سۆي ، نامرات بولسىمۇ ئۇ سېنىڭ داداڭ ...

baghrim

	ئېسىلزادە بولسىمۇ ئۇ سېنىڭ داداڭ ، ئۇلۇغ زاد بولسىمۇ ئۇ سېنىڭ داداڭ . سۇمباتلىق بولسىمۇ ئۇ سېنىڭ داداڭ ، باياشات بولسىمۇ ئۇ سېنىڭ داداڭ ، سۆي ، نامرات بولسىمۇ ئۇ سېنىڭ داداڭ ... ئۇ سېنى چوڭ قىلدى مىڭ تەستە بېقىپ ، جېنىم دەپ پەپىلەپ باغرىغا بېسىپ . ئوتۇڭدا كۆيۈپ ، سۈيۈڭدە ئېقىپ ، قاق سەنەم بولسىمۇ بارىنى سېتىپ ، سۆي ، نامرات بولسىمۇ ئۇ سېنىڭ داداڭ ... ساڭىلا تۈگۈنۈپ ئۆزى يىمەيدۇ ، سېنىلا كەيسۇن دەپ ئۆزى كىيمەيدۇ . جاپا ھەم زەربىگە ۋايساپ كەتمەيدۇ ، بەلكى كۆز يۇمغىچە غېمىڭنى يەيدۇ ، سۆي ، نامرات بولسىمۇ ئۇ سېنىڭ داداڭ ... پۇتلىرى مىڭ قاداق ، قوللىرى يېرىق ، يىل بويى ئىشلەپمۇ كىيىمى يىرتىق . ئۈستىدە تۇرسىمۇ تۈمەن مىڭ سېلىق ، ئۇ شۇنچە مۇلايىم ، ئۇ شۇنچە سىلىق ، سۆي ، نامرات بولسىمۇ ئۇ سېنىڭ داداڭ ... ئۆتكۈزدى ئۇ ئۆمرىنى بالام ، بالام دەپ ، كۈندۈزى ئېتىزدە ، كەچتە كالام دەپ . تېخى كۆپ بالامغا مېھرىم چالام دەپ ، ياشىدى ھەممىگە ئوخشاش سالام دەپ ، سۆي ، نامرات بولسىمۇ ئۇ سېنىڭ داداڭ ... سەن ئۇنىڭ ھالىنى سوراپ باقتىڭمۇ ، بېشىغا بىر تەلپەك بېرىپ باقتىڭمۇ . مۈكچەيگەن قەددىگە قاراپ باقتىڭمۇ ، ئاقارغان چېچىنى سىلاپ باقتىڭمۇ ، سۆي ، نامرات بولسىمۇ ئۇ سېنىڭ داداڭ ... ئۇ سېنى مەكتەپتە ئوقۇتۇپ قويدى ، شۇنداقلا دۇنيانى تونۇتۇپ قويدى . بەختنىڭ تەمىنى تېتىتىپ قويدى ، سېنى دەپ ياشلىقىنى يوقۇتۇپ قويدى ، سۆي، نامرات بولسىمۇ ئۇ سېنىڭ داداڭ ... شۇ گۈزەل ھۆسنۈڭگە كۆچكەن ياشلىقى ، سەن ئۈچۈن كەتمەسكە كەتكەن شاشلىقى . سېنى دەپ يوقالغان ھەم ئوت شاشلىقى ، سېنى دەپ ئاقارغان بېشى چاچلىقى ، سۆي ، نامرات بولسىمۇ ئۇ سېنىڭ داداڭ ... ئەۋەتىپ تۇرىدۇ ساڭا ئايدا ئاش ، نەۋرىلەر يىسۇن دەپ چامغۇر ھەم كۆكباش . ھىچيەردىن ئالمايدۇ بىر تىيىن مائاش ، ئۇ شۇنچە چىداملىق ئۇ شۇنچە يۇۋاش ، سۆي ، نامرات بولسىمۇ ئۇ سېنىڭ داداڭ ... كۆمۈرگە پۇلى كەم ، قالايدۇ مەدەك ، پۇل ئۈچۈن ئېتىزدە تېرىيدۇ غوزەك . ئەمما سەن قەھرىڭنى چاچىسەن بۇزدەك ، ئېيتقىنا سەندىكى ئۇ قانداق يۈرەك ، سۆي ، نامرات بولسىمۇ ئۇ سېنىڭ داداڭ ... كوچىدا كۆرسەڭ قاچىسەن تېخى ، كەمسىتىپ ئەيىۋىنى ئاچىسەن تېخى . ئاچچىقلاپ زەھرىڭنى چاچىسەن تېخى ، شۇندىمۇ بالام دەپ كۆيەر ئۇ تېخى ، سۆي ، نامرات بولسىمۇ ئۇ سېنىڭ داداڭ ... تۇرقىغا قاراپ باق ، كىيىمى جۇل - جۇل ، ھەممىدىن ئايرىلىپ بولۇپ قالدى تۇل . تۇرمۇشنىڭ يولىدا يۈرىكى چۇل - چۇل ، پۇرىۋال ، ئۇ دىگەن خۇش پۇراقلىق گۈل ، سۆي ، نامرات بولسىمۇ ئۇ سېنىڭ داداڭ ... قاراپ باق بەستىگە مۈكچىيىپ كەتتى ، ئىش - ئەمگەك دەستىدىن چەيلىنىپ كەتتى . ئۈششۈگەن گۈل كەبى شۈمشىيىپ كەتتى ، دەردىنى ئېيتالماي ئۈمچىيىپ كەتتى ، سۆي ، نامرات بولسىمۇ ئۇ سېنىڭ داداڭ ... ئۇنىڭدا يوق قىلچە كىبىر - تەمەننا ، ھەر باسقان ئىزىدا تۈمەن مىڭ مەنا . ئەپسۇسكى ياشىنىپ قالدى ئۇ ئەمما ، لېكىن سەن قەرزىڭنى قىلدىڭمۇ ئادا ، سۆي ، نامرات بولسىمۇ ئۇ سېنىڭ داداڭ ... بىلەمسەن سەن ئۇنىڭ نامراتلىقىنى ، نامراتلىق تەختىگە سۇلتانلىقىنى . بىلسەڭمۇ ئەڭ ئاددى پاك زادلىقىنى ، بىلمەيسەن قەرزىڭنىڭ قات - قاتلىقىنى ، سۆي ، نامرات بولسىمۇ ئۇ سېنىڭ داداڭ ... كىيىشىڭ ئېسىل تون ، ساڭا كۈندە توي ، ئىچىشىڭ مەي - شاراپ ، يىيىشىڭ قوي . سەن گويا بىر ئەنبەر ، ئۇ بولسا بەدبۇي ، شۇ سەۋەپ داداڭنىڭ بېشىدا مىڭ ئۆي ، سۆي ، نامرات بولسىمۇ ئۇ سېنىڭ داداڭ ... ئۇ بەرگەن پاختا رەخ ئۇستاخانلاردا ، ئۇ بەرگەن ئاش - غىزا داستىخانلاردا . ئۇ تەرگەن سەي - كۆكتات شۇ قازانلاردا ، ئۇ يەنە ئۆتەلمەس ئىمتىھانلاردا ، سۆي ، نامرات بولسىمۇ ئۇ سېنىڭ داداڭ ... سەن ئۇنى بىر قېتىم يوقلاپ باقتىڭمۇ ، بىرەر رەت قورسىقىنى توقلاپ باقتىڭمۇ . ئۇ سۇنغان داغ چاينى ئوتلاپ باقتىڭمۇ ، بايرىمىڭ بولدى دەپ قۇتلاپ باقتىڭمۇ ، سۆي ، نامرات بولسىمۇ ئۇ سېنىڭ داداڭ ... ياشىدى ئۇ ھامان ھەقنى - ھەق سۆزلەپ ، ئەۋلادىم ، خەلقىم دەپ يىراقنى كۆزلەپ . ئىش - ئەمگەك ئەزسىمۇ ھەتتا ھەسسىلەپ ، چىداشلىق ئۆتكۈزدى ئۆمرىنى بەزلەپ ، سۆي، نامرات بولسىمۇ ئۇ سېنىڭ داداڭ ... ئۇ كەتسە قايتىدىن تاپقىلى بولماس ، ئۇ كەتسە تاي بولۇپ چاپقىلى بولماس . ئۇ كەتسە قوشاققا قاتقىلى بولماس ، پۇل خەجلەپ بازاردىن ئالغىلى بولماس ، سۆي ، نامرات بولسىمۇ ئۇ سېنىڭ داداڭ ... [/size]

