ئىشىق دەشتىدە بەش كارۋان

taklimakan

	ئىشىق دەشتىدە بەش كارۋان (1) مەن سۆيگۈ ھەققىدە قوشاقلار توقۇپ ، سۆزلەرنىڭ ئالدىدىن ئۆتتۈم تالاي رەت . ھاياجان پورەكلەپ ئېچىلغان بىلەن ، كۆكسۈمدە ئاقىدۇ سۈزۈك جاراھەت .   كۈنلەرنىڭ ئەڭ مۇنبەت تۇپراقلىرىدا ، يارىمنىڭ چېچىدەك توزۇيدۇ ھەسرەت . مەن ئىشىق دەشتىدە يۈرگىنىم بىلەن ، بۇ ماڭا ئەگىشىپ كېلەر بىر جەسەت .   ئاقىمەن بىر تامچە سۇنىڭ ئىچىدە ، مىسالى ئاققاندەك نوھنىڭ كېمىسى . قىرىق يىل ئېقىپمۇ شۇ سۇ ئىچىدە ، كەتكىنىم نېمىسى تۇپراقتەك قۇرۇپ ؟   (2) سۆيگۈ ئۇ ھېچنېمە ، كۆڭۈل ھېچنېمە ، ھېچكىممۇ شەكلىنى بېرەلمەس سىزىپ . شۇندىمۇ سۆيگۈدەك تېمى يوق ئۆينى ، مەن يەنە پىيادە چېقتىم ئايلىنىپ .   كۆكتىكى يۇلتۇزلار ئاسماننىڭ گۈلى ، يۇلتۇزنىڭ كۆزىدە مىڭ يىللىق تاشمەن . سەنمۇ ھەم قانلىرى ئېقىپ تۇرغان تاش ، مەن تاشنىڭ كۆزىدە لەيلىگەن كۆلمەن .   مەن سېنى تەسەۋۋۇر قىلالمايمەن ھېچ ، لىۋىڭگە قانغۇدەك سۆيۈپ بىر قېتىم . شۇندىمۇ < يېرىل تاش ، يېرىل تېشىم > دەپ ، شۇ تاشقا ئىسمىڭنى ئويىمەن جېنىم .   (3) ئايلارنىڭ ئىچىدە مېنىڭ ئېيىم يوق ، گۈللىرىم كۆكلەيدۇ قاراڭغۇلۇقتا . كىنومەن قويۇلماي تۇرۇپ تۈگىگەن ، ئادەم يوق كۇلۇپتا ، قۇرۇق ئېكراندا .   بىلمەيمەن ئىسمىڭنى قانداق يېزىشنى ، بىر بەت ئاق قەغەزگە چىرايلىق قىلىپ . ئاۋازىم توزۇيدۇ ئۆلۈك جەسەت بوپ ، بىر كونا سازلىقتەك ئىچىمگە تىنىپ .   ئون سەككىز يېشىڭدىن ئۆتكۈزمەي سېنى ، ئون سەككىز رەڭدىكى گۈل قىلدىم مانا . بىر دەرەخ يىغلايدۇ ئېسەدەپ شۇڭا ، ئېھ سېنىڭ قولۇڭدا ئېسىلىپ ماڭا .   (4) مەن سېنى ھەجىلەپ تۇرۇپ ئوقۇيمەن ، ئىخلاسمەن مۆمىننىڭ ئاۋازى بىلەن . بىر گۈلسەن ھۆپپىدە ئېچىلغان لېكىن ، نەدە بار بىر گۈلنىڭ بولغىنى چېمەن .   مەن مىڭ بىر رەت ئۆتتۈم يىتىم مۈشۈكتەك ، قوزىنىڭ گۆشىدەك ئىسسىق يېنىڭدىن . قۇرىغان خازانغا ئايلاندىم ئاخىر ، بىر ئوتلام ئىچەلمەي يۇمران ئىسمىڭدىن .   كۆكسۈمگە ئۇرىمەن بىر تال گۈل بىلەن ، لېۋىڭگە تەققاسلاپ شۇ بىر تال گۈلنى . تەسەۋۋۇر قىلىمەن ئىشىق چۆلىدەك ، قىرىق بىر قاراقچى كەزگەن چۆللەرنى .   (5) بىر كوبلىت ناخشىدۇر سۆيگۈ دېگەن خەت ، ھەر قېتىم يېڭىدىن ئوقۇلار بىراق . بىر كونا ھارۋىدەك غىچىرلاپ لېكىن ، بۇ سۆيگۈ مېنىڭدىن كەتتى بەك يىراق .   مەن ئېيتقان ناخشا بار ھارۋا ئۈستىدە ، گۈللەرنىڭ كۆزى بار چېمەن ئىچىدە . جەننەتنىڭ خۇش ھېدى كېلىپ تۇرسىمۇ ، ھېس قىلىمەن ئۆزۈمنى دوزاخ ئىچىدە .   مۇھەببەت بىر كونا ھارۋا ئاخىرى ، بۇ ھارۋا مېنىڭدىن كەتتى يىراقلاپ . مەن قالدىم ھېجراننىڭ تاراپ چېچىنى ، ۋە يەنە توزىغان گۈلنى قۇچاقلاپ .

guldar

	بۇ شېئىرلارنىڭ بىر يەرلىرى تونۇشقۇ؟

alganazar

	قارىغاندا بۇ شېئىر ئادىل تۇنىيازنىڭ ئەسەرلىردىن ئىلھام ئېلىپ يېزىلغاندەك قىلىدۇ. تەسەۋۋۇرىڭىز قالتىس ياخشى بولغان بولسىمۇ سەل مۇجىمەللىكتىن ساقلىنالمىغان ئەھۋاللار مەۋجۇت.

