنى ئىسپاتلىدىكى ، تەربىيە ئۇسولى ئوخشاش بولمىسا ، تەربىيىنىڭ ئۈنىمى روشەن ھالدا پەرىقلىنىدۇ . شۇڭا ئائىلە تەربىيىسىنى مائارىپ تەربىيىسى سۈپىتىدە تۇتۇپ تەتقىق قىلىنىۋاتىدۇ . كۆپلىگەن ئاتا - ئانىلار پىداگوگىكا ، پسخولوگىيە، فىزئولوگىيە ، ئىقساسشۇناسلىق قاتارلىق پەنلەر ھەققىدىكى  بىلىملەرنى ئىلىمىزنىڭ ئائىلە تەربىيىسى ۋە ياش - ئۆسمۈرلەرنىڭ ئەمەليىتى بىلەن زىچ بىرلەشتۈرۈپ ئۆگىنىۋاتىدۇ ھەم تەتقىق قىلىۋاتىدۇ . جۈملىدىن ئاپتونۇم  رايونىمىزدىمۇ ئائىلە تەربىيىسى تۈزۈملىنىشكە ، ئىلمىيلىشىشكە قاراپ تەرەقىي قىلىۋاتىدۇ .
        ئائىلە تەربىيىسى دېگەن نىمە ؟
         ئائىلە - جەمىيەتنىڭ ھۈجەيرىسى . ئۇ نىكاھ ۋە قانداشلىق مۇناسىۋىتىنى ئاساس قىلىپ ، ئاتا -ئانا ۋە پەرزەنتلەردىن تەشكىل تاپقان جەمىيەتنىڭ ئەڭ كىچىك ئاساسىي قاتلام تەشكىلى . ئائىلە تەربىيىسى  ئاتا- ئانا ياكى باشقا يېشى چوڭلار تەرىپىدىن مۇئەييەن ئىجتىمائىي تەلەپكە ، سۆز -ئەمەليىتىنى ياكى باشقا تەرنىيە  شەكلىنى ، ئۇسولى ئارقىلىق پەرزەنتلەرگە بېرىدىغان مۇئەييەن تەربىيە تەسىرىنى كۆرسىتىدۇ .
        كىشىلەر ئەمەليەت جەريانىدا ، ئائىلە تەربىيىسىنىڭ مۇھىملىقىنى خېلى بۇرۇنلا تونۇپ يەتكەنىدى . جۇڭگونىڭ قەدىمقى دەۋرىدىلا < مىڭ زىنىڭ ئانىسىنىڭ قوشنا تاللىشى > < يۆفىينىڭ ئانىسىنىڭ خەت ئويۇنى > قاتارلىق ھېكايىلەر ۋە  < يەن جەمەتىنىڭ ئائىە نەسىھەتلىرى > < نەي گونىڭ ئائىلە تەربىيىسى > قاتارلىق ئائىلە تەربىيىسىگە ئائىت ھۆججەتلەر بولغان . يېقىنقى ۋە ھازىرقى زاماندا بولسا ، نۇرغۇن ئاتاقلىق پىداگوكلار  ئۆزلىرىنىڭ ئەسەرلىرىدە ئائىلە تەربىيىسىنىڭ بالىلارنىڭ جىسمانى ۋە پسخىك جەھەتتە تەرەقىي قىلىشىدىكى مۇھىم رولىنى تەكىتلىگەن ، مەسىلەن ، چىڭ سۇلالىسىنىڭ دەسلەپكى مەزگىللىرىدىكى  ئالىم لۇشىيى ؛< پەرزەنتلەرگە ، بىرىنچىدىن ئائىلە بويىچە كۈچ چىقىرىش ، ئىككىنچىدىن ئۇستاز تاللاشتا كۈچ سەرىپ قىلىش . ناۋادا ئائىلە بويىچە كۈچ چىقارمىغاندا ، پەرزەنت بالا ۋاقتىدىن باشلاپلا ئۆزى خالىغانچە بولىۋېلىپ ، ياخشى -ياماننى پەرق ئەتمەيدىغان بولىۋالىدۇ . ئۇنى قانداق قىلغان بىلەنمۇ توغرا يولغا سالغىلى بولمايدۇ . ئۇستاز ياخشى بولغان ھالەتتىمۇ  ئامالسىز قالىدۇ .> دەپ قارىغان . ئۇ ، ئائىلە تەربىيىسىنىڭ دەسلەپكى مەزگىللىك تەسىرى بالىلارنىڭ كېيىنكى ئۆسۈپ يېتىلىشىدە مۇھىم ئاساس بولىدىغانلىقىنى كونكىرىت كۆرسىتىپ بەرگەن .
       ئائىلە تەربىيىسىنىڭ بالىلارنىڭ تەرەقىي قىلىشىدىكى رولى قانداق ؟
        بالىلار مەكتەپكە كىرگەندىن كېيىن مەكتەپنىڭ مەقسەتلىك ، سېستىمىلىق تەربىيىسىنى قوبۇل قىلسىمۇ ۋە تەربىيە ئۇلارنىڭ ئۆسۈپ يېتىلىشىدە يېتەكچى رول ئوينىسىمۇ ، ئەمما ئۇلارنىڭ ئۆسۈپ يېتىلىشى يەنىلا ئائىلە تەربىيىسىدىن ئايرىلالمايدۇ . ئائىلە تەربىيىسى بالىلارنىڭ تەرەقىياتىدا ئىنتايىن مۇھىم رول ئوينايدۇ .
       1- ئائىلە  ، بالىلار ئەڭ ئۇزۇن ياشايدىغان مۇھىت بولۇپ ، بالىلارنىڭ ئاتا -ئانىلىرى بىلەن ئۇچرىشىپ تۇرىدىغان ۋاقتىمۇ كۆپ بولىدۇ . شۇڭا بىر تەرەپتىن ، ئاتا -ئانىلارنىڭ ساپاسى ، تەربىيىلىنىشى ، ئەخلاق - پەزىلىتى ، سۆز -ھەركەتلىرى ، تۇرمۇش ئۇسولى ، تەربىيە بېرىش پوزىتسىيىسى قاتارلىقلارنىڭ ھەممىسى بالىلارغا مەقسەتلىك ياكى مەقسەتسىز تۈردە تەسىر  كۆرسىتىدۇ . ئۇزاق مۇددەتلىك قولاققا سىڭىپ كۆنۈپ  قېلىش ، بىلىندۈرمەي تەسىر كۆرسىتىشلەر بالىلارنىڭ ئەخلاق كۆز قارىشى ، ھەركەت مىزانى ھەمدە ئېسىل ئادەتلەرنىڭ شەكىللىنىشىگە مۇھىم تەسىر كۆرسىتىدۇ ؛ يەنە بىر تەرەپتىن بالىلارنىڭ ئىندىۋىدۇئال  ئالاھىدىلىكى ، ئەخلاق -پەزىلىتى ، ئۆگۈنىش ھالىتى ، قىزىقىشى ، ھەۋىسى ، تۇرمۇش ئادىتى قاتارلىقلار ئائىلىدە ئەڭ تۇلۇق ۋە تەبىئىي ھالدا ئۆز ئىپادىسىنى تاپىدۇ . ئائىلە باشلىقلىرى بۇلارغا ئىنتايىن كۆڭۈل بۆلىدۇ ، ھەم ناھايىتى سەزگۈرلۈك بىلەن مۇئامىلە قىلىدۇ . شۇنىڭ ئۈچۈن بالىلارنىڭ ھەر قايسى جەھەتتىكى ئەھۋاللىرىنى   ئىگىلىشىگە  ۋاقىت يار بېرىدۇ ھەمدە بالىلارنىڭ ئەمەليىتىدىن چىقىپ تۇرۇپ مۇۋاپىق يېتەكچىلىك قىلالايدۇ ۋە تەربىيە بېرەلەيدۇ .
