كىرىمنى جىلغىسىدىكى چۈش

khan

	كىرىمنى جىلغىسىدىكى چۈش ئۇيغۇران كېتىپ بارىمەن، جىلغىلار ئارا،ئەگرى –بۈگرى، قاراڭغۇ –يورۇق، ئېگىز –پەس، لېكىن ھەيۋەتلىك. چاقنايدۇ تاغلار، خۇددى يالقۇندەك. نۇر چاچار سۇلار، خۇددى كۈمۈشتەك. ھەيرانمەن! قارىغايلار، ئارچىلار، سۆگەت، سۇۋادان، تارقالغان ھەريان. لېكىن ئەمەس يېشىلزار، شاخلىرىدا ئوينايدۇ دوللار، بەتلىرىدە داھى سۈرىتى. قىيالارغا يامىشىپ يۈرەر، كۆرەڭلىگەن ئەرەب رەقىمى، مارافونغا يۈگرەيدۇ تىنماي، يىگىرمە ئالتە لاتىن بالىسى. سۇسىز ئۆسكەن بولۇق چىمەندە، ئېنتىرنىتقا ئۇلانغان چوپان، باقار ئۇندا تىزگىنەك بىلەن، كىلونلانغان ئۆچكىلىرىنى. تۇرۇپ قالدىم چوپانغا قاراپ، كۆزلىرىدە لازىر چاقنايدۇ، كالتىكىدىن ئۆچكىلىرىگە، توختىماستىن دولقۇن تارايدۇ. سوراپ قالدىم چوپانغا قاراپ: بۇ يەر قەيەر؟ بۇ قانداق جاي؟ تىلسىماتمۇ؟ كوھىقاپمۇ؟ ياكى دوزاخنىڭ ئېلانى؟! دېدىكى چوپان: ئەي، ئادەم بالىسى! بۇ يەر شۇنداق جاي جەننەت دېسەڭ جەننەتتۇر بۇ يەر، ئۆلمەي تۇرۇپ كىرەلەيدىغان. دوزاخ دېسەڭ دوزاختۇر بۇيەر، تېرورلۇقنى ئىشلەپچىقارغان. تىلسىم دېسەڭ تىلسىمدۇر بۇيەر، مىشچان، ساددا چۈشەنمەيدىغان. كوھىقاپ دەر كوھىقاپمۇ ھەم، كۆز يېشىغا ئىشەنمەيدىغان. چۈشىنىشكە پەقەتلا كېرەك، كىرىمنىيدىن ياسالغان يۈرەك. كېتىپ بارىمەن، جىلغىلار ئارا، كىرىمنىيلىق چېغىر يوللاردا، يول بەلگىسى ــــــــ كولورادو، كولورادو، كولورادو... سايرايدۇ قۇشلار«كولورادو» دەپ. ھۆپۈپ ئۇنتىغان سايراشلىرىنى، زەينەپ چاقىرماس كاككۇكىنى ھەم. كوكاكولا ئىچىپ مەست بولۇپ، تولغىما ئۇسۇل ئوينايدۇ دىلفىن، دەرەخلىكتە ئورانگوتانمۇ، كىيىۋاپتۇ چوپان ئىشتىنى. پۇت تېپىشەر پىل بىلەن ئېشەك، تۇيىقىدىن ئوتلار چاچرىتىپ، گلوبۇسنى زەيتۇن توپ قىلىپ، تالىشاركەن نوھتىن قىزغىنىپ. كومىتالار ئاتىدۇ لاۋا، سەييارىلەر پارتلايدۇ دەھشەت. ئەللىك يۇلتۇز ھۆكۈمران بولۇپ، باش بولاركەن ئالەم قەسرىگە. ئاپئاق ساراي، بەشبۇرجەكساراي، نىچۈن چاچار دۇنياغا مىشەك؟ چۈشىنىشكە پەقەتلا كېرەك، كىرىمنىيدىن ياسالغان يۈرەك. «0»نى قۇچاقلاپ ياتقان ئارالدا، كىرىمنىينى يەۋالغانمېكىن، ساراڭ بوپتۇ بارچە كالىلار. خاررىي پوتتېر سۈپۈرگىسىدە، ئۇچۇپ يۈرەر ئەركە بالىلار. شۇنچە كەڭرى ئالىپ جىلغىسى، شۇنچە گۈزەل دوناي ۋادىسى. ھەر يۈرەككە بېسىلغان چوڭقۇر، نىيوتۇننىڭ ئالتۇن تامغىسى. كىرىمنىيدا يېزىلغان كىتاب، كىتابلاردىن ياسالغان مۇنار، ساقلار ئىكەن روھلارنى ئەبەت. سىبىرىيەدە شىمال بۇغىسى، سەمىرەتتى ئېيىق بورىسنى، بايقوڭۇردىن ياڭرىغان سادا، تەئەججۈپكە سالدى جاھاننى. ئاي كېمىدە ئولتۇرغان مىللەت، ئەركىلەتتى بەڭباش زاماننى. ۋولگا، ئېدىل جىلغىلىرىدا، ئېقىۋاتقان كىرىمنىي سۈيى، يۇتۇپ كەتتى كۇرسىك كېمىنى. «چىرنوبىل»نىڭ تۈتەكلىرىدىن، تۇمان باستى قىزىل مەيداننى، كىرىمنىيلىق ياۋۇز ئىمپىرىيە، كېتىپ قالدى تاشلاپ جاھاننى. ئۆلۈك دېڭىز جىلغىلىرىدا،مۇسائەۋلادى ــــــ يەھۇدىلار ـــــــــ كىرىمنىيدىن تۆرەلگەن مىللەت، تىرىلدۈردى ئۆلۈك دېڭىزنى! تېنچلىق ئۈچۈن يانغان يۈرەكلەر، ئىلىم –پەندىن ئۈنچە تېرەركەن، نوبىل ئاكام يىلدا ئۇلارغا، سۆيۈنچە ھەم ھېيتلىق بېرەركەن. نېمە دېگەن تەتۈر جاھان بۇ، ئۇلارغا تېنچلىق يوق، لېكىن ھېيتلىق بار. بىزگە تېنچلىق بار، لېكىن، لېكىن ھېيتلىق يوق! قۇياش چىققان تاقىم ئاراللار، ئاراللاردا ئۈنچە مارجانلار. شۇ زېمىندا ياشايدىكەن، تارىخنى ئۇنتىغان جەسۇر ئىنسانلار. پاناسونىك، سونى، ياماخا، ئۇزاپ كەتكەن قاچان، قاچاندا. جاھانگىر بوپ ئاقچا –دوللارغا، تويوتا ھەم خوندا، توشىبا. يانار تاغلار ئاتىدۇ لاۋا، ئاسمان –زېمىن تىترەيدۇ پات – پات، بايلىقلىرى تامام خورىغان، مۈشكىلاتقا بولۇپتۇ جاللات. كىرىمنىيلىق چېغىر يوللاردا، گىگانت بوپتۇ پەتەك ياپونلار. خوجا بوپتۇ تېنچ ئوكيانغا، سام تاغىدىن تەلىم ئالغانلار. نەۋرۇز گۈلى ئاچىدۇ چېچەك، بىزگە نىچۈن كۈلمەس كېلەچەك، چۈشىنىشكە پەقەتلا كېرەك، كىرىمنىيدىن ياسالغان يۈرەك. كېزىپتىمەن چۈشلىرىم ئارا، كېزىپتىمەن جىلغىلار ئارا، كۆرۈپتىمەن ــــــــــــــ كولورادو، تىمزا دەرياسى، ئالىپ جىلغىسى، ۋولگا ۋادىسى، ئۆلۈك دېڭىز، فۇجى تېغىنى. ئاھ، كىرىمنىي دۇنياسى! نەقەدەر سېھىرلىك، نەقەدەر تىلسىم، ئەپسۇسكىم لېكىن، كۆرمىدىم بىراق، ئىزدىدىم ئۇزاق. تاپالمىدىم تەڭرى تېغىنى، تاپالمىدىم بۇغدا ئاتىنى. نىچۈن شۇنداقتۇ؟ تەڭرى تاغلىرى، كىرىمنىيغا ياراشمامدىكەن؟! چۈشىنىشكە پەقەتلا كېرەك، كىرىمنىيدىن ياسالغان يۈرەك. 2001 –يىل 24 –ئۆكتەبىر شەھرى ئۈرۈمچى ش م ئى

