ياخشىلىقتىن كۆكلەيدۇ ئىنسان

ئارتۇچ

	ئەمەتجان زۇنۇن ياخشىلىقتىن كۆكلەيدۇ ئىنسان كۈن نۇرىدا يورۇيدۇ جاھان ، مۇھەببەتتە ئۇلۇغلۇق ئايان ، پاك نىيەتتىن نۇسرەتكە ئىمكان ، ياخشىلقتىن كۆكلەيدۇ ئىنسان . چاۋاك دېگەن چىقماس بىر قولدىن ، تەركىي دۇنيا ياشاش يوق ئاندىن ، سۇ ئىچىدۇ  كۆڭۈل - كۆڭۈلدىن ، ياخشىلىقتىن كۆكلەيدۇ ئىنسان . ھالال مېھنەت -جەننەت ئاچقۇچى ، ياخشى خۇلق ئىنسان زىننىتى ، ھەق سۆيگەنلەر بەخت تاپقۇسى ، ياخشىلىقتىن كۆكلەيدۇ ئىنسان . زەررە  ئەجىر  ئالەمچە بەركەت ، ئەل مىڭ كۈلەر قىلساڭ بىر شەپقەت ، توق كۆڭۈلدە چەكسىز ھىدايەت ، ياخشىلىقتىن كۆكلەيدۇ ئىنسان . مۇھەببەتسىز ئارمانىم يالغان مۇھەببەتسىز جاھانىم يالغان ، مۇھەببەتسىز باھارىم يالغان . مۇھەببەتتىن ياشاشقا ئىمكان ، مۇھەببەتسىز ئارمانىم يالغان . مۇھەببەتتە يىغلىدىم  كۈلدۈم ، سۆيگۈ ئۇلۇغ سۆيۈلدۈم  سۆيدۈم ، جان قاخشاتقان ئوتلاردا كۆيدۈم ، مۇھەببەتسىز ئارمانىم يالغان . ياخشىلارغا ئېچىلغان كۆڭلۈم ، ئۈمىتلەردىن يورۇيدۇ يولۇم ، مەنزىللەردە خۇشبۇي ھىد ئىزىم ، مۇھەببەتسىز ئارمانىم يالغان . مۇھەببەتتىن تاڭلار سۈپسۈزۈك ، مۇھەببەتتىن  مەۋجۇدات بۈيۈك ، مۇھەببەتتۇر باھاسىز مۈلۈك ، مۇھەببەتسىز ئارمانىم يالغان . ئۇلىنىدۇ رىشتىگە رىشتە ، ئەر باھادىر قىزلار پەرىشتە ، شات كۈلىمىز گۈلگۈن رەۋىشتە ، مۇھەببەتسىز ئارمانىم يالغان . ياخشىلار ئالەم تەخىت سۇلتان ياخشلار ، بارى -يوققا شۈكران ياخشىلار . بارلىقىمىز ئارمان ياخشىلار ، قۇت مەنزىل كارۋان ياخشىلار . پاك كۆڭلىدىن  چاچار ئاپئاق نۇر ، ساپ تەرىدىن كۈلىدۇ  مەغرۇر ، ئادىمىيلىك چاقنايدۇ  غورۇر ، ئەل - يۇرتقا دەرمان ياخشىلار . پەزىلىدىن تۆكۈلگەن بەركەت ، ھەر ئىزىدىن ياغىدۇ شەپقەت ، ياخشى بار يەر بەئەينى جەننەت ، قۇت تۈنىدە گۈلخان ياخشىلار . كۈلكىسىدىن دۇنيا كۈلىدۇ ، تىنىقىدىن جۇتمۇ كۆيىدۇ ، تىلىكىدىن تەڭرى سۈيىدۇ ، روھ زىياسى ئىمان ياخشىلار. بۇ تۈنلەر يورۇقتۇر خىيال بولسىلا پايانسىز تۈنلەرنىڭ قوينىغا پاتتىم ، ئارمانرەڭ خىياللار مەنزىلى چەكسىز . يۇلتۇزۇم ئىزلىدىم يېشىمدەك ئاقتىم ، يۈرىگىم تەكتىدە پارلىماقتا ئىز . ئۈمىتلىك كۆزلىرىم يولۇڭدا تالدى ، ھىجراننىڭ جاللىتى چاپىمەن دەيدۇ . قەدىم كۈي بارخانلار ئاستىدا قالدى ، توغراقلار بەستىمگە دەرمان تىلەيدۇ. تۆكۈلۈپ بارماقتا كەچكۈز ياپرىقى ، زىمىندەك ھالسىراپ پارلايدۇ روھىم . ئۆمرۈمدىن بەت ئۆرۈپ ھەر بىر ۋارىقى ، كۆيمەكتە قۇياشتەك نۇر تۆكۈپ قەلبىم . ئاسىيمەن ئۆزۈمگە قاچاق جەڭچىدەك ، ئۆزۈمگە جەڭ ئىلان قىلدىم كۈندە مىڭ . چۈشەنسەڭ نىگارىم مېنى ئۆزۈڭدەك ، ياشايتۇق ئالەمدە كۈلۈپ بىجىرىم . ئۇچۇپ ئۆتتى ئەنە تۇرنىلار كۆزۈمگە ياش تولغان بۇ دەمدە ، ئۇچۇپ ئۆتتى يەنە تۇرنىلار . جىمجىت ئېتىپ بوز توپا يەرگە ، ئۆز -ئۈزۈمنى بەزلىدىم دىلدار . سېغىنىشتىن ياسايدۇ ۋولقان ، مىھرىڭ كۈتۈپ چاڭقاق يۈرىگىم . ئوت رىشتىڭدىن چىچەكلەيدۇ جان ، كۈندە باھار چۈشەيدۇ ئىزىم . قىزلار گۈزەللىكنىڭ سۇلتانى قىزلار ، ھاياتلىقنىڭ ئارمانى قىزلار مۇھەببەتنىڭ ھەم جانى قىزلار ، نەۋ باھارنىڭ دەرمانى قىزلار . ئۇزلۇقىدىن تاڭلار سۈپسۈزۈك ، پاكلىغىدىن  بۇ دۇنيا بۈيۈك ، شوخ كۈلكىسى جاراڭلىق گۈدۈك ، ھەقىقەتنىڭ كارۋانى قىزلار . پەرىشتىدەك ياغار ئاپئاق نۇر ، ئويغىتىدۇ مىھرىدىن غورۇر ، مىھنەت تۆكۈپ كۈلىدۇ مەغرۇر ، ۋاپا ، ئەخلاق دىلدارى