      2- ئائىلە جەمىيەتنىڭ ئاساسىي بىرلىكى بولۇش سۈپىتىدە بالىلارنىڭ ئەڭ يېقىن ئىجتىمائىي تۇرمۇش كوللىكتىپىدىن ئىبارەت . ئاتا- ئانىلار بىلەن بالىلار ئوتتۇرسىدا قانداشلىق يېقىن مۇناسىۋەت بار ، بۇ خىل يېقىنلىق ئائىلىنىڭ ئالاھىدە بىر ئىجتىمائىي كوللىكتىپ بولىدىغانلىقىنى ، بۇ كوللىكتىپتا ئاتا - ئانىلار بالىلارنىڭ ئۆسۈپ يېتىلىشىگە ئىنتايىن زور دەرىجىدە كۆڭۈل بۆلىشى ۋە غەمخورلۇق قىلىشى لازاملىقى ، بۇ ، بالىلارنىڭ ئۆسۈپ يېتىلىشىدىكى مۇستەھلەم ئاساس ئىكەنلىكىنى بەلگىلىگەن . پىداگوگ ماكارىنكو بۇ ھەقتە توختىلىپ ؛< ئاتا -ئانىنىڭ مېھرىبانلىقى بولماي تۇرۇپ چوڭ قىلىنغان ئادەم ھامان قوسۇرسىز بولمايدۇ > دەپ كۆرسەتكەنىدى . ئاتا -ئانىنىڭ مېھرىبانلىقى كەمچىل بولغان بالىلار ئائىلىنىڭ ئىللىقلىقىنى ھېس قىلالمايدۇ - دە دائىم دېگۈدەك جىددىلىك ۋە غەمكىنلىك ئىچىدە ئۆتىدۇ . بۇ ئۇلارنىڭ نورمال تەرەقىي قىلىشىغا ئېغىر تەسىر يەتكۈزىدۇ . ئائىلىدىكى يېقىنلىق بالىلارنىڭ بولۇپمۇ يېشى كىچىك بالىلارنىڭ ئائىلىسىدىن كەلگەن تەربىيىنى ۋە تەسىرنى تېخىمۇ ئاسان قوبۇل قىلىدۇ .
     3- ئائىلە تەربىيىسى كەڭ مەزمونغا ئىگە بولۇپ ، ئۇنىڭ ھەرقانداق مەزمونى ، ئۆگۈنىش ،ئەخلاق ، سالامەتلىك ،ساقلىق ساقلاش ، بىخەتەرلىك ، ئەدەپ-قائىدە ، ئالاقىلىشىش ، قىزىقىش ، ھېسسىيات ، ئائىلە ئىشلىرى ۋە ئىستىقبال قاتارلىقلارنى ئۆز ئىچىگە ئالىدۇ . بۇ مەزمونلاردىن ئۈنۈملۈك پايدىللىنىش بالىلارنىڭ ئۆسۈپ يېتىلىشىگە ئىنتايىن پايدىلىق . بىزگە مەلۇمكى ، مەكتەپ ئوقۇغۇچىلارنى تەربىيىلەپ يىتىلدۈرۈش جەھەتتە يېتەكچىلىك رول ئوينايدۇ . ئەمما ئائىلىنىڭ ئەتىراپلىق ماسلىشىشى ، ھەر خىل تەلىم -تەربىيە  ئامىللىرىدىن ئۈنۈملۈك پايدىللىنىپ كەڭ تۈردە تەربىيە ئېلىپ بېرىش بولغاندىلا ، مەكتەپ تەربىيىسى ئەڭ ياخشى تەربىيە ئۈنۈمىنى قولغا كەلتۈرەلەيدۇ . مەسىلەن ؛ ئىتتىپاقلىق ، دوستلۇق ، كوللىكتىپنى قىزغىن سۆيۈش ، باشقىلارغا كۆڭۈل بۆلۈش ، ئەدەپلىك بولۇش ، ئىنتىزامغا رىئايە قىلىش ، ئەمگەكنى قىزغىن سۆيۈش ، ئاددى- ساددا ئىقساتچىل بولۇش ، تاپشۇرۇقلارنى ۋاقتىدا ئىشلەش ، ئەستايدىل ، ئىنچىكە بولۇش ، ئىشنى ياخشى  باشلاپ ، چىرايلىق ئاخىرلاشتۇرۇش ، تازىلىققا ئەھمىيەت بېرىش ، بەدەن چېنىقتۇرۇشنى قەتئىي داۋاملاشتۇرۇش قاتارلىقلار ئائىلىدە مەكتەپكە ماسلاشقان ھالدا ئېلىپ بېرىلسا بالىلار تەربىيىسىگە نىسبەتەن داۋاملاشتۇرۇش رولىنى ئوينايدۇ -دە تېخىمۇ ئەتراپلىق ، تېخىمۇ چوڭقۇر ، تېخىمۇ ئۈنۈملۈك بولىدۇ .
          يۇقىرىدىكىلەردىن شۇنى كۆرىۋېلىشقا بولىدىكى ، ئائىلە بالىلارنىڭ ئىجتىمائىيلىشىشىدا مۇھىم رول ئوينايدۇ . بۇ ، بالىلارغا ئىجتىمائىي ھەركەت ئۆلچىمىنى ئۆگۈتىش  ، ئەخلاق- پەزىلەت ، مىجەز -خۇلقىنى چېنىقتۇرۇش ، تۇرمۇش نىشانىغا يېتىكچىلىك قىلىش ، شەخسىي ئىرادە ۋە قىزىقىشنى شەكىللەندۈرۈش قاتارلىق تەرەپلەرنىمۇ ئۆز ئىچىگە ئالىدۇ . بۇ مەنىدىن ئېلىپ ئېيتقاندا ئائىلە تەربىيىسىنىڭ رولىغا سەل قاراشقا ۋە ئينىڭ ئورنىغا باشقا نەرسىنى دەسسىتىشكە بولمايدۇ . بۇ ، ھەرگىزمۇ ئائىلىلا بولىدىكەن ، ئۇ بالىلارنىڭ تەرەقىي قىلىشىدا ئاكتىپ رول ئوينايدۇ ، دېگەنلىك ئەمەس . ئەمەلىي تۇرمۇشتا ، ئائىلە تەربىيىسى بالىلارنىڭ ئۆسۈپ يېتىلىشىگە ئەاكىس تەسىر كۆرسىتىدىغان   ئەھۋاللارمۇ دائىم كۆرۈلۈپ تۇرىدۇ . شۇڭا ، ئائىلە تەربىيىسىنىڭ رولىنى جارى قىلدۇرۇش بىر مۇرەككەپ مەسىلە دەيمىز . ئۇ ئائىلىنىڭ مۇھىتى ، ئائىكە ئازالىرىنىڭ قۇرۇلمىسى ، ئاتا- ئانىلارنىڭ ساپاسى ، تەربىيىلەش پوزىتسىيىسى ، تەربىيە مەزمونى ، تەربىيە ئۇسولى  ۋە قويغان تەلەپلىرى ، ئائىلىنىڭ ئىقتىسادى ئەھۋالى قاتارلىقلار تەرىپىدىن بەلگىلىنىدۇ . شۇنىڭ ئۈچۈن ، ئائىلە تەربىيىسىگە تۇلۇق ئەھمىيەت بېرىپ ، ئۇنى بىر پەن سۈپىتىدە ئەتەراپلىق ھەم چوڭقۇر تەتقىق قىلىش ، ئائىلە تەربىيىسىنىڭ رولىنى تۇلۇق جارى قىلدۇرىشى لازىم .
                  مەنبە : < ئائىلە تەبىيىسى ئاساسىي بىلىملىرى > دېگەن كىتاپتىن
               داۋامى بار .....بارلىق ئاتا - ئانىلارنىڭ ھەم  ئاتا- ئانا بولغۇچىلارنىڭ كۆرۈشىنى تەۋسىيە قىلىمەن .