khan

	بۇ يازما مىسرانىم تورىغا يوللانغان. مىسرانىم گەرچە چوڭ ئەزالىق بىكەت بولسىمۇ، بىراق بۇ شىئېرىمنى چۈشەنگۈدەك ئادەم چىقمايدىغان ئوخشايدۇ. شۇڭا بۈگۈن چوڭ ئۆيگە ____ ئەلكۈيىگە يۆتكەلدى.

zulyar0997

	مەن ئۈزەمدە بۇ شېئىرنى چۈشەنگۈدەك قابىلىيەت يوق ئىكەنلىكىنى تەن ئالىمەن. پەقەت ‹‹مەن ئاق بايراق ئەمەس››دىگەندەك تىلى ئاددى، مەنىسى بىۋاستە شېئىرلارنى چۈشىنىشكىلا يارايمەن.ھەممىسى شۇ بىلىمسىزلىك، جىق ئۇقۇمىغاننىڭ ئىشى. مېنىڭچە،سىزنىڭ بۇ شېئىرىڭىز چۇقۇم قالتىس شېئىر.

degiz

	ئەسسالامۇ ئەلەيكۇم khan  ئەپەندىم ، بۇ شېئىرىڭىز ماڭا بەكلا يارىدى، ھەقىقەتەنمۇ دۇنيانىڭ خۇجىلىقىنى پەن-تېخنىكىغا تايىنىپ قولىدا تۇتۇپ تۇرىۋاتقان ئامېرىكا شۇنداقلا دۇنياۋى مىكرو ئىلىكتىرون تېخنىكىسىنىڭ بۆشۈكى بولغان كىرىمنى جىلغىسى دۇنيادىكى ھەرقانداق دۆلەتنىڭ ھەۋىسى ھەم ھەسىتىنى قوزغايدۇ،شۇڭا ھىندىستان ئوزىنىڭ ئەڭ تەرەققى قىلغان بانگالور شەھىرىگە، جوڭگو  جۇڭگۈەنسۈن رايۇنىغا ''كىرىمىنىي جىلغىسى'' دىگەن نامنى  بەردى. شېئىرىڭىزدىكى بايانلار دۇنيادىكى بارلىق مىللى، دىنىي زىددىيەتلەر، ساختا تېنىچلىق ۋە تەرەققىياتلار، ساقلانغىلى بولمايدىغان ئۇرۇشلار، يالماپ يۇتۇشلارنى ھەقىقى يۇرۇتۇپ بېرىپتۇ. ئەپسۇسكىم لېكىن، كۆرمىدىم بىراق، ئىزدىدىم ئۇزاق. تاپالمىدىم تەڭرى تېغىنى، تاپالمىدىم بۇغدا ئاتىنى. نىچۈن شۇنداقتۇ؟ تەڭرى تاغلىرى، كىرىمنىيغا ياراشمامدىكەن؟ ئەمدىكى گەپ مۇشۇ مىسرالاردا قالدى.....

khan

	degiz يوللىغان ۋاقتى  2012-5-7 18:21 ئەسسالامۇ ئەلەيكۇم khan  ئەپەندىم ، بۇ شېئىرىڭىز ماڭا بە ... دېڭىز ئەپەندى، شىئېرىمنى چۈشەنگىنىڭىزگە رەھمەت. ئاپتورغا نىسبەتەن ئوقۇرمەننىڭ ئۆز ئەسىرىنى چۈشىنىشىمۇ ھوزۇر ئىكەن. ئەسلى ئىككى ھەپتە بۇرۇن بۇ شىئېرىمنى مىسرانىمغا يوللىغان ئىدىم. بىراق دەسلىپىدىلا «كىرىمنىي دېگەن نېمە؟»، «سىز ئۇ يەرگە بارغانما؟» دېگەندەك پۇچەك ئىنكاسلارنى كۆرۈپ جېنىم چىقايلا دېگەن. بۈگۈن ئەلكۈيىگە يوللىسام، باشقۇرغۇچى نەچچە مىنۇتقا قالمايلا تەستىقلاپتۇ. تېمامنىڭ بۇنچە تېز تەستىقلانغانلىقىدىن بەك خۇش بولدۇم. چۈشكەن ئىنكاسلاردىنمۇ سۆيۈندۈم. بۇ شىئېرنى بۇندىن 10 يىل بۇرۇن يازغان ئىدىم. 22 ياش كىرگەن ۋاقتلىرىم ئىدى. شۇڭا ياشلىقىمدا، قىزىققانلىقىمدا بەزىبىر ھېسسىياتقا تايىنىپ يېزىپ قويغان مىسرالار بار، بۇنىمۇ ئېتىراپ قىلىمەن. ئوقۇرمەنلەرنىڭ تەنقىدىي پوزىتسىيە تۇتىشىنى ئۈمىد قىلىمەن. شىئېردا سىمۋوللۇق ئىپادىلەش قويۇق بولۇپ، مۇنبەرداشلار مۇنازىرە قىلىپ باققاي.

