ياۋروپادا كۆرگەنلىرىم ۋە كۆرمىگەنلىرىم

uyghari

	پىنسىيەگە چىققاندىن بۇيان بىرەر جايغا ساياھەتكىمۇ بېرىپ باقماپتىمەن . ئەندى كېلىپ بىراقلا ياۋروپاغا بېرىپ تۇغقان يوقلاش ، ساياھەت قىلىش پۇرسىتىگە ئېرىشىپ قالدىم . تەستە قولغا كەلگەن بۇ ياخشى پۇرسەتنى قولدىن بېرىپ قويغۇم كەلمىدى ، دەرھال بېيجىڭگە بېرىپ مۇناسىپ رەسمىيەتلەرنى بىجىرىۋالدىم-دە ،يەر يۈزىدىن ئون ئىككى مىڭ  مېتىر ئىگىز ھاۋا بوشلۇقىدا ئون سائەت پەرۋاز قىلغاندىن كىيىن ،  ئۆزەمنى ياپيېشىل گرمانىيە بوستانلىقىدا كۆردۈم .     پاھ ، بۇ نىمىدىگەن ئېسىل زىمىن ھە!  مەن ئايرۇدۇرۇمدىن شەھەرگە كېتىۋېتىپ ،  ماشىنىنىڭ ئەينىكىدىن يولنىڭ ئىككى تەرىپىدىكى گۈزەل مەنزىرىلەرگە تويماي قارايتتىم ، بۆك-باراقسان ئورمان ، ياپيېشىل چىمەنزارلىق ئىچىدە كېتىۋاتىمەن .  مانا ،  ئايرىلىپ كەتكىلى  8  يىل بولغان قىزىمنىڭ ئۆيىگىمۇ يېتىپ كەلدىم ، 90 كۈنلۈك تۇغقان يوقلاش ساياھېتىمنىڭ پەردىسى ئېچىلدى .     مىنىڭ ياۋروپادىكى كۈنلىرىم قەدىمىي شەھەرلەردە ، گۈزەل مەنزىرىلىك سەيلىگاھلاردا ، تارىخىي مەدەنىيەت يادىكارلىقلىرىدا ئۆتتى .  گېرمانىيەنىڭ  ئىككىنچى چوڭ شەھىرى ميۇنخېن ،  ياۋروپا بۇيىچە  ئەڭ ئىگىز چىركاۋ جايلاشقان شەھەر  كۆلىن ،   دونياغا داڭلىق  گۈزەل شەھەر  پارىژ ، ياۋروپا  ئىتتىپاقىنىڭ مەركىزى بىريۇسسىل ، بېلگىيەنىڭ مۇھىم پورت شەھىرى ئانتۋېرپېن ، قەدىمىي شەھەر گېنت ،  شىمالى دېڭىز قىرغىقىدىكى سۇ شەھىرى ئامىستىردام ،  فورتاۋا دەرياسى ساھىلىگە  جايلاشقان  قەدىمىي شەھەر  پراگا  قاتارلىق  جايلاردا مىنىڭ قەدەم ئىزلىرىم قالدى .    ھەش-پەش دىگىچە  ئۈچ ئاي  ۋاقىت  ئۆتۈپ  كەتتى ، گۈزەل ياز كېتىپ ، كەچكۈز كەلدى . ھاۋا رايىنىڭ ئۇشتۇمتۇت  ئۆزگىرىشى  بىلەن  يەر يۈزى  ئاق لىباس  كېيىشكە  باشلىدى .  مەن  غەربى  ياۋروپا  بىلەن شەرقىي ئاسىيا ئوتتۇرىسىدىكى يوقۇرى ھاۋا بوشلۇقىدا  يەنە بىر قېتىم  پەرۋاز قىلىپ بېيجىڭگە قوندۇم .  