2007-يىل ئاخىرىدا، شاڭخەي شەھەرلىك قۇرۇلۇش باشقۇرۇش ئىدارىسى ئەنگلىيە ئىسجىن لايىھەلەش شىركىتىدىن كەلگەن بىرپاچە خەتنى تاپشۇرۇۋالىدۇ. خەتتە: شاڭخەيدىكى ئاق كۆۋرۈك (گۈللۈك كۆۋرۈك)نىڭ ئەسلىي لايىھەسىدە ئىشلىتىلىش مۇددىتىنىڭ 100 يىل، يەنى 1907-يىلى پۈتكەنلىكى، نۆۋەتتە كۆۋرۈكنى رېمۇنت قىلىش كېرەكلىكى ئەسكەرتىلگەن، بۇ شىركەت يەنە شاڭخەي قۇرۇلۇش باشقۇرۇش ئىدارىسىنى ئەينى چاغدىكى كۆۋرۈكنىڭ ئەسلىي چىرتيوژى بىلەن تەمىنلىگەن. بۇ چىرتيوژنى قايتا ئېچىپ قارىغاندا، گەرچە يۈز يىل ئۆتكەن بولسىمۇ چىرتيوژنىڭ يېڭى پېتى تۇرغانلىقىنى كۆرۈپ، ھەممەيلەن ھەيران قالغان. ئەنگلىيە تەرەپنىڭ ئەستايىدىللىق بىلەن بەرگەن ئەسكەرتىشى شاڭخەي قۇرۇلۇش باشقۇرۇش ئىدارىسىنى ئۇيقۇدىن ئويغاتقان. دېمىسىمۇ بۇ بەلگە خاراكتېرلىك كۆۋرۈك يۈز ياشقا كىرگەن بولۇپ ئومۇميۈزلۈك رېمونت قىلىدىغان ۋاقىتقا يەتكەنىدى.
بۇ بىر شىركەتنىڭ «يۈز يىللىق ئەسكەرتىشى»!
100 يىل بۇرۇن چىڭداۋ شەھىرىدىكى بىر قىسىم يۇندا يوللىرىنى گېرمانلار ياسىغان ئىدى. 100 يىلدىن كېيىن يۇندا يولىدا ئازراق كاشىلا كۆرۈلۈپ، خىزمەتچى خادىملار تەكشۈرگەندىن كېيىن بەزى دېتاللىرىنىڭ كونىراپ كەتكەنلىكىنى بايقىغان. ئەينى چاغدىكى گېرمانىيە قۇرۇلۇش شىركىتى ئاللىبۇرۇن يوقىلىپ كەتكەن بولۇپ، چىڭداۋ قۇرۇلۇش شىركىتى گېرمانىيەدىكى باشقا شىركەتلەردىن مەسلىھەت سورايدۇ. ئۇزۇن ئۆتمەي گېرمانىيەدىكى بىر شىركەت ئېلېكترونلۇق پوچتا يوللانمىسى ئەۋەتىدۇ. پوچتا يوللانمىسىدا: «گېرمانىيەدىكى كارخانىلارنىڭ قۇرۇلۇش ئېلىپ بېرىش بەلگىلىمىسىگە ئاساسلانغاندا، كونىراپ كەتكەن دېتالنىڭ ئۈچ مېتىر ئەتراپىدىكى جايدىن زاپاس دېتال ساقلانغان كىچىك ئامبارنى تاپالايسىلەر» دېيىلگەنىدى. چىڭداۋ قۇرۇلۇش شىركىتى يۇندا يولى ئەتراپىنى تەكشۈرگەندىن كېيىن ھەقىقەتەن بىر كىچىك ئامبارنىڭ بارلىقىنى بايقايدۇ. ئىچىدىكى ھەممىسى ماي لاتا بىلەن ئوراپ قويۇلغان زاپاس دېتاللار بولۇپ، يەنىلا ئىشلەتكىلى بولاتتى.
بۇ بىر شىركەتنىڭ «يۈز يىللىق زاپاس دېتالى»!
بىز مۇشۇنداق ئەۋلادمۇ ئەۋلاد داۋاملىشىدىغان يۈز يىل ھېكايىلىرىدىن تەسىرلىنىپلا قالماستىن سەمىمىيلىك بىلەن ئويلىنىشىمىز لازىم. بىر دۆلەتتە ھۆرمەت، بىر شىركەتتە يىراقنى كۆرۈش تۇيغۇسى، بىر ئادەمدە مەسئۇلىيەت بولغاندىلا بۇ دۇنيا گۈزەل ۋە ئىناق بولىدۇ.
مەنبە: «پەن ۋە تۇرمۇش» ژۇرنىلىنىڭ 2011-يىل 5-سانىدىن ئېلىندى
يوللىغان ۋاقتى 2012-5-12 13:28:29
