بالىنىڭ قىز ياكى ئوغۇل بولىشى ئانا بىلەن قىلچە مۇناسىۋەتسىز

bilgejan

	بالىنىڭ قىز ياكى ئوغۇل بولىشى ئانا بىلەن قىلچەمۇناسىۋەتسىز! جەمئىيتىمىزدە بالىنىڭ قىز ياكى ئوغۇل بولىشىغا قارىتائوخشىمىغان چۈشەنچىلەر مەۋجۇت. گەرچە ئىلىم-پەن ساھەسىدە بالىنىڭ جېنسىنىڭ قانداق بەلگىلىنىدىغانلىقى ئايدىڭلاشقىلى نەچچە ئون يىللار بولغان بولسىمۇ لىكىن ئۇيغۇرجەمئىيتىدىكى كۆپىنچە كىشىلەرنىڭ بۇنىڭدىن خەۋەرسىز قېلىشى كىشىنى تولىمۇئەپسۇسلاندۇرىدۇ. يېقىنقى يىللاردىن بۇيان ئانىنىڭ قىز تۇغۇشى تۈپەيلىدىن نۇرغۇن ئائىلىلەرنىڭ ئىناقلىقىنىڭ بۇزۇلغانلىقى ھەتتا ۋەيران بولغانلىقىنى ئاڭلاپ تۇرىمىز. يېقىندا دوستلۇرۇم پەرزەنتلىك بولغانلىقىمنى تەبرىكلەپ ماڭا تېلفۇن ئۇرغاندا "ئوغۇللۇق بولدۇڭمۇ؟ مۇبارەك بولسۇن" دىيىشتى.ھەتتا بەزىلىرى ئايالىمنىڭ  "ئۇغۇل تۇغالمىغانلىقىنى" مەسخىرە قىلىپمۇ ئۈلگۈردى. دوستلۇرۇمنىڭ بۇ گەپلىرى مېنى ئويلاندۇرۇپ قويدى. مەن  بۇنىڭدىن ئككى مەسىلىنى كۆرىۋالدىم. بۇنىڭ بېرى، ئۇلارنىڭ ئوغۇل پەرزەنتلىك بولۇشنى قىز پەرزەنتلىك بولۇشتىنمۇ بەكرەك شەرەپ دەپ بىلگەنلىكى،يەنە بېرى بولسا، ئوغۇل ياكى قىز پەرزەنتلىك بولۇشنىڭ قانداق بەلگىلىنىدىغانلىقىنى بىلمىگەنلىكى ئىدى. شۇنىڭدىن كىيىن مەن پات- پاتلا ئەر- ئاياللارنىڭ پەرزەنتىنىڭ قىز بولۇشى تۈپەيلىدىن ئاجرىشىپ كەتكەنلىكىنى ئاڭلاپ تۇردۇم، ھەم بۇ مەسىلىنىڭ جەمئىيتىمىزدە خېلى ئېغىر ئىكەنلىكىنى تونۇپ يەتتىم. بىزنىڭ تارىختىن بۇيان مەيلى دىننىي جەھەتتىن بولسۇن ۋەياكى مىللىي ئۆرپ- ئادىتىمىزدە بولسۇن ئوغۇل پەرزەنتنى چوڭ كۆرۈپ قىز پەرزەنتنى تۆۋەن كۆرىدىغان ئەنئەنىمىز يوق ئىدى. بەلكىم بۇمۇ باشقىلاردىن يۇققان بىر يېڭى كىسەل بولسا كېرەك. بۇ مەسىلىنى ئايدىڭلاشتۇرۇش ئۈچۈن بىر تېما يوللاپ تورداشلاربىلەن ئورتاقلىشىش قارارىغا كەلدىم. مەن كۆپېيىش بىئولوگىيەسى كەسپىدە ئىزدىنىۋاتقان بىر تەتقىقاتچى بولۇش سۈپىتىم بىلەن كەڭ تورداشلارنىڭ ئىلمىي كۆز قاراشلىرى ياكى سۇئاللىرى بولسا ئورتاقلىشىشنى قارشى ئالىمەن. تۆۋەندە بالىنىڭ جېنسىنىڭ قانداق بەلگىلىنىدىغانلىقىنى قىسقىچە چۈشەندۈرۈپ ئۆتمەكچىمەن: