ئالتۇن بىلەن تۇزنىڭ سۆھبىتى (لىرىك داستان)

ALPAMIX

	ئالتۇن بىلەن  تۇزنىڭ  سۆھبىتى                          (لىرىك داستان )                    ئەزىز ھېيىت كۈن: ئالپامىش                      جىمجىت ئۈن-تىل قىلىپ قۇرغاق ھاۋانى،               تۇز يەتكۈزدى  كەڭلىكلەرگە  نىدانى:              -ئۆزۈم  شورمەن،شۇڭا  شورلۇق تەقدىرىم.                ئۆزۈمدەكلا بەك ئاچچىقتۇر  ئەلىمىم.               تاغ-داۋاندىن كەلدىم سۇغا  قوشۇلۇپ.               ئۆرلەپ چىقتىم  يەر يۈزىگە شور بولۇپ.               مەن بار جايدا  بىرمۇ گىياھ  ئۈنمىدى.              مەن  بار جايغا  ئۇچار قۇشلار قونمىدى.              تۇرۇپ كەلدىم ئۇزاق-ئۇزاق چۆلدەرەپ.              يەر جىمىقتى مېنى « خەتەر-ئاپەت » دەپ.              مەن ھەمىشە  يەكلەندىمما  يەكلەندىم.              يا ماڭالماي ئورنۇم بىلەن چەكلەندىم.              ئەتىۋارلىق ئالتۇن بولۇش ھەدىمىدى؟              تاش-شېخىل يا  تۇپراق بولسام مەيلىدى !              ئەپتىم-تۇرقۇم  ئەسلا سىغماس كۆزۈمگە.             شۇڭا مىڭ –مىڭ لەنەت دەيمەن  ئۆزۈمگە !             چىن قەدىردە دېمەي قوياي ئالتۇننى.             يوق كۆزۈمگە سۈرەي دېسەم مەن ئۇنى.             ھەۋىسىم بار ئاددى،تاشقا  كېسەككە.             كېلەر ئۇلار مەندىن ئوبدان كېرەككە.            تاش بار جايدا  ئۆركەشلەپ سۇ ئاقىدۇ.            گۈل ئېچىلىپ قۇشلار قانات قاقىدۇ.            ئۇ جاي ئاۋات،ئۇنى قانداق دەپ بولاي؟            يەر-تۇپراقمۇ  ھەر چاغ ئامەت-قۇتقا  باي.            بوستانلىقلار ئەشۇ مۇنبەت تۇپراقتا.            ئورمانلىقلار ئەشۇ بىنەم  تۇپراقتا.            نېسىپ ئۇڭا دائىم  قايناق ئاۋاتلىق.            شاد تەنتەنە قىلار  گۈزەل ھاياتلىق.            تەڭرى چەتكە قاققان پەقەت مېنىلا،            ئاقار شۇڭا ئامەتلىكلەر  گېپىلا.»            شۇئان تاغلار تىترەپ،يەر چىڭ تەۋرىدى.            تاشنىڭ،يەرنىڭ ئاغزىغا  گەپ كەلمىدى.             جىمجىت سادا كەلدى بىر چاغ ئالتۇندىن.             بەلكى ئوتتىن،-ھاياجاندىن –يالقۇندىن:             -شىپالىق تۇز سەن ئۆزۈڭنى خار  دېمە.               مۇشاقەتتە،دەرت-ئەلەمدە  زار  دېمە.             تولدۇرالماس ھېچ بىر نەرسە  ئورنۇڭنى.             گەر چۈشەنسەڭ سەل چاغلىما  رولۇڭنى.             تۇزسىز يەردە قۇۋۋەت بولماس ئەزەلدىن.             قېلىشمايدۇ  رولىڭ شۇڭا گۆھەردىن.              ساڭا تەشنا ئەمەس كىممۇ؟ نېمىمۇ؟            دەل ئۆزۈڭدەك بەك ئورۇنلۇق ئىسمىڭمۇ.             