سىز ئۆزىڭىزدىن قانچىلىك يىراقلىقتا

arslan

	بەلكىم سىز تېمىنى كۆرۈپلا سەل ھەيرانلىق ھېس قىلغانسىز ، ئادەم ئۆزىدىن يىراق بولامدىغاندۇ دېگەن ئويغا كەلگەن بولۇشىڭىزمۇ مۇمكىن ۋە ياكى ئادەم بىلەن ئۆزى ئوتتۇرىسىدا ھەقىقەتەنمۇ بەلگىلىك ئارلىق بولىدۇ دەپ ئويلىغان بولۇشىڭىزمۇ مۇمكىن . شۇنى ئېتىراپ قىلماي بولمايدۇكى ، ئادەم بىلەن ئۆزى ئوتتۇرىسىدا بەلگىلىك ماكان ۋە زامان جەھەتتىكى پەرق مەۋجۇد .         ئادەتتىكى تۇرمۇشىمىزدا ئارلىق سۆزى ئېنىق كۆز بىلەن كۆرگىلى بولىدىغان ، بەلگىلىك ئۇزۇنلۇققا ئىگە بولغان كېسىكلىك يۆنىلىش ياكى زامان ئۇقۇمىغا ئىگە بولغان مەۋھۇم ھالەتتە بىزنىڭ كۆز ئالدىمىزدا زاھىر بولىدۇ . بۇ ئارلىق ھامان بىزنىڭ جەمئىيەتتىكى ئورنىمىز ، تۇرمۇش سەۋىيىمىز ، شۆھرىتىمىز ، ھەمدە تاپاۋىتىمىزنى بەلگىلەپ قويىدۇ . شۇڭا بىز تىرىشىپ - تىرمىشىپ بۇ ئالىقىنى كىچىكلىتىشىمىز ياكى يوقىتىشقا قاراپ يۈزلەندۈرۈشىمىز كېرەك .         بىز بۇ ئارىلىقىنى تەھلىل قىلىشتىن ئىلگىرى مەشھۇر كىشىلىرىمىزنىڭ ئۆزى بىلەن بولغان ئارىلىقىنى ئانالىز قىلىپ كۆرەيلى . مەسىلەن ، ئۇيغۇرلارنىڭ بۈگۈنكى زامان ئەدەبىياتتىكى ئەڭ داڭلىق يازغۇچى مەرھۇم زوردۇن سابىر ئاكىمىز ئەينى يىللاردا << ئىزدىنىش >> رومانى بىلەن كەڭ ئۇيغۇر قېرىنداشلارغا تونۇلغان بىلەن << ئانا يۇرت >> ترىلوگىيىسى بىلەن ھەقىقىي زوردۇن سابىر يېقىنلاشتى . دېمەك ، زوردۇن سابىرنىڭ ئەينى يىللاردىكى ئوقۇغۇچىلىق دەۋرىدىن تارتىپ داڭلىق بىر يازغۇچىغا ئايلىنىشقىچە بولغان ئارلىق ئۇنىڭ تەر تۆكۈپ ئەجىر سىڭدۈرۈشى ، يېزا - قىشلاقلاردا يازنى ياز دېمەي ، قىشنى قىش دېمەي تۇرمۇش ئۆگىنىشى ، ئاخىرىدا 3400 گرادۇسلۇق كۆز ئەينەكنى تاقاپ ئولتۇرۇپ ، ۋاپاتىدىن 10 كۈن بۇرۇن << ئانا يۇرت >> ترىلوگىيىسىنى نەشرگە تاپشۇرۇشىغىچە بولغان جەريان ئۇنىڭ ئۆزى بىلەن بولغان ئارلىقنى كىچىكلىتىش جەريانىدۇر . ئۇ ئۆزىنىڭ شۇ جاسارىتى بىلەن ھەقىقىي زوردۇن سابىرنى مەيدانغا كەلتۈردى .         