ئاپامنىڭ تاققا- تۇققا گەپلىرى

زەيتونە

	ئاپامنىڭ  تاققا- تۇققا گەپلىرى ئاپا ، مەن تۇغۇلۇپ ھازىرغىچە ماڭا قانچىلىغان تاققا –تۇققا گەپلەرنى قىلغىنىڭنى بىلەمسەن ؟ ئاڭلا ، مەن دەپ بېرەي : ئەمدىلا ئىسىمنى تاپقان ۋاقىتلىرىمغۇ دەيمەن  ناشتىلىق يەۋاتقاندا سەن دائىم " كۆپرەك يېگىن ئەتىگەنلىك ناشتا بەك مۇھىم ! "دەيتتىڭ ، بەزىدە تاماق ئۈستىلىمىزدە مەن ئەڭ ئامراق پىلتە قۇيماق پەيدا بولۇپ قالغاندا ئىككى قۇلۇمغا بىردىن ئېلىۋېلىپ نەچچە كۈن ئاچ قالغاندەك يالماپ يۇتۇۋاتقاندا سەن يەنە "ئازراق يە ! كۆپ يەۋالما ، كېسەل بولۇپ قالىسەن ! " دەيتتىڭ . قارا بۇ گەپلىرىڭنى بىردەم كۆپرەك يېگىن بىردەم ئازراق يېگىن دەپ زىددىيەتلىكمىكەن ؟ مەن بىلەتتىم ، يۇرتتىكى ئۇرۇق-تۇغققانلار ئەۋەتكەن يەرلىك مەھسۇلاتلارنى ئۆزۈڭ بىرەر چىشلەممۇ يېمەي تىقىپ قۇيۇپ ماڭا ئاز-ئازدىن ئىلىپ بېرىدىغىنىڭنى . مەكتەپكە كىردىم ،ھەر ئەتتىگىنى" ئاپئاق قوزام تېزرەك بول مەكتەپكە كېچىكىپ قالىسەن ! ھاۋا سوغۇق چاپىنىڭنى كىيىۋال ! "دەيتتىڭ بىراق ئىشىكتىن چىقىپ نەچچە قەدەم ماڭمايلا يەنە  "ئاستىراق ماڭغىن ماشىنىلاردىن پەخەس بول ، ئاستا !"دېگەن سۆزلىرىڭ قۇلاق تۈۋۈمدە جاراڭلايتتى . كىيىن بىلدىم ئاپا ، مىنىڭ كېچىكىپ قىلىپ ئوقۇتقۇچىم  ئالدىدا بېشىمنىڭ پەس بولۇشىنى خالىمايتتىڭ لېكىن كۆز ئالدىڭدىن ئازراق نېرى بولۇشۇم بىلەنلا مىنىڭ قانداقتۇر تېز سۈرئەتتە كېتىۋاتقان ماشىنىلارنى ، كىملەردۇر كولاپ قۇيۇپ ئۇنتۇپ قالغان ئورەكلەرنى كۆرمەي قىلىشىمدىن ئەنسىرەيتتىڭ . شۇڭا ھېلى تېزرەك ماڭ دېسەڭ ھېلى ئاستىراق ماڭ دەپتىكەنسەن شۇنداقمۇ ؟ تۇلۇق ئۇتتۇردا ئوقۇۋاتقان چاغلىرىم ،  تاپشۇرۇقنىڭ كۆپلۈكىدىن يېرىم كېچىگىچە ئىشلىسەممۇ تۈگىمەيتتى ، ھەرئاخشىمى  بىر ئىستاكان ئىسسىق سۈتنى كۆتۈرگەن پىتى يېنىمدا پەيدا  بۇلاتتىڭ ، "يەنە قانچىلىك قالدى ؟ قانداق مۇئەللىم ئۇ ، شۇنچە كۆپ تاپشۇرۇق بېرىدىغان ! بولدى بالدۇرراق يىتىپ ئۇخلا ، " لېكىن مەن سۈتنى ئىچىپ بولۇپ ئىستاكاننى ساڭا ئۇزاتقان چىغىمدا بولسا " بالام مۇئەللىملەرمۇ سىلەرگە ياخشى بولسۇن دەيدۇ ، ئۇنىڭ ئۈستىگە يىگىت دېگەن بۈگۈنكى ئىشنى ئەتىگە قويمايدۇ ، يەنىلا بۈگۈنكى تاپشۇرۇقىنى ئىشلەپ بولۇپ ياتقىن " دەيتتىڭ . بىلىمەن ئاپا ، يۈرەك پارەڭنىڭ چارچاپ ھالىدىن كەتكەنلىكىگە چىدىمايتتىڭ بىراق يەنە كېيىنكى ھاياتىمنىڭ ئاساسىنى سالىدىغان مۇھىم پەيتلىرىمنى قەدىرلىشىمنى ئۈمىد قىلاتتىڭ ، " بولدى ئۇخلا " دېگەن ۋاقىتلىرىڭدا ئۇيقۇدىن قىزىرىپ كەتكەن كۆزلىرىڭنىڭ  " غەيرەت قىل بالام ، تاپشۇرۇقۇڭنى تۈگىتىپ ئۇخلا " دەۋاتقانلىقىنى ھېس قىلاتتىم .