جېنىسنىڭ بەلگىلىنىشى ئككى مۇھىم ھالقىدىن تەركىب تاپقان بولۇپ، بۇنىڭ بىرىنچىسى جېنسنىڭ گېنتىكىلىق بەلگىلىنىشى، ئككىنچىسى مېڭىنىڭ جېنىسقا ئايرىلىشى. ئادەتتە، ئىنساننىڭ ھاياتى  ئاتىلىق ئىسپېرما ھۈجەيرىسى بىلەن ئانىلىق تۇخۇم ھۈجەيرىسىنىڭ بىرىكىپ ئۇرۇقلانغان تۇخۇم (يەنى زېگوتا) نىڭ ھاسىل بولۇشى بىلەن باشلىنىدۇ. گەرچە نۇرغۇن كىشىلەر تۆرەلمە يېتىلىپ بىر نەچچە ئايلىق بولغۇچە بىر ھاياتلىق سۈپىتىدە مۇئامىلە قىلمىسىمۇ، لىكىن ئۇرۇقلانغان تۇخۇمنىڭ ئۆزى تولۇق بىرتۆرەلمە ۋە بالا ھەمرىيى ھاسىل قىلىش ئىقتىدارىغا، ئاخېرىدا بىر يىتىلگەن جانلىققا ئايلىنىش پوتىنسىئالىغا ئىگە بولغاچقا، ئۇرۇقلانغان تۇخۇمنى ھاياتلىقنىڭ باشلىنىشى دەپ قارايمىز.  جېنىسنىڭ گېنتىكىلىق بەلگىلىنىشى دېگىنىمىز ئاتىلىق ئىسپېرما ھۈجەيرىسى بىلەن ئانىلىق تۇخۇم ھۈجەيرىسى بىرىككەندە جېنسىي خىروموسوملارنىڭ تەقسىملىنىشى ۋە ئىپادىلىنىشىنى كۆرسىتىدۇ.ئادەم بەدىنىدىكى ئىسپېرما ۋە تۇخۇم ھۈجەيرىسىدىن باشقا بارلىق ھۈجەيرىلەردەجەمئىي 23 جۈپ خىروموسوم بار بولۇپ بۇنىڭ 22 جۈپى تەن (جېنىسسىز) خىروموسومى، بىرجۈپى جېنىسلىق خىروموسومدۇر.ئىسپېرما ۋە تۇخۇم ھۈجەيرىلىرى ئالاھىدە ھۈجەيرىلەربولۇپ، ئۇلاردا پەقەت 23 تال خىروموسوم بولىدۇ. ئىسپېرما ھۈجەيرىلىرىدە 22 تال تەن خىروموسومى بىلەن بىر تال X ياكى Y خىروموسومى بولىدۇ. تۇخۇم ھۈجەيرىلىرىدە بولسا 22تال تەن خىروموسومى بىلەن بىر تال X خىروموسوم بولۇپ، Y خىروموسوم مەۋجۇت بولمايدۇ. دىمەك ئىنسان ھاياتىنىڭ باشلىنىشى بولغان ئۇرۇقلانغان تۇخۇم ھاسىل بولۇش جەريانىدائىسپېرما ھۈجەيرىسىدىكى 23 تال خىروموسوم بىلەن تۇخۇم ھۈجەيرىسىدىكى 23 تال خىروموسوم بىرىكىپ ئۇرۇقلانغان تۇخۇمنى مۇكەممەل بولغان 23 جۈپ خىروموسومغا ئىگەقىلىدۇ. بۇ جەرياندا تۆرەلمە جېنسىنىڭ گېنتىكىلىق بەلگىلىنىشى تاماملىنىدىغان بولۇپ، ئەگەر Y خىروموسوملۇق ئىسپېرما تۇخۇم ھۈجەيرىسى بىلەن بىرىكسە ئوغۇل بولۇشنى بەلگىلەيدۇ؛ ئەگەر X خىروموسوملۇق ئىسپېرما تۇخۇم ھۈجەيرىسى بىلەن بىرىكسە قىز بولۇشنى بەلگىلەيدۇ. شۇنداق قىلىپ كەلگۈسىدە ئوغۇل بولىدىغان تۆرەلمىنىڭ جېنىسىي خىروموسومى ئىسپېرمىدىن كەلگەن Y خىروموسوم بىلەن تۇخۇمدىن كەلگەن X خىروموسوم (XY)دىن تەركىب تاپىدۇ؛ قىز بولىدىغان تۆرەلمىنىڭ جېنىسىي خىروموسومى ئىسپېرمىدىن كەلگەن X خىروموسوم بىلەن تۇخۇمدىن كەلگەن X خىروموسوم (XX) دىن تەركىب تاپىدۇ. بۇنىڭدىن كۆرىۋىلىشقا بولىدۇكى، پەقەت ۋە پەقەت ئاتىدىن كىلىدىغان Y خىروموسومنىڭلا جېنىسنى بەلگىلەش ئىقتىدارى بار. مېڭىنىڭ جېنىسقا ئايرىلىشى جەريانىدا XY تىپلىق تۆرەلمە تەرەققىي قىلىپ مېڭە يىتىلگەندىن كىيىن، كۆپىيىش ئورگانلىرى شەكىللىنىش جەريانىدائىپتىدائىي كۆپىيىش ئورگانلىرىنى تەشكىل قىلىدىغان ھۈجەيرىلىرىنىڭ Y خىروموسومىدىكى گېنلار قوزغىلىپ ئەرلىك جېنسىي ھورمونلارنى ئىشلەپچىقىرىدۇ، ھەم مۇشۇ ھورمونلارنىڭ تەسىرىدە مېڭە ئۆز جېنسىنى تونۇپ يىتىدۇ. XX تىپلىق تۆرەلمە بەدىنىدە ئەرلىك جېنسىي ھورمون ئىشلەپچىقىرىلمايدىغان بولغاچقا، تەبئىي ھالدا مېڭە ئاياللىق جېنىسنى تونۇيدۇ. شۇڭا تۆرەلمە مەزگىلىدىلا مېڭە جېنىسقا ئاساسەن ئوخشىمىغان دەرىجىدەھەرىكەتنى بەلگىلەيدۇ. مېڭىنىڭ تۆرەلمە مەزگىلىدە ئۆز (گېنتىكىلىق) جېنسىنى توغرا تونۇشى ئىتايىن مۇھىم بولۇپ، بۇ جەريان ئاساسلىقى ھورمون ۋە باشقا تۆرەلمە مۇھىت ئامىلىنىڭ تەسىرىگە ئۇچرايدۇ. شۇڭا مېڭىنىڭ ئۆز جېنسىنى تونۇش جەريانى گېنتىكىلىق ئامىلدىن بەكرەك ئېپىگېنتىكىلىق ئامىللارنىڭ تەسىرىدە ئىلىپ بېرىلىدۇ. بۇ بىر قەدەر يېڭى تەتقىقات ساھەسى بولغاچقا، بۇ جەھەتتىكى ئىزدىنىشلەر داۋاملاشماقتا. شۇنداق دىيىشكە بولىدۇكى، بالىنىڭ قىز ياكى ئوغۇل بولىشىدا ئانىنىڭ ھىچقانداق بىۋاستە تەسىرى يوق، بەلكى ئاتا تەرەپتىن تاسادىپىي ھالدا بەلگىلىنىدۇ. ھازىرغىچە ئىنسانلار تېخى بالىنىڭ جېنسىنى تەبئىي ھالدا ئۆزئىختىيارى بويىچە تاللاش ئىمكانىيىتىگە ئىگە ئەمەس. ئەلۋەتتە، تەن سىرتىدا سۈنئىي ئۇسۇلدا يىتىلگەن تۆرەلمىلەر بۇنىڭ سىرتىدا. دىمەك، بالىنىڭ قىز ياكى ئوغۇل بولۇپ قىلىشىنى مەيلى ئەردىن ياكى ئايالدىن كۆرۈش بەكمۇ بىمەنىلىك. ئاخىرىدا، تورداشلارنىڭ بۇ ھەقتە ئاز- تولا بېلىمگە ئىگە بولۇشىنى، ھەم ئۆگەنگەنلىرىنى باشقىلارغىمۇ يەتكۈزۈپ قويۇشىنى ئۈمۈد قىلىمەن.