gvzal3.8

   مۇشۇ ئائىلە تەربىيىسى ھەققىدە سۆز چىققاندا، بىرىنچى بولۇپ  «بالا تەربىيىلەشكە ۋاقىت چىقىرالماسلىق ئەمەلىيەتتە ئادەم بولۇشقا ۋاقىت چىقىرالماسلىقتۇر»دېگەن ئەقلىيە سۆز ئېسىمگە كېلىدۇ( بۇ سۆزنى كىمنىڭ ئېيتقانلىقى ئېسىمدە قالماپتۇ).
   تۇرمۇشىمىزدا بىھۇدە كۆڭۈل ئاغرىقىدىن، بىھۇدە غەم-غۇسسىدىن خالىي بولىمىز دەيدىكەنمىز، پەرزەنتىمىزنى ئىنسابلىق، ئەخلاقلىق قىلىپ تەربىيىلىشىمىز كېرەككەن. مېنىڭ ئوغلۇمدىن كۈتىدىغان ئۈمىدىم بەك ئالىي ئارزۇ-ئۈمىدلەرمۇ ئەمەس، ئۇنى قانداقتۇر ئالىي بىلىم يۇرتلىرىدا ئەڭ ياخشى نەتىجە بىلەن ئوقۇسىكەن، ئېسىل خىزمەتلەرنى ئىشلىسىكەن... دېمەيمەن. مەن پەقەت ئوغلۇمنىڭ غۇرۇرلۇق، ۋىجدانلىق، ئىنسابلىق، راستچىل بولۇشىنى ئۈمىد قىلىمەن، مۇشۇ خىسلەتلەرنى ئۆزىدە يېتىلدۈرەلىسە(ئەلۋەتتە، بۇنىڭدا ئائىلە تەربىيىسى ئالاھىدە ئورۇندا تۇرىدۇ)، تۇرمۇش يولى داغدام بولىدۇ دەپ قارايمەن.

