بەزىلەرگە ئېلىپ كەلدىم < بەزىلەر توغرىسىدا >

zakira

	بەزىلەر توغرىسىدا  < رىشىت مەخسۇت رۇبايىلىرىدىن >   بەزىلەر بىلمەيدۇ ئىزا تارتىشنى ،   بىلىدۇ باشقىغا گۇنا ئارتىشنى .    نۇمۇسنى شەرەپ دەپ ئۇ كۈلەر تېخى ،   پەرق ئەتمەي راست ئالقىش ،تەنە ئالقىشنى.    نومۇستۇر زىت قىلمىش گۈزەل ئەخلاققا ،   نۇمۇستۇر بىرىلىش نەپ، نام- ئاتاققا .    ئەپسۇسكى بەزىلەر ئەخلاقنى ئۇنتۇپ ،    ئۇنىڭدىن  يىراقلاپ كەتتى ئۇزاققا .    بەزىلەر تاشلار گۈل سولۇشۇپ قالسا ،    يارىنىڭ گۈل يۈزى پۈرلىشىپ قالسا .    يۆگەيگە زوقلىنىپ قاراپ قالىمەن ،    ئاجىرماس كېۋەزگە چىرمىشىپ قالسا .    ئېرىشسە بەخىتكە چاكىنا ئىنسان ،    شىر بولۇپ ھۆركۈرەر  تار كېلىپ جاھان .    گەر يەتسە ناگاھان بەخىتسىزلىكلەر ،    ئۆچەككە كىرەر ئۇ بولۇپ بىر چاشقان .     ئەر - ئايال ياشاڭلار گۈلدەك ماسلىشىپ ،     تىكەندەك مىجەزلەر بولسا تاشلىشىپ .     بۇ دۇنيا بەك ئۇزۇن ياشاتماس ئەگەر ،    يۈرسەڭلار باتنىشىپ ،گاھى چاچلىشىپ .     بازاردا ساتمىغان نەرسە ئاز قالدى ،     ساختا كۆپ ،يالغان كۆپ، ئازراق راست قالدى .    ئەپسۇسكى ،بەزىلەر  نومۇس، ۋىجداننى -    تاۋار دەپ ساتقىلى تاس- تاماس قالدى .   مۇناپىق ئۆزىنىڭ خام تاماسىدا ،   مەن دوست دەپ چىڭ تۇرار ئۆز داۋاسىدا .    مەن بىخود ئەمەسمەن  ئۇ دائىم ئاتار ،     دۈشمەنلىك ئوقىنى دوستلۇق ياسىدا .    قانچىلىك ئەجىردىن كېلەر بىر تال دان،    قانچىلىك مەرۋايىت تۆككەندۇر دېھقان ؟    ۋىجدانىڭ ئاز- تولا قورۇنمىغايمۇ ؟    داپ چالساڭ بىرىنى تېپىپ ئىككى نان .    بەزىلەر ئەمىلىنى كوزور قىلىشىپ ،    پۇقرانى يەپ-ئىچەر ھوزور قىلىشىپ .    گەر پۇقرا ئۇلارنىڭ ئۆيىگە كەلسە ،     قۇپقۇرۇق قايتۇرار ئۆزۈر قىلىشىپ .    بەزىلەر ئالدىراپ غورا چاينايدۇ ،    غورىنى گويا ئۇ پىشتى سانايدۇ .    ئۇ يىگەن غورىنىڭ كاساپىتىدىن ،    كېيىنكى نەسلىنىڭ چىشى قانايدۇ .    بەزىلەر راسلىغان بىر چۈشلۈك تاماق ،   ئېھتىمال ئوۋ ئۈچۈن سېلىنغان قارماق .   يەمنى دەپ بەند بولغان بېلىق قىسمىتى ،   بىزگىمۇ بولسىكەن ئۇنتۇلماس ساۋاق .     بەزىلەر ئۆزىگە ئىشلەشكە ماھىر ،    ئىت بولۇپ باشقىنى چىشلەشكە ماھىر .    قۇرۇتۇپ خۇشپۇراق ھەر خىل گۈللەرنى،    ياۋا ئوت- چۆپلەرنى كۈچلەشكە ماھىر .    بەزىلەر قىلسىمۇ ھەقنى ئېتىراپ ،    ۋە لېكىن تىنمايدۇ  [ھەر يان قېتىراپ .    بازىرى بولغاچقا قېتىراشلارنىڭ ،     مىسنى زەر قىلدۇرماق بولار كىتىراپ .   نامەردلەر سوقۇدۇ ئۆزى ئۈچۈن چوت ،   پۇل گويا ئۇلارغا ئەڭ ئالى مەبود .    ئۆزەم ساق قالساملا مەيلى دەيدۇ ئۇ ،   جاھاننى كۆيدۈرۈپ كۈل قىلسىمۇ ئوت .    بەزىلەر دەر: < بايلىق چېرىكلەشتۈرەر    ئەل بىلەن ئارىنى يىرىكلەشتۈرەر .    ياق بايلىق مەردلەرنى پەرىشتە قىلىپ ،    نامەردنى  شەيتانغا شېرىكلەشتۈرەر >     بەزىلەر مەنسەپكەبەكمۇ بېرىلدى ،     ئېرىشسە ئۇنىڭغا قالتىس كېرىلدى .     كېيىنكى بىچارە ھالىنى ئويلاپ ،     ئېچىنىپ ئۇنىڭغا ئىچىم سېرىلدى .      بەزىلەر ئىزدەيدۇ گەپ بار دەپ سېنى ،     راستلىقى بايدا بار ، نەپ بار دەپ سېنى .     بەزىلەر قاچىدۇ سەندىن يىرىققا ،     يولىسام زىيان بار ،خەۋپ بار دەپ سېنى .     بەزىلەر تىكەننى كۆرمىگەن ئىكەن ،     پۇتىغا تىكەنمۇ كىرمىگەن ئىكەن .     گوياكى پارنىكتا ئۆسكەن گىياھدەك ،     تۇغۇلۇپ يەر دەسسەپ يۈرمىگەن ئىكەن .      بىلىشى <قۇرئان> نىڭ ئۇششاق سۆرىسى ،     تاماسى ھەر قاچان ئۆينىڭ تۆرىسى .     ئۇنىڭغا دىيانەت دوستمىكىن دىسەم ،     شۈبھىسىز شەيتانلار يېقىن جۆرىسى .           رىشىت مەخسۇتنىڭ روبايىلىرىنى ئوقىۋېتىپ بۇ رۇبائىيسىغا بەكلا كۆزۈم چۈشتى شۇڭا يوللاپ قويدۇم . بەزىلەر ئۆزەڭلارغا ئەپ كەتمەڭلار يەنە . ھازىرقى ۋەزىيىتىمىزگە ماسلىشىدىغان جايلىرى كۆپ ئىكەن .

