بۆرە ئوغلى روبائىلىرىدىن

boraogli

	روبائىلار ئەخمەدجان توختى مەي ئىچتىڭ بىر دەملىك ئارام تاپارسەن، دەردىڭگە ۋاقىتلىق پالاس ياپارسەن. بەرھەقكى ئىسلامدا كاپىر ئاتىلىپ، يۈزلىنىپ دوزاققا شۇ دەم چاپارسەن. دەپتىمىش بىراۋلار غەملەردىن يىراق پېقىرنى،ئەلەمدىن كەلمەيدۇ پۇراق. بېشىمدا غەم تولا شۇندىمۇ لېكىن، نىچۈنكىن مەن كۈلۈپ ياشىدىم بىراق. ھەسەت يوق ھەر كۈنى قاينىسا كوراڭ، ۋەياكى گىلەمگە ئالماشسا بوراڭ. بىللىدۇر دائىما پادا باقساڭمۇ، ياخشى دوست ئۆزۈڭ شۇ سۇدىكى شولاڭ. ئېشەككە شاخ تاپسام ئاتنىڭ يېمى يوق قاخشىما دەپ يەنە كەپتەر دېنى يوق. ئۆزۈڭنىڭ ئىشىغا ئۆزۈڭ چاپمىساڭ، بۇ دۇنيا رەھىمسىز ياتنىڭ غېمى يوق. ئادەمنى دەيدىكىن مايمۇن ئۈممىتى، كەلمىشى لايدىن يا ئاللاھ  ھىممىتى. نىمىدىن تۆرەلسۇن ۋەلېكىن بىراق، ھەممىدىن مۇھىمى قەدىر قىممىتى. جاھاندىن پۇل دەپلا ئۆتەرلىك ئەمەس، چۈنكى ئۇ ھىچكىمگە يېتەرلىك ئەمەس. كىملەردىن قالمىغان دۇنيا ئىكەن بۇ، قەبرىگە ئەپ بىللە كېتەرلىك ئەمەس. قاخشىما جاھاننىڭ تارايغىنى يوق، بۇتلىنىپ چىرايى قارايغىنى يوق. ئۈمىدكە قېتىلسا تىرىشچانلىقىڭ، كۈلگەن ئۇ ھىچكىمگە ئالايغىنى يوق. بۇ كەمدە خۇشاللىق مېنىڭدىن نېرى، ئەيلىمەك بولدىمۇ ۋەياكى <قېرى>. شۇندىمۇ چېھرىمدە كۈلكە-تەبەسسۇم، باش ئەگمەي ئۈمۈدىم ئۇلغايغانسىرى. كۆزۈگە كىرىپلا كەتكەن ئەشۇ دەم، بىر بالا تىللىدى ئۇنى دەممۇ-دەم. توپىدىن بىر سادا:تىللىما بالام بوۋاڭنىڭ بوۋىسى ئىدىم مەنمۇ ھەم. يۈرەكقۇ ئەلۋەتتە سوقىشى كېرەك، ۋەلېكىن سوقسىلا ئەمەستۇر يۈرەك. ئوخشىماس تومۇردا ئاققان قانمۇ ھەم، ھەقىقى يۈرەكنىڭ سوقۇشى بۆلەك. مۈشكۈلگە يولىقسا ئەگەر بىر كىشى، يالتايماق ئىشىدىن ناداننىڭ ئىشى. تۆت پەسىل خاس ئەمەس تەبئىەتكىلا، بولىدۇ ھەر ئىشنىڭ يېزى ھەم قىشى. قاچانكىن دۇنياغا كۆزمۇ ئاچىدۇ، ئاتىدىن،ئانىدىن مېھىر تاپىدۇ. ۋەلېكىن ئارتۇقچە كۆيۈم بالىنىڭ، بەختىنىڭ شېخغا پالتا چاپىدۇ. بىزلەرگە دۇنيادا ئازمىدۇ ساۋاپ، ھاجەتمۇ مەككىنى قىلمىقىڭ تاۋاپ. پۇل سەۋەپ ئۆلۈم كۆپ،ئوقۇشسىز بالا، شۇندىمۇ ھەجىگە كەتتۇق ئالدىراپ. 2012-يىلى 13-ئاۋغۇست شەھىرى بورتالا

yvsvpjan

	رۇبائىيلار ياخشى يېزىلىپتۇ! 2-،5-كوپلىتلاردا ‹‹لېكىن، بىراق›› دېگەن مەنىداش سۆزلەر تەڭلا قوللىنىلىپ قاپتۇ. ئېغىزدا شۇنداق قوللانساقمۇ، يېزىقتا بۇنداق سۆزلەر ئارقا-ئارقىدىن بىر مىسرادا بىراقلا قوللىنىلمايدۇ. ئومۇمەن، بۇ رۇبائىيلار خېلىلا ۋايىغا يېتىپتۇ! تاشلىۋەتمەي داۋاملاشتۇرغايسىز!

akattrgvl

	10-كۇبلىتنى ئوقۇۋېتىپ ئا.ئۆتكۈرنىڭ«ئەجەپ بىر گۆش ئىكەن بۇ يۈرەك دېگەن .......» شئېرى ئېسىمگە كەپ قالدى،قەلەم قۇۋۋىتىڭىزگە ئاپىرېىن .

boraogli

	كالىنىڭ بىھۇدە سەمرىپ كېتىشى، بەرھەقكى ئۇنىڭغا ئەجەل يېتىشى. پارىخور ئەمەلدار مىسالى كالا، كۇپايە قىلمايدۇ موللاق ئېتىشى.

yawayiarkak

	بەك ياخشى يېزىپسىز .بارىكاللا بارىكاللا !!!!  2-5 كۇپىلىتتا سۇز ئىشلىتىش تە   خاتالىق يۇق .

boraogli

	قوللىغىنىڭلارغا كۆپ رەھمەت ئەزىزلەر،

kokasman

	قاچانكىن دۇنياغا كۆزمۇ ئاچىدۇ، ئاتىدىن،ئانىدىن مېھىر تاپىدۇ. ۋەلېكىن ئارتۇقچە كۆيۈم بالىنىڭ، بەختىنىڭ شېخغا پالتا چاپىدۇ.    بۇ مىسرالار بەكمۇ يارىدى ماڭا...ئىلھاملىرىڭىز ئۇزۇلمىگەي...........

mehmudmamut

	ھەممىسى بىر_بىرىدىن ئېسىل رۇبائىلار ئىكەن، قولىڭىزغا دەرىت كەلمىسۇن ！