ئاپام-دادام يارىشىپ قالسىكەن

akkaniyat

	بىر سەبىينىڭ ئارزۇسى ئوقۇتقۇچىلىق قىلىۋاتقىنىمغىمۇ مانا ھەش-پەش دېگۈچە 15 يىل بولاي دەپتۇ. بۇ جەريانىدا نۇرغۇنلىغان ئوقۇغۇچىلارغا ئۇچرىدىم، نۇرغۇنلىغان ئاتا-ئانىلار بىلەن سۆھبەتلەشتىم، نۇرغۇنلىغان ئائىلىلەرنى چۈشەندىم. نۇرغۇنلىغان ئوقۇغۇچىلىرىم مېنىڭ پەلسەپىۋى پىكىرلىرىم، ئىلمىي رىغبەتلەندۈرۈشلىرىم بەدلىگە ياراملىق بولۇپ يېتىلدى. ھەتتا، بەزى ئوقۇغۇچىلىرىم خىزمەتكە چىقتى، ئۆي-ئوچاقلىقمۇ بولدى. بەزى ئوقۇغۇچىلىرىم بىلەن تا ھازىرغىچە خۇددى ئەينى ۋاقىتتىكىدەك شۇنچىلىك يېقىن، يوللاردا ئۇچرىشىپ قالساق ئىختىيارسىز ھالدا خۇددى كونا قەدىناسلاردەك پاراڭلىشىپ كېتىمىز. توغرا، ئۇلار چوڭ بوپتۇ. مۇنداقچە ئېيتقاندا ئادەم بوپتۇ. مەن ھەر قېتىم ئۇلارنىڭ سالىمىنى قۇبۇل قىلغىنىمدا ياكى ئۇلار بىلەن كۆرۈشكىنىمدە ئۆزۈمنى شۇنچىلىك بەختلىك ھېس قىلىمەن.   ئەپسۇس، شۇ ئوقۇغۇچىلىرىم ئىچىدە يەنە بىر تۈركۈم ‹‹ئالاھىدە ئوقۇغۇچى›› لىرىم بار ئىدى. بۇنداق ئوقۇغۇچىلىرىم دەسلەپكى خىزمەتكە چىققان ۋاقىتلىرىمدا ناھايىتىمۇ ئاز ئىدى. لېكىن، يىللارنىڭ ئۆتۈشى بىلەن ھەر بىر سىنىپتىكى ئاتا-ئانىسى ئاجرىشىپ كەتكەن ئوقۇغۇچىلارنىڭ كۆپىيىشى مېنىلا ئەمەس، مەكتەپتىكى ھەممىمىزنى ھەيران قالدۇرغانىدى.   مانا بۇ ‹‹ئالاھىدە ئوقۇغۇچى›› لىرىم ماڭىمۇ ئالاھىدە تەسىر بېرەتتى. چۈنكى ئۇلارنىڭ دىللىرى سۇنۇق، كۆزلىرى خۇنۈك ئىدى. ھەر قېتىم ئۇلار بىلەن مۇڭداشقىنىمدا ئۇلارنىڭ بىردىنبىر ئارزۇسى ئاتا-ئانىسىنىڭ يارىشىۋىلىشىنى ئۈمىد قىلىدىغىنى مېنى ئىختىيارسىز سۈكۈتكە چۆمدۈرەتتى.   توغرا، ئۇلارنىڭ تەلىپى تولىمۇ ئاددىي ئىدى. ئەپسۇس، شۇ ئاتا-ئانىلار بۇ سەبىيلەرنىڭ قەلبىنى ھېس قىلالىغان بولسىچۇ كاشكى. ياق، ئۇلار پەقەت ئۆزلىرىنىڭ خوشاللىقىنىلا ئويلاپ، بۇ سەبىيلەرنىڭ قاپقارا كۆزلىرىدىكى ياشقا، ئۇلارنىڭ ئۈمچەيگەن ئېغىزلىرىغا، مىسكىن چىرايىغا سەپ سالمايلا پېشىنى قېقىپ، ئايرىلىپ كېتەتتى. نەتىجىدە كەلگۈلۈك يەنىلا بىچارە بالىغا كېلەتتى. ئۇلار ئۆزى بىلەن تەڭ دېمەتلىك، ئاتا-ئانىلىرى بار بالىلارغا ھەۋەس بىلەن قارايدىغان، خالىي جايلاردا ئۈنسىز ياش تۆكىدىغان بولدى. مۇئەللىمى ئائىلە توغرىلىق ماقالە يېزىڭلار دېسە، غايىۋى ئائىلىسىنى كۆزئالدىغا كەلتۈرۈپ، تولىمۇ بەختلىك ئائىلىدە ياشاۋاتقانلىقىنى يېزىش ئارقىلىق مىسكىن كۆڭلىگە تەسەللىي بېرىدىغان بولۇشتى. ئاھ، بالىلار! ئۇلار نېمە دېگەن بىچارە، نېمە دېگەن سەبىي-ھە!   