ئوت ھارۋىسى مىنى  ئۆيۈمگە  يەتكۈزۈپ  قويدى . بىراق  ، ئۆزەم  ئۆيدە  تۇرساممۇ ،  ياۋروپادا  ئۆتكەن  ئەشۇ كۈنلىرىم زادىلا خىيالىمدىن  كەتمەيتتى .  چۈنكى  مەن  ئۇيەردە  كۆرمىگەننى  كۆرۈپ ،   تەبىئەتنىڭ   گۈزەللىكىدىن   قانغىچە ھۇزۇرلىنىپ ، نەزەر دائىرەم كېڭىيىپ ، روھىم كۆتىرىلىپ قالغان ئىدى .    قايتىپ  كەلگەندىن  كىيىن ،  ياۋروپا  ساياھىتىنىڭ  كۆڭۈل خاتىرەمدە قالدۇرۇپ قويغان ئەسلىمىلىرىنى كومپيۇتېر  ئېكرانىغا  چۈشۈرىۋېلىش  ئىستىكى  توغۇلدى ،  بۇ بىر  ئۆمۈرلۈك خاتىرە بولۇپ  قالاتتى .  ئەمما بۇ خاتىرىنى نەدىن باشلاشنى  بىلەلمەي  بىر  ھازا تۇرۇپ قالدىم ،  نەدىن باشلىسام بولار ؟  مەن  ياۋروپادا  توپ- توغرا  ئۈچ  ئاي  سەيلە - ساياھەتتە  بولدۇم  ،  كۆرگەنلىرىم  ناھايتى  كۆپ ،  كۆرمىگەنلىرىممۇ  بار .  توغرا ، خاتىرىنى مۇشۇ يەردىن باشلاي .    مەن  ياۋروپادا  نىمىلەرنى  كۆردۈم ؟  راست گەپنى قىلسام ،  مەن ئۇ يەردە  تەرەققى قىلغان ،  زامانىۋىيلاشقان ،  قانون - تۈزۈملەشكەن  يىپ - يېڭى  بىر  دونيانى  كۆردۈم ؛   ئورمانلاشقان ،  باغچىلاشقان ،   گۈل- چىمەنلەرگە تولغان ،  ساپ ھاۋالىق  گۈزەل مۇھىتنى كۆردۈم ؛  ئۆيلەرگە ئوغرى كىرمەيدىغان ، ماشىنىلار كېچە- كۈندۈز   كوچىدا  توختىتىپ   قويۇلسىمۇ  ھىچكىم   چېقىلمايدىغان ،  قالايمىقانچىلىقتىن  خالى  تېنچ - ئامان جەمئىيەتنى  كۆردۈم ؛  پۇقرالارنىڭ  توغۇلغاندىن  تارتىپ  ئۆمرىنىڭ  ئاخىرغىچە  بولغان تەربىيىلىنىش ، بىلىم ئېلىش ،  ئىشقا  ئورۇنلىشىش ،  داۋالىنىش ،  دەم ئېلىش  قاتارلىق  ياشاش  ھوقوقلىرى  تولۇق كاپالەتكە ئىگە بولغان  ئىجتىمائىي  كاپالەتنى  كۆردۈم ؛  پاراخورلۇقنىڭ  بازىرى  بولمىغان ،  ئېرق ، دىن ، مىللەت ئايرىلماي ، ھەممە  ئادەم  باراۋەر  ھالدا  ئىشقا  ئورۇنلىشىدىغان  ئادىللىقنى  كۆردۈم ؛  ھوقوق  قانونغا  بويسۇنىدىغان ، قانون  ئالدىدا  ھەممە  ئادەم  باراۋەر  بولىدىغان ،  قانونغا ،  ئەخلاققا   خىلاپ  قىلمىشلارغا  يۇمشاق  قوللۇق قىلمايدىغان  ئادىللىقنى  كۆردۈم ؛  ئوخشاش  بولمىغان  مىللەتلەرنىڭ ئوخشاش بولمىغان كېيىنىش ، ياسىنىش ئادەتلىرىگە  ھۆرمەت  قىلىدىغان ،  ئۇنىڭغا ھىچقانداق چەكلىمە قويۇلمايدىغان ئەركىنلىكنى كۆردۈم ؛  يولۇچىلارنىڭ  ئېھتىياجىنى  ھەر ۋاقىت  قاندۇرىدىغان ،  ئەرزان ،  قولايلىق ،  تېز ،  بىخەتەر بولغان زامانىۋىي قاتناش شارائېتىنى  كۆردۈم ؛  شەھەردىكى  قاتناش  ۋاستىلىرى  بىلەن  پىيادىلەر  بىر-بىرنىڭ  يولىغا كىرىۋالماي ، ھەر قايسىسى  ئۆز  يولىدا  ماڭىدىغان ،  قىزىل ، يېشىل چىراق يوق جايلاردا ماشىنىلار پىيادىلەرگە يول بىرىدىغان ، قاتناش ھادىسلىرى ئاساسەن  يۈز بەرمەيدىغان  ياخشى تەرتىپنى كۆردۈم ؛   تەبىئەتنى سۆيىدىغان ، تەبىئەتنى قوغدايدىغان ،  ئادەم  بىلەن  تەبىئەت  ئىناق  ياشايدىغان زىمىننى كۆردۈم ؛  ۋاراڭ-چۇرۇڭ ،  شاۋقۇن-سۈرەن بولمىغان ،  پۇقرالار  خاتىرجەم  خىزمەت ،  ئۆگىنىش ،  سودا-سېتىق قىلالايدىغان ،  ئارام ئالالايدىغان تىپتېنچ ماكاننى  كۆردۈم ؛  بىجىرىشكە  تىگىشلىك  ئىشنى  باشقىلاغا  ئىتتىرمەي ،  ئارقىغا سۆرىمەي ،  ھاجەتمەنلەرگە ئاۋارىچىلىق  سالماي ، ۋاقتىدا  تېز  بىجىرىپ  بىرىدىغان  ئۈنۈملۈك  مۇلازىمەتنى  كۆردۈم ؛  يالغان ،  ساختا ، ناچار مال تېپىلمايدىغان ،  ئىستىمالچىلارغا  ئەمەلى  نەپ  بېرىدىغان ،  خېرىدارلار  رازى  بولىدىغان  ھەقىقى بازارنى  كۆردۈم ؛  ئەسلى قىياپىتى بويىچە  بۇزۇلماي  تۇرغان قەدىمىي  ئۆي-ئىمارەتلەرنى ، ياخشى قوغدىلىپ كېلىۋاتقان مەدەنىيەت يادىكارلىقلىرىنى كۆردۈم .    مانا بۇلار مىنىڭ ياۋروپادا كۆرگەنلىرىم .  ئەلبەتتە  كۆرمىگەنلىرىممۇ  بار ،  مەسىلەن ، يۇرتۇمدىكىگە ئوخشاش  تۆمۈر  يول ،  تاشيول  بويلىرىدا  قاغجىراپ  كەتكەن  قاقاسلىق ،  سايلىقلارنى ، چۆل-جەزىرىلەرنى كۆرمىدىم ؛  ھۆكۈمەت  دوختۇرخانىلىرىنىڭ  ئامبولاتۇرىيىسىدە  كېسەل  كۆرسىتىشنى ،  تەكشۈرتۈشنى  كۈتۈپ ئولتۇرغان  مىغ-مىغ  ئادەملەر  توپىنى  كۆرمىدىم ؛    ۋوگزاللاردا ،  ئۇزۇن  يوللۇق   ئاپتۇبۇس   بېكەتلىرىدە « بىخەتەرلىك   تەكشۈرۈش »  ىنى    ۋە   « پويىز كۈتۈش زالى » ،  « ئاپتۇبۇس كۈتۈش زالى »   دىگەنلەرنى كۆرمىدىم ؛  مېترو ،  تىرامۋاي  ۋە  كوچا  ئاپتۇبۇسلىرىغا بىر-بىرىنى ئىتتىرىشىپ ،  قىستىشىپ چىقىۋالىدىغان، ياشانغانلار  ۋە  ھامىلدارلارغا  ئورۇن  بوشىتىپ  بەرمەيدىغان  ئەخلاقسىزلىقنى كۆرمىدىم ؛  ھەرخىل  قاتناش ۋاستىلىرى  يول  تالىشىپ ،  بىر-بىرنى  يانداپ  ماڭىدىغان ،  پىيادىلەر ۋە قاتناش ۋاستىلىرى قىزىل چىراقنى بۆسۈپ ئۆتىدىغان ،  ماشىنىلارنى  خالىغان  جايدا  قالايمىقان  توختىتىدىغان  قائىدىگە  خىلاپ  قىلمىشلارنى كۆرمىدىم ؛   ئىش  بىجىرىشتىكى   بىپەرۋالىق ،  مەسئۇلىيەتسىزلىك ،  مەنپەئەتپەرەسلىك  ۋە  سۆرەلمىلىكنى كۆرمىدىم ؛  كوچا  دوقمۇشلىرىدىكى  ساقچى  بوتكىلىرىنى ،  كوچىمۇ - كوچا  چارلاپ  يۈرىدىغان  ساقچىلارنى كۆرمىدىم ؛   بىنانىڭ   يوقۇرى  قەۋىتىدە  ئولتۇرغانلار  خالىغانچە  تاراق - تۇرۇق  قىلىپ ،   تۆۋەن   قەۋەتتە ئولتۇرغانلارنىڭ  ئارامىنى  بۇزىدىغان  مەدەنىيەتسىزلىكنى   كۆرمىدىم ؛  رېستۇرانلارنىڭ  تاماق   ئۈستەللىرىدىكى  ھەشەمەتچىلىك ،  مەيخورلۇق ،  ئىسراپچىلىقنى كۆرمىدىم ؛  كوچىلاردا  يايمىچىلارنى ،  مالنى كۆتىرىپ يۈرۈپ  ساتقۇچىلارنى ،  ھارۋا  ئىتتىرىپ  مىۋە-چىۋە  ساتىغان  باققاللارنى كۆرمىدىم ؛  سودا  دوكانلىرىنىڭ ئالدىدا  ئەتىدىن  كەچكىچە  شاۋقۇن   سېلىپ  ۋارقىراپ  تۇرىدىغان  ئاۋاز ياڭراتقۇلارنى كۆرمىدىم ؛ كوچىنىڭ تاملىرىغا ،  ئېلان  تاختىلىرىغا ۋە  ئاسفالت  يول  يۈزىگە  يېزىلغان  ساختا  گوۋاھنامە   ياساش تېلىفۇن نومۇرلىرىنى كۆرمىدىم ؛  كۆرگەنلا  يەرگە  تۈكۈرىدىغان ،  مىۋە شۇپۇكلىرىنى ،  ئىچىملىك  قۇتىلىرىنى  تاشلايدىغان مەدەنىيەتسىز  كىشىلەرنى  كۆرمىدىم ؛  بۇلۇڭ-پۇشقاقلارغ ا توپلىشىۋېلىپ  قارت ، شاھمات ئوينايدىغانلارنى ، كوچىلاردا  لاغايلاپ  يۈرۈيدىغان  بىكار  تەلەتلەرنى ،  دەلدەڭشىپ ماڭالماي كوچىلاردا يېتىپ قالغان زابويلارنى كۆرمىدىم .   قىسقىسى ،  يۇرتۇمدا  كۆرگەنلىرىمنى  ياۋروپادا   كۆرەلمىدىم ،   ياۋروپادا  كۆرگەنلىرىمنى  يۇرتۇمدا كۆرەلمىدىم .  