سەنسىز قايسى بىر نىممەتتە  تەم  بولسۇن؟             تەركىپلىرىڭ قاي نەرسىدە كەم بولسۇن؟             تەڭ تۇرىسەن ئەڭ ئورۇنلۇق گەپ بىلەن.             نە گەپكى دەل يەتكۈزۈلگەن  نەپ بىلەن.             ساۋاق ئېيتار :«  گۆھەر بىلمەس ئۆزىنى !             لايدا تۇرماس ئەگەر بىلسە  ئۆزىنى.»             سەن كېرەكلىك تا ئەزەلدىن ھەممىگە.             كۈچ بېرىسەن،تەم بېرىسەن ھەممىگە.             سەن قىززىققان تاشنى،يەرنى قويايلى.             سەن ئەيمەنگەن بىر ئۆزۈمنى ئالايلى.             قىممەتلىكىم - مېنىڭ  ئەسلى ئازلىقتا.            ئېسىللىقىم-چىنلىقىمدا،  ساپلىقتا.            ئەپسۇس كۆپ چاغ  بولالمايمەن ئاشكارە.           مېنى تاغمۇ  يوشۇرۇشتا  ئاۋارە.           ئاز جايلارلا مېنى پىنھان ساقلايدۇ.           ھاجەتمەنلەر ئورنۇمنى راست ئۇقمايدۇ.           ئايان بولسام كاتتا بايدىن ئاشمايمەن.           تۆمۈر ساندۇق ئىچرە مەجبۇر ئۇخلايمەن.          تالىشىدۇ مېنى مەڭگۈ  ئادەملەر .          قان تۆكۈلۈپ ئۈزۈلمەيدۇ ماتەملەر.          شەرەپ،ئابروي بوپ قالىمەن بايلارغا.          تىرىشسىمۇ ھېچ تەگمەيمەن پۇقراغا.         ئەڭ يامىنى كۆز-كۆز،-ئەمەك بولغىنىم.         ئاياللارغا  زىننەت-بىزەك بولغىنىم.         جۇلالايمەن  ھالقا  بولۇپ قۇلاقتا.         ۋە چاقنايمەن  ئۈزۈك بولۇپ بارماقتا.         نامراتقا يوق  كۆزگە سۈرەي دېسىمۇ         قانغۇچە بىر كۆرۈپ كۈلەي دېسىمۇ.         ئالتۇن چىشلىق بولدى باي ئەر-ئاياللار.         كۈلگەن چاغدا كۆز چاقنىتىپ ۋالىلدار.         مېنى سوقۇپ مەلھەم قىلسا پەدازغا.         ئاي يۈزىنى بەردىم  سەنەم-دىلنازغا.         ھەتتا مېنى كۆينەك قىلىپ كىيىشتى !         كەيمىگەنلەر كۆڭلى قاتتىق  ئېچىشتى !        بولالمىدىم مەن ھەممىگە  تەڭ  نىسىپ !         دەيمەن شۇڭا تەقدىرىمگە  ۋاي ئىسىت  !         ئاڭلىغانسەن سەنمۇ مېنىڭ دەردىمنى ؟         چۈشەنگەنسەن غېرىپ،مىسكىن كۆڭلۈمنى.         ھەۋىسىم بار ساڭا جانۇ-دىلىمدىن.         ساڭا قاراپ سۆيۈنىمەن ئىچىمدىن.         پەقەت سەنلا راست ئەسقاتىڭ ھەممىگە.         يەتتىڭ غېرىپ،ئاجىزلارنىڭ دەردىگە.         ئادەم دىسەم  سېنى راستلا مۇبادا.         سەن ئوخشايسەن ئەڭ كېرەكلىك پۇقراغا.         قاندۇرىسەن ئۇسىغاننى،ئاچقاننى.         قوغلاشمايسەن ئورۇن ،مەنپەت ۋە نامنى.        كېچە-كۈندۈز يۈرەلەيسەن  ئاشكارە.        ئەركىنلىكتە سەن رەسمى بىر خانزادە.        ھەركىم ئۈچۈن سەن بولمىساڭ بولمايدۇ.        رولۇڭ يەرگە سىڭگەن سۇغا ئوخشايدۇ.        