راھەت (زوردۇن سابىر)

dihqan

	راھەت ئاپتورى: زوردۇن سابىر «...كوچا ئاپتوبۇسىدا ئۆرە تۇرۇشمۇ راھەت، لېكىن ئورۇندۇقتا ئولتۇرىۋېلىش بىزنىڭ ئادەملىرىمىز ئۈچۈن مودىغا ئايلانغان راھەت. ھەتتا بەدىنى تەلەپ قىلمىسىمۇ، ئۇلارنىڭ روھى بۇ راھەتكە ئىنتىلىدۇ... پسىخولوگىيە ئالىمى باش بېكەتتە بايىلا ئېرىشكەن ئورۇندۇقتا ئولتۇرۇپ، ئاشۇنداق ئويلاۋاتقاندا ئاپتوبۇسقا قىستىلىپ چىقىۋاتقان ئادەملەر ئارىسىدىن نارەسىدەنىڭ يىغىسى، ياش ئانىنىڭ جىملىشى، دادىنىڭ غەزەپلىك ئاۋازى ئاڭلاندى _مانا، مانا، ئولتۇرۇڭ،- ئالىم ئورنىدىن تۇرۇپ بالىلىق چوكانغا ئورنىنى كۆرسەتتى. _رەھمەت، رەھمەت...سىلى... _چوكان ئالىمنىڭ قېلىن كۆزەينەكلىك چىرايىغا، ئاقارغان بۇرۇتلىرىغا خىجىل بولۇپ قارىدى. _ئولتۇرمامسەن، قۇچىقىڭدا بالا بولغاندىكىن... رەھمەت ئاكا، رەھمەت. دادىنىڭ بۇيرۇق تەلەپپۇزىدىكى ئاۋازى تەبىئىي قۇدرىتى بىلەن ھەممىنى ھەل قىلدى: ئانا كۈلۈپ ئولتۇردى، ياشقا تولمىغان بوۋاق ئوماق كۈلۈپ، ياش يۇقى كۆزلىرى بىلەن بوۋاينىڭ كۆزەينەكلىك، بۇرۇتلۇق يۈزىگە قىزىقىپ قارىدى. دادا شادلاندى. _رەھمەت بوۋا دە، ئوغلۇم، بوۋاڭ ياخشىكەن-ھە؟ قارىسىلا، ئولتۇرغانلارنىڭ ھەممىسى ياشلار، بىرەرسىمۇ ئورۇن بېرەي، دېمىدى. _ھەممە ئادەم راھەتكە ئىنتىلىدۇ، ئۇكام. _سىلى راھەتتىن كېچەلىدىلىغۇ؟ _ ياق، مەن راھەتكە ئىنتىلدىم، شۇڭا ئۇنىڭغا ئېرىشتىم. _ دېمىسىمۇ، ئۆرە تۇرۇش راھەت، شاماللىق-ھە؟ _ شامالنىڭ ئىشى چاغلىق، روھىڭىز قانائەت تاپىدۇ. _مانداق دەڭ، بۇ گەپنى مەن بىر كىتابتىن ئوقۇغان. روھىي قانائەت... _ ئادەمنىڭ روھى بىلەن جىسمى بىر-بىرىگە ھەم دوست، ھەم دۈشمەن، ئۇلار مەڭگۈ بىللە، بىردەم سوقۇشىدۇ، بىردەمدىلا يارىشىدۇ، ئەر-خوتۇنلاردەك... ئالىمغا قىزىققۇچىلار كۆپەيدى. _ جاپاغا ئىنتىلىدىغان ئادەملەرمۇ بولامدۇ؟ _ بولىدۇ، ئۇكام، شۇنداق ئادەملەرنىڭ شان-شەرىپى كۆپ بولىدۇ. _ راھەتنى دەپ جاپا تارتىدىغاندۇ ئۇلارمۇ؟ _ ياق، ياق، روھىنى قانائەتلەندۈرۈش ئۈچۈن. روھىنىڭ جىسمى ئۈستىدىن غەلىبە قىلىشىنى تىلەيدىغان ئادەملەر مەۋجۇت. بىر مىللەتتە شۇلارنىڭ سانى قانچىلىك كۆپەيسە، ئۇ مىللەت شۇنچە روناق تاپىدۇ. راھەتكە ئىنتىلىدىغانلار قانچە كۆپەيسە، ئۇ مىللەت شۇنچە تېز ھالاك بولىدۇ. بۇ دېگەن ئۆلمەس قانۇنىيەت! _ رەھمەت سىزگە، كېلىڭ، ئولتۇرىۋېلىڭ! _ بوۋاقنىڭ ئاتا-ئانىسى چۈشمەكچى بولۇپ ئورۇنلىرىدىن تۇرۇشۇپ، ئورۇندۇقنى كۆكرەكلىرى بىلەن توسۇپ، بوۋاينى ئۆز ئورنىغا ئولتۇرغۇزماقچى بولدى، لېكىن ئاپتوبۇستا قەيسەرلەر كۆپكەن، ئورۇندۇققا ئىنتىلگەن بىر نەچچە قىز-يىگىت ئىچىدىن قۇياشتىن مۇداپىئەلىنىش ئەينىكى تاقىغان، بۈدۈر چاچ، مودا كىيىملىرىمۇ غەلىتىرەك بىر قىز ھەممىدىن غالىپ كەلدى. ئۇ پەرداز بىلەن پەيدا قىلغان بەدەن گۈزەللىكىگە زادىلا ياراشمىغان قوپاللىق بىلەن باشقىلارنى ئىتتىرىپ، جەينەكدەپ، تۇنجى قېتىم ئارقان سېلىنغان شاش ئاتتەك يۇلقۇنۇپ ئورۇندۇققا ئېرىشتى. _ ماۋۇ كىشىنىڭ ئورنى بۇ ھوي قىز، بالىلىق ئايالغا ئۆتۈنۈپ بەرگەن. _سېتىۋاپتىكەنمۇ؟ _ بولدى، بولدى، بىر بېكەتتىن كېيىن مەنمۇ چۈشىمەن،_ دېدى بوۋاي ئۇنىڭغا غەزەپ بىلەن ئىنتىلگەن «دادا»نىڭ ئالدىنى توسۇپ،_ ئولتۇرىۋالسۇن، ياشلار ئەمەسمۇ، راھەتكە ئىنتىلگەك كېلىدۇ. _ قارا كۆزەينەكلىك قىز بوۋايغا غەزەپ بىلەن ئالىيىپ (كۆزى كۆرۈنمىسىمۇ؟) قارىدى _ قېرىلارچۇ؟ بۇرنىنىڭ ئۈستىگە ئېلىپ قويامدىكەن؟ راھەت قېرىلاردىن ئاشمىغاچقا ياشلار ئاچكۆز. كۆپچىلىك كۈلۈشتى. «راھەتكە ئىنتىلىش مودىغا ئايلانغان ئوخشايدۇ، بىزنى ھالاك قىلسا جاپا-مۇشەققەت ئەمەس، موشۇ راھەتكە ئىنتىلىش ھالاك قىلىدۇ...» ئاپتوبۇستا جىدەل كۆپ، ھەممىنىڭ يىلتىزى بىرلا، ئۇ بولسىمۇ راھەت. مەنبە:«چىنىقىش»ھىكايىلەر توپلىمى

