ھاسا بولاي يوللىرىڭدا ياز-ئاياز!
(ئىبراھىم قۇرباننىڭ ناخشا ،ئىجادىيەت كېچىلىكىگە بېغىشلاپ)
قاراخان
يىغلاپ كەتسەڭ قارا كۆزلۈك بالام دەپ،
پەپىلىگەن سېنى توقسۇن، ئاستانە.
ياغدى بۈگۈن ئىدىقۇتتىن شان شەرەپ،
بولدۇڭ كارىز مۇڭلرىغا مەستانە.
يالقۇنتاغدا سەمەندەردەك تاۋلىنىپ ،
قىش يازدىمۇ ئەلگە بەردىڭ ھارارەت.
ئايدىڭكۆلدە ساداقەتكە باغلىنىپ،
قېقىنۇستەك يېتىلدۈردۈڭ كارامەت.
ئارا يىراق كۆڭۈل يىراق ئەمەسقۇ،
بارالمىدىم سۈننەت بىلىپ تەكلىپنى.
نەدە بولساق سەن بىلەن بىر نەپەسقۇ،
قەدىرلەيمىز ھەر تىنىقنى، كەسپنى.
ئىيوندىكى مەرىكە قۇت كېچىلىك،
ئەلگە سۇنغان يۈرىكىڭنىڭ شەربىتى.
ئەلدە بولسا ئەر غېمى گەر قانچىلىك،
سۇنماس ئۇنىڭ ئەلدە ئىززەت -ھۆرمىتى.
ئوڭ سولۇڭدا ھەمرا ئىكەن كۆزلىرىڭ،
دىلى كورغا ئورۇن يوقكەن يېنىڭدا.
كۈلكە-چاخچاق ئوزۇق ئىكەن سۆزلىرىڭ ،
موللا زەيدىن قېنى بارمۇ قېنىڭدا .
نىجات تاپقىن سىرلىق بارخان قوينىدا.
ناخشاڭغا جۆر جىڭ،داۋانچىڭ بۇلبۇلى.
ھەققىمىز بار يىل- ئەسىرنىڭ بوينىدا،
ساڭا تەڭكەش ھاياتلىقنىڭ مەرغۇلى.
ئويۇپ بېرەي كۆزلىرىمنى ساڭا مەن،
تىجىمەلدەك بولما مۇھتاج ھاسىغا.
ياڭراپ تۇرسۇن قەلبىڭدىكى مۇڭ -سۈرەن ،
تېگىشمىگىن ئۇنى يىغا - ھازىغا.
2013-يىلى 3-ئىيون
مەنبە: يازما ئىگىسىنىڭ تەلىپى بويچە يوللاندى
بۇ يازمىنى ئاخىرىدا مۇبارەك تەھرىرلىگەن. ۋاقتى 2013-6-4 15:08
يوللىغان ۋاقتى 2013-6-3 21:42:07