بۇ  ئىككى  جاي  ئوتتۇرىسىدىكى  پەرق  نىمىدىگەن چوڭ-ھە! «ياۋروپادا كۆرگەنلىرىمنى يۇرتۇمدىمۇ  كۆرەلىگەن  بولسام ،  ياۋروپادا  كۆرمىگەنلىرىمنى  يۇرتۇمدىمۇ   كۆرەلمىگەن  بولسام   قانداق   ياخشى بولاتتى ! »  دەپ  ئويلۇدۇم  ئىچىمدە .  بىراق ، بۇ پەقەتلا مىنىڭدىكى بىر ئارزۇ ، خالاس . بۇ ئارزۇنىڭ يېقىن مەزگىلدە  رىئاللىققا  ئايلىنىشىنى  تەسەۋۋۇر  قىلىش  تەس ،  بەلكى ئۇنىڭغا خېلى ئوزاق بىر جەريان كېتىشى ، پەقەت كېيىنكى ئەۋلاتلىرىمىزلا ئۇنى كۆرەلىشى مومكىن .    مەن  بۇ يەردە  باشقىلارنى كۆتىرىپ ئۆزىمىزنى چۈشۈرمەكچى ئەمەس . بىزدىمۇ يېقىنقى يىللاردىن بۇيان تەرەققىيات  ناھايتى  تېز  بولىۋاتىدۇ ،  ئۆزگىرىش  ھەقىقەتەن  زور .  لېكىن مەن يەنىلا ياۋروپادىكى تەرەققى قىلغان  دۆلەتلەرنىڭ  ئىقتىساد ،  پەن-تېخنىكا  جەھەتتە ، ماددى ، مەنىۋىي مەدەنىيەت جەھەتتە بىزدىن كۆپ ئىلغار  ئىكەنلىكىنى  ئېتىراپ  قىلماي  تۇرالمايمەن .  بۇ خىل  ئېتىراپ  قىلىش  مىنى  ئۆزىمىزنىڭكىنىلا ياخشى ، ئۆزىمىزنىڭكىنىلا  توغرا دەپ قارايدىغان  تار  نۇقتىئىي نەزىرىمىز  ئۈستىدە قايتا ئويلۇنۇشقا دەۋەت قىلىۋاتىدۇ . بىر مەسەلدە ئېيتىلىشىچە ،  بىر  پاقا  قۇدۇقنىڭ ئىچىدە تۇرۇپ  « دۇنيانىڭ  چوڭلۇقى  پەقەت مۇشۇ قۇدۇقنىڭ ئاغزىچىلىكلا » دەپتىكەن .  ئادەم  سىرتقا چىقمىسا ، خۇددى  ئەشۇ  پاقىغا  ئوخشاش تار نەزەر دائىرە ئىچىدە توختاپ  قالىدىكەن .  سىرتقا چىقسا ،  نەزەر  دائىرىسى  كېڭىيىدىكەن ،  باشقىلارنىڭ  يۇرتىنى ،   قىلىۋاتقان ئىشلىرىنى  كۆرۈپ ،  ئۇنى  ئۆز  يۇرتى  بىلەن  سېلىشتۇرۇپ  باققۇسى  كېلىدىكەن .  مۇشۇنداق سېلىشتۇرۇش ئارقىلىق ، خۇددى  ئەينەككە  قارىغانغا  ئوخشاش ،  يۇرتىمىزدىكى ،   مەنىۋىيىتىمىزدىكى  ئىللەتلەرنى  كۆرەلەيدىكەنمىز .   دىمىسىمۇ  بىزدە  تەرەققىياتىمىزغا  توسالغۇ  بۇلىۋاتقان  مەنىۋىي  ئىللەتلىرىمىز  ئاز  ئەمەس .