قىزلار . كۈلۈشۈمنى سېغىندىڭ بەلكىم چۈشلىرىڭدىن ئويغىنىپ غەمكىن ، خىياللارغا بېرىپ مۇڭلۇق سىن . جۇدالىقتا ئۆتۈلسە  قەدرىم  ، كۈلۈشۈمنى سېغىندىڭ بەلكىم . ياش تۆكتىمۇ گۇۋاھ چىمبۇلاق ، كاككۈك سايراپ ئۆرتەمدۇ پىراق ، پىچىرلىدى يېشىل يوپۇرماق ، كۈلۈشۈمنى سېغىندىڭ بەلكىم . چوقۇم كەتتى ئېشىڭنىڭ تۇزى ، سۇغا تۆكتۈڭ چوغنىڭ كۈلىنى ، مەجنۇن ئەيلەپ سەۋدالىق رىشتى ، كۈلۈشۈمنى سېغىندىڭ بەلكىم . تەڭتۈش جۈپلەر ئىزى ھىد چاچتى ، كۈتۈشلىرىڭ چىكىدىن ئاشتى ، كۈلكە گۈلگۈن چىھرىڭدىن قاچتى ، كۈلۈشۈمنى سېغىندىڭ بەلكىم . كاككۇك يەنە سايرىدى مۇڭلۇق چۈشلىرىمدىن كەتتىڭسەن توزۇپ ، بەلكىم قېنىپ لەۋ يېقىشمىدۇق ، ئازابلارغا  تويۇنسام تولۇق ، كاككۇك يەنە سايرىدى مۇڭلۇق . ياپراق كەبى تىترىدىم قاق چۈش ، بىلدىڭ سۆيگۈ قەلىبكە كۆچۈش ، كەلدى پۇرسەت ساڭا چۈمۈلۈش ، كاككۇك يەنە سايرىدى مۇڭلۇق . سۇ ئۇسىتىگە يامرىغان ئوتتەك ، يۈرىگىمگە ئاقتى بىر يۈرەك ، جان چىچىگى ئاچقاندا پورەك ، كاككۇك يەنە سايرىدى مۇڭلۇق .   ئوغلۇم پەن - ھېكمەت يولىدا كارۋانسەن ئوغلۇم، ئىزلىرىم جۇلاسى ئارمانسەن ئوغلۇم. ھاياتلىق مەنزىلى مۈشكۈل- جاپالىق، قىسمەتلەر باغرىدا تاۋلانسەن ئوغلۇم. پاك ھالال مىھنەتنىڭ بەركىتى چەكسىز، ئاقىللار سۆزلىرى ھىكمىتى چەكسىز، ئەل -يۇرتنىڭ سۆيگۈسى شەۋكىتى چەكسىز، مېھرىگە  ئۈمىدسەن ، دەرمانسەن ئوغلۇم. ئەجرىڭدىن  پارلايدۇ  نۇرانە  تاڭلار ، گۈللەيدۇ  باياۋان ،دەشتى- چۆل ،باغلار، جاسارەت كۈچۈڭدىن تىترەيدۇ تاغلار، قۇت ، ئىقبال تەختىگە ئىمكانسەن ئوغلۇم. ۋەتەننىڭ غورۇرى ئەرنىڭ ئىپپىتى ، كۆيدۈرەر ئەبەدىي ئىشقى رىشتىسى، نومۇس -ئار ، ۋىجدانىڭ ئۆمۈر جىلۋىسى، ھەقىقەت  تۇغىسەن جەۋلانسەن ئوغلۇم. روبائىيلار زىمىننى ئىللىتىپ ياشنىتار قۇياش، ياخشىلار خىسلىتى قۇياشقا ئوخشاش. زۇلمەتلەر باغرىنى يورۇتسا نۇرى، تەپتىدىن كۆكلەيدۇ چۆل،قۇم،تاغۇ-تاش. يىغىلاپلا كۆز ئاچتىم كۈلۈپ ياشايمەن، ھەق سۆيگۈ ئوتىدا كۆيۈپ ياشايمەن. ئىزىمدىن پارلىسۇن پاك مىھنەت نۇرى، قىسمەتتە تاۋلىنىپ دااۋان ئاشايمەن. ياخشىلىق مىھرىدىن سۆيۈنگىن كۆڭلۈم، ياخشىدىن پەخرلەن كۆيۈنگىن كۆڭلۈم. پاك نىيەت، ئاق دىللار  زىمىن زىننىتى، ساپ تۇرغىن كۈنۈ-تۈن سۇنمىغىن كۆڭلۈم. جۇت-تومۇز ،بوراندا تاۋلانغاچ توغراق، مىڭ يىللاپ كۆكلەيدۇ زەبەردەس شۇنداق. مىننەتسىز، غەيرەتلىك بولسا ھەر ئىنسان، قۇت -ئامەت مەڭگۈگە  ئاچىدۇ قۇچاق. ئاتىدۇر زىمىننىڭ تۈۋرۈگى ، ئۇلى، ئانىدۇر    زىمىننىڭ يۈرىگى، نۇرى. مىھنىتى كامالى ئەنگۈشتەر قۇدرەت، ئىزىسەن ياراتساڭ پارلاق كەلگۈسى. سۆيگۈ دەپ تىنىقىم باھار سەلكىنى، بارچىغا تىلەيمەن ۋىسال لەززىتى. پاكلىقتىن روھىمىز  نۇر چاچسا كۈندەك، ياغىدۇ تىنماستىن ھايات بەركىتى. پاك رىزىق، ساپ ئەقىل ئىنسانغا قانات، يۈرەك توق كىتىمىز سۆيسىمۇ مامات. ئەل -ۋەتەن سۆيگۈسى تەڭداشسىز بۈيۈك، يىلتىزسىز ياشنامدۇ كۈللى مەۋجۇدات. تەنھالىق ئېزىلدى يۈرىگىم ھىجرانلار ئارا ، مۇڭلۇنۇپ قارايدۇ كۆكتە يۇلتۇزلار . خىياللار سىھرىدە تۈنلىرىم يورۇق، ئۈمىترەڭ ئىزلىرىم تەكتىدە ئىزلار. سۈيىدۇ قۇچاقلاپ يىگانە قۇياش، قۇشلارنىڭ كۈيىگە ئامراقمەن ئەجەپ. خۇشاللىق بىلىنەر مەۋھۈم چۈشلەردەك، بەختنىڭ تىللىرى قالغان كېكەچلەپ. جىگدىلەر ئاڭلايدۇ دەردى ھالىمنى، تۆكۈلەر ئىچ سىرىم گويا يامغۇردەك. بوز تورغاي سايرىما يەنە مۇڭ قوشۇپ، قىسمەتلەر  سىقماقتا مېنى ئامبۇردەك. ھەيرەتتە باقىمەن تەڭتۈشلىرىمگە، ئازابلىق كۈنلەرنىڭ باغرىدا ئېقىپ. قۇشلاردەك ئۇچۇشنى ئويلايمەن ھامان، يايرىسام كۆك كېزىپ پەر قانات قېقىپ. تۆكۈلەر ئىچىمدىن تۈگىمەس دەرتلەر، ئۆزۈمنى ئىزلەيمەن  مەنزىلدىن تەكرار. مەن كۆيگەن گۈلخاننى سېغىنىپ تۇرۇپ، ئۆچمىگەن ، كۆچمىگەن چوغدىن مەن بىزار. تومۇچۇقۇم سايرىغىن خۇشال زەر قەپەزگە ئەمەسسەن مەپتۇن ، تومۇچۇقۇم سايرىغىن خۇشال. سايرىشىڭدىن بولغانمەن مەجنۇن، تومۇچۇقۇم سايرىغىن خۇشال. پەرۋازىڭدىن سۈزۈكتۇر ئاسمان ، پەرۋازىڭدىن يورۇقتۇر جاھان ، پەرۋازىڭدىن سۈيۈنىدۇ جان، تومۇچۇقۇم سايرىغىن خۇشال. قانىتىڭنى توسمىسۇن بۇلۇت ، قانىتىڭنى بوغمىسۇن جۇھۇت ، قانىتىڭغا سۆيسۈن مەڭگۈ قۇت ، تومۇچۇقۇم سايرىغىن خۇشال. مۇھەببەتتە كۆكلەيدۇ ئىنسان مۇھەببەتتىن يارالدى جاھان ، مەۋجۇداتقا بەردى ئۇلۇغ جان ، ئارمانلارغا ئۇلۇشۇپ ئارمان ، مۇھەببەتتىن كۆكلەيدۇ ئىنسان . سۆيگۈ رىشتى باغلىدى مەھكەم ، تاڭ جىلۋىسى ئۈمىت مۇجەسسەم ، ۋىسال ئارا تاتلىق ھىجران ، غەم ، مۇھەببەتتىن كۆكلەيدۇ ئىنسان . تۈكۆلىدۇ  ئالەمچە بەركەت ، ۋاپا ،مىھنەت ياغدۇرۇپ ھىممەت ، كامال تاپقان ئىنسانىي قىممەت ، مۇھەببەتتىن كۆكلەيدۇ ئىنسان . ئانا تىل ئۆز ئانامسەن گويا ئانا تىل ، ماڭا گۈزەل دۇنيا ئانا تىل ، يايرايدۇ جان ھىكمەتلىرىڭدىن ، مەنزىلىمدە زىيا ئانا تىل . ئادەم بولدۇم تونۇپ ھەممنى ، ئاق -قارىنى ،ھەقنى -ناھەقنى ، سەن بار بىلدىم ھايات قەدرىنى ، ئەجدات ئىزى گۇۋا ئانا تىل . تۆكۈلىدۇ ئالەمچە بەركەت ، ياغدۇرىسەن مىھرى -مۇھەببەت ، خىسلىتىڭدىن يار بولغان نۇسرەت ، ھاياتىمغا  پىدا ئانا تىل . مەڭگۈ يورۇق قۇياشتەك مېھرىڭ ، جەننەت تۇتاش ئۇلۇغدۇر سىھرىڭ ، پۈتمەس ئىمكان قۇدرىتىڭ ،چىھرىڭ ، پاك روھىمدا جۇلا ئانا تىل . ھۈنەر ھكمىتى ھاياتلىقنىڭ شەۋكىتى ھۈنەر ، ھالاللىقنىڭ يول خېتى ھۈنەر . جان كۆكلەيدۇ ئەجىر -مىھنەتتىن ، بۈيۈك ئىزلار بەركىتى ھۈنەر . ئىلىم -ھۈنەر تارىخ ياراتقان ، مەنزىللەردە ئىزلىنىپ ئىنسان ، چىچەكلەيدۇ يۈرەكتە ئارمان ، گۈل ئۆمۈرنىڭ قۇدرىتى ھۈنەر . پاك نىيەتتىن پاك ھوسۇل ھاسىل ، سۈزۈك تەردىن كۈلىدۇ ئەقىل ، نەپرەت بىلەن سۆيگۈگە پاسىل ، ئامەت ، بەخىت نۇسرىتى ھۈنەر . كەلمىسەڭ قۇرۇپ قاقشال بولۇپ قالىمەن ، چۆلدە قالغان بىر تۈپ دەرەختەك . ئۆز -ئۆزۈمنى ئوتقا سالىمەن ، گۈلخان بولۇپ ئاقىدۇ يۈرەك . سۆيگۈ ئىزلەپ يۈرگەن ئاشىقمەن ، تىرىكلىكنىڭ غەم بازىرىدا . ھىجران يۈدۈپ بولغان شائىرمەن ، ئۈلۈم  ۋىسال ھەق ئارىسىدا . تاڭ كۆيگەندەك كۆيىمەن ھەر كۈن ، مەجنۇنلاردەك ناخشام تۈگىمەس . يۈلتۇزلارنى سۆيىمەن ھەر تۈن . دىدارىڭسىز كۆزلىرىم ئەلەس . تەڭرىم سالغان بۇ سەۋدالىقنى جاندىن ئۇلۇغ بىلىمەن جېنىم . ساڭا سالغان  ئۇ تەرسالىقنى ، ياندۇرىدۇ ۋاپالىق مىھرىم . تەنھالىقتىن تويدۇم بىلمىدىڭ ، جۇدالىققا ئەجەپ تاشلىدىڭ . ئەقىدەمگە نېمە تىلىدىڭ ، ئوتۇنچىغا مېنى ساتمىدىڭ . ياخشلىق ئۇلۇغ مىھرى -شەپقەت ياخشىلىق ، بىباھاسىز قىممەت ياخشىلىق . ياخشىلقتىن ياشنايدۇ ئىنسان ، تەڭدىشى يوق زىننەت ياخشىلىق . پاك نىيەتتىن پاك ئەجىر ئايان ، ھالاللىقتىن كۆكلەيدۇ ئىنسان ، ياخشىلىقتىن گۈللەيدۇ جاھان ، چەكسىز ئامەت -بەركەت ياخشىلىق . ياخشلىقلار ئىنسانىي قەرىز ، ياخشلىقلار ئىنسانىي پەرىز ، ياخشىلىقتىن ئۆچمەس باسقان ئىز ، ئالەمچە نۇر شەۋكەت ياخشىلىق . ياخشلىقتىن يورۇيدۇ زۇلمەت ، ياخشىلىقتىن چۆللەرمۇ جەننەت ، ياخشىلىقتىن سۈيەر مۇھەببەت ، قۇت، كامالەت ، نۇسرەت ياخشىلىق. ئەجەپ ئەمەس يىغلاپ كەلگەن كۈلەلىسەم ئەجەپ ئەمەس، ھاتەم كەبى يۈرەلىسەم ئەجەپ ئەمەس. مىھنىتىمدىن گۈللەندۈرۈپ باياۋاننى، خامانلاردا  تۈنەلىسەم ئەجەپ ئەمەس . ۋەتەن ئىشقى يۈرىگىمدە گۈلخان بولدى ، ئەل مىھرىدىن تىنىم چەكسىز كۈچكە تولدى، رەقىبلەرنى بەربات قىلماق ئارمان بولدى، ئەلنى جاندەك سۈيەلىسەم ئەجەپ ئەمەس. تۆكۈلىدۇ ئامەت -بەركەت پاك نىيەتتىن، زور ئىرادە ، سەمىمىيەت ،ساداقەتتىن ، دىيانەتتىن ، جاسارەتتىن ، مۇھەببەتتىن، ئۇلۇغلۇقنى بىلەلىسەم ئەجەپ ئەمەس. ياخشىلىقتىن كۆكلەيدىكەن گۈزەل ئالەم، ياشنايدىكەن ئەجرى بىلەن ئەزىز ئادەم، ئاپەتلەرگە ، قىسمەتلەرگە قۇت مۇجەسسەم، كەچمىشلەرگە كۆنەلىسەم ئەجەپ ئەمەس. ھىجرانى بار  سۆيگۈ ۋىسال نۇسرەتلەرنىڭ ، ھىساۋى بار تەرسىز كەلگەن  نىممەتلەرنىڭ، ئازابى بار  ئاسان نىسىپ  ھىممەتلەرنىڭ ، تەرىمدىن خۇش كۆلەلىسەم ئەجەپ ئەمەس. ئادىمىيلىك ئۆلچىمىدۇر ۋىجدان ، غورۇر، بۇ بېزەكسىز ياشالماسمىز بولۇپ مەغرۇر، روھىيەتنى يورۇتىدۇ  مەڭگۈلۈك نۇر، روھىمدىن نۇر كۆرەلىسەم ئەجەپ ئەمەس. ئۆمۈر باقماس باي -گادايغا ، ئەمەلدارغا ھەم، تامچە سۇدىن كەلگەن كەتسەك كۆزلەردە نەم، ئارمان سىڭغان يۈرەكلەردە چەكسىز ئەلەم ، ھەق ئىشقىدا كۆيەلىسەم ئەجەپ ئەمەس. مۇھەببەتتە ھەققىم بار بىلسەڭ مۇھەببەتتىن تۆكۈلىدۇ نۇر ، مۇھەببەتتىن ياشايمەن مەغرۇر، بېرەر ۋىجدان دىيانەت، غورۇر، مۇھەببەتتە ھەققىم بار بىلسەڭ. مۇھەببەتتىن كۆز ئاچتىم ،كۈلەي، جان كەتسىمۇ ئىشقىدا كۆيەي، سۈيۈندۈرەي سۆيدۈرەي سۈيەي، مۇھەببەتتە ھەققىم بار بىلسەڭ. ئىشقىسىزغا يولىما كۆڭلۈم، ئەقىدىسىز ياشىماق ئۈلۈم، ۋىسال ئۈچۈن مەيلى نە  كۈرۈم، مۇھەببەتتە ھەققىم بار بىلسەڭ. مۇھەببەتنى ئۇلۇغلىساڭ كەل جانان يۈرۈگۈمنى كۆيدۈرىدۇ بىر ئارمان، شۇ ئارمان ئەۋجىدە ياشنايدۇ بۇ جان. سۆيىدۇ قىسمەتلەر قىينايدۇ ھىجران، مۇھەببەتنى ئۇلۇغلىساڭ كەل جانان. ئاتام ئاتا ھاۋا ئانا ئىزى بىز، گويا جەننەت باغلىرىنىڭ گۈلى بىز، ئۇلۇغ سۆيگۈ مەنزىللەرنىڭ سىرى بىز، مۇھەببەتنى ئۇلۇغلىساڭ كەل جانان. نېمە يەتسۇن مىھرى ۋاپا رىشتىگە، ۋىسال تاپساق گۈللىمەمدۇ جەزىرە، كۈلدۈرىدۇ چىن ئاشىقنى ئەقىدە، مۇھەببەتنى ئۇلۇغلىساڭ كەل جانان. باقىي ئەمەس مالۇ-دۇنيا ، ھەشەمەت، باقىي ئەمەس ئەمەل-مەنسەب،سەلتەنەت، زامانلاردىن ئۇزاق ياشار مۇھەببەت، مۇھەببەتنى ئۇلۇغلىساڭ كەل جانان. مەندىن شېئىر سورايدۇ ئالەم چۈشلىرىمدە شېئىر چۈشەيمەن ، يۇلتۇز بولۇپ چاقنايدۇ نورلۇق . ئاشىق بولۇپ قالغان ئوخشايمەن ، سۈزۈك تاڭلار كۆيىدۇ ئوتلۇق . يۈرىگىمدە شېئىر تىنىقى ، باھار ھىدى كەبى خۇشپۇراق . ئىگەم جانغا سالغان رىشتىنى ، بىلدىم شېئىر بەرگەن ئوت -پىراق . ئوماق قىزدك كۆرۈنسە گاھى ، سۈيۈلۈشنى ئۈگەندىم  شۇندىن . چاڭقاتقاندا ھىجران ئازابى ، ھەق يولىدا تاۋلاندىم ئاندىن . جەننەت تۇتاش ئارمانلار پارلاپ ، شىۋ قەدرىدەك سۆيدى شېئىرىم . ئادەم بولدۇم روھىمنى پاكلاپ ، ئانا يەرگە سىڭدى ئىزلىرىم . خىياللىرىم شەپەقرەڭ جۇلا ، دىل كۆكىمدە قۇشلار پەرۋازى . ھەر تۇيغۇمدا سۈپسۈزۈك دۇنيا ، ئاڭلىنىدۇ توغراقلار كۈيى . قەدىم ناخشا كولدۇرما ئۈنى ، تاراپ كەتكەن يىراق -يىراققا . تەكلىماكان ئانامسەن خۇددى ، شېئىر ئوتى ياقتىڭ بالاڭغا . مۇھەببەتنىڭ قۇدرىتى چەكسىز ، سۆيگۈ مېھرى