ئەپسۇس، تارىختىن بۇيان ئائىلىنىڭ مۇقەددەسلىكىنى تەكىتلەيدىغان بىز ھالا بۈگۈنگە كەلگەندە ئائىلىنى پەقەت ‹‹ياتاق›› ئورنىدىلا كۆرىدىغان، ئاجرىشىشنى ‹‹بىر ۋاق تاماق يېگەندەك›› لا ئاددىي چاغلايدىغان بولۇپ قالدۇق. ھە دېسىلا ‹‹خام سۈت ئەمگەن بەندە›› دەپ ئۆزىمىزنى ئالداپ كەلدۇق. شۇنىڭ بىلەن ئارىمىزدا ئانا-ئانىسى تىرىك ‹‹يىتىم›› لار كۆپىيىشكە باشلىدى. ۋاقىتنىڭ ئۆتۈشى بىلەن ئۇ ‹‹يىتىم›› لارمۇ بۇنىڭغا كۆنۈپ قالدى. چۈنكى بىر سىنىپنىڭ يېرىمى دېگۈدەك شۇنداق بالىلار بولغاندىن كېيىن بۇمۇ ‹‹نورمال ئەھۋال›› غا ئايلاندى. ھەتتا بەزى بالىلار تەلەپ قىلىپ ئاتا-ئانىلىرىنى ئاجرىشىشقا ‹‹رىغبەتلەندۈرىدىغان›› مۇ بولدى. چۈنكى ئۇلارمۇ ئۆزىگە ھەقىقىي ئىللىقلىق ئاتا قىلالمىغان مۇنداق شەكىل جەھەتتىكى ‹‹قەغەز  ئائىلە›› دىن زېرىككەنىدى.   قىسىقىسى، ئوقۇتقۇچىلىق ھاياتىمدا بۇنداق بالىلار خېلى كۆپ ئۇچرىدى. گەرچە، تالاي قېتىم ئۇلارنىڭ ئاتا-ئانىسى بىلەن پاراڭلىشىپ بېقىش، شۇ سەبىيلەرنىڭ ئارزۇسىنى روياپقا چىقىرىشنى نىيەت قىلغان بولساممۇ ئەپسۇس،  ئاتا-ئانىلارنىڭ سوغۇق مۇئامىلىسىگە ئۇچرايتتىم. ئۇلارنىڭ ئاجايىب تۇرمۇش پەلسەپىلىرى مېنى تەڭلىكتە قوياتتى. ئۇلارغا تالاي سۇئاللارنى قويغۇم كېلەتتىيۇ، يەنە ئۆزۈمگە ھاي بېرەتتىم.   ئەجىبا، شۇ ئاتا-ئانىلاردا پەقەتلا يول قويغۇدەك ئارىلىق قالمىغانمىدۇ؟ ئۇلارنىڭ ئالدى 20 يىل، كەينى ئاز دېگەندىمۇ 10 يىل ئۆي تۇتقان ئاتا-ئانىلار، ھە دېسىلا ‹‹مىجەزىمىز كېلىشمىدى››، ‹‹ئىسنىڭ ئاچچىقىنى مورا بىلىدۇ›› دېيىش ئارقىلىقلا ‹‹ئائىلە›› دېن ئىبارەت بۇ مۇقەددەس جاينى پارچىلىماقچى، ئۆزىنىڭ يۈكسەك مەسئولىيىتىدىن ۋاز كەچمەكچى بولۇشىدىكەن. دەسلىپىدە تونۇشۇپ، توي قىلغاندا كېلىشكەن مىجەز، ئەجەب تويدىن كېيىن كېلىشمەس بولۇپ قاپتىغۇ؟ بىر ئۆينىڭ مورىسىدىن ئىس چىقىرىمەن دەپ خوتۇن ئالغان ئەر ياكى تەككەن ئايال ئەجەب تويدىن بۇرۇن شۇ ‹‹ئاچچىق››نى ھېس قىلالماپتىكىنا؟...    قىسىقىسى، مەن ئەنە شۇ ئوقۇغۇچىلىرىمنىڭ قەلب سۆزىنى كەڭ ئوقۇرمەنلەرگە يەتكۈزمەكچى ئىدىم. ئەگەر ئوقۇرمەنلەر بۇ كۆڭلۈمنى توغرا چۈشەنگەن بولسا مەنمۇ تولىمۇ خۇرسەن بولار ئىدىم،ئەلۋەتتە.   ئەي، تارىختىن بۇيان ئاجايىپ ئۇلۇغ سۆزلەر بىلەن تەرىپلىنىپ كېلىۋاتقان، ئاتا-ئانىلار بالىنىڭ قەلب  ساداسىغا قۇلاق سېلىڭ: ئاپا، دادا يارىشىپ قېلىڭلار!