خەنزۇ ئەدەبىياتىدىكى نۇرغۇن ئاقساقال كىشىلەر لۇشۈن توغرىسىدا گەپ قىلسا ، ئەڭ ئالدى بىلەن << ئاQ نىڭ غەيرىي - رەسمىي تەرجىمىھالى >> نى تىلغا ئالماي قالمايدۇ . راستىنى ئېيتقاندا جۇشۇرۇننى ھەقىقىي لۇشۈن قىلغىنى ئۇنىڭ نەسرىي شېئىرلىرى ياكى سالام خەتلىرى بولماستىن بەلكى بەدىئىي جەھەتتە دۇنياۋى شۆھرەت قازانغان پوۋېست << ئاQ نىڭ غەيرىي - رەسمىي تەرجىمىھالى >> دۇر . ئۇنىڭ  كېمىسازلىق مەكتىپىگە كىرىشى ۋە ياپونىيىگە ئوقۇشقا چىقىشىدىن تارتىپ ، ۋەتەنگە قايتىپ كېلىشى ۋە قېچىپ تۇرۇپ ئىجادىيەت بىلەن شۇغۇللىنىشىغىچە بولغان جەرياندىكى كۈرەش ۋە جاپالار ئۇنىڭ ئۆزى بىلەن بولغان ئارلىقنى قىسقارتىش جەريانى بولدى . ئۇ شۇنداق ئازاب - ئوقۇبەت بىلەن دۇنيا خەلقىگە << جۇڭگو ئەدەبىياتىنىڭ بايراقدارى >> دېگەن نامنى قالدۇرۇپ كەتتى .         دۇنياغا داڭلىق يازغۇچى ھېمىڭۋايمۇ نوبېل ئەدەبىيات مۇكاپاتىغا ئېرىشىپ بولغۇچە نەچچە قېتىم چوڭ ئۇرۇشلارغا قاتناشقان ، ھەتتا ئۆلگۈلىمۇ تاس قالغان ، قاتتىق ئاغرىپ يېتىپ قالغان ، جەڭ مەيدانىدا مۇخبىرمۇ بولغان ، دەسلەپكى تۇرمۇشى قىيىنچىلىقتا ئۆتسىمۇ ، يەنە ئەدەبىياتقا ئوتتەك ئىشتىياق باشلاپ ، ئاخىرىدا ئۆزگىچە ئىپادىلەش ئۇسۇلىنى يارىتىپ پىروزا ساھەسىدە ئالەمچە شۆھرەت قازاندى ، بەلكىم ئۇنىڭ ئۆزى بىلەن بولغان ئارلىقى ئۇ ئۆزىنى مىلتىق بىلەن ئېتىۋالغاندىن كېيىن تېخىمۇ كىچىكلىگەن بولۇشى مۇمكىن .         ئەگەر بىز يەنە مىسال ئالىدىغان بولساق ، بۇنداق مىساللار ماڭدامدا بىر ئۇچرايدۇ . بۇنداق ئۆزى بىلەن بولغان ئارلىقنى كىچىكلىتىپ ، ھەقىقىي مەنىدىكى ئۆزىنى مەيدانغا كەلتۈرگەن داڭدار كىشىلەر پەقەت ئەدەبىيات ساھەسىدىلا ئەمەس ، بەلكى يەنە باشقا ساھەدىمۇ كۆپ ئىكەنلىكىنى بايقايمىز . بۇ خىل ئارلىق بىزنىڭ مەۋجۇدلۇق كۆرسەتكۈچىمىز ، بۇ خىل ئارلىق بىزنىڭ تەقدىرىمىز بىلەن تەتۈر تاناسىپ تۈزىدۇ ، بۇ خىل ئارلىق چوڭايغانسېرى بىزنىڭ مەنىۋى كۈچىمىز ۋە جىسمانىيىتىمىز شۇنچە خورايدۇ ۋە مەۋجۇدلۇقىمىز خارابلىققا يۈزلىنىدۇ .         