arzuyar

	ئىلھام مەنبەسى شۇ ئاپتۇبۇستىكى ئىشلار، راھەتكە ئىنتىلىش مودىغا ئايلانغان ئوخشايدۇ، بىزنى ھالاك قىلسا جاپا-مۇشەققەت ئەمەس، موشۇ راھەتكە ئىنتىلىش ھالاك قىلىدۇ... مەنمىغۇ ئانچە مۇنچە ئىنتىلىپ قويىمەن،بۇ جۈملە ھەقىقەتەن بولىدىكەن،ئوبدان ئويلىنىپ باقاي جۇمۇ.

ArislanMemet

	.................................................................................. ھەجەپ كەچ بولۇپ كېتىپتۇ مۇنبەر كۆرۈپ ، مەن ئەمدى ئۇخلاي . راھەتكە ئىنتىلىش كېرەك

uyghurzuwan

	راھەتكە ئىنتىلىش، ئۇنى قوغلىشىش ۋە ئۇنىڭغا ئېرىشىش كېرەك، لېكىن  ھەددىدىن ئارتۇق شەخسىيەتچىلىك ئۈستىگە راھەتكە ئېرىشىش كىشىنىڭ ناچار روھى ھالىتىنى ئاشكارلاپ قويىدۇ- دە، بۇ ئېرىشكەن راھەتلىرى ئۇنىڭغا راھەت بولماي قالىدۇ.

bargiya

	جىسمى راھەتلىك  كىشىنى ھۇرۇن ۋە تەۋرىمەس قىلىپ قويۇدۇ، قېرىتىدۇ. روھىي راھەتلىك كىشىنى مەڭگۈ ئالغا ئىنتىلىدىغان قىلىدۇ،ياشارتىدۇ. دىللار سۆيۈنگۈدەك مەنىۋى ئوزۇق.

oxkantag

	راھەت ، ھوزۇر ،ھالاۋەت كە ئىنتىلىشىش يولىدا ،كۆپ ھاللاردا ئىنسان ئاسانلا خاتالىشىپ قالىدۇ،چۈنكى چىكىدىن ئاشقان راھەتكە ئىنتىلىش تۇيغۇسى ئۇنىڭ ئەقىل كۆزلىرىنى توسۇپ ، كۆزلىگىنى ئۈچۈن ۋاستە تاللىماس قىلىپ قويۇدۇ. ئىنسان مەنىۋىيىتىنى بېيىتىشتىن (ئىلىم ئىلىش)باشقىسىدا ، قانائەتچەن بولمىقى ئەۋزەلدۇر. ئەمما ، بۇ قانئەتچىللىكمۇ نىسپىدۇر .....

uytag

	ئىلىم -پەن مەدەنىيەت تارىخىنى ۋاراقلاپ كۆرسەك ئالتۇندەك نۇر چېچىپ تۇرغان تۆھپە ئىگىلىرىنى كۆرىمىز،ئۇلار بۇنىڭغا بىراۋلارنىڭ غەمخورلۇقى ياكى تۇيۇقسىز ئامەتتىن ئىرىشكەن ئەمەس، بەلكى قىممەتلىك ياشلىقىنى سەرىپ قىلىش ھىسابىغا ئىرىشكەن.                                                                                              _ زوردۇن سابىرى

polojan

	ئىلىم -پەن مەدەنىيەت تارىخىنى ۋاراقلاپ كۆرسەك ئالتۇندەك نۇر چېچىپ تۇرغان تۆھپە ئىگىلىرىنى كۆرىمىز،ئۇلار بۇنىڭغا بىراۋلارنىڭ غەمخورلۇقى ياكى تۇيۇقسىز ئامەتتىن ئىرىشكەن ئەمەس، بەلكى قىممەتلىك ياشلىقىنى سەرىپ قىلىش ھىسابىغا ئىرىشكەن.                                                                                              _ زوردۇن سابىرى مەنمۇ،بۇ كۆزقاراشقا قوشىلىمەن،،،،،،،،،

atikam1

	ھەي  شۇ  راھەتكە ئىنتىلمەيدىغان كىم بار،،،بارلىق كىشىلەر  شۇ راھەتكە ئىنتىلىدۇ،،،بىراق شۇ باشقىلارنىڭ كۆڭلىنى ئاغرىتىش ئۇستىگە راھەتكە چىقسا ،،قانداق بولا،،،ئۇنداق كىشى راھەتكە ئەمەس ئازاپقا قېلىشى مۇمكىن ،،بىلسە،،،،

