ماتېماتىك تۇرغۇنجان ئابدۇكېرىم تۈرك

matimatika

	تەبىئىي پەنلەر دوكتورى تۇرغۇنجان ئابدۇكېرىم تۈرك   1961- يىلى 10- ئايدا بۆرتالادا تۇغۇلغان، ئۇ ھازىر شىنجاڭ پېداگوگىكا ئۇنىۋېرسىتېتى ماتېماتىكا فاكۇلتېتىنىڭ دوكتورى ھەم شۇ فاكۇلتېتنىڭ مۇئاۋىن مۇدىرى، شىنجاڭ ماتېماتىكا جەمئىيىتىنىڭ دائىمىي مۇدىرىيەت ئەزاسى، جۇڭگو ماتېماتىكا جەمئىيىتىنىڭ ئەزاسى. تۇرغۇنجان ئابدۇكېرىم تۈرك 1980-يىلىدىن 1985-يىلىغىچە قەشقەر پىداگوگىكا ئىنستىتۇتىنىڭ ماتېماتىكا فاكۇلتېتىدا ئوقۇغان، ئوقۇش پۈتتۈرگەندىن كېيىن شىنجاڭ پىداگوگىكا ئۇنىۋېرسىتېتىنىڭ ماتېماتىكا فاكۇلتېتىغا تەقسىم قىلىنغان. 1987-يىلىدىن 1989- يىلىغىچە مەزكۇر فاكۇلتېتتا ئاسپىرانتلىقتا ئوقۇغان. تۇرغۇنجان ئابدۇكېرىم مىللي يېزىقتىكى ماتېماتىكا ماتېرىياللىرىنىڭ ئىنتايىن كەملىكىنى ھېس قىلىپ ، يېقىنقى يىللاردىن بېرى«ئۆلچەم نەزەرىيىسىدىن مۇقەددىمە»، «ھەقىقىي ئۆزگەرگۈچىنىڭ فۇنكىسىيىلىك نەزەرىيىسى ۋە فۇنكسىئونال ئانالىز يېتەكچىسى» ، «ئوتتۇرا مەكتەپ ماتېماتىكا تەھلىلى» ، «ئالىي ماتېماتىكىدىن مۇلاھىزە سوئاللىرى» قاتارلىق كىتابلارنى تۈزۈپ، شىنجاڭ پەن - تېخنىكا نەشرىياتى، شىنجاڭ مائارىپ نەشرىياتى قاتارلىق ئورۇنلاردا نەشىر قىلدۇردى. ئۇ يەنە باشقىلار بىلەن «دىسكرېت ماتېماتىكا»، «IBM-PC ئاسسېمبل تىلىدا پروگرامما لايىھىلەش»، « C تىلدا پروگرامما لايىھىلەش» قاتارلىق كىتابلارنى شىنجاڭ ئۇنىۋېرسىتى نەشرىياتى، شىنجاڭ پەن- تېخنىكا نەشرىياتىدا نەشىر قىلدۇردى. ئۇنىڭدىن باشقا «باغلىق بولمىغان توپولوگىيىلىك بوشلۇق ھەققىدە مۇلاھىزە»، «ۋېۋېللىت ۋە سىگنال» قاتارلىق 23 پارچە ماقالىسى مەملىكەت ئىچى ۋە رايونىمىزدىكى ژۇرناللاردا ئېلان قىلىندى. ئۇ يەنە دۆلەت تەبئىي پەن فوندى ياردىمىدىكى تەتقىقات تۈرى «ئۇيغۇر تىلىدىكى ئۈزلۈكسىز تاۋۇش پەرق ئېتىش سىستېما تەتقىقاتى» ۋە «شىنجاڭ ئاز سانلىق مىللەتلىرى رەسىم ئۆرنەكلىرى كۆپ ۋاسىتىلىك ئۇچۇر ئامبىرى سىستېما تەتقىقاتى» غا ئاساسلىق تەتقىقاتچى بولۇپ قاتناشتى. ھازىر شىنجاڭ ئۇيغۇر ئاپتونوم رايونلۇق تەبىئىي بەن فوندى ياردىمىدىكى تەتقىقات تۈرى «كۆپ ۋاستىچىدە ئۇچۇر قىسىش ئۇسۇلى ۋە قىسقۇچى تەتقىقاتى» قاتارلىق ئىككى تەتقىقات تۈرىگە ئاساسلىق تەتقىقاتچى بولۇپ قاتنىشىۋاتىدۇ. تۇرغۇنجان ئابدۇكېرىم 1999-يىلى10-ئايدا ياپونىيىنىڭ كيوشۇ ئۇنىۋېرسىتېتىغا بىر يىللىق ئوقۇش ۋە تەتقىقات بىلەن شۇغۇللىنىشقا ئەۋەتىلدى. بۇ جەرياندا ئۇ 80-يىللارنىڭ ئاخىرلىرىدا دۇنياغا كەلگەن يېڭى پەن «ۋېۋېللىت ئانالىزى» ھەققىدە بەزىبىر بۆسۈش خاراكتېرلىك يېڭى نەتىجىلەرگە ئېرىشتى. ئۇ يېتەكچى پروفىسسورلار تەكلىپى بويىچە ياپۇنيەدە تەتقىقات ئېلىپ بېرىشنى داۋاملاشتۇرغان. تەتقىقاتنى