   ئاخىرىدا زەكىرەنىڭ ئەجرىگە رەھمەت ئېيتىش بىلەن بىرگە، ھەممىڭلارنىڭ يېڭى يىلدا  يېڭى نەتىجىلەرنى قولغا كەلتۈرۈشۈڭلارغا ۋە تۇرمۇشۇڭلارنىڭ خاتىرجەملىك ئىچىدە ئۆتۈشىگە تىلەكداشمەن.

pariay

زاكىرە خانىمنىڭ بۇ يوللانمىسى ئادەمنى چوڭقۇر ئويلاندۇرىدۇ ، ئائىلە تەربىيىسى ئائىلىدە بەكمۇ مۇھىم ، بالىلار كىلەچەكنىڭ ئۈمۈدلىرى ،  توغرا بولغان ئائىلە تەربىيىسىنىڭ رولى بالىلارنىڭ ئۆسۈپ يىتىلىشىگە ياراملىق ئادەم بۇلىشىغا تۈرتكە بولالايدۇ ؟ ۋاقىتنى ئۆتكۈزىۋەتسە مەڭگۈ ئورنىنى تولدۇرغىلى بولمايدۇ ؟    بەزى بالىلارغا قارايدىغان بولساق گەپ - سۆز  ئىش - ھەركەتلىرى شۇنداق ئەدەپلىك ، مۇلايىم كىمنىڭ بالىسىدۇ ، قانداق ئائىلىدە تەربىيە ئالغان بالىدۇ دەپ سالغۇسى كىلىدۇ ! بەزى بالىلارغا قارىسا قانداق ئەدەپسىز تەربىيلىگەن بالا بۇ دىگۈسى كىلىدۇ ! بالىلار ئۆزى بىر ئاق قەغەز___ ئائىلە تەربىيىسىنىڭ رولىنى تۇلۇق جارى قىلدۇرىشى لازىم . ئەجرىڭىزگە تەشەككۈر !