ئالايلۇق ، ھوقوق  ئارقىلىق  ئىدارە  قىلىشنى  قانون  ئارقىلىق  ئىدارە قىلىشنىڭ ئورنىغا دەسسىتىش ،  خەلق بەرگەن  ھوقوقنى  ئۆزىگە  بايلىق  توپلاشنىڭ  ۋاستىسى  قىلىۋېلىش ،  پۇقرالارغا  باراۋەر مۇئامىلە قىلماسلىق ،پۇقرالارنىڭ قانونى ھوقوق مەنپىئەتىگە خالىغانچە دەخلى-تەروز يەتكۈزۈش ، قانون-نىزام بۇيىچە بىجىرىلىدىغان ئىشنى پۇل ئارقىلىق بىجىرىش ،   شەكىلۋازلىق ، ساختىلىق ، يالغانچىلىق ، مۇبالىغىچىلىق ، ياسالمىلىق ، كۆزبويامچىلىق بىلەن يوقۇرىنى ئالداپ ئۆتكەلدىن ئۆتىۋېلىش قاتارلىق ئىللەتلەر پارتىيە ، ھۆكۈمەتنىڭ ئوبرازىغا ،پارتىيە ، ھۆكۈمەت بىلەن خەلقنىڭ مۇناسىۋېتىگە زىيان يەتكۈزۈپ ،  تەرەققىياتىمىزغا پۇتلىكاشاڭ  بولىدىغان مەنىۋىي كىشەنلىك رولىنى ئوينىماقتا .  بىزنىڭ  ئىنچىكە  ۋە  مۇكەممەل  بولمىغان ،  قەغەزدە بار ئەمەلدە يوق قانونلىرىمىز  بۇنداق مەنىۋىي  كىشەنلەرنى چۆرۈپ تاشلاشقا تېخى قادىر ئەمەس . شۇڭلاشقىمۇ « تېزىنى باسسا مېزى ، مېزىنى باسسا تېزى » چىقىۋالىدىغان پاسسىپ ھالەتتىن قۇتۇلالمايۋاتىمىز .   ياۋروپادىكى  تەرەققى  قىلغان  دۆلەتلەردە  قانوننىڭ  كۈچ-قۇدرىتى  ئالاھىدە  چوڭ  بولۇپ ، چوڭ-كىچىك  ئىشلارنىڭ  ھەممىسى  قانون ئارقىلىق باشقۇرىلىدىكەن ،  دۆلەتنىڭ پىرىزدىنتى ۋە باش مىنىستىرىدىن تارتىپ  تۆۋەن  دەرىجىلىك  ئەمەلدارلارغىچە  ھەممىسى  قىلنى قىرىق يارىدىغان قانوننىڭ قاتتىق تىزگىنلىشى ئاستىدا ئىشلەيدىكەن ،  ھىچكىم قانون يولىدىن چىقىپ خالىغانچە ئىش كۆرۈشكە پېتىنالمايدىكەن .  شۇنداق بولغاشقا ،  بۇ دۆلەتلەر بىزدىن خېلى بۇرۇنلا تەرەققى قىلىپ ،  بۈگۈنكىدەك زامانىۋىيلاشقان ، پاراۋان دەۋىرگە قەدەم قويغان . بۇ بىزنىڭ ئەينەك قىلىشىمىزغا ئەرزىمەمدۇ ؟!    گەپنىڭ قىسقىسى ،  قانونلىرىمىزنى  مۇكەممەللەشتۈرۈپ ،  ئۇنىڭ  نۇپۇزىنى  تىكلىمىسەك ،  مەنىۋىيىتىمىزدىكى  تۈرلۈك  ئىللەتلىرىمىزنى  سۈپۈرۈپ  تاشلىمىساق ،  ئۆزىمىز  بىلەن تەرەققى قىلغان دۆلەتلەر ئوتتۇرىسىدىكى  پەرقنى  تۈگىتىش  مەقسىدىگە  يىتەلمەيمىز .      مانا  بۇ  مىنىڭ  ياۋروپادا كۆرگەنلىرىم ۋە كۆرمىگەنلىرىمدىن چىقارغان ئاددى خۇلاسسەم .

