ئۆزۈڭنىلا ئويلايدىغان بولۇپ قالما

qabdas

	ئۆزۈڭنىلا ئويلايدىغان بولۇپ قالما ئاپتور:مۇھەممەتجان راشىدىن بالام، يالغۇز ئۆزۈڭنى ئويلايدىغان بوپقالما، ئىش - ئوقەتكە مەيلى يوق، ئوينايدىغان بوپقالما. سارايلارغا سازاۋەر بولغاندىمۇ ئۆمۈرلۈك، گەمىلەرنى ياقتۇرماي، قونمايدىغان بوپقالما. پېشايۋاندا كۆك كەپتەر يارىشىقى ھويلاڭنىڭ، دەرگاھىڭدىن ئامەتنى قوغلايدىغان بوپقالما. ئەقىل دېگەن ئىنساننىڭ ئەزىز جېنى يەنە بىر، يامانلارنى«ياخشى» دەپ قوغدايدىغان بوپقالما. بولۇپ چىقتى نائەھلى ئۆگەنگەنلەر نان ئىلغاپ، دېھقان تۇرۇپ سەنمۇ، نان ئىلغايدىغان بوپقالما. قوغۇن تەرسەڭ باش - بۇرنى كۆپنىڭ بولسۇن ئەڭ ئاۋۋال، قوغۇن تېرىپ بىر خەمەك تىلمايدىغان بوپقالما. چاشقانلىرى نەپسىڭنىڭ پۇل كەينىدىن قۇترىشىپ، خۇدا بەرگەن رىزقىڭغا تويمايدىغان بوپقالما. دۇنيا يىغساڭ يىغ مەيلى، تەڭرى بەرسۇن ۋە لېكىن ! ئاتاڭغىمۇ بىر توخلا سويمايدىغان بوپقالما. تارتىپ كۆرەر تۈنلەردە ئىشىكىڭنى ئېزىتقۇ، ئىشىكىنى قەلبىڭنىڭ ئىلمايدىغان بوپقالما. ئەمەل تۇتساڭ ئەل تۇرسۇن ئۆز ئاناڭدەك يادىڭدا، دەردمەن كەلسە ھال ئېيتىپ، تىللايدىغان بوپقالما. قېچىپ يۈرەر ياخشىلار ھەر دوقمۇشتا شەيتاندىن، سەن شەيتاننى، ئەكسىچە چىللايدىغان بوپقالما. ئۆز بېغىڭدا گۈل تۇرۇپ تۈمەن گۈلگە بەرگۈسىز، ئۆزگىلەرنىڭ بېغىدىن خىللايدىغان بوپقالما. ئادالەتنىڭ ناخشىسى ياقمايدىغان يۈرەك يوق، ياقمايدىغان ناخشىنى تولايدىغان بوپقالما. ئالقىنىڭنىڭ پاكلىقى دەرگاھىڭغا شەرەپشان، يانچۇقىنى پۇقرانىڭ كولايدىغان بوپقالما. يېڭى ئەسىر سېنىڭدىن يېڭى ياشلىق كۈتمەكتە، ئىختىرا قىل، ئىجاد قىل، دورايدىغان بوپقالما. ياشانغاندا ياخشى نام ئالالماستىن ئالەمدىن، بارمىقىڭنى پۇشماندا شورايدىغان بوپقالما. مەنبە :سەلتەنەت تور بېتى

maryam

	بۇ تېما ھەقىقەتەن كۈچلۈك تەربىيىۋى ئەھمىيەتكە ئىگە ئىكەن، پەرزەنت تەربىيىسى بىز ئاتا-ئانىلار ئۈچۈن بۈگۈنكى بۇنداق شارائىتتا ھەقىقەتەن بەك تەس بولۇپ قالدى، ئازراق دىققەت قىلمىساق بالىنى تەربىيلەشتە نۇرغۇن خاتالىقلارنى سادىر قىلىپ سالىمىز،شۇڭا ھەممە ئشنى ئاۋۋال ئۆزىمىزدىن باشلىشىمىز كېرەك.