lukqak

	ماۋۇ ئەلگەنەزەر دېگەن تورداش ئەجەپ ئىچىمنى بىرخىل قىلىپ قويدىڭىز دېسە....قايسى تېمىغا قارىسام،مۇنداق ئېكەن،ئانداق ئېكەن دەپ پۇتاقلام چىقىرىۋاتىسىز،سىز مەخسۇس تېما ئوپراتسىيەچىسى ئەمەستۇرسىز؟باشقىلارنىڭكىنى ئۇنداق - مونداق دېيىشتىن بۇرۇن ئاۋۇ تېمىڭىزدا ساقلانغان بىر مۇنچە ئىملا خاتالىقىغا بولغان سەزگۈرلىكىڭىزنى ئاشۇرسىڭىز ،ئۆزىڭىزنىڭ<<ئېسىل>>،<<نوقسانسىز>>يازمىڭىزنى ئېلان قىلسىڭىزچۇ كاشكى...مەرتنى مەيداندا سىنا دەپتىكەن،باشقىلارنىڭ قىزغىنلىقىغا بوشراق سوغۇق سۇ سىسپىڭ!

guldar

	ئەلگە نەزە : خاتالاشقاندەك قىپسىز. بۇ ئادىل تۇنىيازنىڭ ئۇسلۇبىغا قەتئىي ئوخشىمايدۇ.

sakina

	توۋا ،مۇنداق تەسەۋۋرۇغا باي شائىرلىرىمىزمۇ بارئىكەن ھە . ھەقىقەتەن سۈيۈنۈش ئىلكىدە ئوقۇپ چىقتىم . مۇشۇنداق ئېسل يازمىلىرىڭىزنى ئوقۇپ تۇرسام دەيمەن . اللاھ قەلەم تۇتقان قوللىرىڭىزغا دەرد بەرمىسۇن !

kitab

	قەيسەر تۇرسۇننىڭ شېئىرلىرىدەكلا تونۇش بىلىندى ماڭا.

saypidin.

	شېئىرىڭىزنىڭ ئەدەبىيلىكى ياخشىكەن ، بىراق ھىسسىيات ئۆزلىكسىزلىكىگە كىملەرنىڭ ئوقى تىگىپ كەتتىكىنتاڭ ، داۋاملىق تېرىشىڭ دوستۇم ،قارىغاندا شېئىرنى يېزىپ بولغۇچە پىكرىڭىز بەك چېچىلىپ كەتكەن ئوخشايدۇ ...

saypidin.

	بۇ يېڭى ئاتالغۇ ئەمەس ،ئادەتتە شېئىرنىڭ مۇزىكىدارلىقى كۈچلۈك بۇلىدۇ ،بۇ ئالاھىدىلىك شېئىرنى ناخشا قىلىپ ئوقۇشقا ئەپلىك قىلغان . شېئىرنىڭ جېنى ھىسسىيات دەيمىز ،شېئىردە چۇقۇم ھىسسىيات كونتىروللىقى بولۇش كېرەك ،ئەگەر سىز نېمىنى يېزىشنى خالاپ يېزىۋەرسىڭىز  ئۇ ھالدا بۇ بىر پاخپاق بىر يازمىغائايلىنىپ قالىدۇ ،ئىخچام تىل دېگەن ھىىسىيات كونتىروللىقىدا يېزىپ چىقىلىدۇ ،بۇندىن باشقا شېئىرىي پىكىر ،تىل ۋە ھىسسىيات جەھەتتە مەلۇم سەكرىتىش بولۇش كېرەك ،بولمىسا ئوقۇرمەننى شېئىر ئىچىگە باشلاپ كىرەلمەيسىز ،ئەكسىچە زىرىكتۈرۈپ قۇيىسىز ،بۇلار ئادەتتە شېئىرىي رېتىم ئارقىلىق ئەمەلگە ئاشىدۇ ،شېئىرىي رىتىم شېئىرنىڭ تۇمۇرىغا ئوخشايدۇ ، ھىسسىيات جەھەتتىكى چىڭقىلىش يا ھۇزۇر سىزىمى ئاتا قىلالمىسا ئۇ شېئىرنى ئۆلۈك شېئىر دېسەك بولىدۇ .شېئىردىكى كەيپىيات ،پىكىر شېئىرنىڭ كۆزىگە ئوخشايدۇ،كەيپىيات يارىتىلمىغان ، مەلۇم  پىكىر بولمىغان  ، سەكرىتىش ئېلىپ بېرىلمىغان  ، رېتىمسىز  يازما ئادەتتە شېئىر قاتارىغا كىرگۈزۈلمەيدۇ.مېنىڭ يۇقارقى شېئىرنى ئەدەبىيلىكى ياخشىكەن دىيىشىمدىكى سەۋەب :تىل جەھەتتىكى دادىل تەسەۋۋۇر بۇ شېئىرنى مەلۇم نەتىجىگە ئىگە قىلغان،ئۇندىن باشقا  سىزنى مەلۇم بىر كەيپىيات ئىچىگە ئېلىپ كىرەلەيدۇ ،باغلانما تەسەۋۋۇر خېلى ياخشى چىققان ،بىراق بۇ باغلانما تەسەۋۋۇر ۋە شېئىرىي كەيپىيات تىنىمسىز ئۆزگىرىپ كەتكەن بولغاچقا ئوقۇرمەنگە ناھايتى قالايمىقان تۇيغۇ بىرىدۇ ،شۇڭا كۆپىنچە ئادەملەر شېئىرنى ئوقۇپ تۈگەتمەيلا  بولدى قىلىدۇ .(يۇقارقىلار پەقەت مېنىڭ شەخسىي كۆز قارىشىم خالاس)