بىز جان - جىگەر دوست بولالامدۇق ( زۇلخۇمار )

zulhumar

             ئىجتىمائىي تۇرمۇشتا كىشىلەر ھامان بېر- بېرى بىلەن دوستلىشىپ ئۆتىدۇ . دوستسىز ھايات خۇددى تۇزسىز تاماققا ئوخشاش مەنىسىزدۇر . دوستلۇق قېرىنداشلىق ۋە مۇھەببەتتىن قالسىلا مۇھىم ئورۇندا تۇردىغان بىر خىل كىشىلىك مۇناسىۋەت . بۇ مۇناسىۋەت قىزغىن ، ئىشەنچلىك راۋاجلانسا ، ئۆگىنىش ، خىزمەت ، تۇرمۇش ۋە ئالغا ئىلگىرلەشكە زور ياردەم بولىدۇ . ئەكسىنچە بولغاندا ، كىشىلەرگە چۈشكۈنلۈك ، ئازاپ ۋە روھىي بېسىم ئېلىپ كېلىدۇ - دە كۈتۈلمىگەن كۆڭۈلسىزلىك كېلىپ چىقىدۇ . دوستلۇقتا ياش ۋە جىنىس پەرقى چەكلەنمەيدۇ . پەقەت ئورتاق بىر دۇنيا قاراشقا ئىگە بولغان ، بىر - بىرىگە ئىشەنچلىك بولغان كىشىلەرلا دوستلۇق ئورنىتالايدۇ . ئىنسانلارنىڭ ئارىسىدىكى دوستلۇق ئادەتتە ئىككى خىل بولىدۇ . بىر خىل دوستلۇق ئادەتتىكى دوستلۇق ، يەنە بىر خىل دوستلۇق جانجىگەر دوستلۇق . ئالدىنقىسى پەقەت يېقىنراق ئارلىشالايدىغان ، ئۆز- ئارا مىجەزى قاملىشالايدىغان ، چۈشىنشەلەيدىغان ، پىكىرداشلار ئوتتۇرسىدىكى دوستلۇق ، كېيىنكى دوستلۇق بەكمۇ نازۇك ، قىزغىن دوستلۇق بولۇپ ، ئىنتايىن مۇھىم دوستلۇق ھېساپلىنىدۇ .
            ئادەتتە ھەر قانداق بىر ئادەمنىڭ بىر ياكى ئىككى جانجىگەر دوستى بولىشى كېرەك . بۇنداق دوستلۇق ئىنتايىن ئالىجاناپ بولۇپ ، بۇ دوستلار ھەرقانداق كىشىگە ، ھەتتا ئاتا- ئانىسى ، قېرىنداشلىرغا دىيەلمەيدىغان سىرلىرنى ۋە ئوي- پىكىرلىرنى بىر- بىرىگە ئېيتالايدۇ ۋە بىر - بىرىنى رىغبەتلەندۈرەلەيدۇ . بۇ خىل دوستلۇق  بىر- بىرىدىن ھىچنىمىسىنى ئايىمىغان ، بىر- بىرىنى ئەپۇ قىلالايدىغان ، ئېغىر كۈنلەردە بىر- بىرىنى تاشلىۋەتمەيدىغان ، بىر- بىرىنى داۋاملىق سېغىنىدىغان ، بىر- بىرىنىڭ جاپالىق ئىشلىرنى ئۆزىنىڭ دەيدىغان ، ۋاقتى كەلسە بىر- بىرى ئۈچۈن قۇربان بېرەلەيدىغان كىشىلەر ئارىسىدىلا بولىدۇ .
              دوستۇم ، بىز ھەقىقىي جان- جىگەر دوستلاردىن بولۇپ قالالامدۇق ؟
             ئەلۋەتتە جان -جىگەر دوستلاردىن بولۇپ قالالايمىز . ئالدى بىلەن ھەر كىم دوستلاشماقچى بولغان ئوبىيكىتنى مۇۋاپىق تاللىشى كېرەك . ئەتراپلىق كۈزىتىش ، ئارلىشىش جەريانىدا چۈشىنىش ئارقىلىق كۆڭلىڭىزگە ياقسا ، ئۇنى ھەقىقى دوست بولۇشقا تاللىسىڭىز بولىدۇ . ئۇنىڭدىن باشقا شۇ دوست بولغۇچى ئىشقا مەسئۇلىيەتچانلىق بىلەن مۇئامىلە قىلامدۇ ؟ ئۆز ۋەدىسىگە ۋاپا قىلامدۇ ؟ دىگەندەك ئىشلار گەرچە ئۇششاق مەسىلە بولسىمۇ لېكىن ھەقىقى دوستلۇقتا ئىنتايىن مۇھىم .
           يەنە بىرتەرەپتىن ، بەزىبىر كىشىلەر بىلەن دوستلاشماقچى بولسىڭىز ، ئادەتتە < ئاسمان ئۆرۈلۈپ چۈشسە تېگىدە مانتا يەيدىغان > ، نە ۋىجدانى ياكى ئېنىق مەيدانى يوق ، بىرەر كىشىگە ياخشىلىق قىلىشنى ياكى خوش قىلىشنىمۇ بىلمەيدۇ . سىز پەرىشان بولغاندا تەسەللى بېرىشنىمۇ ، نەتىنجە قازانغاندا ئۇنى مۇئەييەنلەشتۈرۈشنىمۇ بىلمەيدۇ ، سىز ئىزدىمىسىڭىز سىزنى تەشەببۇسكارلىق بىلەن ئىزدىمەيدۇ . بۇنداق كىشىلەر ھەقىقى دوستلۇققا ھەرگىز يارىمايدۇ ، ھەم ئۆزىمۇ ھەقىقى دوستلۇققا مەڭگۈ ئېرىشەلمەيدۇ .
           دىمەك مەيلى ئادەتتىكى دوستلۇق بولسۇن ياكى جان- جىگەر دوستلۇق بولسۇن چۇقۇم شۇ دوستلۇق ئۈچۈن سەمىمىلىك ، ۋاپادارلىق ، كۈيۈمچانلىق ، پىداكارلىق بولۇش كېرەك .



