ھېيت قاچان كېلىدۇ (چىمەنگۈل ئاۋۇت)

دوپپام

	ھېيت قاچان كېلىدۇ (چىمەنگۈل ئاۋۇت) ھېيت قاچان كېلىدۇ مېنىڭ بالام ساما سېلىۋاتىدۇ، چېكىسىدىكى تەر يۈرىكىمگە تېمىۋاتىدۇ. ئۇنىڭ كۆزلىرىدە بىر دېڭىز بار، ئۇنىڭ ۋۇجۇدىدا بىر ئېڭىز بار. دېڭىزدىكى بېلىقلار يۈرەر يالىڭاچ، ئېڭىزغا چۈشكەن ئاپتاپ ئاستا-ئاستا ئىرىيدۇ يىراقلارغا قارىغاچ.... ئۇ ساما سېلىۋاتىدۇ. يەرنىڭ يۈرىكىنى تىلىۋاتىدۇ. خىياللىرىغا ھاياجىنىغا قېنىۋاتىدۇ. ئۇ قەدەملىرىنى يۆتكەۋاتىدۇ، مەشرەپ چۆلدە ماڭغاندەك، مەنسۇر ھەللاجى دار ئالدىدىن ئۆتكەندەك. ئۇ توۋلاۋاتىدۇ، كىشنەۋاتىدۇ، سامانىڭ خاسىيىتىنى بىلگەندەك مۇھەببەتنىڭ قىياسىغا ئۆرلەۋاتىدۇ. ئۇنىڭ سېنىڭكىدەك ھېمىرىلگەن قېشى، لەۋلىرىنى كۈچ بىلەن چىشلىۋالغان چىشى، تىرىكلەرنى كۆتۈرىدىغان ئۆلۈكلەرنى يۇپۇرىدىغان ئۇلۇغ توپىغىلا پۈكۈلگەن تىزى مېنى كۆيدۈرىۋاتىدۇ، ئوتلۇق نەپەسلىرىم بىلەن سۆيدۈرۋاتىدۇ. -ئانا! ھېيت قاچان كېلىدۇ؟ ھېيتگاھقا بېرىپ ساما سالىمەن، يىگىت بولغىنىمنى ئاسمان كۆرىدۇ،يەر بىلىدۇ... چاقماق چاقتى ئۇنىڭ گەپلىرىگە ھەيران قالدىم، ھايات ھېكمەتلىرىنى بالامنىڭ چۈچۈك تىللىرىدىن ئالدىم!

OYGAN-TILAK

	چىمەنگۈل خانىم بەك مەزمۇنلۇق بىر پارچە ئەسەرنى سۇنۇمسىز مەن بەكمۇ سۆيۇندىم ، بۇ تىيمىڭىزدىن

nimjan

	ئۇيغۇر خەلقىگە كۈندە-ھەپتىدە ھېيتقۇ بۇ زاماندا؟

taxnayi-a

	ئاھ ساما! ئاھ قاينام تاشقىنلىق دۇنياسىغا ئايلانغان ئانا يۇرتۇم قوينى! مېنىڭمۇ چىكىلىرىمدىن ئاققان ياش تامچىلىرى ئانامنىڭ يۈرىكىگە تولغۇچە ساما سالغۇم بار ئىدى. ئەپسۇس، ئىلىم ئىشقىدا يات جايلاردا مۇساپىر بوپ قالدىم.                                                     بىر مۇساپىر بالا                                   بېشىدا بادام دوپپا.                                   ساما سالاي دەپ                                  يۈگرەپ بارسا                                                                               مەسچىت ئالدىغا،                                 بىرمۇ ئادەم يوق،                                ھەيكەللەرگە توشۇپ كىتىپتۇ.                                 - ھىتگاھ قەيەردە؟                                سوراي دېسە بىلمەيدۇ قۇشلار                               دەرەخلەرمۇ تاشتەك قىتىپتۇ.                                                              بىر مۇساپىر بالا                               بېشىدا  بادام دوپپا .                                                                                                             ئىزدەپ يۈرەر رەسىمدىكى تاش كوچىلاردىن                              ئات قېتىلغان سايىۋەن مەپە                               دوپپا كەيگەن يەنە بىر بالا.                               مەسچىتلەردىن قۇياشنى ئېلىپ،                                ئۆيگە ماڭغان مىھرىبان ئاتا.                                 ئىزدەپ يۈرەر كەڭرى ئۇپۇقتىن                                 غۇلاچلىرىنى لاچىندەك كىرىپ،                                 جۈپ كۆزىنى بۈركۈتتەك ئېچىپ،                                يۈرىكىدىن ئۆتكۈر نۇر چىچىپ،                                 ساما سالغان يولۋاستەك ئاكا.                                                                    بىر مۇساپىر بالا                                   بېشىدا بادام دوپپا.                                 ساما سالاي دەپ                                 يۈگرەپ بارسا «ھىتگاھ » ئالدىغا                                  يۈرىكىنى قۇچاقلاپ يىتىپ،                                دوپپىسىنى باغرىغا بېسىپ،                                ئۇخلاپ قاپتۇ «ھىتگاھ» ئالدىدا                               ئاڭا ئوخشاش يەنە بىر بالا.                               ئاڭلانمايدۇ ھېچبىر خۇش ناۋا....                              .............................

kmtkmt

	نىمە دىگەن تەسىرلىك سېغىنىش كۇيى بۇ ھە!

serhosh

	پاھ! بۇ شېئىرنى

serhosh

	ئۇنىڭ سېنىڭكىدەك ھېمىرىلگەن قېشى، لەۋلىرىنى كۈچ بىلەن چىشلىۋالغان چىشى، تىرىكلەرنى كۆتۈرىدىغان ئۆلۈكلەرنى يۇپۇرىدىغان ئۇلۇغ توپىغىلا پۈكۈلگەن تىزى مېنى كۆيدۈرىۋاتىدۇ، ئوتلۇق نەپەسلىرىم بىلەن سۆيدۈرۋاتىدۇ

akmdl

	ھېيتگاھقا بېرىپ ساما سالىمەن! شۇ ساماغا تەشنا بولىۋاتىمىز. ئاپىرىن

cholpanyultuz

	قولىڭىزغا دەرت تەگمىسۇن

زامانتاش

	بەك  ياخشى  يېزىلىپتۇ...