sabaat

	ئىنتايىن ئەھمىيەتلىك تىيمىدىن بىرنى يوللاپسىز. مىنىڭ8ياشلىىق ئوغلۇم بىلەن بىر سىنىپتا ئۇقۇيدىغان بىر ساۋاقدىشىنىڭمۇ ئاتا -ئانىسى ئاجىرشىپ كىتىپتىكەن، ئۇ ئۇقۇغۇچى ساۋاقداشلىرىغا ئۆزىنىڭ ئاتا ئانىسى ئاجىرشىپ كەتكەندىن كىيىنكى تۇرمۇش ۋە باشقا گەپلەرنى دەپ سىنىپتىكى بالىلارنىڭ ھەممىسنى يىغىلىتىۋېتىپتۇ. ئوغلۇمنىڭ دەپ بەرگەنلىرىنى ئاڭلاپ مىنىڭمۇ كۆزلىرىمدىن ياش چىقىپ كەتتى. دىمىسىمۇ ئاشۇ 8 ياشلىق بالىنى يىتىم قىلغان ئاتا-ئانىنىڭ يېشى ئاز دىگەندىمۇ 30غا بارغاندۇ.ئاللا نىسىپ قىلسا  بۇ دۇنيادا ياشايدىغان ئۆمۇرنىڭ يېرىمىن كۆپرەكىنى ياشاپ بولدى دىگەن گەپ،لىكىن ئاشۇ بالىلار چۇ؟ بىز ئۆزىمىزنىڭ ئاشۇ يېرىم قالغان ئۆمرىمىزنى ياخشى ئۆتكۈزۈش ئۇچۇن ئاشۇ ناتىۋانلارنىڭ پۇتۇن ئۆمرىنى ئازاپ بىلەن ئۆتكۈزۈشكە يول ئېچىپ بەرسەك بۇ قانداق بولغىنى؟ قەدىمدىن تارتىپ ئاتا-بوۋىللىرىمىز بىزگە پەرزەنىت ئۈچۈن نى-نى جاپا مۇشەققەتلەرگە چىداپ، ئۇلارنىڭ ئوتىدا كۈيۈپ ، سۈيىدە ئېقىشنى ئۆگەتكەنغۇ؟ تولۇقلىما مەزمۇن (2012-5-9 13:57): شۇڭا  ياش ئاتا-ئانىلارغا دەيدىغىم مۇمكىن بولسا يارشىپ قېلىڭلار.

birtamqasu ھەقىي سالاھىيەتلىك ئەزا

	نىكاھ ،.ئائىلە ھەرگىزمۇ ئويۇن ئەمەس ، خوشى تۇتقاندا ئويناپ ، زىرىككەندە تاشلايدىغان ؛ پەرزەنتمۇ  قونچاق ئەمەس ، بىر بۇلۇڭغا تاشلىنىپ قالسىمۇ ھىچنىمە بولمايدىغان.بەزى بالىلار ھەتتا قونچىقىنى تاشلاپ قويۇشقىمۇ چىدىمايدىغۇ ! ئاجراشقانلار ياكى ئاجىرشىشنى ئويلاۋاتقانلار پەرزەنتىڭلارنى ئويلاپ قويۇڭلار : ئۇلار ھەقىقەتەن گۇناھسىز !

