ياشلىققا خىتاپ (1)
تۇرسۇنبەگ ياسېن (ئارسلان )
رۇبائىيلار ۋە پارچىلار
جاھاندا ھەممىدىن ھايات قىممەتلىك،
ھاياتنى سۆيگىن ھەم دائىم قەدىرلە.
ئۆزۈڭنى ئادەم دەپ ھېساپلا ئاندىن-
ھاياتىڭ نۇر چاچسا پقەت بىر زەررە.
ئىھ ياشلق قاچانمۇ تويارسەن دەيمەن،
جاناننىڭ ئالمىدەك ئاپئاق يۈزىگە.
قاچانمۇ تىكىلمەي قالارسەن بىر رەت،
سىھىرگە تولغان شۇ قاپقارا كۆزگە.
ئىھ ياشلىق بولدى قىل ئۇنۇت پىغاننى،
تۈگىمەس يولدۇر بۇ مۇھەببەت يولى .
ئىز سالغىن ھاياتقا سەن بولغىن كارۋان،
سۆيگۈ دەپ بىراۋنىڭ بولمىغىن قۇلى.
ئىھ ياشلىق بولدى قوي سۈرمىگىن خىيال،
كۆڭۈلنىڭ كەينىگە كىرمىگىن ئەمدى.
ئىزىڭدىن قانداقمۇ ئۈنسۈن گۈللەر،
پەيتىدە ئۇرۇقنى سالمىساڭ ئەمدى .
مەيلىگە چاپتۇرسام ئۆمۈر ئېتىمنى،
ھەر يانغا باشلايدۇ مىنى شاش كۆڭۈل.
ياشلىقتا نە مەنا تۆكمەي ھالال تەر ،
كۆڭۈلنىڭ كەينىدە توزىما ئۆمۈر.
ياشلىقنىڭ قوينى كەڭ پۇرسىتى نۇرغۇن،
ياشلىقتىن سانسىز باغ –ساراي پۈتىدۇ.
ياشلىقتا پۇرسەتنى چىڭ تۇتساڭ ئەگەر،
كىلەچەك ئاتلىق بىر جانان كۈتىدۇ.
رەنجىمە ئەي كۆڭلۈم مىنىڭدىن ھەرگىز،
قويالماي قالساممۇ سىنى مەيلىڭگە.
تۈگەيدۇ بىھۇدە ياشلىقتا كۈنلەر،
چاپتۇرسام ئېتىمنى سىنىڭ مەيلىڭگە.
ئەركەك بول غورۇرلۇق ۋىجدانغا تولغان،
ئەل –ۋەتەن ئۈچۈن كۈچ - مادارغا تولغان.
پىدا قىل بارىڭنى ئەلنىڭ ئوغلى بول،
شۇندىلا سەن يىگەن نان ھالال بولغاي.
ئەي ياشلىق نادانلىق قىلمىغىن ھەرگىز،
ئېقىن سەن ،چاقماق سەن ئۆمرۈڭ بەك قىسقا.
تەر تۆكسەڭ ئىزىڭدىن ئۈگۈسى گۈللەر،
تىرىشقىن ئىجتىھاد بىلەن ياشاشقا.
جاھاندا ياشلىقتىن گۈزەل رەنا يوق،
يار تۇتساڭ ئۇنىڭدىن تاپسىەن مۇرات.
ياشلىقنىڭ قوينى كەڭ ،باغلىرى چىمەن،
قىلساڭ گەر خىيانەت ئالەمچە ئۇيات.
مۇھەببەت بىلەن باق جاھانغا دوستۇم،
تەبەسسۇم ئۆچمىسۇن ئىللىق چىھرىڭدىن.
مىھىر بەر ھەربىرجان،ھەربىر گىياھقا،
ھەممە دىل سۇ ئىچسۇن سىنىڭ مىھرىڭدىن.
ياشلىقتۇر قىممەتلىك ،ياشلىقتۇر گۆھەر،
ياشلىقنى تىگىشمە ھەرگىز كۆڭۈلگە.
ئىزدەنگىن ،تەر تۆككىن ئىجتىھاد بىلەن،
چىن مەنە ئىزدىگىن ھەربىر كۈنۈڭگە.
ئىككىمىز دوست بولدۇق ئېغىر كۈنلەردە ،
خەقلەرنىڭ ئىشكىدە پالاس قاققاندا.
ۋەلىكىن پىغاندىن يىغلايدۇ قەلبىم،
ئايرىلدۇق باغلاردا ياڭاق چاققاندا.
ئۆلمىدۇق ،ئۆلمەسمىز ھېجرانمۇ تۈگەر،
كۆڭۈلگە‹شاھ سەنەم›قىلدۇق جاناننى.
بەرمىدۇق ئالدىراپ كۈلگەنگە كۆڭۈل،
نە ئۈچۈن تارتقۇسى كۆڭۈل ياماننى.
