ئۆچتى ئارمان كۆچكەندەك قۇملار
تورلىرىڭنى يېيىپ سەھەردە ،
يىغىۋالدىڭ چىڭقى چۈش پەيتى .
بۈرجىگىدىن ئىلىندى يۈرەك ،
ھالسىراتتى قۇياشنىڭ تەپتى .
تەلمۈرگىنىچە قىلماقتا نالە ،
چاك - چېكىدىن يېرىلدى لەۋلەر .
تىلىگەنتى ئۈمۈد ئىچىدە ،
چىن سۆيگۈدىن ئىچىشنى كەۋسەر .
يۈرىكىدىم تامچىغان زەرداپ ،
قان رەڭگىدە بوياق ئۇپۇقنى .
نالىسىدە تىتىرىدى ساھىل ،
ياپقاچ ئاڭا ئەلەم يۇپۇقنى .
مۇڭ ھەسرەتلەر ئېلىپ قوينىغا ،
تىلىم - تىلىم تىلىندى يۈرەك .
ئۆچتى ئارمان كۆچكەندەك قۇملار ،
ئۆكسۈپ - ئۆكسۈپ يىغلىدى تىلەك .
ئۈمۈد يەنە تىكىلدى دوغا
گاھ كۆرۈنۈپ يوقايسەن گاھى ،
تەشۋىشلەرگە سېلىپ كۆڭۈلنى .
تىلسىم ئىكەن ھەر بىر بېقىشىڭ ،
ئۈزەلمىدىم ئەجەپ ئۈمۈدنى .
ئىككىلىنىپ تۇرساممۇ شۇنچە ،
كۈتتۈم سەندىن كۈتتۈم ۋىسالنى .
سەن نىمانچە ھىلىگەر توۋا ،
ئاستىڭمۇ يا شەيتان تۇمارنى .
سىھىرلىدىڭ كۆڭۈل ھەم كۆزنى ،
بەرسەڭمۇ دەرت دۇنيادا بىر سەن .
رەڭدار سىزما پەقەت مەن ئۈچۈن ،
قارچۇقلارغا دائىم سىزىمەن .
پايانى يوق غەملەر ئىچىدە ،
تاپالمىدىم ئىزلەپ كۈلكىلەر .
كۆز قىسشىپ كەلسىمۇ ھىجران ،
كۆرۈنمىدىڭ كۆزگە تۈلكىلەر .
ۋىسال ئاتلىق تونغا ئورىنىپ ،
ھىجىيىسەن مىڭ خىل مۇئەمما .
بىھۇشلۇقتا ئەقلىم لال بولۇپ ،
ئۈمۈد يەنە تىكىلدى دوغا .
خوش دىمىگىم تەس بولدى ئەجەپ
ئۇزاتماقچى بولۇپ يار سېنى ،
تەشۋىش ئارا باردىم بېكەتكە .
چاناقلارغا تولۇپ ئازاپلار ،
سىرغىپ چۈشتى نىمجان يۈرەككە .
خوش دىمەكچى بولۇپ يار ساڭا ،
دىيەلمىدىم ، دىگۈم يوق ئەسلى .
سەنسىز بولغاچ يۈتەرمۇ ئەمدى ،
ھاياتىمنىڭ نەۋ باھار پەسلى .
خوش دىمىگىم تەس بولدى ئەجەپ ،
دىدىم ، يۈرەك ئىزىلدى ئۇندەك .
سېغىنىشنىڭ ئاراچلىرىدا ،
ئۆتەرمەنمۇ ئۈششىگەن گۈلدەك .
چىقتى روھىم تۇرمىدى تەندە
كېلىمەن دەپ بېرىپسەن ئۇچۇر ،
تاڭ سەھەردە بۇلبۇلدەك گويا .
يوللىرىڭغا تەلمۈرەر كۆزەم ،
كۈتتۈم سېنى شەپەقلەر ئارا .
سۈكۈت ئىچرە ئاي ۋە يۇلتۇزلار ،
تەشۋىشىمگە ھەمرادۇر ھەمرا .
شەكلەنمىدىم كېلەر سەن ھامان ،
لېكىن مۇڭغا چۆمدىغۇ دۇنيا .
قان رەڭگىدە بۇيالدى ئۇپۇق ،
ھەسرىتىمدىن ئاققان تامچىدا .
كۈتۈشلىرىم بولغاچ جاۋاپسىز ،
يۈرەك زەرداپ باغرىمدۇر يارا .
تەمتىرىدىم چۆلدىمەن گويا ،
نە قىلارنى بىلمىدىم پەقەت .
قارچۇقلارنى قاپلىدى تۇمان ،
ئارمان بولۇپ قالدى مۇھەببەت .
ئۈمۈدسىزلىك قاپلاپ ۋۇجۇدنى ،
ئەلەم ئارا قايتتىم سەھەردە .
گۈلشەنلىرىم بولدى مازاردەك ،
چىقتى روھىم تۇرمىدى تەندە .
مەنبە : ئىجادىيەت .
ئەسسالامۇ ئەلەيكۇم ئەلكۈيىدىكى دىلكەش دوسلار كەمىنە گۆھەردىن ھەممىڭلارغا ئوتلۇق سالاملار بولسۇن . مۇنبەرگە قۇرۇق قول كەلگۈم كەلمىدى .
يوللىغان ۋاقتى 2012-11-9 19:06:30