zakira

  ئائىلە تەربىيىسىنىڭ ئالاھىدىلىكى
   
                       خەلق مائارىپى ئائىلە تەربىيىسى مەكتەپ تەربىيىسى ۋە جەمىيەت تەربىيىسىنى ئۆز ئىچىگە ئالىدۇ . ئائىلە تەربىيىسى  خەلق مائارىپىنىڭ ئورگانىك پۈتۈنلىكىدىن ئىبارەت . ئائىلە تەربىيىسىنىڭ ئالاھىدىلىكلىرى  تۈۋەندىكى بىرقانچە  جەھەتلەردە ئىپادىلىنىدۇ .
      1-  ئائىلە تەربىيىسىدە قانداشلىق مۇناسىۋەت بولىدۇ
     بالىلار ئادەتتە ئائىلە ، مەكتەپ ،جەمىيەتتىن ئىبارەت چوڭ ئائىلىدە ياشايدۇ ، ھەمدە ئائىلە ، مەكتەپ ۋە جەمىيەتنىڭ تەسىرىنى قوبۇل قىلىدۇ . لېكىن ، ئاتا -ئانىنىڭ ھېسسىياتى، مەكتەپ تەربىيىسى ، جەمىيەتنىڭ غەمخورلىقى خارەكتېر جەھەتتىن  بىر - بىرىگە ئوخشىمايدۇ . ئاتا- ئانا  بىلەن پەرزەنتنىڭ مۇناسىۋىتى ئادەتتىكى مۇناسىۋەت بولماستىن ، بەلكى ، نىكاھ مۇناسىۋىتى ئارقىلىق پەيدا بولغان قانداشلىق مۇناسىۋەتتۇر . ئاتا - ئانىلار پەرزەنتلىرىنى تەربىيىلەش جەريانىدا ناھايىتى زور بەدەل تۆلەيدۇ ، ئۇلارغا غەمخورلۇق قىلىدۇ ۋە ئاسرايدۇ . پەرزەنتلەرنىڭ كىيىن كېچەك ، يىمەك -ئىچمەكلىرىگە كۆڭۈل بۆلىدۇ ، ئاغرىپ قالسا يېنىدىن ئايرىلماي قارايدۇ . مانا بۇلار يۇقىردىكى ئالاھىدە  ھېسسىيات ئۈستىگە قۇرۇلغان ئائىلە تەربىيىسى بولۇپ ، ئۇ ،پەرزەنتلەرگە قارتا بىر خىل يېقىنلىق ھېسسىياتى ، بەخىت ھېسسىياتى ۋە مەسئوليەتچانلىق ھېسسىياتى قاتارلىقلارنى پەيدا قىلىدۇ . بۇ ئائىلە تەربىيىسىنىڭ ئىدىيىۋى ئاساسىدۇر .
    2- ئائىلە تەربىيىسىنىڭ دەسلەپكى تەسىرلەنسۈرۈشچانلىقى  
      ئائىلە تەربىيىسىنىڭ  بۇ خىل ئالاھىدىلىكى بالىلارنىڭ ئۆسۈپ يېتىلىشى ، تەرەقىي قىلىشى جەريانىدا ئىنتايىن مۇھىم ئورۇن تۇتىدۇ ، ئائىلە بالىلار تۇرمۇش ئۆگۈنىدىغان  تۇنجى مەكتەپ ، ئاتا - ئانا بالىغا تۇرمۇش ئۆگۈتىدىغان تۇنجى ئۇستاز . بالا تۇغۇلغان كۈندىن باشلاپ ئۇنىڭ بىلىش ، ھېسسىيات ، ھەركەت ئادىتىنىڭ يېتىلىشى ، شۇنداقلا ئۇنىڭ ھەر خىل قابىليەتلىرىنىڭ شەكىللىنىشى قاتارلىقلار ئائىلە ئارقىلىق ئىشقا ئاشىدۇ . نۆۋەتتە ئېلىمىزنىڭ ئائىلە تەربىيىسى دېگەندەك تەرەقىي قىلمىدى . يەنىلا بىرقاتار مەسىلىلەر مەۋجوت بولۇپ تۇرماقتا . مەسىلەن ؛ ساغلام بولمىغان ئائىلىلەر ( ئاتا - ئانىسى ئاجرىشىپ كەتكەن ئائىلىلەرگە ئوخشاش ) نىڭ كۈندىن -كۈنگە كۆپىيىپ بېرىشى ، باياشات ئائىلىلەرنىڭ كۆپىيىشى ، ( ئالدىنقىلاردىن ئېشىپ ئىستىمال قىلىدىغان ) ئائىلىلەرنىڭ كۆپىيىشى بالىلارنىڭ تەرەقىي قىلىشىغا نىسبەتەن پايدىسىز تەسىر كۆرسەتمەكتە . بالىلارنى ئەتىراپلىق ، ساغلام تەرەقىي قىلىش ئىمكانىيىتىگە ئىگە قىلىش ئۈچۈن ، بۇ يېڭى مەسىلىلەر داۋاملىق تەتقىق قىلنىشى لازىم . بۇ مەسىلىلەرنى ھەل قىلىشتا مەكتەپ تەربىيىسى يېتەكچى رول ئوينايدۇ .
     3-  ئائىلە  تەربىيىسىنىڭ ئۇزاق مۇددەت مەۋجوتلىقى
    كىشىلەر تۇرمۇش يولىدا ئائىلە تەربىيىسىنىڭ داۋاملىشىش ۋاقتىنى ئەڭ ئۇزاق بولىدۇ . بۇ بالا تۇغۇلۇپ ئۆسۈپ يېتىلىشتىن ياكى جەمىيەتكە چىققانغا قەدەر ، ئۇنىڭ كۆپلىگەن ۋاقتى ئاساسەن ئائىلىدە ئۆتىدۇ ھەم بۇ جەرياندا ئائىلىنىڭ تەسىرىنى ئۈن - تۈنسىز قوبۇل قىلىدۇ . جەمىيەتكە چىقىپ ئائىلىدىن ئايرىلغاندىن كېيىن ، ئۇنىڭ ئائىلىگە بولغان تەۋەلىك ھېسسىياتى بىلەن ئاتا -ئانىغا بولغان سېغىنىش ھېسسىياتى ھەر خىل شەكىلدىكى مۇناسىۋەتلەر ئارقىلىق ساقلىنىپ ، بىۋاستە ياكى ۋاستىلىق ھالدا ئائىلە تەربىيىسىنىڭ تەسىرىنى قوبۇل قىلىدۇ .
     4- ئائىلە تەربىيىسىنىڭ جەمىيەت بىلەن بولغان باغلىنىشى
    جەمىيەتنىڭ تەرەقىي قىلىشىغا ئەگىشىپ ، ئائىلە تەربىيىسى بىلەن جەمىيەتنىڭ تەسىر كۆرسىتىش رولى بارغانسېرى زورىيىپ بارماقتا . لېكىن مەكتەپ تەربىيىسىنىڭ ئورنىغا باشقا ھەرقانداق تەربىيىنى دەسسىتىشكە بولمايدۇ . مەكتەپ تەربىيىسى ئەڭ نېگىزلىك ، ئەڭ ئاساسلىق تەربىيە شەكلى بولۇپ ، ئۇنىڭ ئۆزىگە خاس ئالاھىدىلىكلىرى بولىدۇ . سېلىشتۇرۇپ كۆرسەك ، ئائىلە تەربىيىسى بىلەن جەمىيەت تەربىيىسى ئارقىلىق مەكتەپ تەربىيىسىنىڭ تەلەپلىرىنى ئورۇنداش قىيىن . شۇڭا مەكتەپتە دەل مۇشۇنداق ئالاھىدە خۇسوسيەتلەر بولغىنى ئۈچۈن ، ئائىلە تەربىيىسى بىلەن جەمىيەت تەربىيىسىگە قارتا ئۈنۈملۈك تۈردىكى تەڭشەش ۋە كونتۇرول قىلىش رولىنى ئىشقا ئاشۇرۇش كېرەك .
     5- ئائىلە تەربىيىسىنىڭ چوڭقۇر قاراتمىلىقى
     ئائىلە تەربىيىسى مەقسەتلىك ، پىلانلىق ، تەشكىللىك ، سېستىمىلىق ئېلىپ بېرىلىدىغان مەكتەپ تەربىيىسىگە ئوخشىمىسىمۇ ، لېكىن ئۇنىڭدا چوڭقۇر قاراتمىلىق بولىدۇ . بۇنىڭ كونكىرىت ئىپادىلىرى _ ئاتا - ئانىلار ئۆز بالىسىنى ئەڭ ياخشى چۈشىنىدۇ ، شۇڭا ئۇلار بالىلارغا قارتا ئەڭ توغرا ، ئەڭ ئۆز ۋاقتىدا تەربىيە ئېلىپ بارىدۇ . جەمىيەت ۋە پەن تېخنىكىنىڭ ئۇچقاندەك تەرەقىي قىلىشىغا ئەگىشىپ جەمىيەتتىكى ھەر خىل ھادىسىلەر ۋە ئۇچۇرلار ياش -ئۆسمۈرلەرگە سەل قارىغىلى بولمايدىغان دەرىجىدە تەسىر كۆرسەتمەكتە . ھازىرقى جەمىيەتتە سىنىپىي مۇناسىۋەت ، ئىجتىمائىي تۈزۈم قاتارلىقلاردا بۇرۇنقىغا قارىغاندا زور ئۆزگۈرىشلەر بولدى . شۇنىڭ بىلەن ئائىلە تەربىيىسىنىڭ نىشانى ، مەزمونى ، ئۇسولى قاتارلىقلار پارتىيىنىڭ مائارىپ فاڭجىنى بىلەن ماس ھالدا ئېلىپ بېرىلماقتا .
      يىغىنچاقلاپ ئېيتقاندا ، سوپتسىيالىستىك ئائىلە تەربىيىسى ئىنسانلار  ئائىلە تەربىيىسى تارىخىدىكى ئەڭ دىمۇكراتىك ، ئەڭ باراۋەر ، ئەڭ ئېنىق تەربىيە ھېساپلىنىدۇ .  ئۇ مەكتەپ تەربىيىسى ، جەمىيەت تەربىيىسى بىلەن زىچ باغلىنىشلىق بولۇپ ، پۈتكۈل جەمىيەتنىڭ كەلگۈسى ئەۋلادلارنى تەربىيىلەش سېستىمىسىنى شەكىللەندۈرىدۇ . مانا بۇ سوتسىيالىستىك ئائىلە تەربىيىسىنىڭ ماھىيىتىدۇر .
      مەنبە ؛ < ئائىلە تەربىيىسى ئاساسىي بىلىملىرى >  دېگەن كىتاپتىن  

arxang

قالتىس سەرخىل تىمىلارنى يوللايسەن، بىر-بىرىدىن نادىر.

