گىرىمسەن شام يورۇقىدا شىرەنى چۆرىدەپ بىر ئەر بىلەن
بىر قىز ئولتۇرىدۇ.
- مەن سىزنى سۆيىمەن، – قىز بىر تەرەپتىن قولىدىكى ئىستاكاننى ئوينىغاچ، يەنە بىر تەرەپتىن شۇنداق دىمەكتە.
- مېنىڭ ئايالىم بار، – دېدى ئەر قولىدىكى ئۈزۈكنى سىلىغاچ.
- كارىم يوق، مەن پەقەت سىزنىڭ ھېسسىياتىڭىزنى بىلىپ باقماقچى. سىز مېنى سۆيەمسىز؟ – ئەر بېشىنى كۆتۈردى. ئىچىدە قىزنى باھالىماقتا.
24 ياش – ياش، ئىنسان ھاياتىدىكى تولىمۇ شاش، كۆڭۈلدىكىدەك ياش باسقۇچى.
ئاپپاق تېرە، ھاياتىي كۈچكە تولغان بەدەن، چاقناپ تۈرىدىغان، ھەر بىر قارىشىدا قەلبىدىكىنى سۆزلەپ تۈرىدىغان چەشمە كۆز.
ھەقىقەتەن ئادەمنىڭ مەيلىنى ئۇتقۇدەك
ياخشى قىز، ئەپسۇس …
- ئەگەر سىزمۇ مېنى سۆيسىڭىز، سىزنىڭ مەشۇقىڭىز بولغۇم بار، – قىز ئاخىرى تاقات قىلالماي كۆڭلىدىكى دەۋەتتى.
- مەن ئايالىمنى سۆيىمەن، – ئەر قەتئىيلىك بىلەن جاۋاب بەردى.
- سىز ئۇنى سۆيەمسىز؟ سۆيسىڭىز نېمە بولماقچى؟ بىلسەم-بىلمىسەم ھازىرقى ئۇ چىرايىنى قورۇق باسقان، كۆرۈمسىز بىر ئايالغا ئايلىنىپ قالدى، ئۇنداق بولمىسا ھەر قېتىملىق يىغىلىشقا نېمىشقا ئۆزىڭىز يالغۇزلا …
قىز توختىماي سۆزلىمەكچىدى، ئەمما ئەرنىڭ كۆزىدىكى سوغوق نۇرنى كۆرۈپ تىلىنىڭ ئۇچىدىكى گەپنى يۇتىۋەتتى.
سۈكۈت …
- سىز مېنىڭ نېمەمنى سۆيىسىز؟ – ئەر ئېغىز ئاچتى.
- پىشقان، تەمكىنلىكىڭىزنى، ئەرلەرگە خاس ھەرىكەتلىرىڭىزنى، كىشىگە كۆڭۈل بۆلۈشىڭىزنى، بەكمۇ، بەكمۇ كۆپ يەرلىرىڭىزنى. ئىشقىلىپ مەن كۆرۈپ باققان ئەرلەرگە زادىلا ئوخشىمايسىز. سىز تولىمۇ ئالاھىدە.
- سىز مېنىڭ ئۈچ يىل بۇرۇن قانداق ھالەتتە ئىكەنلىكىمنى بىلەمسىز؟ – ئەر تاماكىسىغا ئوت تۇتاشتۇرغاچ شۇنى سورىدى.
- بىلمەيمەن، تۈرمىدە ياتقان بولسىڭىزمۇ پەرۋايىغا ئېلىپ كەتمەيمەن.
- ئۈچ يىل بۇرۇن، مەن سىزنىڭ ھازىرقى كۆزىڭىزدىكى ئادەتتىكى ئەر ئىدىم، – ئەر قىز بىلەن كارى بولماي مۇشۇلارنى دىمەكتە.
- ئادەتتىكى ئالىي مەكتەپنى پۈتتۈرگەن، خىزمىتى ئوڭۇشلۇق بولمىغان، پۈتۈن كۈن ھاراق ئىچىدىغان، تىرىككەك ئەر ئىدىم. قىزلارنىڭ ياخشى كۆرۈشى بىلەن ھېسابلىشىپ كەتمەيتىم. كەچلىك بەزمىخانىلارغا بېرىپ خېنىملارنى ئىزدەپ ساقچىغىمۇ تۇتۇلغان …
- ئۇنداق بولسا … – قىز بۇ ئەرنى نېمە ئۆزگەرتكەنلىكىگە قىزىقىپ قالدى،- ئۇ سەۋەبلىكما؟
- ھەئە، ئۇ ھەمىشە ئىشنىڭ ئىچكى ماھىيىتىنى كۆرەتتى. ماڭا ناھايىتى كۆپ نەرسىلەرنى ئۆگەتكەن. ئۇ ماڭا ئېرىشكەن – يوقاتقانلىرىم ئالدىدا تەمكىن بولۇشنى، كۆز ئالدىمدىكى ئىشلارغا بەك پەرۋا قىلىپ كەتمەسلىكنى، باشقىلارغا كەڭ قورساقلىق بىلەن مۇئامىلە قىلىشنى ئۆگەتكەن. ئۇ چاغدا مەن ئۇنىڭ ئالدىدا ئىش ئۇقماسلا بىر بالا ئىدىم. ئەڭ غەلىتە يېرى، باشقىلارغا توڭ تېگىپلا تۇرىدىغان مەن ئۇنىڭ ئالدىغا كەلسەملا بەكلا رايىش بولۇپ كېتەتتىم. ئۇنىڭ دىگەنلىرى بويىچە رېئاللىقنى قۇبۇل قىلغانىدىم. مەن ئۆزۈمنىڭ كېرەكسىزلىكىنى، تىرىشىپ خىزمەت قىلىشىم كېرەكلىكىنى تونۇپ يەتكەنىدىم. شۇ يىلى يىل ئاخىرىدا خىزمىتىمدە بەلگىلىك بۇرۇلۇش بولدى، بىز توي قىلدۇق.