چوڭقۇرلاشتۇرۇش نەتىجىسىدە خەلقئارادا تۇنجى بولۇپ «ئۆرلىتىلمە دىئادىك ۋېۋېللىت نەزەرىيە سىستېمىسى» نى ئوتتۇرىغا قويغان. بۇ يېڭى نەتىجە «شاۋقۇن تازلاش ئۆرلىتىلمە دىئادىك ۋېۋېلىتلىرى» دېگەن تېمىدا 2003-يىلى 9-ئايدا ئىسپانىيىنىڭ بارسېلونا شەھىرىدە ئېچىلغان «سىگنال بىر تەرەپ قىلىش يىللىق يىغىنى» دا ئوقۇلۇپ، دۇنيانىڭ ھەرقايسى جايلىرىدىن كەلگەن ئالىم، مۇتەخەسسىسلەرنىڭ يۇقىرى باھاسىغا ئېرىشكەن.  بۇ نەزەرىيە ئاساسىدا «ئۇچۇر بىر تەرەپ قىلىش» ، «سىگنال ۋە سۈرئەت بىر تەرەپ قىلىش» ساھەلىرىدە 14 پارچە ماقالە ئېلان قىلىنغان. بۇ ماقالىلەرنىڭ تۆت پارچىسى ئىسپانىيە، ئاۋسترالىيە ، كورىيە، ياپونىيە قاتارلىق دۆلەتلەردە ئېچىلغان خەلقئارالىق يىغىنلاردا ئوقۇلغان ھەم يىغىن توپلاملىرىغا كىرگۈزۈلگەن. يەتتە پارچىسى خەلقئارالىق ئىلمى ژۇرناللاردا ئېلان قىلىنغان. ئۈچ پارچىسى شىنجاڭ پېداگوگىكا ئۇنىۋېرسىتېتىنىڭ ئىلمىي ژۇرنىلىدا ئېلان قىلىنغان. بۇ 14 پارچە ماقالە خەلقئارا پەن نەتىجىلىرىنى ئەمەلىي قوللىنىشتا 19 قېتىم ئىشلىتىلگەن. 2005-يىلى 3-ئاينىڭ 25-كۈنى تۇرغۇنجان ئابدۇكېرىم ئۈچۈن ئۇنتۇلغۇسىز بىر كۈن بولدى. بۇ كۈنى ئۇ بەش يىل جاپالىق ئىزدىنىش ئارقىلىق يېزىپ چىققان «ئۆرلىتىلمە دىئادىك ۋېۋېللىت نەزەرىيىسى ۋە سۈرئەت بىر تەرەپ قىلىش دولقۇن سۈزگۈچلەرنى لايىھىلەش تەتقىقاتى» ناملىق دىسسېرتاتسىيە ماقالىسىنى ئۇقۇپ، مۇتەخەسسىسلەرنىڭ سورىغان سوئاللىرىغا قايىل قىلارلىق جاۋاپ بېرىپ، تولۇق ئاۋاز بىلەن تەبىئي پەنلەر بويىچە دوكتورلۇق ئۇنۋانىغا ئېرىشتى. ئۇ ياپونىيە كيوشۇ ئۇنىۋېرسىتېتىدا ئۆزىگە يېتەكچىلىك قىلغان ئوقۇتقۇچىلىرىنىڭ ياپونىيىدە قېلىپ، داۋاملىق ئىشلەش تەكلىپنى ئەدەپ بىلەن رەت قىلىپ، شىنجاڭ پىداگوگىكا ئۇنىۋېرسىتېتىدا قايتىپ كەلگەندىن كېيىن، ماگىستىر ئاسپىرانتلار ئۈچۈن بىر قىسىم يېڭى دەرسلەرنى تەسىس قىلدى ھەمدە مەكتەپ تەبىئىي پەن فوندىنىڭ « تېز سۈرئەتلىك پارامېتىرلىق ۋېۋېللىت ئالگارىزىم بىلەن كومپيوتېرلىق سۈرئەت بىر تەرەپ قىلىش يېڭى تېخنىكىسى» ناملىق تەتقىقات تۈرىنى ئۈستىگە ئالدى. بۇ ئاساسىدا دۆلەت تەبىئىي پەن فوندىنىڭ تەتقىقات تۈرلىرىنى ئىلتىماس قىلىش تەييارلىقىنى ئىشلەۋاتىدۇ. تۇرغۇنجان ئابدۇكېرىمغا 1991-يىلى شىنجاڭ ئۇيغۇر ئاپتونوم رايونلۇق خەلق ھۆكۈمىتى تەرىپىدىن «80-يىللاردىكى ئالىي مەكتەپ، تېخنىكوم پۈتتۈرگەن مۇنەۋۋەر ئوقۇغۇچى» دېگەن نام بېرىلدى. ئۇ 1997-يىلى يەنە ئاپتونوم رايون بويىچە «مۇنەۋۋەر ئوقۇتقۇچى» بولۇپ باھالاندى. 1996-يىلى رامكا بۇزۇپ ئۆرلەپ دوتسېنت بولدى،  2006-يىلى پروفېسسور بولدى. 2005-يىلى تەبىئي پەنلەر بويىچە دوكتورلۇق ئۇنۋانىغا ئېرىشتى. http://matimatik.blogbus.com/logs/81663514.html