بەزىلەر مۇۋەپپەقىيەت توغرىلىق سۆز ئېچىپ ، پەقەت << بىر قەدەم >> نىلا ئەسكەرتىدۇ . شۇنداق بۇ بىر قەدەم قانداقتۇر باشقا قەدەم بولماستىن بەلكى ئۆزىمىزگە قاراپ يەنى ئۆزىمىزگە يېقىنلاپ ئېلىنىۋاتقان بىر قەدەمدۇر . ئەگەر بىزدە ئاشۇ كۆزگە چېلىقماس ھايۋان قۇلۇلىنىڭ جاسارىتى بولسا ئىدى ، ياشلىق مەزگىلىمىزنىڭ ئاخىرىدا ، ھەتتا ياشلىق مەزگىلىمىزدىلا ئۆزىمىز بىلەن بولغان ئارلىقى تۆۋەن چەككە چۈشۈرەلەيىتتۇق . پۇل تاپساق ئۇنى بۇزۇپ چاچتۇق ، يەنە تاپىمىز دېدۇق ، نەتىجىدە بىر ئۆزىمىزدىن نەچچە قەدەم يىراقلىشىپ كەتتۇق ، يۈز تاپتۇق ، ئۆزىمىزنى كۆرسەتتۇق ، نەتىجىدە كىشىلەرنىڭ قەلبىدىن چۈشكەننى ئاز دەپ ئۆزىمىزدىن يىراقلىشىپ كەتتۇق ، ھەتتا ئۆزىمىزنى ئادەمىيلىك دالاسىدىن ئىزدەپ تاپالمىغۇدەك دەرىجىگە بېرىپ يەتتۇق . بۇ ئارلىق ئاخىرىدا بىزنى ئۆز ئىسكەنجىسىگە ئالغاندا ، بىز بۇنى ئۆزىمىزدىن كۆرەر يوق ( چۈنكى بۇ ۋاقىتتا بىزنى ئۆزىمىزنى كۆرگۈدەك كۆزمۇ قالمىغان بولىدۇ ) ، ئارتۇقچە ھالدا تەقدىر يەنە ئاللىنېمىلەردىن رەنجىدۇق . مانا شۇنىڭ بىلەن بىزنى پالاكەت باستى ، زاۋاللىق دارى خېخىردىكىمىزدىن ئاستى ، يورۇق دۇنيا بىزگە ھارام بولدى ، كۆزىمىزدىن توققۇز دەريا تارام بولدى ، ناھايىتى ئېچىنىشلىق ھالدا ئۆزىمىزنى ۋە تەقدىرىمىزنى ئېتىراپ قىلىشقا ئامالسىز قالدۇق .         << سەن ئۆزۈڭنى ئېتىراپ قىلغان كۈنۈڭ دۇنياغا قايتىدىن كۆز ئاچقان بولىسەن >> دەيدۇ ئۇيغۇر خەلقىمىزنىڭ سۆيۈملۈك يازغۇچىسى ئەختەم ئۆمەر . بۇ ئارىلىقىنى ئېتىراپ قىلمىساق ، بارا - بارا كىچىكلىتىپ ، ھەقىقىي مەنىدىكى ئۆزىمىزگە يېقىنلىمىساق ، خوتەنلىك رومانتىك شائىر نەۋبەتى مىسرالىرىدىكى << ئەي ، يارەنلەر بىز كېتەرمىز ، يادىكار قالدى كالام ، كىشىدىن قالغاي جاھاندا بىر نىشانە ، ياخشى نام >> دېگەن ھېكمەتلەرگە ياندىشالمىغاننىڭ ئۈستىگە ، كەچۈرگۈسىز دەرىجىدىكى جىنايەت تۇيغۇسى بىلەن زاۋاللىق دەرگاھىغا قەدەم ئالغان بولىمىز ، شۇنىڭ بىلەن ئۇ يەردە مەڭگۈ قالىمىز ، دەل شۇ ۋاقتىدا دۇنيادىكى ئازابنىڭ ھېچنېمىگە ئەرزىمەيدىغانلىقىنى ھېس قىلىپ قالىمىز . شۇڭا بىز قانچە تىز بۇ ئارلىقنى كىچىكلەتسەك ، ھايات دەرىخىمىز خۇددى ئېگىز تاغدىكى مەغرۇر شەمشادتەك مەڭگۈ يېشىل تۇرىدۇ .