ئەر بارماقلىرى بىلەن كۈلداننى چەككەچ شۇلارنى دىمەكتە ئىدى.
- شۇ چاغلاردا كۈنلىرىمىز بەك جاپالىق ئىدى. ئىككىمىزگە پەقەت بىرلا كارىۋات بار ئىدى. ئۆي جاھازىلىرىنىڭ بىچارىلىكىنى دىمەيسىز تېخى. بىلەمسىز؟ توي قىلىپ بىر يىلدىن كېيىن يېرىم يىلدىن بېرى يىغقان پۇلۇمغا ئاران ئۇنىڭغا ئالماس كۆزلۈك ئۈزۈك ئېلىپ بېرەلىگەنىدىم. ئەلىۋەتتە، بۇ ئىشلار ئۇنىڭغا سىر ئىدى. ئەگەر ئۇ بىلىپ قالسىلا ئۇنىمايدىغىنى ئېنىق ئىدى.
- شۇ چاغلاردا ھاراق – تاماكا مېنى كاردىن چىقىرىپلا قويغان. سوغوق قىش كۈنلىرى ئۇ ماڭا ئىچكىلى ئىسسىق شورپا تەييارلاپ بېرەتتى. ئاشۇ مىززىلىك پۇراقنى پەقەت شۇلا پەيدا قىلالايتى.
ئەر ئۆتمۈشلىرىگە چۆكۈپلا كەتكەنىدى، ۋاقىت نەدە، توختىماي ئۆتمۈشلىرىنى سۆزلىمەكتە ئىدى.
قىز ئۇنىڭ ئەسلىمىلىرىنى ئۈزۈپ قويماسلىق ئۈچۈن جىممىدە ئولتۇرغاچ ئۇنىڭ مۇشۇ دەقىقىلەرگە قايتىشىنى ساقلايتى، ئاللىقاچان كەچ سائەت 10 دىن ئاشقانىدى.
- ئاپلا، كەچۈرۈڭ، دىققەت قىلماي قاپتىمەن، كەچ بوپ كېتىپتۇ، – ئەر كەچۈرۈم سورىغاچ كۈلۈپ كەتتى، – ئەمدى بىلگەنسىز؟ مەن سىزنى سۆيەلمەيمەن ھەم ئۇنداق بولۇشىمۇ مۇمكىن ئەمەس، ئۇنىڭغا يۈز كېلەلمەيدىغان ئىشنى ھەرگىز قىلمايمەن.
- ھەئە، بىلدىم. سىزگە ئۇتتۇرغىنىمغا قايىل بولدۇم! – قىز بېشىنى چايقايتى، – ئەمما مەن ئۇنىڭ يېشىغا بارغاندا چوقۇم تېخىمۇ قالتىس بولۇپ كېتىمەن.
- توغرا دەيسىز، ئۇ چاغدا تېخىمۇ قالتىس ئەرنى تاپالايسىز، شۇنداققۇ؟
- كەچ بولۇپ كەتتى، قىزىق شورپىمۇ مۇزلاپ قالدى ھەقاچان. مەن سىزنى ئاپىرىپ قوياي، – ئەر ئورنىدىن تۇرۇپ، قىزنى ئۇزىتىپ قويماق بولدى.
- بولدى، مەن ئۆزۈم قايتساملا بولدى، – قىز قولىنى يىنىك سىلكىپ قويدى، – قايتىپ كېتىڭ، ئۇ تىت – تىت بولمىسۇن.
ئەر ماقۇل دىگەندەك، قايتىش ئۈچۈن ئۆرۈلۈپ تۇرىشىغا قىز:
- ئۇ چىرايلىقمۇ؟
- ھەئە، بەكلا چىرايلىق.
ئەرنىڭ قامىتى كېچە قوينىدا غايىپ بولدى، شام يورۇقىدا ھاڭۋاققىنىچە
پەقەت قىزلا قالدى.
ئەر ئۇدۇللا ياتاققا كىرىپ، ئۈستەل چىرىقىنى ياندۇردى. كارىۋات قىرىنى بويلاپ ئولتۇردى.
خوتۇن، بۇ تۆتىنچىسى. مەن نېمىشقا باشقىلار ياخشى كۆرگۈدەك بۇنداق ياخشى بولۇپ كەتتىم. نېمىشقا مېنى باشقىلار ياقتۇرغۇدەك ياخشى ئادەم قىلىپ قويۇپ، ئۆزۈڭ بالدۇر كېتىۋالدىڭ؟ مەن، مەن، ئەجەپمۇ غېرىپسىندىم، يىگانىلا قالدىمغۇ …
ئەر ئۆزىگە سۆزلەيتى، بارا-بارا ئۇنىڭ ئاۋازى يىغا ئاۋازى ئىچىدە چىقمايلا قالدى.
ياشلار بىر تامچىدىن بىر تامچىدىن ئەرنىڭ مەڭزىنى بويلاپ قولىدىكى رەسىم رامكىسىغا ئاقماقتا … گىرىمسەن چىراغ يورۇقىدا، بۇرۇن چۈشكەن رەسىمدىن ئالەمدىن ئۆتكەن بىر قىزنىڭ بىر خىل ئىللىقلىقى بالقىپ تۇراتتى.
مەنبە:
بوغلان مۇۋەپپەقىيەتشۇناسلىق بلوگى، ئادىرسى:
http://www.boghlan.com/1135.html
يوللىغان ۋاقتى 2012-7-18 00:34:15