parixta799

	مۇشۇ  شائىرىمىزنىڭ  شېئېرلىرىنى  ئىنتايىن  بەك  ياقتۇرۇپ  ئوقۇيمەن،تۇرمۇش  پۇرىقى  بەك  كۈچلۈك،تىلى  چۈشىنىشلىك،ھەر  قانداق  ئادەم  بىر  ئۇقۇپلا  ھەزىم  قىلالايدۇ.شائىرغا  ئۇزۇن  ئۆمۈر،سالامەتلىك  تىلەيمەن.تېما  ئىگىسىگىمۇ  تەشەككۈر!

pariay

	مۇھەممەتجان راشىدىن ئاكىنىڭ شېئىرلىرىنى بەكمۇ ياقتۇرۇپ ئوقۇيمەن ،،تەربىيەۋى ئەھمىيەتكە ئىگە بۇ شېئىرنى يوللىغان تىما ئىگىسىگە تەشەككۈر !!!

rena617

	ئەجەپمۇ  ياخشى  شىئېر ئىكەن ،مۇھەممەتجان  راشىدىننىڭ  شىئېرلىرىنى  بەك  ياقتۇرىمەن ،ساقلىۋالاي ،رەھمەت .

bayawan

	سىر ھەققىدە غەزەل سىر بېرىپ، سىر سورىغانغا سۆزلىگەن ئەخمەق ئېرۇر ،   رەقىبىڭ قەستى سىرىڭنى سىنچىلاپ ئۇقماق ئېرۇر. شۇ ئەيىبتىن يەتتى باشقا كۆپ نادامەتلەر بۈگۈن،   ئەمدى بىلدىم  ياخشى خىسلەت -دىلنى سىر تۇتماق ئىرۇر . ئۈلپىتىڭ نائەھلى كەلسە،ئۆلگىنىڭ شۇدۇر تىرىك،   لازىمى ھەر دوستقا ئەقىلىڭ كۆزىدە باقماق ئېرۇر. بەدنىيەت ئۈلپەتلىرىڭدىن سەن ئۈچۈن كەلمىش “ۋاپا”،   ئاقىۋەت بىر كۈن كېلىپ باشىڭغا ئوت ياقماق ئىرۇر . نەپسى دوست تائىپلىرىڭ ھەقدا تائامىڭغا سېنىڭ،   گەر بېشىڭغا چۈشسە كۈن،سەندىن بەتتەر قاچماق ئېرۇر. بىر بوۋاي ئۆمرى ئۈچۈن ئۇشبۇ جاھانمۇ ئاز ئەمەس ،   ئەمما ئىنسان ئۆمرى گويا كۆكتىكى چاقماق ئېرۇر. شۇندىمۇ قانداق ياشاشنىڭ ئىزدىسەڭ ئۆز يولى بار،   ئۆلچىمى ئۆلمەس ئۆمىرنىڭ ياخشى نام تاپماق ئېرۇر . ياخشى نام ۋە ياخشى دوست جۈپ كەلگىنى دۆلەت ساڭا،   ياخشى دوست كۈلكەڭگە خوش ،دەرت كەلسە تەڭ تارتماق ئېرۇر . ياخشى دوست ياقۇت ئېرۇر ،دوزاىتىمۇ ھەمراھ ساڭا ،   سەن ئاقار دەريادا سەنچۈن ئۇ ئۆزى ئاقماق ئېرۇر. بايقىماي باسقان ئاياق ھەم پەملىمەي بەرگەن سىرىم ،   گۆر كولاپ مەنچۈن بۈگۈن دەھشەت ئىشىك ئاچماق ئېرۇر   مەنبە؛مۇھەممەتجان راشىدىن  شىئىرلىرى