arman1002

	راست گەپ مۇشۇ بەزىلەردەك كىشىلەرمۇ كۆپ جۇمۇ

atikam1

	شۇنداق مەنالىق روبائىيدىن يوللاپسىزغۇ جانىم ،،، بەزىلەر ئالدىراپ غورا چاينايدۇ ،    غورىنى گويا ئۇ پىشتى سانايدۇ .    ئۇ يىگەن غورىنىڭ كاساپىتىدىن ،    كېيىنكى نەسلىنىڭ چىشى قانايدۇ . بۇ كوپلىتنى ئۇقۇۋېتىپ  مۇنداق بىر جۇملە  سۆز يادىمغا كەپ قالدى ،،،، <<خەنزۇلار  دولىدىن قېرىيدۇ ،بىر-بىرىنى يۆلەپ، ئۇيغۇرلار  چېشىدىن قېرىيدۇ  بىر-بىرىنى غاجىلاپ >>

otyak

	ياخشى روبائىيلار ئىكەن. بەزىلەر قولىدا كۆتۈرۈپ سامسا، باشلىق ئالدىدا ئوينايدۇ تانسا. قانداق بولاركىن ئۇلارنىڭ ھالى،   قولىدىكى سامسىدىن ئايرىلىپ قالسا .      بۇ شېئىر يادىمغا كېلىپ قالدى. يوللاپ قويدۇم. بۇ ناخشا قىلىپمۇ ئوقۇلغان .

