قارا بايراق
كۆيمەكتە ئوت بولۇپ چوغلانغان كۆڭۈل،
ئەسلىتىپ قان تامغان يۈرەكنى گويا .
غېرىبلىق قاراڭغۇ جاڭگالدىن چىقىپ،
ﻫۇۋلايدۇ قەلبىمنىڭ باياۋانىدا .
يىرتىلغان ئەخلاقنىڭ دېرىزىسىدىن
قارىساڭ شۇ قەدەر بۇلۇتلۇق ئاسمان.
ۋىجدانىڭ يارا بوپ كەتسىمۇ بۇندا،
ئاﻫ،ئۇنىڭ قىممىتى بىر تىيىن ﻫامان.
ئاشۇنداق تۇيغۇدا باقساڭ ﻫاياتقا،
كۆرۈنەر رېئاللىق كۆزۈڭگە مايماق.
ئۆمىلەپ بىر دۆڭگە چىقىپ ئادەملەر،
تىكلىگەن ئۇ يەرگە بىر قارا بايراق.
ئەسلىسەم ﻫەر قېتىم شۇ قارا بايراق،
قوزغايدۇ كۆڭۈلنىڭ جاراﻫىتىنى .
تۆتىنچى قەۋەتتىن چۈشىمەن غەمدە،
ئوت كەبى كۆيدۈرۈپ پەلەمپەيلەرنى.
مۈكچەيگەن بىر بوۋاي كەلمەكتە ئاستا،
يىراقتىن قەلبىمنىڭ ئىچىگە مېڭىپ.
چىرايلىق بىر توپ ياش كەتمەكتە ئۇزاپ،
قولىغا بىر قارا بايراقنى ئېلىپ ...
مەنبە : ئىجادىيىتىم
2007 -يىل ئىيۇل
يوللىغان ۋاقتى 2010-11-7 17:17:52
