بالىلارنىڭ ياخشى تەربىيەلىنىشىگە تۈرتكە بولىدىغان ‹‹تۆت سوئال››
بىر ئاتىنىڭ قىزىنى تەربىيەلەش ئۇسۇلى ئۆزگىچە بولۇپ، ئەزەلدىن قىزىنىڭ ئۆگىنىشىگە يېتەكچىلىك قىلمايدىكەن.
بىراق، كۈنلۈكى 10 مىنۇت ۋاقىت چىقىرىپ قىزى بىلەن مۇڭداشقاچ مۇنداق تۆت سوئالنى سوراش ئارقىلىق ئۆزىنىڭ ئائىلىدىكى تەربىيەلەش ۋەزىپىسىنى تاماملايدىكەن. بۇ تۆت سوئال مۇنداق:
1. مەكتىپىڭلاردە بۈگۈن قانداق ياخشى ۋە يامان ئىشلار يۈز بەردى؟
2. بۈگۈن ئىپادىڭىز قايسۇ جەھەتتە ياخشى بولدى؟
3. بۈگۈن قانداق ياخشى ھاسىلاتقا ئېرىشتىڭىز؟
4. ئاتىڭىزنىڭ قانداق ياردىمىگە ئېھتىياجىڭىز بار؟
بۇ خىل ئاددىي سوئاللارنىڭ ئارقىسىغا ئەمىلىيەتتە چوڭقۇر مەنىلەر يوشۇرۇنغان .
1-سوئال ئارقىلىق قىزىنىڭ قىممەت قارىشىنى تەكشۈرۈپ، قىزىنىڭ قەلبىدە نېمىلەرنى ياخشى، نېمىلەرنى ناچار دەپ قارايدىغانلىقىنى ئىگىلىگەن.
2-سوئال ئارقىلىق قىزىنى رىغبەتلەندۈرۈپ ، قىزىنىڭ ئۆزىگە بولغان ئىشەنچىسىنى ئاشۇرغان.
3-سوئالنىڭ قىزىنىڭ كونكرىت نېمىلەرنى ئۆگەنگەنلىكىگە قارىتا مۇئەييەنلەشتۈرۈش رولى بار.
4-سوئال ئىككى خىل مەنىگە ئىگە. بىرى، سىزگە ئىنتايىن كۆيىنىمەن، يەنە بىرى، ئۆگنىش ئۆزىڭىزنىڭ مۇستەقىل ئىشى، دېگەندىن ئىبارەت.
يۇقۇرقى تۆت سوئال ئىنتايىن ئاددىي بولسىمۇ، ئەمما ئۇنىڭغا كۆيۈنۈش، غەمخورلۇق مەنىلىرى سىڭگەن.
بالىلارنى ياخشى تەربىيەلەشتە، ئەڭ ھالقىلىق بولغىنى_ ئاتا-بالا مۇناسىۋىتىنى ياخشى بىر تەرەپ قىلىش، ئاتا-ئانىلار بالىلارنىڭ قەلبىدە مۇتلەق مەسئۇلىيەت تۇيغۇسىنى شەكىللەندۈرسىلا ، بالىلار ئاتا-ئانىلارنىڭ ئۆزلىرىنى شەرتسىز ياخشى كۆرىدىغانلىقىغا ئىشىنىدۇ. شۇنداق بولغاندىلا بۇ خىل مۇناسىۋەت _ ياخشى سۈپەتلىك مۇناسىۋەت ھەم ئۆزئارا كۆيۈنىدىغان، ئۆزئارا قوللايدىغان، ئۆزئارا چۈشىنىدىغان تۇراقلىق مۇناسىۋەت بولالايدۇ.
تولۇقلىما مەزمۇن (2012-11-17 19:59):
مەنبە: ‹‹ شىنجاڭ مائارىپى›› ژورنىلى
يوللىغان ۋاقتى 2012-11-17 19:57:45