erkay

ناھايتى ئەھمىيەتلىك تېما ئىكەن. دېمىسىمۇ ئانا دېگەن پەرزەنتلەرنىڭ تۇنجى ئانىسى ئەمەسمۇ؟؟؟

tograk001

مۇشۇ زاكىرە ھەدەم ئادەمگە بەك ياقىدىغان  تىما يوللايدۇ.  بۇ بەك ئەھمىيەتلىك تىما ئىكەن. بىز دەك پەرزەنىتلەرمۇ  مۇشۇنداق تىمىلارنى كۆرۈپ تۇرساق ياخشى.  ئەجرىڭىزگە رەھمەت.زاكىرە ھەدە.

zohran

ئائىلە تەربىيىسى بۈگۈنكى كۈندە بىر مۇھىم تىما، تورداشلارغا  ئائىلە تەربىيىسى ۋە پەرزەنت تەربىيىسىدە يارمۇھەممەد تاھىر تۇغلۇق ئەپەندىنىڭ كىتابلىرىنى كۆرۈپ بىقىشقا تەۋسىيە قىلىمەن.

zakira

مەملىكىتىمىز ئائىلە تەربىيىسىنىڭ  ھازىرقى ئەھۋالى
            ئىسلاھار ئېلىپ بېرىلىۋاتقان ، ئىشىك سىرتقا ئېچىۋېتىلگەنبۈگۈنكى كۈندە ، كۆپلىگەن  ئاتا -ئانىلار ئائىلە تەربىيىسىنىڭ مۇھىملىقىنى بارغانچە تۇنۇپ يېتىشمەكتە . بالا ئانىدىن توغۇلغاندا ، ئۇنىڭدىكى تۇغما پەرىقلەر ئانچە چوڭ بولمايدۇ ، بىراق كېيىنكى ئۆسۈپ يېتىلىش جەريانىدىكى پەرىقلەر ناھايىتى گەۋدىلىك بولىدۇ . سەۋەبىنى سۈرۈشتۈرگەندە ئائىلە تەربىيىسى ئامىلىغا سەل قاراشقا بولمايدۇ . ئائىلە تەربىيىسىنىڭ سۈپىتىنى ئۆستۈرىش ئۈچۈن ، ئاتا - ئانىلارنىڭ بولۇپمۇ ئائىلە تەبىيىسى تەتقىقاتى بىلەن شۇغۇللىنىۋاتقان يولداشلار مەملىكىتىمىز ئائىلە تەربىيىسىنىڭ ھدزىرقى ھالىتىنى چۈشۈنەلەيدىغان بولىشى كېرەك .
              1- مەملىكىتىمىز ئائىلە تەربىيىسىنىڭ ھازىرقى ھالىتى
        ياش ئۆسمۈرلەر ۋەتىنىمىزنىڭ كېلەچىكى ، مىللىتىمىزنىڭ ئۈمىدى . ئائىلە ياش -ئۆسمۈرلەر تۇرمۇش كەچۈرىدىغان ئورۇن ھەم ئۇلارنى ساغلام ئۆسۈپ يېتىلدۈرىدىغان بۆشۈك . ئاتا - ئانىلارنىڭ ئىدىيە ۋە مەدەنىيەت ساپاسى ئوخشىمايدۇ ، لېكىن بۇنى مەملىكىتىمىز  ئائىلە تەربىيىسىنىڭ ھازىرقى ھالىتىدىن قارىغاندا زور  كۆپ ساندىكى ئاتا - ئانىلار بىردەك بالىلىرىنىڭ ساغلام ئۆسۈپ يېتىلىشىنى ، ئەقىللىق چوڭ بولىشىنى ، باشقىلاردىن ئېشىپ كېتىشىنى ئۈمىد قىلىدۇ . مۇشۇ ئۈمىد ۋە ئارزۇ ئاساسىدا ، بەزى ئاتا - ئانىلار  ئىدىيىۋى تۇرمۇش جەھەتتە ، بالا تەربىيىلەش بىزنىڭ باش تارتىپ بولمايدىغان مەجبوريىتىمىز ، شۇڭا ، ئائىلە تەربىيىسىگە بىرقەدەر ئەھمىيەت بېرىپ ، ئۇلارنى ئەخلاقىي ، ئەقلىي ، جىسمانىي ، گۈزەللىك قاتارلىق تەرەپلەردىن ساغلام قىلىپ تەربىيىلەۋاتىمىز ، دىيىشىدۇ . يەنە بەزى ئاتا - ئانىلار تەربىيىلەش ئۇسولى جەھەتتە ، بالىلارنىڭ ئۆسۈپ يېتىلىشىدە كۆپ خىل ئامىللارنىڭ رول ئوينايدىغانلىقىنى تونۇپ يېتىشمەكتە . شۇڭا ئۇلار بالىلىرىنىڭ ئۆگۈنىش ، تۇرمۇش پائالىيىتى ئۈچۈن بىرقەدەر ياخشى شارائىت يارىتىپ بەرمەكتە . مۇۋاپىق پۇرسەت يارىتىپ بېرىشكە ، ھەر شەكىللەر ئارقىلىق ئۇلارنىڭ تەپەككۇر ۋە ھەركەت ئادىتىنى  يېتىلدۈرىشكە ئەھمىيەت بەرمەكتە . ھازىرقى زامان پەن -تېخنىككىسىنىڭ ئۇچقاندەك تەرەقىي قىلىشىغا ئەگىشىپ ، ئائىلە تەربىيىسىدە يەنە ھەل قىلىشقا تىگىشلىك بولغان نۇرغۇن مەسىلىلەر مەۋجوت