مۇھاببەت لېرىكىلىرى

koygandengiz

	مۇھاببەت لېرىكىلىرى                                                        يۈرۈپ كەتتۇق ، ماشىنا نۇرلىرى گىرەلەشكەن يوللارنى بويلاپ . بەلكىم ماڭدىڭ ، ئۆزەڭگە تونۇش مەنزىلگە باشلاپ . ئەمما مەن ماڭغاندەك ، گويا بۇ دۇنيانى تاشلاپ . كېتىۋاتىمىز ، ماي يولىنىڭ ئىككى ياقىسىدا كۈز ياتىدۇ ، يوپۇرماقلار كۈز تىلىدا شىۋىرلايدۇ . مەن ئانا تىلىمدا شىۋىرلىدىم ، ئانا تىلدا شىۋىرلىشىم ، تېلىفونۇڭغا ئۈچۇر بوپ كەلدى ........ سۆيۈش مەردانلىق ، سۆيۈلۈش بەخت ، سۆيۈپ سۆيۈلماسلىك بەختسىزلىك ، سۆيۈلۈپ سۆيمەسلىك زېرىكىشلىك .@ شۇ تاپ بىزار قىلغان مەنىسىزلىك ئىچىدىن ، قىمىلداپ يۈرگەن ئادەم ھەم ماشىنىلار ئارىسىدىن ، كەتتۇق ئۇزاپ . داۋامى يوق يولنىڭ جىمجىتلىقى ، كەلدى ئوراپ . ئاسماندا ھىلال ئاي ، يەردە شۇ ھال . سەن ماڭا ئېگىلدىڭ ، مەن ساڭا ئېگىلدىم ، ماشىنا ئورۇندۇقىغا قونغان ھىلال ئاي بولدۇق . كۆزۈم كۆزۈڭگە ، كۆزۈڭ كۆزۈمگە سايە تاشلىدى . قالدىم تەمتىرەپ . سۆيۈش مەردانلىق ...... تىنىقىڭغا قوشۇلۇپ كەتتىم ، يۈرىكىڭدىن قونالغۇ ئىزدەپ ، بەلكىم ئەركەكلىكىڭدىن ئۆزۈمنى ئىزدەپ . لەيلىگەندەك قاراڭغۇلۇقتا ، سۈكۈتلەرگە ئەل بولدۇق بىر پەس ، قولۇڭ قولۇمدا ، قولۇم قولۇمدا ، ئاڭلىنار پەقەت ئىگىز - پەس نەپەس . سەزدىم بەرگەن بولساڭمۇ جېنىمغا بىر جان ، دىلىڭدا ئىمان نەپسىڭگە يەنە قالدۇردۇڭ ئىمكان . شۇ بىر رەت ، بەلكىم تۇنجى ياكى ئاخىرقى بىر رەت ، روھىمغا بەردىم شامالدەك ئەرك ، ئالالمىدىم دەم كۈز ئالماشتى باھارغا بىردەم ........ تېنىم تېنىمگە قايتتى ، جېنىم جېنىمغا قايتتى ، تۇرۇپ يەنە ئاسىي قوللىرىم ، بوينۇڭغا سالدى گىرە . راست - يالغانمۇ دىدىڭمىكىن ، قاراپ قويدۇڭ بىرە - بىرە ....... ئاڭلانغاندەك بولدى شۇ تاپ ، قۇلىقىمغا ئۇنتۇلغان ناخشا ، ئۆزۈم ئۈچۈن قىلغۇم كەلدى ئۇزۇن بىر دۇئا ...... رەببىم ! مېنى ئۆزۈمدەك ياشىغىلى قوي ، رەببىم ! سۆيگۈم كەلگەننى بىر سۆيگىلى قوي ، رەببىم ! ئىجازەتسىز يوللىرىڭدا بىر ماڭغىلى قوي ، رەببىم ! مۇھاببەتتە كۈز پەسلىم مېنىڭ ، باھارىمغا بىر قايتقىلى قوي ....... بىلگۈم كېلىدۇ ، قىلغانسەنمۇ مەندەك بىر دۇئا ؟! بىلگۈم كېلىدۇ ، بولغاندىمۇ سېنىڭدە شۇنداق مۇددىئا ؟! كېچە ئاغزىنى يوغان ئاچتى ، ئاخىرى يوق يولغا ماشىنا چىرىقىنىڭ پىپسىمان نۇرى يېيىلدى ، بەلكىم ئەركىنلىكنىڭ ئاخىرى چېكى كېسىلدى . يۈرۈپ كەتتۇق ، تۈننىڭ قوچىقىدا ئەللەيلىنىپ ، تەلپۈنىشتىن چارچىغان جىسمىم ، كۆتەردى غۇۋغا . سېنىڭ كۆزلىرىڭ يولدا ، قوللىرىڭ رولدا ، قۇتۇپ يۇلتۇزى تامام ئېگىلگەن بولدۇم ، بەلكىم قىلغاندىمەن ، ۋىسال دەملىرىدەك سۆيۈشنى سوۋغا . ئىككى ياندا يوپۇرماقسىز دەرەخلەر ، داۋامى يوق يول قالدى تاشلىنىپ . ئەمما شېئىرىمدا قالدى يادلىنىپ . « خوش » دىدىڭ ، « خوش » دىدىم ، شۇنچە يېقىن ئارىلىقتىن « خوش » دىيىشىمىز تۇنجى ياكى ئاخىرقى قېتىم ........

koygandengiz

	يۇقىرىدىكى شېئىرغا « خاتىرەمدىن » دەپ ئەسكەرتىشنى ئۇنتۇپتىمەن . بىر پارچە شېئىر ئارقا كۆرىنىشى بار تاسادىپىيلىق .                                                  ئابدۇقادىر جالالىددىن

xax189

	سۆيۈپ سۆيۈلماسلىك بەختسىزلىك ، سۆيۈلۈپ سۆيمەسلىك زېرىكىشلىك .@ بۇ مىسىرالار ماڭا بەك ياقتى.

sadakatguli

	بەكمۇ ياقتۇرۇدۇم... مۇھەببەت ئىككى يۈرەككە تەئەللۇق بولسا،ئازاپ كۆپىنچە ھاللاردا بىرلا قەلىبكە يۇشۇرۇنغان بولىدۇ...

borslan

	ئاسىي قوللىرىم

ئەلبەگ

	ياخشى چىقىپتۇ، بىراق«مۇھەببەت لىرىكللىرى» بىرلا شېئىرنى كۆرسەتسە بولمايدۇ! داۋامىنىمۇ يوللاڭ.

kulkam803

	مەنمۇ ھۇزۇر ئالدىم ،رەھمەت!

mainur

	سۆيۈش مەردانلىق سۆيۈلۈش بەخت ، سۆيۈپ سۆيۈلماسلىك بەختسىزلىك ، سۆيۈلۈپ سۆيمەسلىك زېرىكىشلىك . تولىمۇ ياكتۇردۇم .

mainur

	سۆيۈش مەردانلىق سۆيۈلۈش بەخت ، سۆيۈپ سۆيۈلماسلىك بەختسىزلىك ، سۆيۈلۈپ سۆيمەسلىك زېرىكىشلىك . تولىمۇ ياكتۇردۇم .

mainur

	سۆيۈش مەردانلىق سۆيۈلۈش بەخت ، سۆيۈپ سۆيۈلماسلىك بەختسىزلىك ، سۆيۈلۈپ سۆيمەسلىك زېرىكىشلىك . تولىمۇ ياكتۇردۇم .