melek

	قۇرۇتۇپ خۇشپۇراق ھەر خىل گۈللەرنى، ياۋا ئوت- چۆپلەرنى كۈچلەشكە ماھىر . ماۋۇ بەك كەپتۇ جۇمۇ، مۇنبىرىمىزدىكى سەرخىل گۈللەرنىڭ قەدرىنى بىلمەي ،چەيلەۋاتقان بەزىبىر لەرگە تازا ماس كەلگۈدەك،شۇنداق ياخشى تېمىلارنى چەيلەپ،ئۇجۇقتۇرۋىتىدىغان بىر قىسىملارغا. بەزىلەر ئەمىلىنى كوزور قىلىشىپ ،    پۇقرانى يەپ-ئىچەر ھوزور قىلىشىپ .    گەر پۇقرا ئۇلارنىڭ ئۆيىگە كەلسە ،     قۇپقۇرۇق قايتۇرار ئۆزۈر قىلىشىپ . ۋاي -ۋاي ماۋۇ مىسرالارنىڭ ئېسىللىقىنى، پۇخرالىرى ماختاپ كۆككە كۆتۈرۈپ ئەسەر يازسا تاج كەيدۈرۈپ،سەللا پىكىر-تەلەپ تەلەپ قىلسا يەڭ ئىچىدە پۇخرالارنى زىندانغا تاشلايدىغان ئەمەلدارلارغا ئاتالغانىكەنغۇ.تېخى يۈتۈپ كەتكەن نەرسىلەرنىڭ ئىز دىرىكىنى قىلىپ ئىزدەپ-سوراپ ئۇچۇر قىلسا .قايتۇرۇپمۇ قويمايدۇ بەزى ھاكاۋۇر ئىنسانلار.... ھەي،مۇشۇ بەزىلەرنىڭ كاساپاتىدىن قانچىلىك ئادەملەر بۇ يەردىن يوق بولدى،قانچىلىك ئادەملەر ئەپسۇسلىنىپ بېشىنى چايقاپ كۈدە-كۆرپىسىنى يۇغۇشتۇرۇپ چىقىپ كەتتى....

zakira

	بۇ 3قەۋەتتىكىatikam1 يوللىغان 2010-11-02 13:31 غا قارتىلغان  : شۇنداق مەنالىق روبائىيدىن يوللاپسىزغۇ جانىم ،،، بەزىلەر ئالدىراپ غورا چاينايدۇ ،    غورىنى گويا ئۇ پىشتى سانايدۇ .    ئۇ يىگەن غورىنىڭ كاساپىتىدىن ، .......   جانىم نەدە تەييار تۇرغاندۇ بۇ نەقىللىرىڭىز ...

halida1466

	kizhumar0998 مەن داۋامنى چۈشۈرەي ..............بەك ياخشى يوللانغان روبايىلاركەن .            كۆرسىتىپ ئۆزىنى گويا ئەۋلىيا ،            ھەركىمنىڭ ئىچىنى سىقىپ  ياشايدۇ .            ئۈندۈرۈپ يوق يەردىن تۇخۇمغا تۈكنى ،            ياخشىنى ئورىغا تىقىپ ياشايدۇ ،             ئاش بەرگەن قازاننى سۇندۇرۇپ چەيلەپ ،             دوستىنىڭ بېشىغا چىقىپ ياشايدۇ .            قېنى داۋاملاشتۇرىدىغانلار بولسا مەرھەمەت .زاكىرە خانىمنىڭ يوللىغان روبايىسىغا كۆپ رەھمەت .

مۇبارەك

	جىمى يەردە تۇغۇپ بەرسە خۇش، بىزنىڭ ئەلدە «بوغۇپ» بەرسە. جىمى ئەلدە يېپىپ بەرسە خۇش، بىزنىڭ ئەلدە ئېچىپ بەرسە...

yalpuz0997

	تەربىيىۋىچانلىقى كۈچلۈك رۇبائىلاركەن ،ئاپتۇرنىڭ قەلىمىگە ۋە زاكىرەنىڭ  ئەجىرىگە تەشەككۈر.

pariay

	قانچىلىك ئەجىردىن كېلەر بىر تال دان،    قانچىلىك مەرۋايىت تۆككەندۇر دېھقان ؟    ۋىجدانىڭ ئاز- تولا قورۇنمىغايمۇ ؟    داپ چالساڭ بىرىنى تېپىپ ئىككى نان . بۇ مىسرالارنى بەكمۇ ياقتۇردۇم !! بەكمۇ مەزمۇنلۇق قۇرلاركەن ،،،