چۈشەندۈر دەپ ئېيتىپ قالدىڭ بىركۈنى،
ۋىجدان دەپ نىمىگە ئېيتىدۇ زادى؟
ئەي دوستۇم ئاڭلىغىن ۋىجدان دىگەنلىك-
مۇھەببەت –نەپرەتكە ئەڭ ئادىل قازى.
ئاقىللق كۆزىدە قاراڭ جاھانغا،
بىر تالاي ھىكمەت ھەم ئەقىل كۆرىسىز.
ۋەھالەن ئەقىلگە بولسىڭىز ئاسىي،
جاھاننىڭ ئارتۇقى ،يۈكى بولىسىز.
ئاقىلغا بۇجاھان شۇنچىلك كەڭرى،
نادانغا گوياكى كاتەك بىلەن تەڭ.
ھاياتتىن چىن مەنە تاپالماي يۈرۈپ،
ئۆتكىنىڭ گوياكى ئۆلگەن بىلەن تەڭ.
ھاياتىڭغا ئىزدىگىن مەنە،
كۈنلىرىڭنى ئۆتكۈز ئەجىردە.
تەرلىرىڭدىن چېچىلسۇن ئۈنچە،
پەخىرلەنسۇن سىنىڭدىن ھەممە.
ئويناپ يۈرمە بىغەم –گۆدەكچە،
بولغىن دوستۇم ياشاشقا ماھىر.
سوراقسىزكەن دىمە جاھاننى،
كۈنلەرگە چوقۇمكى سوراق بار ئاخىر.
شەبنەم بولغىن ياشناتقىن گۈلنى،
ياكى گۈلگە شەيدا بۇلبۇل بول.
كۈيلىرىڭدىن ياشنىسۇن دىللار،
ھايات ئۈچۈن ئاچقىن پارلاق يول!
كەچمىگىن مىنىڭدىن بىللە ئۆتىمىز،
مۇشەققەت تاغىدا بىللە يۈرىمىز.
ئىشەنگىن ۋىسالغا چوقۇم يىتىمىز،
ھاياتنىڭ مىھرىگە قېنىپ ئۆتىمىز.
ياشلىقتا كىرمىگىن كۆڭۈل كەينىگە،
چاپتۇرما ئېتىڭنى ئۇنىڭ مەيلىگە.
ئۆتسە گەر كۈنلىرىڭ ئىجاد مەنىدە،
شۇندىلا ئوخشارسەن شىرىن –لەيلىگە.
چىقارما ئىسىڭدىن سۆزۈڭنى پەقەت،
ۋەدەڭگە ھەرگىزمۇ قىلما خىيانەت.
دوست بولغىن ۋىجدانغا پەقەتلا پەقەت،
دىلىڭغا چىڭ پۈتكىن مىھىر-مۇھەببەت.
تۆت كۈنلۈك جاھان بۇ ئۆمۈر بەك قىسقا،
ئۆتمىسۇن بۇ كۈنلەر ئويۇن شوخلۇقتا.
پۇشايمان بەك ئاچچىق، كەلمەس ئورنىغا.
تەر تۆكسەڭ ئوخشايسەن نۇرلۇق قوياشقا.
نە ھاجەت نادانغا ئۈلپەت بوپ ئۆتمەك،
ساياقنىڭ سۆزىدىن چىن مەنە كۈتمەك.
قازانغا سۈركەلسەڭ بولىسەن مەينەت،
توغرىسى ياماندىن يىراققا كەتمەك.
ياشلىقتا ئاشىق بول ئىلىمگە گوياھ-
پەرۋانە چىراققا ئاشنا بولغاندەك.
كۈچ تاپقىن ،قۇت تاپقىن ئەلگە چىراق بول،
ناھار چاچ خۇددى كۈن نۇرغا تولغاندەك.
ئەي دوستۇم ھەۋەسكە بىرىلىپ كەتمە،
قىلچىلىك تۆھپەڭدىن كىرىلىپ كەتمە.
كەمتەر بول ،ئاز سۆزلە،ئىشقا ماھىر بول،
سىناقلار كۆپ تېخى شاللىنىپ كەتمە.
ئەي دوستۇم يانتاياق بولما يامانغا ،
نازلىنىپ يالۋۇرما ھەرگىز قاۋانغا .
ئادەمسەن ۋىجداننى جاندىن ئەزىز بىل،
غورۇرۇڭ قالمىسۇن ھەرگىز ئۇۋالغا.
بىراۋغا تىزلىنىپ ياتقاننى كۆردۈم،
غورۇرسىز پېتىققا پاتقاننى كۆردۈم.
ۋاز كىچىپ ئادەملىك ئىسىل ئۇنۋاندىن،
ۋىجداننى مال كەبى ساتقاننى كۆردۈم.
غورۇرسىز ئادەملەر ئوخشايدۇ گوياھ،
سەلكىندە لىڭشىغان ئاجىز قومۇشقا.
ئازغىنە شامالدا ئۇچار توختىماي،
بولمايدۇ ئۇلارنى دوست دەپ تونۇشقا.
2011-2012-2013-يىللىرى شەھرى بېيجىڭ -تىيەنجىن
يوللىغان ۋاقتى 2013-6-29 16:39:15