aptap

	رەخمەت قىرىندىشىم !  توغرا مەن ئۆزۈمدىن بەكمۇ يىراقتا ،  چوقۇم ئۆزۈمنى تىپۋىلشىم كىرەك .    تىرشىمەن...... مۇنبەردە روھى ئويغاق ھەربىر قىرىندىشمىز ئۈچۈن ،مۇشۇنداق بىر ئېسىل يازمىنى يوللىغىنڭىزدىن بەكمۇ خۇرسەن بولدۇم .  ئۆزۈم بولۇشقا  تىرشىمەن.... .ھەم مۇنبەردىكى تورداشلىرىمنىڭمۇ ئۆزنى تىپۋىلشىغا تىلەكداشمەن.

sahra

	ئارسلان تىمىڭىزغا تەشەككۇر ، مەنمۇ  ئۈزۈمنى تېپىۋىلىشقا تىرشىۋاتقان مۇشۇ مىنۇتلاردىمۇ ، ھەقىقى ئۈزۈم بىلەن يىراقلىشىپ كېتىۋاتقان مۇساپەمنى ئويلاپ قالاتتىم . تىمىڭىزدىكى  يۈرەككە ئۇرۇلىدىغان قۇرلاردىن يۈرۈكۈم ئۈمۈتنى سەزدى ، ئورنۇمدىن تۇرغان ئاشۇ كۈندىن بىرى ، ئۈزۈم تامام كىتىۋاتىمەن . بۇنداق نادىر تىمىللىرىڭىزنى دائىم كۈرۈش نىسىپ بولغاي.

arsilan999

	ھەقىقەتەن كىشىنى ئويلاندۇرىدىغان تىما يوللاپسىز، ھارمىغايسىز. دىمىسىمۇ بىزلەردە  ئۆزىنى ھەقىقى تۈردە تۇنۇيدىغان كىشىلىرىمىز (ھەتتا بەزىدە ئۆزىمىزمۇ شۇنىڭ ئىچىدە ) تولىمۇ ئاز.بىز بىر ئىشنى بىلىپ تۇرساقمۇ  ئەمما بىغەملىكىمىز تۈپەيلىدىن بىلمەسكە سېلىپ يۈرىۋىرىمىز. بۇ خىل ئەھۋال چوڭدىن تارتىپ كىچىككىچە ھەممىمىزدە بار.شۇنى ئىتراپ قىلماي تۇرالمايمىزكى ؛ ھورۇنلۇق، بوشاڭلىق، بىغەملىك ھەم ئۈمىدسىزلىك بىزلەرنى خار زەبۇنلۇق تۇرمۇشقا باشلاپ كىرىدىغانلىقىنى بىلىپ تۇرۇپ يەنىلا شۇنداق بىغەم ، پەرۋاسىز ھالەتتە يۈرىۋاتىمىز.بەلكىم .ئۇزۇن يىللىق جاپا مۇشەققەت بىزلەرنىڭ بىلىمىزنى پۈكۈپ مىدىرلىماس قىلىپ قويغاندۇ. ئەمما بىز ئۆزىمىزنى ھەقىقى تۈردە تۇنۇپ يىتىپ،ئۆزىمىزنىڭ زادى نىمىگە ئىھتىياجلىق ئىكەنلىكىمىزنى، ھازىرقىدەك رىقابەتكە تولغان،كۈچلۈكلەر يىڭىپ ئاجىزلار يەم بولىدىغان مۇشۇنداق ئاچچىق رىئاللىق ئاستىدا زادى نىمىلەرنى قىلىشىمىز كىرەكلىكىنى زادى قانچىلىك ئادەم ئويلاپ يىتەلىدۇق؟قانچىلىك ئادەم ئويلىغانلىرىمىزنى تاپقان يوللىرىمىزنى  يول تاپالماي قىينىلىۋاتقان،قولىدا بىر تىيىننىڭ سۇنۇقى يوق ئاجىز بىچارىلىرىمىزگە،قولىدا ھەرخىل ئالىي مەكتەپلەرنىڭ دىپلومى تۇرۇپمۇ يەنىلا چىقىش يولى تاپالمايۋاتقان زىيالىيلىرىمىزغا ، سەن مۇنداق قىلساڭ مۇنداق بولىدۇ،سەن قىلدىغان ئىش ماۋۇ ،سىنىڭ بىلىمىڭ بار مىنىڭ پۇلۇم بار ئىككىمىز ھەمكارلىشىپ ياخشى بولغان بىر قېتىملىق ئوبدان سودىدىن بىرنى قىلىپ،كىيىنكى ئىشلىرىمىزنىڭ  يۈكسىلىشى ئۈچۈن،شۇنداقلا بۇندىن كىيىنكى قېرىنداشلىرىمىزنىڭ ئۆز يولىنى تېپىۋېلىشى ئۈچۈن ئورتاق كۈچ چىقىرايلى - دەپ  شۇ بىلىمى بار ئەمما پۇلى، يۇلى يوق زىيالىيلىرىمىزنى يېنىمىزغا تارتىپ ئۇلار بىلەن ھەمكارلىشالىدۇق؟ قايسى زىيالىرىمىز ئۆزلىكىدىن بىر يەرگە يىغىلىپ بۇندىن كىيىنكى ئىشلىرى ئۈچۈن بىرلىكتە ئىش قىلىشنى ئويلاپ باقتى؟؟؟  بەلكىم بۇنداق قىلغانلارمۇ بار بولىشى مومكىن. ئەمما بىزلەرگە نىسبەتەن تولىمۇ ئاز سانلىقنى ئىگلەيدۇ. بۇ بىز ئۈچۈن يىتەرلىك ئەمەس. بىز نىڭ بۇنداق كىشىلىرىمىز يۈزلەپ،مىڭلاپ،بەلكى نەچچە ئون مىڭلاپ چىققان بولسا بەلكىم ھازىرقى كىشىلىك تۇرمۇشىمىز باشقىچە بولار ئىدى.  بىز باشقىلارنىڭ مەدەنىيتىنى ئۈزلۈكسىز تۈردە ئۈگىنىپ كىلىۋاتىمىز . ئەمما شۇنى بىلىشىمىز كىرەككى مەيلى باشقىلارنىڭ قانچىلىك مەدەنىيتىنى ئۈگەنسەكمۇ،باشقىلارغا قانچىلىك ئوخشىۋالساقمۇ بىز دىگەن يەنىلا بىز.ھەرگىزمۇ باشقا ئاتالمىش مەدەنىيەتلىك ئىنسانلارغا ئايلىنالمايمىز. پەقەت بىزنىڭ ئېرىشكىنىمىز بىر توپ ئاتالمىش مەدەنىيەتنىڭ چاڭلاشمىسىدىن ھاسىل بولغان لۈكچەك ئالىجوقا ، پەقەت چىشلەشنىلا بىلىپ ئىشلەشنى بىلمەيدىغان،ئۆزىدىن باشقىنى ئويلىمايدىغان ،ئاسمان ئۆرۈلۈپ چۈشسىمۇ تېگىدە بىغەم ئولتۇرۇپ مانتا يەيدىغان ئاز ساندىكى زامانىۋى ماشىنىلارغا ئىگە بولۇش خالاس!