بولۇپ تۇرماقتا . مەسىلەن ؛ بەزى ئاتا - ئانىلار بالىسىنىڭ ئۆرلەپ ئوقۇشىنى تەكىتلەپ ، قانداقتۇر ئالى مەكتەپنىڭ < دېپلومى > نى ئالساڭ ئىستىقبالىڭ بولىدۇ ، دەپ  قاراشماقتا . يەنە بەزى ئاتا -ئانىلار جەمىيەت ئۇچۇرلىرىغا ، بىلىم ئۇچۇرلىرىغا زادى دىققەت قىلمايدۇ . بۇ خىل ئۇچۇرلارنىڭ بالىنىڭ ئۆسۈپ يېتىلىشىگە بولغان رولىغا سەل قارايدۇ . نەتىجىدە بالىسىمۇ ئۆزىگە ئوخشاش ئەقىل جەھەتتە دېگەندەك تەرەقىي قىلالمايدۇ . يەنە بەزى ئاتا - ئانىلار بالىسىنىڭ ئۆگۈنىشتە ئانچە ياخشى ئەمەسلىكىنى كۆزدە تۇتۇپ ، بىر بولسا بالىسىنى دىننىي مەكتەپكە بەرسە ، بىر بولسا بالىسىنى مەكتەپتىن توختىتىپ  < دېڭىزغا چۈشۈش > كە مەجبورلاپ بالدۇر نان تېپىشنى ، بالدۇرراق پۇل تېپىشنى ، بالدۇرراق ئۆي -ئوچاقلىق بولىشىنى تەشەببۇس قىلماقتا ، ھەتتا مۇنداق قىلىشنى ئۆزلىرىنىڭ مەجبوريىتىنى ئادا قىلغانلىق دەپ قارىماقتا . بەزى ئاتا -ئانىلار بالىسىنى زىيادە ئەركە چوڭ قىلىدۇ ، بالىسىنىڭ ئاغزىدىن نىمە چىقسا شۇنى قىلىپ بېرىدۇ  ، گىپىنى يېرمايدۇ ھەتتا بالىسى ئاسماندىكى ئاينى ئېلىپ بەر دېسە ، ئىمكانىيىتى بولسىلا ئېلىپ بېرىدۇ ، بالىسىنى گۆھەردەك ئەتىۋارلاپ ، ئائىلىسىنىڭ بىردىن -بىر ئەڭگۈشتەرى قىلىۋالىدۇ . بۇنداق ئائىلىدە تەربىيىلەنگەن بالا مىشچان ، ئاچكۆز ، ھورۇن ، مۇئامىلىسى قوپال ، كۆيۈمسىز ، شەپقەتسىز ، مەسئوليەتسىز بولۇپ چوڭ بولىدۇ . بەزىلىرى يامانلىققا يۈزلىنىدۇ . بەزى ئاتا - ئانىلار بالىسىغا قوپال مۇئامىلە قىلىدۇ ، بالىسى بىرەر ئىشنى خاتا قىلىپ قويسا ، يېنىك بولغاندا تىللايدۇ ، ئېغىر بولغاندا قولىغا نىمە چىقسا شۇنىڭ بىلەن ئۇرىدۇ . ئۇلار بالىنى قورقۇتۇپ تەربىيىلەشنى < گەپ ئاڭلايدىغان بولىدۇ >  دەپ  قارايدۇ  ، نۇرغۇن ئەمەليەتلەر شۇنى ئىسپاتلىدىكى ، بالىلارغا قوپاللىق بىلەن مۇئامىلە قىلىش ، كۆرۈنىشتە يۇۋاش ، ئېغىر - بېسىق قىلىپ قويىدۇ . ئەمەليەتتە تىزگىنى بولۇشتەك ئاقىۋەتكە ئېلىپ بارىدۇ ، بۇنداق ئائىلىدە تەربىيىلەنگەن بالىلاردا كىچىكىدىن باشلاپ ئاتا -ئانىسىغا ئۆچلۈك قىلىش پسخىكىسى يېتىلىپ بارىدۇ . بەزى ئاتا - ئانىلار خىلمۇ - خىل سەۋەپلەر تۈپەيلىدىن بالىسىغا بولغان تەربىيىگە سەل قارايدۇ . بالىسىنىڭ بولمىغۇر قىلىقلىرىنى كۆرۈپ كۆرمەسكە سالىدۇ . باشقىلار ككرسىتىپ بەرسە ئاڭلاش ئۇياقتا تۇرسۇن ، ئەكسىچە بالىسىغا بولۇشۇپ  < بالا كىچىك تۇرسا چوڭ بولغاندا ئوڭشۇلۇپ قالىدۇ > دەيدۇ . كىچىك ئىشلارنىڭ چوڭۇيۇپ مەسىلىگە ئايلىنىدىغانلىقىنى تەسەۋۋۇر قىلىشمايدۇ . دېمەك ئائىلە تەربىيىسىدىكى ئوڭۇشسىزلىق ئىقتىساس ئىگىلىرىنىڭ يېتىلىشىگە تەسىر كۆرسىتىپ ، شەخس ھەم دۆلەت ئۈچۈن مۆلچەرلىگۈسىز زىيان ئېلىپ كېلىدۇ ، شۇڭا بۇ مەسىلىگە ھەممەيلەن ئەھمىيەت بېرىش ، شۇنىڭ بىلەن بىرگە ئىختىيارلىق خارەكتىردىكى ئائىلە تەربىيىسىنى ئىلمىيلەشكەن ئائىلە تەربىيىسىگە يۆتكەش لازىم .
                داۋامى بار .........