burkut327

	ئەپسۇسكىم لېكىن، كۆرمىدىم بىراق، ئىزدىدىم ئۇزاق. تاپالمىدىم تەڭرى تېغىنى، تاپالمىدىم بۇغدا ئاتىنى. نىچۈن شۇنداقتۇ؟ تەڭرى تاغلىرى، كىرىمنىيغا ياراشمامدىكەن؟       ئۇزاق بوپتىكەن ئەركىن شىئىر ئوقۇمىغىلى ، تولۇق ئوقۇدۇم ، 22ياش ۋاقتىڭىزدىكى تەپەككۇر ، ئىجادىيتىڭىزگە قايىل بولدۇم . ھوزۇر باشقا ،ئوي باشقا .

turklanxah

	khan يوللىغان ۋاقتى  2012-5-7 13:02 بۇ يازما مىسرانىم تورىغا يوللانغان. مىسرانىم گەرچە چوڭ ... مىسرانىمدا چۇشەنگۈدەك كىشلەر ئەسلىي بار ئىدى. لىكىن شىئېرلار كۆپ يوللۇنۇپ مۇنبەرداشلارنىڭ بېشىنى ئاغرىتۋەتكەچكە ،ياخشى شىئېلارغىمۇ دىققەت قىلماس بۇلۇپ قالغان.ئۇنىڭ ئۇستىگە شۇنداق پۇچەك ئىنكاسلارمۇ تىما ئىگىلىرىنى مەيۈسلەندۇرۇپ قۇيىدۇ.ئامال يوقتە ،تەرەقىيات يۇلىدا  ئوڭۇشسىزلىقلارنىڭ بۇلىشى تەبىي ئەھۋالغۇ؟كىيىنكى قېتىمدا يوللاپ قالسىڭىز مەن چۇقۇم ياخشى ئىنكاستىن بىرنى يازىمەن.

nazi

	ياخشى يېزلىپتۇ.    مۇنۇ مېسرالىنى ياقتۇردۇم.. ئۇلارغا تېنچلىق يوق، لېكىن ھېيتلىق بار. بىزگە تېنچلىق بار، لېكىن، لېكىن ھېيتلىق يوق! cctvنىڭ بىر پىرگىرامىسىدا قايسى كۈنى ھېندىستانىڭ بانگېلور شەھرىنى  ئامېرىكا كالىفورنىيەدىكى كىرىمىنى سىنى بېسىپ چۈشىۋاتىدۇ دەپ تونوشتۇرۋاتقاندى..يەنى ئامېرىكىدا ئۆيىڭىزدە ئولتۇرۇپ پېسا قاتلىمىسى بۇيرۇتماقچى بولسىڭىز تېلفۇنى ئالغۇچىنىڭ ھېندىستاندىكى تېلفونېسىت ئىكەنلىگىنى ئويلاپ يېتەلمەيسىز  دەپ..................

kurxat

	مۇڭ باسقان زىمىننىڭ مەيۈسلۈك نالىسى.........

turditohti

	شىئېرىڭىزدىن تۆكۈلۈپ تۇرغان ئىنساننىڭ ئەركىن تەرەققىيات ئېڭى،تۇغۇلغان زىمىنغا بۈلدۈرۋاتقان بۇيۈك ھۆرمەت،كەلگۈسىمىزگە بىرىلۋاتقان بىشارەت قاتارلىقلار يۇغۇرۇلۇپ،مىللىتىمىزنىڭ زاماننىڭ تىزلىگىگە ھەم تىزلىك ئېلىپ كەلگەن بېسىمغا بەرداشلىق بىرىپ،كەلگۈسىنى يارىتىشتەك يۈكسەك نىشاننى بىزلەرگە بۈلدۈرۈپ،قانداق ياشاش توغرىسىدا ئېقىل كۆرسىتىلگەنلىكىدىن تۈلىمۇ سۈيۈندۈم. دەۋرىگە ماسلىشىپ ياشاش-مىللەتنىڭ تەقدىرى بىلەن زىچ مۇناسىۋەتلىك بولغانمۇھىم شەرتلەرنىڭ بىرسىدۇر. سىزگە سالامەتلىك تىلەيمەن!