salam234

	ناھايىتى ئەھمىيەتلىك تىما يىزىپسىز مۇئەللىم ، تىمىڭىزغا تەشەككۈر .   راست ئىيتىسىز  ،شۇنچە ئۇزۇن يىل ئۆي تۇتقان ئاتا ئانىلار، بىردەمدىلا ئايرىلىدۇ.توي قىلىشتىن بۇرۇن شۇنچە ئۇزۇن بىللە يۈرۈپ توي قىلغانلارمۇ  كىچىككىنە سەېەپلەرتۈپەيلى ئاجرىشىشىدۇ ،ئەمما بۇ ئاجرىشىشنىڭ ئاقىۋىتىنى ۋە نىمىنى كەلتۈرۈپ چىقىرىشىنى ئۇلار قىلچە ئويلاشمايدۇ.   ئاقىۋەتتە شۇ ئاجرىشىش شۇ ئائىلىدىكى سەبىي پەرزەنتنىڭ يىتىم بولىشىنى ،قەلبىنىڭ شۇ قەدەر سۇنۇق بولىشىنى كەلتۈرۈپ چىقىرىدۇ، شۇ ئاجراشقۇچى مۇشۇ نۇقتىنى ئويلىمامدىغاندۇ؟؟؟   ئۇلار بۇ نۇقتىنى ئاللىبۇرۇن كىچىككەندە ئويلىشى مۇمكىن.

美丽的相遇 ھەقىي سالاھىيەتلىك ئەزا

	سىز ناھايىتى ياخشى تىمىنى تاللاپ يېزىپسىز :           مەن ئۇقۇپ ئىختىيارسىز يىغلاپ سالدىم . مەنمۇ ئاجىراشقان ئايال  ، بىزمۇ بىر قىسىم ئەرزىمەس ئىشلار تۈپەيلى ئاجىرشىپ كەتتۇق ، ئاجىرشىپ ئون بەش كۈنگە بارمايلا يولدۇشۇم توي قىلدى .            بىر يىل بولدى 3 ياشقا كىرگەن بالام بىلەن ئۈتىۋاتىمەن ! ئاللا خالىسا توي قىلمايمەن دەيدىغان ئارزۇيۇم بار .

avral

	ئادەمنىڭ كۆڭلىنى يېرىم قىلىدىغان ھەقىقى  تېمىدىن بىرنى يېزىپ يوللاپسىز، رەھمەت سىزگە! مېنىڭمۇ ئاتا ئانام مەن 3ياش ۋاختىمدا ئاجرىشىپ كەتكەن، مەن ھازىر 25 ياشقا كىردىم، ئوقۇۋاتىمەن، ھازىرغىچە ئاتا ئانامنى يارىشىپ قالسىكەن دەپ ئۈمۈت قىلىمەن، ئەمما مۇمكىن بولمايدىغانلىقىنىمۇ ئوبدان بىلىمەن، ئەمما كۆڭلۈمنىڭ چوڭقۇر يەرلىرىدىن شۇنداق ئاۋاز كېلىدۇ. ئەسلى مەن چوڭ بولغانسىرى بۇ ئىشلارنى ئويلىمايدىغان بولارمەنمىكىن دېسەم، چوڭ بولغانسىرى تېخىمۇ ئويلايدىغان بوپ قالدىم، بۇ خىلدىكى جاراھەت ئادەمنىڭ كۆڭلىدە مەڭگۈلۈك قالىدىكەن، شۇڭا ھازىر ئويلايمەن، كەلگۈسىدە ئاللاھ خالىسا ئۆزەمنىڭ بالىلىرىنىڭ ھەم ئاتىلىق مېھرىدىن ھەم ئانىلىق مېھرىدىن تولۇق بەھرىمان بولىشى ئۈچۈن تىرىشىمەن.