zakira

       2- ئائىلە تەربىيىسىدە دىققەت قىلىشقا تىگىشلىك بىر قانچە مەسىلە
         ئائىلە تەربىيىسىمۇ بىر خىل پەن ، شۇڭا ، ھەر بىر ئاتا -ئانا  بولغۇچى ئائىلە تەربىيىسى بىلىملىرىنى ئاز -تولا ئۆگۈنۈپ قويىشى ۋە ئۇنى ئىگىلىشى ، توغرا ،مۇۋاپىق ، ئىلمىي بولغان ئائىلە تەربىيىسىنىڭ ئۇسولى بىلەن تەجىربىلىرىنى ئۆگۈنىش لازام . نۆۋەتتە تۈۋەندىكى تۆت مەسىلە ئاتا -ئانىلارنىڭ دىققىتىنى قوزغىشى لازام ؛
        1- دەسلەپكى تەربىيىگە ئەھمىيەت بېرىش لازىم
     كۆپلىگەن ئەمەلىي پاكىتلار شۇنى ئىسپاتلىدىكى ، دەسلەپكى تەربىيە بالىلارنىڭ ئەقلىنى تەرەقىي قىلدۇرۇشتا ئىنتايىن مۇھىم ئەھمىيەتكە ئىگە . شۇڭا ، ئاتا -ئانىلار بالىلار ئاسان قوبۇل قىلىدىغان ، ئاسان چۈشىنەلەيدىغان تەربىيە مەزمونلىرىنى تاللاپ ، ئاددىدىن مۇرەككەپلىككە ، تېيىزلىقتىن چوڭقۇرلۇققا قاراپ تەرەقىي قىلىدىغان تەربىيە ئۇسوللىرىنى قوللىنىشى لازىم ، تەربىيىلەش جەريانىدا جانلىق ، قىزىقارلىق ، ئوبرازلىق بولىشىغا دىققەت قىلىش كېرەك .
          2- مۇھىت تەربىيىسىگە ئەھمىيەت بېرىش لازىم
         ئائىلە مۇھىتى - ئائىلە تەربىيىسىنىڭ بىۋاستە ماتىريالى . رەتلىك ۋە پاكىزە بولغان ئائىلە مۇھىتى ، ئۆز- ئارا ئىناق بولغان ئائىلە  مۇناسىۋىتى ، مول ، كۆپ خىل ئائىلە تۈرمۇشى ، خارەكتېر جەھەتتە ئلچۇق يورۇق بولغان ئائىلە ئەزالىرى ياخشى ئائىلە تەربىيىسىنى يولغا قويۇشنىڭ ئاساسى ۋە كاپالىتى بولۇپ ، ئۇ بالىلارنىڭ ساغلام يېتىلىشىنىڭ تاشقى شەرتى ھېساپلىنىدۇ .
        3- ئۈلگە ئارقىلىق تەربىيىلەشكە ئەھمىيەت بېرىش لاىم
        ئۈلگە ئارقىلىق تەربىيىلەشنىڭ مەزمونى كۆپ تەرەپلەردە كۆرۈلىدۇ . بۇنىڭ ئىچىدە  ئاتا - ئانىنىڭ گەپ -سۆزى ، يۈرۈش - تۇرىشى ، ئەخلاق ساپاسى ، مەدەنيەت ساپاسى ، تۇرمۇش ئادىتى قاتارلىقلار بالىلارغا ئاۋازسىز تەسىر كۆرسىتىدىغان تەرىپىدۇر . شۇڭا ئاتا - ئانىلار ھەر قانداق شارائىتتا ئۆزلىرىگە قاتتىق تەلەپ قويۇپ ، تۇرمۇش ، ئۆگۈنىش ،خىزمەت ، ئائىلە ئەمگىكى ، باشقىلارغا مۇئامىلە قىلىش ، باشقىلارغا سوۋغا بېرىش ، باشقىلارنىڭ سوۋغىسىنى قوبۇل قىلىش قاتارلىق جەھەتلەردە پەرزەنتلەرگە ياخشى ئۈلگە بولىشىمىز لازىم .
       4- تەربىيىنىڭ بىردەك بولىشىغا ئەھمىيەت بېرىش لازىم
       ئائىلە ئەزالىرى بولۇپمۇ ئاتا - ئانىلار بالىغا بولغان تەربىيىدە بىردەك بولىشى ، ئوخشاش نىشان ئاساسىدا تەربىيىلىشى ، ئۇسول جەھەتتە بىردەكلىكنى ساقلاشقا كاپالەتلىك قىلىش لازىم . ئۇنداق بولمايدىكەن بىر تەرەپ قاتتىق تەلەپ قويۇپ تەربىيىلىسە . يەنە بىر تەرەپ قاتتىق تەلەپ قويمىسا ؛ بىر تەرەپ چىڭ تۇتۇپ بىر تەرەپ چىڭ تۇتمىسا ، بولىشىغا قويىۋەتسە بالىلار ھەق - ناھەقنى ئېنىق ئاجىرتالمايدىغان ، ئادەمگە قاراپ مۇئامىلە قىلىدىغان ناچار خارەكتېر ئادەتلىرىنى يېتىلدۈرۋالىدۇ .
        ئائىلە تەربىيىسى ، ئائىلە تۇرمۇشىنىڭ مۇھىم مەزمونى . ئائىلە تەربىيىسىنى ياخشى ئېلىپ بېرىش بەزىلەر خىيال قىلغىنىدەك ئۇنداق ئاسان ئىش ئەمەس . چۈنكى ، ئائىلە تەربىيىسى ئىلمىيلىككە ، بىلىم خارەكتېىرگە ۋە قانۇنيەتكە ئىگە بولىدۇ . شۇڭا ، ھەر بىر ئاتا -ئانا  ئائىلە تەربىيىسىنىڭ ئاساسىي نەزەريەسىنى ئەستايدىللىق بىلەن ئۆگۈنىپ ، ئەمەليەت جەريانىدا ئۆزلۈكسىز تىرىشىدىغان بولسا ئائىلە تەربىيىسى كۆڭۈلدىكىدەك ياخشى ئېلىپ بارالايدۇ ھەم ۋەتەن ئۈچۈن ، مىللەت ئۈچۈن تېخىمۇ كۆپ ئەسىر ھالقىغان لاياقەتلىك ئىخساس  ئىگىلىرىنى تەربىيەلەپ چىقالايدۇ . بۇ جەھەتتە ھەر بىر ئاتا -ئانىنىڭ باش تارتىپ بولمايدىغان مۇھىم مەجبوريىتى ....

   مەنبە ؛ < ئائىلە تەربىيىسى ئاساسىي بىلىملىرى > دىن