كونا يازمىلىرىمدىن ئۈچ پارچە

yaz~quxi

	ئوت   تەكلىماكاندەك خىياللىرىمدا   ئۇخلىماقتا قۇملار چۈش كۆرۈپ .   ياز ئاپتىپى كۆيمەكتە ئاستا ...    ئۆكسىمەكتە تەنلەر ئۆركىشى،    يۆتەلمەكتە قۇرغاق ﻫاياجان،    بىر ئەلنىڭ ئۆلگەن قەلبىدەك گويا.       تىترەۋاتقان سارغۇچ تەبەسسۇم    ئايلانماقتا قارا تاشلارغا .    ئاپتاپلارنىڭ باياۋانىدا يامغۇر كۆيۈپ كۈل بولماقتا...       ئوت كەتمەكتە قەلبىمىزگە،    ئوت كەتمەكتە شەﻫەرگە...   قۇيۇلماقتا كىچىك بىر دەريا    كۆيۈۋاتقان يېشىل يۈرەككە...        تەكلىماكاندا مېڭىش         قۇملارنىڭ يۈرىكى بار دەپ ئويلىدىم    كېتىۋېتىپ تەكلىماكاندا .    قۇرۇغان توغراقلار ئوخشاپ كېتەتتى    مېنىڭ قەلبىمدىكى بىر توپ ئادەمگە .      ماشىنا قۇملارغا قاراپ ماڭاتتى    قۇملار ماشىنىغا قاراپ قالاتتى.    مەن قۇملار بىلەن پىچىرلاشقاندا    مەن ئۆزۈمنىڭ ئادەملىكىمنى    قۇملار ئۆزىنىڭ قۇم ئىكەنلىكىنى    ئۇنتۇپ قالاتتى...    تەكلىماكان ئۆزگىرىپ كەتكەن خاتا ئىسىممىكىن دەيمەن ،   توغرا نامى بەلكىم ئۇنىڭ قۇملار تېگىدە. توغراق يوپۇرماقلىرى ئۈمىدكە شاھىد ، قۇرۇپ قالغانلىرى ئازابقا تەۋە.    ئۇ ھەم يانالمىغان تارىخنىڭ بىر دۆۋە سۈكۈتىگە بوپ تۇرار بەلگە .    تەكلىماكان ،    سېنى قۇچاقلاشقا يەتمىدى قولۇم ،   قۇچاقلىدىم يۈرىكىمدىن سېنى مەن مەھكەم ...    ئارامجاڭگال مەيخانىسى          بىلمەيمەن ئورنۇڭنىڭ نەدىلىكىنى بېرىپ باقمىدىم ساڭا بىر قېتىم .    ئەمما، شۇندىمۇ    چېچەكلەيدۇ بەزىدە جىملا    سەن توغۇرلۇق مېنىڭ خىيالىم .       پەقەت    خاتىرەمدە كۆيۈپ تۇرغان سۆزلەرنى دەسسەپ    ساڭا بىر رەت يول ئالىمەن چۈشۈمدە .    كىملەرنىڭدۇر مۇناپىقلىقى    غەزەپلەندۈرۈر مېنى غۇچچىدە .       ساڭا بىر قېتىم باراي دەيمەن    مەي ھەققىدە بىردەم ئويلايمەن    بېشىم بىلەن مېڭىپ مەن ئاندىن جاڭگىلىڭنى ھارماي بويلايمەن. ئارامجاڭگال ، ئەتە - ئۆگۈن باشلاپ بېرىپ ئاغىنىلەرنى    ئۇرۇپ - چەيلەپ كۆكەمىلەرنى    ئىچىشىمىز سېنىڭدە بىر كۈن !       2007- يىل 7- ئاي. تۇرپان

جىن

	بىر دۆۋە سۈكۈتىگە بوپ تۇرار بەلگە . ------------- بۇ مىسرادىن سۈيۈنۈپ كەتتىم  بۇ مىسرا  ئۇيغۇر شېئرىتىدە پەقەتلا   سىزنىڭ بەلگىڭىز بۇلۇپ قالغۇسى ،

yaprah~0997

	يازدا كۆرگەن چۇشلەرنى ، ئەمدى ئويلاپ قالدىقمۇ . ئىچىۋېلىپ ۋۇسۇڭدەك ، قىشتا ئوخلاپ قالدىقمۇ .

zakira

	بىزگە مەنىۋىي زوق ئاتا قىلىدىغان شېئىرلىرىڭىزنى داۋاملىق يوللاپ تۇرغايسىز ..

bargiya

	ياز چۈشىنى قىش كەلسە ئۇيقۇغا كىرىۋالغان چېغى دىگەنتۇق [s:2] تۆكۈپ تۇرۇڭ مۇشۇنداق..كەچكىچە چۈش قوينىدا يۈرۈۋەرمەي..

yaz~quxi

	جىن ئۇكام، ئاۋۇ ئىنكاسىڭىزنى ئوقۇپ، خىجىل بولۇپ قالدىم...

sewda

	ماشىنا قۇملارغا قاراپ ماڭاتتى    قۇملار ماشىنىغا قاراپ قالاتتى.    مەن قۇملار بىلەن پىچىرلاشقاندا    مەن ئۆزۈمنىڭ ئادەملىكىمنى    قۇملار ئۆزىنىڭ قۇم ئىكەنلىكىنى    ئۇنتۇپ قالاتتى...    قالتىسكەن...