kutnur502

	ئەر خوتۇن  ئاجراشسا  كۆپرەك ئاياللارغا  گۇناھ  قويىشىدۇ،ئۇنداقتا ئائىلە پەقەت ئاياللارلا ئاچچىق يۇتۇپ ئۈتىدىغان ماكانمۇ؟  ئۆز مەسئولىيىتىنى ئادا قىلىشقا قادىر  تۇرۇپ ،ئائىلە ئۈچۈن تەر تۆكمىگەن ھېچقانداق تەربىيە ئۆتمىگەن ،تاپقان تەرگىنىنى ئويۇن ئۈچۈن ئاتىۋەتكەن ،ئائىلە يۈكىنى ئاياللارغا ئارتىپ قويغان ئەرلەرگە زادى قانداق مۇئامىلە قىلغۇلۇق كېرەك؟ئائىلىدىن ئىبارەت بۇ ئىللىق ماكان بۇ ئەرلەرگىمۇ كېرەك ئەمەسما؟كونىلار ئەر ئۆينىڭ تۈۋرۈكى ،دەپتىكەن ،تۈۋرۈك ئەمەس ،يۈك ،ئاپەت بولغانلارنى قانداق قىلغىلۇق؟

kunbek2

	‹‹ھەر كىم ھەر نىمە دەيدۇ،باشقا كەلمىسە بىلمەيدۇ››.     بىر ئائىلىنىڭ مورىسىدىن تۈتۈن چىقىرىش ھەقىقەتەن ئۇنچە ئاسان ئەمەس ئىكەن. تۇرمۇشنى بىر كىنو دىسەك، ئائىلىنى بىر سەھنە دىسەك ئەر بىلەن ئايال مۇشۇ سەھنىدىكى رول ئالغۇچىلار. ئەگەر رول ئالغۇچىلار ئۆز ئارا ماسلاشمىسا كىنو مۇۋەپپىقىيەتلىك چىقامدۇ؟    ئەلۋەتتە ئاياللاردىكى مەسىلىلەر ھەقىقەتەن ئاز ئەمەس، ئەمما ئاياللار ئەممە كىشى ئاچچىقىنى چىقىرىدىغان ‹‹ مۇشت خالتىسى›› ئەمەستە!    ‹‹ كۆزۈڭنى ئاچ،ئۆزۈڭنى تاپ ئەركەكلەر›› بۇ ئەرلەرگە قىلىنغان ئەڭ سەمىمىي ئىلتىجا!    توي قىلىپ ئائىلە قۇرۇشنى ئويلاۋاتقانلار ھەم توي قىلىپ ئائىلە قۇرغانلار ھەم ئائىلىسى بۇزۇلۇش ئالدىدا تۇرغانلار ‹‹مەسئۇلىيەت دىگەن ئاڭ بىزدە يېتىلدىمۇ ›› دىگەن مەسىلە ئۈستىدە ئەستايىدىل ۋە يەنىمۇ ئەستايىدىل ئويلىنايلى!!!

sabaat

	kunbek2 يوللىغان ۋاقتى  2012-5-13 19:08 ‹‹ھەر كىم ھەر نىمە دەيدۇ،باشقا كەلمىسە بىلمەيدۇ››.     ... ھەققەتەن ئەستايىدىللىق بىلەن ئىنكاس يىزىپسىز. مىنىڭچە مۇشۇ ئەرلەر ئاشۇ ‹كۆزۈڭنى ئاچ ، ئۆزۈڭنى اپ ئەركەكلەر› دىگەن كىتاپنى بىر ئۇقۇپ باقسا بۇلاتتى.

banxira

	مىنىڭمۇ  بىر  دوستۇم  بولىدىغان   ،  ئۇمۇ  ئاجىرىشىپ  كىتىمىز  دەپ  يۇرۇپ  كىيىن  قانداق  بولغان  يولدىشى  بىلەن   چىقىشىپ  قالدى  ھازىر  ئۆي  تۇتىۋاتىدۇ  . شۇنداق  ئوبدان  تۇرمۇشى ، بىر  قىزى  بار . ئەمدى  يەنە  كۆز  تىگىشتىن  ئاللا  ساقلىسۇن  شۇ  بەخىتلىك  ئائىلىگە  .