توغرا دېدىممۇ ؟ تۇلۇق ئۇتتۇرنى پۈتتۈرىدىغان يىلى دائىم ماڭا " ھەرگىز بالدۇر مۇھەببەتلىشىپ قالما ، ئوغۇل بالىغا كەسىپ ئەڭ مۇھىم ، ھەر ئىشنىڭ ۋاقتى بولىدۇ ، ھازىر ئۆگىنىدىغان ۋاقتىڭ ، مۇھەببەتلىشىدىغان ۋاقتىڭ ئەمەس " دەيتتىڭ ، لېكىن يەنە تېلېفونۇمغا مۇنداق ئۇچۇر يوللاپ قويغانتىڭ " بالام ، مەكتىپىڭلاردا چىرايلىق گۈللەر بەك كۆپ شۇنداقمۇ  ؟ ئېسىڭدە تۇت ھەرگىز بىرەر گۈلنىڭ يېنىدا ئۇزاق تۇرۇپ قالما ، كېتەلمەي قالىسەن ، لېكىن ئالاھىدە چىرايلىق ، خۇش پۇراق ، ئېسىل گۈللەر بۇنىڭ سىرتىدا " بىلىمەن ئاپا ، ئوغلۇڭنىڭ ئوقۇشنى ، كەسىپنى دەپ ئۆزى ياخشى كۆرگەن قىزدىن ئايرىلىپ قىلىپ مەڭگۈلۈك پۇشايمانغا قىلىشىنى ئەسلا خالىمايتتىڭ . ئالىي مەكتەپكە ئوقۇشقا ماڭىدىغان بولدۇم  . كىيىم كېچەكلىرىمنى رەتلەۋېتىپ مۇنداق دېدىڭ " بالام ، ئوغۇل بالا دېگەن بەك مودا قوغلىشىپ كەتسە چاكىنا كۆرۈنۈپ قالىدۇ ، شۇڭا  بەك مودا قوغلىشىپ كەتمە ، رەتلىك ، پاكىز كىيىنسەڭمۇ بولىدۇ ." بىراق ئەتىسى دادام ئىككىمىزنى پويىز ئىستانسىغا ئۇزىتىپ چىققاندا دادامغا كۆرسەتمەي تۇرۇپ قۇلۇمغا 500يۈەن پۇلنى تۇتقۇزوپ قۇلىقىمغا " ئوغلۇم ، ئەرزان باھالىق كىيىملەر ئەر كىشىنىڭ سالاپىتىنى بۇزىدۇ ، ئۇنىڭ ئۈستىگە بوينىڭ قىسىلىپ قالىدۇ ، بىر نەچچە قۇر قىممەترەك كىيىم سېتىۋال " دەپ پىچىرلىدىڭ . ئەلۋەتتە ، ئەينى ۋاقىتتا سۆزلىرىڭ ماڭا شۇنچىلىك كۈلكىلىك ، بىھۇدە تۇيۇلغان لېكىن ئۆزۈمنىڭ بالىسى بولۇپ ئاتا-ئانا قەلبىنى چۈشەنگەن ۋاقتىمدىلا سىنىڭ ئاشۇ زىددىيەتلىك گەپلىرىڭنىڭ مېنى ھەدىدىن زىيادە ياخشى كۆرگىنىڭ ئۈچۈن ئىكەنلىكىنى ، ھەممىسى مەن ئۈچۈن ، مىنىڭ بەختىم ، كەلگۈسىم ئۈچۈن ئىكەنلىكىنى چۈشەندىم جىنىم ئاپا ! ئاپا ، ئوغلۇڭ تاققا –تۇققا گەپلىرىڭنى چۈشەندى ، مەن چوڭ بۇپتىمەنمۇ ؟ مەنبە : خەنزۇچە «سىنى سۆيىمەن » ژۇرنىلىنىڭ 2012يىللىق 10- سانىدىن تەرجىمە قىلىندى

behlan

	چوڭقۇر ئانىلىق مۇھەببەتكە تۇيۇنغان شۇ تاققا -تۇققا گەپلەرنى كېچىكىپ چۈشىنىمىز ، تولىمۇ كېچىكىپ .......... بەك ياخشى تېمىكەن ، رەھمەت سىزگە زەيتۇنە!

ablikim1239

	بىر ئۆمۈرلۈك تارىخنىڭ قىسقارتىلىمىسى.

yarun

	سىزگە ئىنىڭىزدىن بەكرەك كۆيۈنۈپ باققان بىرەسىنى كۆرۈپ باققانمىدى ڭىز؟