mardan1103

	بىزنىڭ دۆلەتتە  نوپۇس بەك جىق ، شۇڭا نۇرغۇنلىغان ئىشلار بىزنى بىئارام قىلىدۇ ، ئادەم جىق بولغاندىكىن ئۇنى قانۇن بويىچە  باشقۇرماق  ئاسان ئەمەس،  سىزنىڭ ئافرىقىدىكى دۆلەتلەرگە بىرىپ باققان بولسىڭىز جوڭگۇ كۆزىڭىزگە باشقىچە كۆرىنەتتى ، ئىشقىلىپ مەدىنىيەت ئاساسى ۋە ئىجدىمايى ئورنى ئوخشاش بولمىغان ئىككى دۆلەتنى سىلىشتۇرۇش ئاقىلىنارلىق ئىش ئەمەس،

ihwa ھەقىي سالاھىيەتلىك ئەزا

	يازمىڭىزنى ئۇقۇپ مەندىمۇ  نەزىرىمگە ئىلىنمىگەن بەزىبىر ئويلىنىشلار پەيدا بولدى . ئەھۋال ھەقىقەتەن شۇنداق بولسا ، پەرق يوق دىيىشنىڭمۇ ئورنى يوقكەن . ئەمدى سىزگە تەۋسىيە قىلاي . سىز يەنە شۇ يۇقىرقىدەك سېلىشتۇرۇش ۋاستىسى بىلەن بىزدىكى مەدەنىي بولغان ياكى ئىلغار مەدەنىيەتكە ۋەكىللىك قىلالايدىغان ھەمدە ياۋرۇپادىكى مەدەنىيەتسىزلىككە ياتىدىغان قىلمىش ئەتمىشلەردىن ئاز تۇلا بايان قىلىپ سېلىشتۇرۇپ بېرىڭ !؟ يەنە كۆزىمىز ۋە تەپەككۇرىمىز ئېچىلىپ قالسۇن . بىزمۇ شۇ يازمىڭىزنى ئۇقۇش ئارقىلىق ئۆزىمىزنىڭ زادى نانقېپى يارىماس ئەمەسلىكىمىزنى بىلىپ ئۆزىمىزەە ئاز تۇلا تەسەللىي بىرىۋالايلى . ماقۇل كۆرسىڭىز قېنى ئەمىسە ...

iminov

	تولىمۇ بىرتەرەپلىمىلىك بىلەن يېزىلغان ئەسەركەن.ياۋروپانى مۇكەممللىك بىلەن ۋە ۋەتىنىمىز جۇڭگونى پاسسىپلىق بىلەن تەرىپلەپسىز.سىز 90كۈن ساياھەتتە بولغان ياۋروپا ھېچقاچان ھەرۋاقىت تىپتىنچ تۇرىدىغان ۋە ھەممە نەرسە گۈزەل ھالەتتە تۇرىدىغان ماكان ئەمەس.كۆرگىنىڭىز ھەممىسى پەقەت شۇ جاينىڭ ئەڭ سىرتقى مەنزىرىسى.سىزنىڭ ساياھىتىڭىز پەقەت مەنزىرە ۋە ۋەتەن سېلىشتۇرمىسى ئىچىدە قاپتۇ.يەنىمۇ چوڭقۇر تەپەكككۇر قىلسىڭىز ئۇلاردىمۇ نۇرغۇن بىزدە بار نەرسىلەرنىڭ يوق ئىكەنلىكىنى بايقايتتىڭىز.ياۋروپا ھەرەگىزمۇ سىزنىڭ تەسۋىرلىگىنىڭىزدىكىدەك ئۇ دەرىجىدە مۇكەممەل ئەمەس.ئەسەر يازماقچى بولسىڭىز 90كۈنلۈك ساياھەت ئىلھامىڭىز سۇسلاشقاندا قايتا كومپىيۇتىر ئالدىغا كېلىشىڭىزنى تەۋسىيە قىلىمەن.

riwayatnur

	ياخشى يىزىپسىز ....بولۇپمۇ بەزى يەرلەرنى...