سەزدىم شېئىردىن . تەنھالىقنىڭ ھەسرىتى چەكسىز ، ئۆز -ئۆزۈمنى كەزدىم شېئىردىن . سڭماق بولسام شېئىر قوينىغا ، مەن ئۆزۈمنى يېڭىشىم كىرەك . بۇركۈت بولۇپ قۇنۇپ قىياغا ، پەيلىرىمنى قىرقىشىم كىرەك . مۇئەللىم بارلىق مىھنەتكەش ئۇستازلارنىڭ بايرىمىنى قۇتلۇقلايمەن . قارا دىللار سۈزۈك تاڭدەك يورۇدى ، نورلۇق قۇياش گويا ئوتلۇق مىھرىڭز . سەبى جانلار ھاياتلىقنى تونۇدى ، خىزىر سۈپەت بەركەت ياغقان چىھرىڭىز . ئەجرىڭىزدىن مەنزىللەردە گۈل ئۈنۈپ ، يىراقلاشتى ئەلدىن يامان ئىللەتلەر . ئادىمىيلىك كامال تاپتى قۇت قۇچۇپ ، چىچەكلىدى ئۇلۇغ ئارزۇ -تىلەكلەر . بارلىغىڭىز بېغىشلانغان ئىلىمگە ، ياراتتىڭىز تارىخ -ھىكمەت ،بۈيۈكلۈك . رىشتىڭىزدىن پاكلىق تۇغدۇر ئالەمگە ، تىنىقىڭىز روھ ئويغاتقان زىل گۈدۈك . قۇتلۇق مىھنەت ،تەرىڭىزدىن ئەل كۈلدى ، چەكسىز ئازاپ ، قىسمەتلەرنى يەڭدىڭىز . ھەق -دىيانەت ،  گۈزەللىكتىن سۈيۈندى ، كۈللى جانغا بەخىت -شاتلىق بەردىڭىز . مېھرىڭىز قۇياشتەك كۈلىدۇ ئۇستاز تونۇلغان سىر بېزەكچىلىك ئۇستىسى ئۇستام ئابلەت ئۆمەرنى ئەسلەيمەن . چىھرىڭىزدىن كۈلەتتى باھار ، مېھرىڭىزدىن چاقنايتتى قۇياش . ئادىمىيلىك ۋىسالى ئىزھار ، ئىزىڭىزدىن چىمەن تاغۇ -تاش . ئەجرىڭىزدىن تالاي ئوغلانلار ، تەۋپىق ،نۇسرەت، بەختىنى تاپقان . ئەل -يۇرت قەلبى چۈمگەن ئىپتىخار ، ھۈنەردە سىز ھىكمەت تاراتقان . پاك ھالاللىق ،خالىس نىيەتلىك ، گۈل ھاياتلىق مىزانى ئىدى . ئېسىل خىسلەت ، خۇشخۇي مىجەزلىك ، پەزىلەتلەر شەبنەمدەك تامدى . گويا قۇشتۇق ئەنقا ئىدىڭىز ، پايانىدا ئۇچقان ئىلىمنىڭ . خىزىر سۈپەت باسقان ئىزىڭىز ، ئۇيقۇسىنى ئاچقان زىمىننىڭ . مېھرىڭىزدىن نۇرلانغان دىللار ، ئۈمىتلەرنى ئاقلايمىز چوقۇم . سىز مۇز جۇتنى قوغلىغان باھار ، قۇياش بولۇپ پارلايمىز چوقۇم . كۆزۈڭنى يۇم پەقەت بىر دەملا كۆزۈڭنى يۇم پەقەت بىردەملا ، سۆيۈپ قوياي مەڭزىڭگە تاتلىق . ئوتلۇق نەپەس تىنىقلار ئارا ، ۋۇجۇدلارغا تارىسۇن شاتلىق . كۆزۈڭنى يۇم پەقەت بىردەملا ، بارچە ئەلەم ھەسرەتنى ئۇنتۇپ . ئىلاھىي نۇر سۆيگۈ باغرىدا ، گويا ئەركىن قۇشلاردەك ئۇچۇپ . كۆزۈڭنى يۇم پەقەت بىردەملا ، يۈرەكلەرنى تونىسۇن يۈرەك . پاك ئەقىدە ، ۋاپا نۇرىدا ، باھارىمىز ئاچسۇن گۈل -چىچەك . ئاشىقمەن پالانغان كۆيۈك شەھرىگە مۇھەببەت جېڭىدە يېڭىلدىم بىر رەت ، تاس قالدى بىر خانىش قۇلدەك ساتقىلى . ئويغانغان روھىمدا قاينايدۇ نەپرەت ، قۇتۇلدۇم ؛  تەڭرىنىڭ ئۇلۇغ شەپقىتى . چۈشەندىم شۇنىڭدىن مۇھەببەت نېمە ، قايتىدىن كۆز ئاچتىم ،تىرىلدىم دېمەك . تاڭدىنمۇ سۈپسۈزۈك سۆيگۈ رىشتىدە ، يايرايدۇ  ياشىرىپ چاڭقىغان يۈرەك . ھاياتنىڭ جەريانى شۇ ئىكەن يەنە ، ھەر تاڭلار نۇرلىرى مۇھەببەت نۇرى . قىسمەتكە تويۇنغان سىھرى ئىچىدە ، ھىجراندىن پۈتەركەن ۋىسالنىڭ ئۇلى . تەنھالىق سۆيەركەن قانماستىن بېقىپ ، مەنزىللەر قوينىدا مۇھەببەت جېڭى . پەرشتە جىلۋىسى باڭرىڭغا ئېقىپ ، ئويغىتار ئادەملىك ، ئۇلۇغلۇق ئېڭى . بۇ دەملەر يېڭىلش بولسىمۇ مەيلى ، ئىنسان ئۇ پاكلىقنىڭ ، سۆيگۈنىڭ قۇلى . مەجنۇنمەن يولۇمدا كۈتەر بىر لەيلى ، ئىزلىرىم ئاستىدا بىر كۆيۈك شەھرى . ئۈزۈلمەيدۇ مۇھەببەت كۈيى سۈپسۈزۈك تاڭلاردەك تىنىقىم لاۋا ، قۇياشتەك كۆيىمەن پايانىم ھىجران . كۈلىدۇ تەنىدە ئەجەپ بۇ دۇنيا ، يېنىشلاپ سۆيىىدۇ بىر ئېزگۈ ئارمان . زىمىننىڭ قوينىغا تاشلاپ ئۆزۈمنى ، يىغلىغۇم كېلىدۇ ئۈنۈم