omar

	رەھمەت سىزگە .. ماڭا ئەشۇ بىچارە دادامنى ئەسلىتىپ قويدىڭىز ئاللا  قولىڭىزغا دەرىت بەرمىسۇن

nalan

	ھەممە شائىر ئانىلا دىدى ، ئاتىلىرى يوقمىكىن ئەستە . ئۇلار شۇنداق ئاتىلار ئىدى ، يولۋاسنىمۇ قويغان ھەۋەستە .... بۈگۈن دادامنى ئۈزەمچىلا سېغىنىپ قالغاندا ماۋۇ تىمىنى .... بۈگۈن دادامغا سوۋغا ئالغان ئىدىم تېخى .... [s:2]

alsoyar0998

	قوللىرى گۈلىدەك قاپىرىپ تاپقان پۇللىرىنى ئوغلۇم دەپ بەرگەن،بىر ئۆمۈر پەرزەنت ئوتىدا كۆيۈپ پىشقان دادىلار قاراڭلار بالىلارگە ، سۆيۈملۈك بالىلار ئاقلاڭلار دادىلارنىڭ ئۈمۈت- ئارزۇلىرىنى

kiroran

	بەك ياخشى يىزىپسىز .بىز مانا مۇشۇنداق ەسەرلەرگە موھتاج.بۇنداق ەسەرلەر بىزنى اتا -انىمىز ھەققىدە كۆپرەك ويلاندۇرىدۇ .اتا-انىلار مەڭگۇ ياشنىسۇن .بۇ شىرىڭىز مىنى بەكمۇ ويلاندۇرۇپ  قويدى .بۇنداق ياخشىى تىمىلارنى بىزدىن ايىماڭ .