barkatjan

مۇبارەك

	مەنچە ساياھەت قىلىشنىڭ بىردىن-بىر ئۆلچىمىنى يۇرتىمىز ھەم مىللىتىمىز بىلەن سېلىشتۇرۇش دەپ ھېس قىلىۋېلىپ ھەم شۇ يۆلىنىش بىلەن ئويلىنىش ھەم بىرنەرسە يېزىشنىڭ ئانچە قىززىقى قالماپتۇ. كىچىك-كىچىك ۋەقەلىك ياكى بولمىسا بىرەر ئېغىز مەنىلىك گەپمۇ جىق نەرسىلەرنى چۈشەندۈرۈپ بېرەلەيدۇ. دەسلەپتە تېما ماۋزۇسىنى كۆرۈپ چوقۇم رەسىملەر كىرىشتۈرۈلگەن، ئوماق ھېكايىلەر، تەسىرلىك خۇلاسىلەر بار خاتىرىمىكىن، دەپرەك ئويلىغانتىم. بۇ بەلكىم پىنسىيىگە چىقىپ بولغان داداشنىڭ ياش پەرقى بىلەن مۇناسىۋەتلىك بولىشى مۇمكىنغۇ-ھە! مېنى قويۇپ بەرسە كوچىدا ماروژنا يەپ ماڭغان سېرىق بۈدرە چاچلىق گىرمان قىزچىقىنىمۇ ھارماي يازغان بولاتتىم. دېمەكچى، ئادەم بىلەن ئادەمنىڭ شەيئى ياكى ۋەقەلەرگە تۇتقان پوزىتسىيى ھەم قاراش سەزگۈسى ئوخشاش بولمايدۇ، ئوخشاش بولمايدىكەن. سىز قومۇلغا قوغۇن يېيىش ئۈچۈن كېلەمسىز؟ ياكى «قوغۇنچى قىز»نى كۆرۈش ئۈچۈنمۇ؟ ئۇنداق بولسا بولمايدۇ. شائىرە رىسالەت مەرداننىڭ شېئىرى مىسرالىرى بويىچە: قومۇلغا كەلدۇق، قومۇلدا قومۇل يوق، تاغلار قومۇللۇق... دېگەندەك ئويدا كەلسىڭىز قومۇلنى ئوبدانراق چۈشۈنۈپ قالىسىز. قوشۇمچە: بۇلارنىڭ بىرى يېنىمىزدىكىلا يۇرت، يەنە بىرى ئوكياننىڭ نېرىسىدىكى يۇرت. پەقەت ئوخشىمايدۇ. قوشۇمچە، قوشۇمچە: تەھرىرلىسەممۇ يەنە شېئىرىي شەكىلدە چىقىپ قاپتۇ.

sawri

	ۋاھ ! ، شۈنچىلك ياخشى ئىشلارنى كۆرۈپسىز . بىلىپسىز .  كاللىڭىز شۇنداق ئىچىلىپ كەتكەندۇ ھەقىچان . داۋاملىق تەسىراتىڭىزنى يېزىشنى داۋاملاشتۇرۇڭ .

iminov

	0991insan يوللىغان ۋاقتى  2013-3-17 12:15 بۇرۇختۇرما مۇھىت ئىچىدە ياشىغان چوشقا مىجەز كىشىلەر ي ... بەلكى سىز دېگەن شۇ بۇرۇقتۇرمىلىقتا قالغان كىشىلەر ياۋروپاغا بارغاندىن كېيىنكى تەسىراتىنى بۇ يەرگە يازغان بولىشى مۇمكىن.ئەگەر سىز ياۋروپادىكى خالىغان دۆلەتتە ھەقىقىي ياشاپ باقسىڭىز،ساياھەت قىلغىلى ئەمەس بەلكى ياشىغىلى بارسىڭىز ئاندىن بۇ قائىدىنى چۈشىنىپ يېتەلەيسىز.ئەلۋەتتە ۋەتىنىمىزدىمۇ ئۇلاردىن كۆپ ئارقىدا تۇرىدىغان تەرەپلىرىنى يوق ئەمەس دېيەلمەيمەن.لېكىن كۆرگەن بىۋاستە تەسىراتىغا تايىنىپلا ھەممىگە بىراقلا باھا بېرىۋىتىش چوڭ خاتالىق.