پۈتكىچە . قولۇڭنى چىڭ تۇتۇپ يومۇپ كۆزۈمنى ، سۆيسەمكەن يارسېنى جېنىم پۈتكىچە . قۇشلاردەك ئەيلىسەك يىراققا پەرۋاز ، ھېچكىممۇ  بىلمىسە پىچىرلاشلارنى . ئېرىيدۇ يۈرىگىم جېنىم سەۋرىىناز ، بىلىسەن كۈتۈشتە چاڭقاشلىرىمنى . جەننەتتەك بىلىنەر ئىدى كەپىمۇ ، ۋىسالدىن مەس بولساق تەنلەر قوشۇلۇپ . مۇراتقا يېتەتتى شېرىن ۋەدىمۇ ، بارچىكى ئازابلار مەڭگۈ يوقۇلۇپ . بىر قىز بار مەن تېخى سۆيۈپ باقمىغان بىر قىز بار مەن تېخى سۆيۈپ باقمىغان ، شاماللار ئېپ كېلەر خۇشبۇي ھىدىنى . ھېچكىمگە بۇنچىلىك كۆيۈپ باقمىغان ، يۈرەككە تۇتاشتۇر ئىلاھىي رىشتى . بىر قىز بار مەن تېخى سۆيۈپ باقمىغان ، ھەر تاڭلار چېھرىدىن مېھرى ئاياندۇر  . كۈتۈشكە بۇنچىلىك كۆنۈپ باقمىغان ، مىسالى پەرىشتە سىھرى ئاياندۇر . بىر قىز بار مەن تېخى سۆيۈپ باقمىغان ، تۈنلەردە يۇلتۇزدىن سالام يوللايدۇ . بۇنچىلىك قۇت پەيزى سۈرۈپ باقمىغان ، ئارمانلار ۋەسلىدە جېنىم يايرايدۇ .                                                                     ھۈنەردە                                                   ئىنسان بەخىت تاپقان ھۈنەردە ،                                                    ئەقىل كۆزى ئاچقان ھۈنەردە .                                                   پاك -ھالاللىق باھاسىز زىننەت ،                                                   جاھان روناق تاپقان ھۈنەردە .                                             قان  -تەرىدىن ياشناتقان يەرنى  ،                                             ئېلىم -ھۈنەر كۆكلەتكەن ئەرنى ،                                            ئېرىشتۈرگەن نۇسرەتكە   ئەلنى ،                                            ئىزىدىن ھىد چاچقان ھۈنەردە .                                           تىرىكچىلىك يوللىرى مۈشكۈل ،                                            قولى گۈلنىڭ چۆللىرىمۇ گۈل ،                                            جەننەت ھوزۇر سۈرىدۇ  پۈتكۈل ،                                             كامالەتكە ئىمكان ھۈنەردە .                                            مىھنىتىدىن ئادەملەر ئۇلۇغ ،                                            ئىلىم -ھۈنەر ھاياتلىققا تۇغ،                                          يۈرەكلەردە ئۈمىت ئۆچمەس چوغ ،                                           جاندىن بۈيۈك ئارمان ھۈنەردە       ئانا تىلىم جان تىلىم ئانا تىلىم جان تىلىم ، تومۇرۇمدا قان تىلىم . تاۋۇشلىرىڭ تىنىقىم ، ياشاشقا ئمكان تىلىم . ئەقىل بەردىڭ كۈچ بەردىڭ ، ھەقنى بەردىڭ قۇت بەردىڭ ، زىمىستاندا  ئوت مېھرىڭ ، مەنزىلدە دەرمان تىلىم . بۈيۈكلۈكتە  تەڭداشسىز ، ئامەت بەركىتىڭ چەكسىز ، ئۇلۇغ تارىخ  قالدى ئىز ، ياراتتىڭ جاھان تىلىم . دىھقان - زىمىن ئاتىسى كۆمۈش تەردە قۇياش نۇرى پارلايدۇ ، ماڭلىيىدا كەچمىش -تارىخ ئىزناسى . ئانا زىمىن ئاڭا كۈلۈپ قارايدۇ ، خىزىر سۈپەت ھاتەم خىسلەت سىماسى . نەۋ باھارنىڭ چېچەكلىرى ھىدىدەك ، يەر -جاھاننى خۇشبۇي ئىپار قاپلىغان . نەدە ئۇلۇغ رىشتە ئوتلۇق مېھرىدەك ، نى سەلتەنەت ، زامانغا  ئۇ  بەرگەن جان . تاڭنى چىللاپ تىنىقلىرى ئوت  -لاۋا ، ئىزلىرىدىن سۆيۈنىدۇ باغ -ئېرەم . پاكلىغىدىن بەركەت ياغقان ھەر جايغا ، ساپلىغىدىن گۈلىستاندۇر مۇكەررەم . چىمدىم توپا ، ھەر بىر