تىنىقىمدا يانىدۇ بىر ئوت
( ئېھتىرام )
ئۇچقۇن چاچار بۇلاق كۆزلىرىڭ ،
گەپ قىلىشنى بىلىدۇ توۋا !.
قىيا بېقىپ لىۋەن كۈلگىنىڭ ،
شۇنچە نازۇك ،شۇنچە دىلرەبا .
مېنى دەرتكە مۇپتىلا قىلغان ،
شوخلۇقۇڭدىن ئايلىناي ،توۋا !
جىلۋە تۆكۈپ زىناقلىرىڭدىن ،
بوۋاق كەبى كۈلسەڭ ۋىلىقلاپ .
گۈلگۈن لېۋىڭ جىلمىيىپ شۇدەم ،
شوخ ھېسلارنى قويار غىدىقلاپ .
خۇش ھىدىڭدىن مەس بولۇپ كەتتىم ،
ئىچمەي تۇرۇپ ئەسلا مەي –شاراپ .
ساڭا مېھرىم ئوخچىغان دەريا ،
سەن كۈلسەڭلا كۈلەر يۈرىكىم .
سېنى كۆرمەي يېرىم ئۆلۈكمەن ،
سەن بىلەنلا ياشنار تىلىكىم .
بۇلاق كۆزۈڭ مەن ئۈچۈن ئۇۋا ،
ئۈمىت شامىم ،مەرمەر يۈزلۈكۈم .
كۆيدۈم دىگەن چالا ئاشىقنىڭ ،
سۆزلىرىگە سالماسمەن قۇلاق .
سەنلا مېنىڭ بەخت – نىشانەم ،
يۈرەك –پارەم ،جىگىرىم ئوماق .
ئۇنتۇلىدۇ ھەممە ھىكايەت ،
سۆيگەن يارنى قىيىن ئۇنۇتماق .
ئۆكسۈپ- ئۆكسۈپ يىغلىدىم بىر پەس ،
پۇراق چاچماي گۈلزارى بەختىم .
نۇر ياغدۇرساڭ مەرمەر يۈزۈڭدىن ،
شوخ ھېسلارغا چۆمىدۇ قەلبىم .
باسقۇم كېلەر تەشنالىقىمنى ،
باغرىمغا چىڭ تاڭغانچە جېنىم .
سەنلا ماڭا جۆر بولساڭ خەقلەر ،
نىمە دېسە دەۋەرسۇن مەيلى .
سىناق تېشى ئاتىدۇ بەزەن ،
مۇھەببەتكە جۇدالىق پەسلى .
لەيلى بولساڭ ئىشقىڭدا مەجنۇن ،
ئۈزۈلمەستۇر سۆيگۈ داستانى .
مۇھەببەتنى كۈلدۈرسە ئارمان ،
مەن سېنىڭسىز تاپماسمەن ۋىسال .
تىنىقىمدا يانىدۇ بىر ئوت ،
ۋۇجۇدۇمدا گۈلخانلىق بىر ھال .
نازۇك چېھرىڭ قۇياشتەك پارلاپ ،
ئەس- يادىمنى قىلماقتا مالال .
يۇرۇڭقاشنىڭ سۈيىدەك ئۆركەش ،
ياسار دىلدا ئوخچۇپ مۇھەببەت .
تەشنالىقتا سوقاتتى يۈرەك ،
سۈزۈك قەلبىڭ شۇنچىلىك قىممەت .
سۆيگۈ رېڭى ئۆڭمەيدۇ ئەسلا ،
سېنى سۆيسەم ئەبەتتىن –ئەبەت .
( ئېھتىرام يازدى)
(بۇ ئەسىرىم ئاللىقاچانلا مەتبۇئاتتا ئېلان قىلىنىپ بولغان ، شۇڭا باشقا تور بەتلەرگە كۆچۈرىمەن دەپ ئاۋارە بولماڭ . ئەسەر ھوقوقىغا ھۆرمەت قىلىڭ. ئېھتىرام )
يوللىغان ۋاقتى 2010-7-31 13:58:21