bizlar.kim

	[b]مىللىتىمىزنىڭ پەخىرلىكلىرىنى يىتىشتۈرىۋاتقان پەخرىمىزنىڭ تىرىشچانلىقلىرىغا ئاپىرىن !

KARAHANI

	بىز ئۈچۈن  ئەۋلادلار ئۈچۈن  دەپ جاپا چەككەنلەرنىڭ تىنى سالامەت  ئشلىرى ئوڭۇشلۇق بولسۇن !

bilgabag

	لاۋزا ئېتوتتىن نەچچىنى ئويناپ قويغان بىرىنى تونۇشتۇرسا ئاھ مىللىتىمىزنىڭ پەخرى يەي، پاھ بىزنىڭ تۈۋرۈكىمىز... دەپ ھالى قالمايدىغانلار ما تېمىدا كۆرۈنمەيدىغۇ؟

bedar

	دوكتۇرىمىزنىڭ بۇنىڭدىن كېيىنكى ئىشلىرىغا ئۇتۇق تىلەيمەن! تېما ئىگىسىگىمۇ كۆپ رەھمەت،تونۇشتۇرۇشقا تېگىشلىك كىشىكەن مانا.

musik0093

	پەخىرلىك ئالىمىمىزنىڭ ئۇزىدەك  ئالىملارنى تەربىيەلىشىگە تىلەكداشمىز!!! تولۇقلىما مەزمۇن (2012-9-25 20:12): ئىشلىرىڭىزغا ئاللاھ ئاسانلىق بەرگەي.

claire

	مانا تىرشقاندا ھەرقانداق نەتىجە قولغا كىلىدۇ  ،  نۇرغۇن ئادەم ماتىماتېكىغا نىسبەتەن بىرلا شۇئار توۋلايدۇ ، يەنى ‹‹ مەن بەك ئۆچ ! ››  ، تۇرغۇنجان ئابدۇكېرىم ئاكىمىز ھەممە ئادەم ئۆچ بولغان ماتىماتىكىنى تەتقىق قىلىپ تاڭ قالغۇدەك نەتجىلەرنى يارتىپ ھەقىقى مىللەت پەخىرى بوپتۇ ، بىز سەنئەتنىلا سۆيمەستىن تەبىئي پەننىمۇ چىن دىلىمىزدىن سۆيسەك كىشلەر دائىم دەيدىغان ‹‹ ئۇيغۇرلار دۆت ئەمەس ، ئەقىللىق ››  دىگەن سۆزنى ئىسپاتلاپ بېرەلەيمىز .

bilgabag

	مۇشۇنىڭغا ئوخشاش ھەقىقىي ئۆتكۈر پىكىرلىك زىيالىلىرىمىزنىڭ كۆپلەپ تەشۋىق قىلىنىشىنى ئۈمىد قىلىمەن. بىر قىسىم چاكىنا ھەزىلكەشلەر بىزنى ۋاقىتلىق كۈلدۈرگەندەك قىلغان بىلەن، بىز ئۈچۈن ھەقىقىي كېرەك بولۇۋاتقىنى ئۆتكۈر پىكىرلىك مۇتەپپەككۇر، پەيلاسوپ، جەمئىيەتشۇناس شۇنداقلا تەبىئىي پەن ئالىملىرى. بىز يۇقارقى ساھەدىكى سەركىلەرنىڭ رولىنىڭ ھەقىقىي مۇھىملىقىنى چوڭقۇر تونۇپ يېتىشىمىز ۋە كېيىنكىلەرگە بىلدۈرىشىمىز كېرەك.

abduwahed

	20 يىللىق جاپالىق ئىزدىنىش 20 يىللىق ھارماسلىق زىرىكمەسلىك ھەر قانداق بىر ئىنسانى قايىل قىلىدۇ. ئۇلۇق ئاللادىن دوكتۇرنىڭ ئىشلىرىنىڭ ئوڭۇشلۇق، ئىزىز تىنىنىڭ سالامەت، ئائىلىسىنىڭ بەخىتلىك بولۇشىنى تىلەيمەن.

erka

	دوكتۇرىمىزنىڭ بۇنىڭدىن كېيىنكى ئىشلىرىغا ئۇتۇق تىلەيمەن