گىياھ ئەزىزدۇر ، بار مەۋجۇدات ، تىرىكچىلىك ياشنايدۇ . چۆلنى بوستان قىلغان ھالال ئەجرىدۇر ، ئادىمىيلىك لەزىز ، روھتىن چانمايدۇ . ئىناقلقتىن  يارىتىدۇ  ئۇلۇغلۇق ، غورۇر - ۋىجدان ئەنگۈشتىرى ، تۇمارى . قىيالاردا  ئېچىلىدۇ  بوپ چوغلۇق ، ئۇ ھاياتلىق جەڭگاھىنىڭ سەردارى . كامال تاپقان سۈزۈك نىيەت ، دىيانەت ، كۈرمىڭ قىسمەت جاپالاردا  ئۇ  مەغرۇر . ياغدۇرىدۇ ئەلگە ھىممەت ، مۇھەببەت ، قاباھەتنى يورۇتقاندەك ئاپئاق نۇر  . مول -ھوسۇلدىن توي -مەشرەپلەر ئوينايدۇ ، قۇت كۆكىدە بۈركۈتلەردەك پەرۋازى . ئەل ئىشقىدا ئەل چىھرىگە قانمايدۇ ، زىمىن گۈللەپ ئۈزۈلمەيدۇ پاك رىشتى . سۆيەلمەيمەن دېمە ئەزىزەم جاندىن ئۇلۇغ سۆيگۈ ئەقىدەم، شەپەق تامان مەنزىل-نىشانەم. تاغدەك مەزمۇت غۇرۇر-ئىرادەم، سۆيەلمەيمەن دېمە ئەزىزەم. ئىزلىرىمنى سۆيىدۇ قۇياش، تۈنلەر يورۇق قوشۇلغاندا باش. شەكسىز ئۆلۈم ۋىسالسىز ياشاش، سۆيەلمەيمەن دېمە ئەزىزەم. خۇش ھىدىڭدىن گۈللەيدۇ باھار، كۈلۈشىڭدىن  كۈلىدۇ ناھار. رەقىب ۋەسلى بولسۇن بەربات، خار، سۆيەلمەيمەن دېمە ئەزىزەم. ھەقىقەتنى چۈشەنمىسەڭ ئەگەردە ئادەمدىن يىراقسەن تەڭرى كۆزىدە، پاك روھىڭ قاباھەت زەئىب تېنىڭدە. يوقىلار ئۇلۇغلۇق، مۇھەببەت رىشتە، ھەقىقەتنى چۈشەنمىسەڭ ئەگەردە. ئۇرغاندەك بولىسەن گۆھەرنى تاشقا، تەڭسىزلىك ، ئەلەملەر كېلىدۇ  باشقا، نە سەۋەپ  قالىدۇ  يەنە  ياشاشقا، ھەقىقەتنى چۈشەنمىسەڭ ئەگەردە. قۇم -بوران ئاستىدا كۆمۈلەر ئىزىڭ، ھېچنىمە ئەمەستۇر قىلغان ھەر سۆزۈڭ، ھېچنىمە ئەمەسسەن بولسىمۇ جېنىڭ، ھەقىقەتنى چۈشەنمىسەڭ ئەگەردە. ئەخلەتكە ئايلىنار پۇل، دۇنيا، بىسات، ئىشقىسىز يۈرىكىڭ نېمىگە ھېساب، ئەل دەيدۇ: نادانغا كۈرمىڭ پەندىيات، ھەقىقەتنى چۈشەنمىسەڭ ئەگەردە. بەركەتلەر ، ئامەتلەر يېقىن يولىماس، زۇلمەتكە تۇتقۇندۇر دىلىڭ يورۇماس، قەبرەڭنى  ھەتتاكى شىۋاق ئورۇماس، ھەقىقەتنى چۈشەنمىسەڭ ئەگەردە. ئامال يوق ئۇزىتىپ قويىدۇ بەندە، يازمايدۇ ھېچكىممۇ ئاتاپ مەرسىيە، قاغىلار قاقىلداپ قونىدۇ  بىرە، ھەقىقەتنى چۈشەنمىسەڭ ئەگەردە . پورەكلەپ ئېچىلدى ھىجران گۈللىرى غېرىبتەك ساقلايمەن سېنى ئەي سەنەم ، ھاياتلىق يولىغا تۇتاشقان باغدا ، ئوخشاتسام گۈللەرنى ۋىسالغا بۇ دەم ، بۇلبۇلنىڭ نالىسى  سالدى خىيالغا . ئارمانلار قوينىدا كەزدىم مەنزىللەر ، ئايلىنىپ ماڭغىنىم سۆيگۈ ئېقىنى . چۈشۈڭدىن ئۇيغۇتۇپ ئۆتكەن سەھەرلەر ، شاماللار پۇرۇتۇپ ئۆتتى ھىدىڭنى . نەۋ باھار كۈيىدىن تۇغۇلدۇم تالاي ، ئالدىمدا تەڭتۈشلەر يارقىن ئىزلىرى ، كۈتۈشلەر ئىلكىدە مېھرىڭگە قانماي ، پورەكلەپ ئېچىلدى ھىجران گۈللىرى . قۇياشىڭ بولايمەن قۇياشىم دېسەڭ تۈنلەرنى يورۇتقان تولۇنئاي ئۆزۈڭ ، قۇياشىڭ بولايمەن قۇياشىم دېسەڭ . چاقنىغان يۇلتۇزلار نۇرانە كۆزۈڭ ، سەن گويا پەرىشتە  بىغۇبار  كۈلكەڭ . سەھەردە باغلاردا ئچىلغان گۈلسەن ، ئەبەدىي يېقىملىق ياڭرىغان كۈيسەن ، شەپەققە تۇتاشقان ئارمانىڭ بىلەن ، قۇياشىڭ بولايمەن قۇياشىم دېسەڭ . ھاياتلىق يولىدا ئىزىمىز قالسۇن ، ۋىسالغا چۈمۈلۈپ باغرىمىز قانسۇن ، مېھرىمىز تەپتىدىن جاھان تاڭ قالسۇن ، قۇياشىڭ بولايمەن قۇياشىم دېسەڭ . ۋاپانىڭ بېغىدا مەڭگۈ باھار بار ، سۆيگۈلۈك يۈرەككە  نۇسرەت يارى -يار، ياشنايدۇ  مىسكىن جان ئەيلەپ ئىپتىخار ، قۇياشىڭ بولايمەن قۇياشىم دېسەڭ . سۆزلىشىمەن يۈرىگىم بىلەن يۇلتۇزۇمنى ئىزلەپ تەنھا تۈن ، خىياللىرىم سۆيىدۇ تاڭنى . ھىجرانلاردا