semerqent

	bargiya يوللىغان ۋاقتى  2012-3-23 10:31 جىسمى راھەتلىك  كىشىنى ھۇرۇن ۋە تەۋرىمەس قىلىپ قويۇدۇ، ...          راھەتكە ئىنتىلىش مەنچە ئۇنچە يامان ئىش ئەمەس ، پەقەت ئىنسان نېمىنىڭ ھەقىقىي راھەت ۋە لەززەتلىكىنى بىلەلىگەندە قوغلاشقان شۇ راھەت ئەمەلىيەتتە ئۇنىڭ بۇرچى بىلەن باراۋەر بولىدۇ . مەسىلەن ،  ئىلىمنىڭ ھەقىقىي لەززىتىنى ھېس قىلالايدىغان بىرەيلەن بىر ئۆمۈر ئىلىم ئىگەللەش يولىدا زىيازەت چېكىشى مۇمكىن ، شۇ كىشىگە نىسبەتەن سىز بۇنى قانداقمۇ رىيازەت چەكتىڭ دېيەلەيسىز ؟  بۇ زىيازەت ئۇنىڭ ئۈچۈن بىر راھەتتەك تۇيۇلىدۇ ، ئۇ دەل مۇشۇ خىل راھەتنى قوغلاشقۇچىدۇر .           بۇ پەقەت تونۇش مەسىلىسى . ھېكايىدە ئەكس ئەتتۈرۈلگەن ئاساسىي بولسا كىشىلەرنىڭ جىسمانىي ، ئەھمىيەتسىز ۋە ۋاقىتلىق راھەتكە ئىنتىلىش پىسىخىكىسىنى تەنقىد قىلىش ئىكەن . زوردۇن سابىرنىڭ قارىشىچە جىسمانىي راھەتنىڭ تىزگىنىكىدىن قۇتۇلۇپ روھىي ئازادىلىكنى قولغا كەلتۈرەلەيدىغان كىشىلەرگە نىسبەتەن راھەتسىزلىك ئۇقۇمى مەۋجۇد بولمايدۇ .  بۇنداق ئادەملەر ھاياتنى مەنىلىك ۋە ئەھمىيەتلىك ئۆتكۈزەلەيدۇ ، بۇلار ھاياتنىڭ قىممىتىنىڭ روھىي ئازادلىقتا ئىكەنلىكىنى تونۇپ يەتكەن ئادەملەر بولغاچقا بۇ خىل ئادەملەرنىڭ سانى ئۇلغايسا مىللەتنىڭ ئومۇمىي يۈكسىلىشىنى قولغا كەلتۈرگىلى بولىدۇ . ئاپتۇر بۇنى مۇنۇ بايانلىرىدا مەزكەزلىك ئوتتۇرىغا قويغان : ‹‹  روھىنىڭ جىسمى ئۈستىدىن غەلىبە قىلىشىنى تىلەيدىغان ئادەملەر مەۋجۇت. بىر مىللەتتە شۇلارنىڭ سانى قانچىلىك كۆپەيسە، ئۇ مىللەت شۇنچە روناق تاپىدۇ. راھەتكە ئىنتىلىدىغانلار قانچە كۆپەيسە، ئۇ مىللەت شۇنچە تېز ھالاك بولىدۇ. بۇ دېگەن ئۆلمەس قانۇنىيەت! ›› تولۇقلىما مەزمۇن (2012-3-23 23:17): رىيازەت دەپ ئوقۇلغاي تولۇقلىما مەزمۇن (2012-3-23 23:18): بەرگىيە ھەدىمىزنى مۇنبەردە كۆرمەس بولۇپ كېتىۋاتىمىز دىسە ؟!