   مەنبە : شىنجاڭ ياشلىرى

fana

ھەقىقىي  دوستلۇق  -سالامەتلىككە ئوخشايدۇ . ئۇنىڭ قىممىتى ئۇنىڭدىن ئايرىلغاندىلا بىلىنىدۇ .
...............
مۇھەببەتكە ئوخشىغان دوستلۇق -ئىللىق بولىدۇ . دوستلۇققا ئوخشىغان مۇھەببەت - مۇقىم بولىدۇ .
.............
دوستلۇق سېخى  ، مۇھەببەت-بېخىلدۇر .
...................
قېرىندىشىڭىز  دوست  بولالماسلىقى مۇمكىن ، بىراق بىر دوست ھامان ياخشى  قېرىنداشتۇر ..

begiz

ئەسسىلامۇ ئەلەيكۇم ؛
نەپ ئۈچۈن قۇرۇلغان دوستلۇق ، كىچىككىنا زىيان چىققاندا ،غەزەپ ! نەپرەت ! جىدەل - ماجرا - ئۇرۇش - تالاش- تارتىش بىلەن ئاخىرلىشىدۇ ..........

herustal

ھوزۇر-ھالاۋەتنى كىشىلەر بىلەن تەڭ ئورتاقلاشمايدىغانلارنىڭ ھەرگىزمۇ  قەدىناس دوستى بولمايدۇ.
ئىسىل تېمىلىرىڭىزدىن سۈيۈندۈم.

zakira

دوسقا دوس ئەسقاتار ئېغىر كۈنلەردە ،
دوسقا دوس بېرىدۇ سۇنماس قاناتنى .

بۇ مىسرالاردىمۇ ھەقىقى دوسلۇق مەدھىيەلەنگەن .  سىز دوستىڭىز ئۈچۈن جېنىڭىزدىن كىچەلىسىڭىز ، ئاندىن ھەقىقى دوسلۇققا ئېرىشەلەيسىز ..

mk119

مەيلى ئادەتتىكى دوستلۇق بولسۇن ياكى جان- جىگەر دوستلۇق بولسۇن چۇقۇم شۇ دوستلۇق ئۈچۈن سەمىمىلىك ، ۋاپادارلىق ، كۈيۈمچانلىق ، پىداكارلىق بولۇش كېرەك .

uyghurbeg

مۇشۇ كۈنلەردە دوستسىز ياشاشقا ئامراق بوپ قالدىم..

qol-yamghuri

توغرا دەيسىز يا  ئۆزىنى خۇش قىلالمايدىغان يا  باشقىلارنى خۇش قىلالمايدىغان ئادەم ھەرگىزمۇ ھەقىقى دوست بولالمايدۇ.<دوستنىڭ دوستلۇقى يەتتە يىلدا سىنىلار >  دىگەن گەپ بار ئەمەسمۇ.

مۇبارەك

بىر بولسىمۇ دوست بولغان ياخشى، لېكىن ھەقىقىي دوستلۇق يەنە باشقىچە.

melek

مەن سىز بىلەن دوست بولالايمەن ھى ھى ھى