كۆيىمەن پۈتۈن ، قۇچاقلايمەن ئەڭ بۈيۈك ئاڭنى . روھىمغا يار نۇرانە ئىزلار ، مەنزىلىمدە پارلايدۇ ئارمان . تىنىقىمدەك چىچەكلەپ سىرلار ، ئىكەكلىنىپ ئۇپرايدۇ بۇ جان . قىسمەتلەرنى تەكرارلاپ تەقدىر  ، گۈزەل قىزدەك مەپتۇن ئەيلەيدۇ . كۆنۈپ قالدىم ھەممىگە ئاخىر ، ھەسرەتلەرنى ئۈمىد  چەيلەيدۇ . سۆيگۈ ئىزلەپ ياشىدىم مەغرۇر ، ئەقىدەمدىن ياندۇرۇپ لاۋا . تىلەكلىرىم ئىلاھىي ئاق نۇر ، ئامانەتكە ھامىلدار دۇنيا . ئېسىل دەملەر خۇشخۇي دىدار ، ئاپئاق تېلەكلەر ، كۆڭۈللەردىن مېھىر تاشىدۇ . جەننەت تامان تۇتاش يۈرەكلەر ، قۇياش بولۇپ نۇرلار چاچىدۇ . سۈزۈك تاڭدەك گۈلگۈن چىرايلار ، نەۋ باھارنى قىلىدۇ مەپتۇن . چىچەكلەيدۇ بەخىتتىن جانلار ، ئەھلى دوسىتلار شاتلىغى پۈتۈن . قۇت - ئىناقلىق ناۋاسى جۇشقۇن ، ئۇلۇغ كۈنلەر قىبلىسى ئۆيلەر . تۇققانلار جەم  نۇسرەتكە تۇتقۇن ، قەدەملەردىن تۆكۈلۈپ گۈللەر . جەمىگاھى ئوتلۇق رىشتىنىڭ ، بەركەت ياغقان ئانا زىمىنغا . ئوتى يامان سۆيگۈ ئىشقىنىڭ ، يۈرەكلەردە كۆيىدۇ دۇنيا . ۋىسالنىڭ تاڭلىرى سۈپسۈزۈك جېنىم جاندىن ئەزىز سۆيگۈ ئەسلىدە ، يۈكسەك ئاڭدىن بۈيۈك ھاياتلىق . روھى سۈزۈك ئىنسان نەسلىدە ، تاڭدەك پارلاپ تۇرغان نىجاتلىق . كەچمش -قىسمەت تاۋلايدۇ ھامان ، تىرىكلىكنىڭ مەنزىلى مۈشكۈل . ئۇلىشىدۇ  ئارمانغا  ئارمان ، ۋىسال ئىزلەپ كۆيىدۇ  پۈتكۈل . پاك نىيەتتىن كۈلۈپ پاك مىھنەت ، گۈل پۇرايدۇ  دەشتى چۆل قوينى . تۆكۈلىدۇ  ئالەمچە بەركەت ، ياخشىلارنىڭ بولغاچ ئوت مېھرى . يېزىڭ مۇخبىر ۋەتەن -ئەل سۆيگۈسى چەكسىز  مۇھەببەتنى يېزىڭ مۇخبىر ، ئۇلۇغ رىشتە ،  ئاتەش مېھىر  ھارارەتنى يېزىڭ  مۇخبىر . ئىلىم -ھىكمەت  ساماسىدا  قانات قاققان ، بەخىت تاپقان ، ھالال تەردىن زەپەر قۇچقان  كامالەتنى يېزىڭ مۇخبىر . ئاسايىشلىق ، ئېناق تۇرمۇش ، ئاۋات بازار ، باياشات ئەل ، ئامەت -بەركەت قۇچاق ئاچقان  سائادەتنى يېزىڭ مۇخبىر . دانا تەدبىر ، ئېلىم پەندىن   تېپىپ قۇدرەت روناق تاپتۇق ، بېيىدۇق ھەم قۇچۇپ نۇسرەت   پاراسەتنى يېزىڭ مۇخبىر . تۈمەن سەرخىل ھۈنەر -كەسىپ كۆلەملەشتى ، راۋاجلاندى ، بۈيۈك ئىشلارغا يول ئاچقان  سىياسەتنى يېزىڭ مۇخبىر . سۈزۈك تاڭلار ، ئۆسۈپ ئاڭلار كۈلۈپ شاد يايرىدى دىھقان ، ئۈمىد -ئارمان چېچەك ئاچقان  ھالاۋەتنى يېزىڭ مۇخبىر . ھاتەم خىسلەت نى ئوغلانلار يېڭىپ مۈشكۈل داۋان ئاشتى ، چىدام - غەيرەت  ، پىداكارلىق ،  جاسارەتنى يېزىڭ مۇخبىر . غېرىب -مىسكىن ، مېيىب -ئاجىز ، كېسەل ، نامرات ، ياشانغانلار ، بەھىر ئالغان  پاراۋانلىق   شاپائەتنى  يېزىڭ مۇخبىر . سۇسىز  چۆللەر گۈلىستاندۇر ، يېزا -قىشلاق شەھەرلەشتى ، يېڭىلىقلار تولۇپ تاشقان  قىياپەتنى  يېزىڭ مۇخبىر . قېرىنداشتەك ئىجىل -ئامراق ئەللىك ئالتە مىللەت ئىناق ، ئۇلۇغ مەنزىل ، بۈيۈك ئارمان   ساداقەتنى يېزىڭ مۇخبىر . مەنبە :ئۆزۈم

nurzat320

	بارىكاللا ياخشى يىزىپسىز

alram1976

	ياخشى چىقىپتۇ، ئۇقۇپ سۆيۈندۈم. سالامەت بۇلىشىڭىزنى تىلەيمەن.

春雨

	ۋاي-ۋۇي،نېمىدىگەن ئۇزۇن شېئىر بۈۇ؟قانداقمۇ يېزىپ بولغانسىز،مەن ئوقۇپ ھېرىپ كەتتىم،توپلامقىلىپ بىرلا يېزۋىتىپ سىز-دە،لېكىن،راسلا ياخىشى يېىپسىز،تېخىمۇ تىرىشىڭ

زامانتاش

	ياخشى  يېزىپسىز.

زامانتاش

	ياخشى  يېزىپسىز.

jiya.ogli

	ئارتۇچ ئەپەندىمنىڭ بۇ بىر بۈلۈك شېئىرلىرىنى ئوقۇپ ھەقىقەتەن ياقتۇردۇم.... ئىجادىيەتتە قول تۇتۇشۇپ ئىلگىرىلەيلى!...