nurlani

fahru

	بەزىدە ئۆزۈمنى ، ئۆزۈم ئەمەسمىكىن دەپمۇ قالاتتىم ... ماۋۇتىمىدىن خېلى نەرسىنى ھېس قىلدىم ...

zohran

	مەنمۇ نىمىشقا ئۈزۈمگە يىقىنلىشالمايدىغاندىمەن؟

ugenguqi

	ئۆزىگە يېقىنلاشقاننىڭ نېمە پايدىسى ھازىر ؟ ئەمما ئىسىل تېما!

zakira

	راسلا  ئادەمنى سەگەكلەشتۈرىپ ئۆزىمىزنىڭ قانچىلىك يىراقتا تۇرىۋاتقانلىقىمىزنى ئەسكەتتىڭىز ... ئويغىنايلى !!

886-ayixa

	ياخشىمۇسىز مەن بۇ مۇنبەرگە كىرىپلا تۇنجى بۇلۇپ  بۇ تېمىنى كۆردۈم  بەكلا بەلەن چىقىپتۇ گاھىدا مەن شۇنداق ئويلاپمۇ قالاتتم ئۆز-ئۆزۈمنى چۈشەنمەيدىغاندەك بوپ قالاتتم.گاھىدا ئۆزۈمنىڭ قىلغۇسى بار ئىشلارنىمۇ قىلالمايمەن  بۇ زادى نىمە ئۈچۈنكىن دىسەم مەن ئۆز-ئۆزۈمدن بەكلا يىراقلاپ كىتىپتىمەن ئەمەسمۇ ؟ قارىغاندا قايتىدىن بىر ئۆزۈمگە قايتسام بولغۇدەك تە   رەھمەت  قولىڭىزغا دەت بەرمىسۇن  داۋاملىق مۇشۇنداق ياخشى ئەسەرلەرنى يوللاپ تۇرۇڭ    [s:3]