«تاشئالما» كۈنسىرى پىشماقتا، پۇتبول ھىدى دىماقنى يارماقتا. يېقىندىن بۇيان پۈتكۈل ئۇيغۇردا پۇتبول قىزغىنلىقى كۆتۈرۈلدى، جۈملىدىن ھەردەرىجىلىك مەكتەپلەردە پۇتبول كۇرژىكلىرى بەس-بەستە قۇرۇلماقتا ۋە ئۆز شارائىتىغا ماس ھالدا چامىنىڭ يېتىشىچە پۇتبول مۇسابىقىلىرى ئېلىپ بېرىلماقتا.
ئۆتكەندە مەكتىپىمىز بىرقانچە قوشنا مەكتەپ بىلەن بىرلىشىپ « تەقلىدىي دۇنيا لوڭقىسى» نى تالىشش پۇتبول مۇسابىقىسىنى ئېلىپ بارغاندىن كېيىن، مەكتىپىمىزنىڭ پۇتبول كۇرژىكىنىڭ پائاليەتلىرى بۆلەكچىلا جانلىنىپ كەتتى...
تۈنۈگۈن ، تەنتەربىيە ئوقۇتۇش گۇرۇپپىسىنىڭ مەسئۇلى مىنى ئىزدەپ كېرىپ، مەكتەپ پۇتبول كوماندىسى ئۈچۈن بىر ناخشا تېكستى يېزىپ بېرىشىمنى تەۋسىيە قىلغان ئىدى، بۈگۈن ئەتىگەنگە ئۇلگۈرتۈپ، قەلەم كۈچۈمنىڭ شۇنچە ئاجىزلىقىغا تەن بەرمەي، بىر ناخشا تېكىستى يېزىپ چىقتىم. نۆۋەتتە، مۇزىكا ئوقۇتقۇچىمىز بۇنىڭغائاھاڭ ئىشلەۋاتىدۇ. مەن بۇنى يېزىشتا ئاھاڭدارلىقى كۈچلۈك، قۇرۇلمىسى ئاددى بولۇشنى ئۆلچەم قىلغان ئىدىم ،شۇ مۇددىئاغا يەتكىنىمنى بىلمەيمەن، كۆپچىلىك بىرنېمە دېسۇن.
پۇتبولچى بىز
چەبدەس بىز، ھارماس بىز، پۇتبولچى بىز،
بۇ ياپ - يېشىل جەڭگاھتا قاينار قېنىمىز.
رەقىبكە ئادىل بىز، مەردۇ - مەردان بىز،
پۇتبولغا يۈز كېلىش بىزنىڭ ئەھدىمىز .
غالىب بىز، ئۇزغۇن بىز، شەرەپ قۇچىمىز ،
ئەل ھۇررا توۋلىسا، جان تەسەددۇق بىز.
بۇ بۈيۈك ئويۇننىڭ ئىجادكارلىرى بىز،
تارىخقا ئويغان بىز-ئۇتۇقلاردىن ئىز .
«ھۇررا»دا زىمىننى تىترەت ئوغۇل-قىز،
بۇجاھان تونىسۇن، نەسلى ئۇيغۇر بىز.
قايتارما:
چەبدەس بىز، ھارماس بىز، پۇتبولچى بىز،
بۇ ياپ - يېشىل جەڭگاھتا قاينار قېنىمىز.
يوللىغان ۋاقتى 2012-6-8 10:00:08