nurgul1

	ياخشى تىما ئىكەن .قىز بولسۇن .ئۇغۇل بولسۇن.ساق سالامەت بولسىلا بۇلىدۇ

شادىمان

	ياخشى تېما ئىكەن، ئوغۇل ياكى قىز بولسۇن ھەر ئككىلىسى ئۈزىمىزنىڭ پۇشتى .ھەر ئىككىلسى كەلگۇسىنىڭ قۇرغۇچىللىرى ،شۇڭا ئۇلارنى ئوخشاش كۈرۈشمىزلازىم.

guzalturuk

	ئونۋىرسىتتا ئوقۇۋاتقان چاغلىرىمدا بۇ ھەقتە ئاز-پاز ئاڭلىغانىدىم.قىزبولسۇن ئوغۇل بولسۇن،مۇھەببەتنىڭ مىۋىسى،ئائىلىنىڭ بەختى،ئاللا ئىنساب بەرسۇن،ياخشى تەربىلىنىشكە نىسىپ قىلسۇن.

bortala0909

	ئۇقۋالدۇق  رەخمەت ھە سىزگە،،،،،،،،،،

amannisa2

	ناھايىتى ياخشى تېما بوپتۇ. كۆپ نەرسىلەرنى بىلۋالدىم. يەنە يېڭى يېڭى تېمىلارنى يوللاپ تۇرۇڭ.

zuaya

	ناھايىتى ئەھمىيەتلىك تىمايوللاپسىز كىشىللىرىمىزننڭ خاتا چۈشەنچىلىرىگە ئازتولا پايدىسى بوپ قالا. قىز بولسۇن ئوغۇل بولسۇن ھەممىسى ئاللاھنىڭ بىزگە بەرگەن كاتتا نىئمىتى ئەمەسمۇ؟ كىشىلەرنىڭ ئارزۇسىدەك ھەممىسى ئوغۇل بولىۋەرسە ئىنسانىيەت جەمئىيتىنىڭ تەڭپۇڭلۇقى بۇزۇلمامدۇ؟ ئىنسانىيەت قانداق داۋاملىشىدۇ؟

bahit0998

	تولىمۇ ياخشى بىر تىمىنى ئوتتۇرىغا قويۇپسىز ، قىز ياكى ئوغۇل بولسۇن ساق سالامەت تۇغۇلسىلا بولمىدىمۇ ؟ قايسى كۈنى دوستۇمنىڭ ئۆيىگە بىرىپ (ئۇ ھامىلدار ئىدى ) پاراڭلىشىش جەريانىدا ئۇنىڭ يولدىشى نۇمۇس قىلماي بۇ ئوغۇل تۇغۇشنى بىلمەيدۇ ،ئالدىنقى قىتىممۇ ئاغىنىلىرىمنىڭ ئالدىددا يۈزۈمنى تۆككەنتى ،بۇقىتىممۇ يەنە قىز تۇغىدۇ ھەرقاچان دەپ دوستۇمنىڭ كۆڭلىگە ئازار بەردى ،قىز بولسۇن ئوغۇل بولسۇن ھەممىسى ئۇلۇغ ئاللاھنىڭ بىزگە بەرگەن نىئمىتى ، ئۇنى ساق سالامەت، ياخشى تەربىيەلەپ چوڭ قىلىش بىز ئاتا -ئانىلارنىڭ مەجبۇرىيتى ئەمەسمۇ ؟

zupak

	تولۇق ئوتتۇرا مەكتەپتە ئوقۇۋاتقاندا دەرس قىلىپ ئۆتكەندەك قىلىۋاتقان.

hirostal

	بىر قىز تۇغۋالسام بولاتتى،كىمدە سىناقتىن ئوتكەن،ئېلمى ئاساسى بار رېتسىپ بار،بولسا ماڭا دەپ بەرسەڭلار بوپتىكەن،شۇنچىلىك قىز پەرزەنتلىك بولوش ئارزۇيۇم باركىن ئەگەر ئوغول توغوپ قالسام قوشوپ قىزدىن بىرنى بېقۋىلىش قارارىغىمۇ كىپ بولدۇم(چوڭ بالام ئوغول ئېدى)