كۆڭلۈڭ توقتۇر جاپا  تارتىپ ئۆتسەڭمۇ.        بەختلىكسەن ئاددى-ساددا يۈرسەڭمۇ.         يولۇقمايسەن ھەسسەتكىمۇ  ھېچ قاچان.         ھالال ياشاپ ئۆتەلەيسەن  تېچ-ئامان.           گاھى چاغدا  يوچۇن خىيال سۈرىمەن.           دەيمەن: بولسام كېسەكنىڭ نەق ئۆزىمەن.           زىمىن-تۇپراق  بۇ ئالەمدىن يۈتەرمۇ؟            تۇپراق مېنىڭ  ئورنۇمغا تىز ئۆتەرمۇ ؟           چالما-كېسەك مەندىن قىس بوپ شۇ چاغدا.           ئالتۇنلۇققا  ئايلىنارمۇ  بۇ دۇنيا ؟            جىمى ئادەم ئەتىۋارلاپ  چالمىنى،           ساندۇقىغا  يوشۇرارمۇ  چالمىنى ؟           توپا ئۈزۈك،ھالقىلارنى سەتەڭلەر،           تاقىشىپ ھە قانچىلىك بەك كۆرەڭلەر؟           ئەپسۇس شۇ ئوي ئادىل ئەمەس تۇپراققا.           يەر قالمىغاي مەن تارتقان دەرد،ئازاپقا.           مېنى ئېسىل،كاتتا،قىممەت بىلگەنلەر،           ئىچىم ئەمەس تېشىمنىلا كۆرگەنلەر.           مېنى ئادەم دەپ قارىساڭ ناۋادا.           قابىلمەن كەم  تېپىلغۇچى دۇنيادا.           ئەزىز  ئورنىم مۇقىم ھۆرمەت تۆرىدە           مەدھىيگە يولۇقىمەن ھەر كۈندە.           كۆرۈنگەچ مەن ھەممەيلەنگە بوپ لىللا،           ھەر بىر سۆزۈم ئاڭلىنىدۇ بوپ تىللا.           چۈشەي دەپمۇ چۈشەلمەيمەن پەگاغا            پەقەت يېقىن تۇرالمايمەن پۇقراغا.            مەندىن ئاۋال نامىم ھەريان يېتىدۇ.            نى كاتتىلار كېلىشىمنى كۈتىدۇ.            ئۆتەلمەيمەن ئاددى-ساددا پۇقرادەك.            پۇقرا بىلەن ئارىمىزدا  ھاڭ باردەك.            بولالمايمەن يوقسۇل بىلەن مەن بىللە.            بېرەلمەيمەن زۈرۈر چاغدا بىر تۈگمە.           ئەشۇ ھالدا مەن باغلاقسىز بىر مەھبۇس.           ئۈمىدلەرنى ئاقلالمايمەن  مىڭ ئەپسۇس !           دەردىم كۆپتۇر،بايقىغانسەن قاينىماي.           كىم ۋە نىمە دەردسىز؟ بولدى زارلىماي.           شىپالىق تۇز  يېرىم قىلما كۆڭلۈڭنى.           پەخىرلىكسەن يوغان ئاچساڭ كۆزۈڭنى.           شۇنداقمىكەن  كۆزلىرىڭنى ئاچتىڭمۇ؟           ئورنى،رولى باردۇر ھەتتا تاشنىڭمۇ !            رولى يوق ھېچ نەرسە يوق جاھاندا.            رولسىز بولسا مەۋجۇت بولماس جاھاندا.            چۈشىنەيلى شۇ چوڭ ھەقنى ھەممىمىز.            يەنە داۋام قىلار كۈتكەن ئەتىمىز.»             تۇز ئېيتتىكى : -يورۇتتىڭىز  كۆڭلۈمنى.             سۆزىڭىزدىن  تونىۋالدىم  ئۆزۈمنى.             مەنمۇ ئەمدى سىزدەك كۆزدە قارايمەن.             دۇنيانى  سىز ئويلىغاندەك  ئويلايمەن.             تۇز بولغانغا ئۆكۈنمەيمەن ،رازىمەن.             قاقشىمايمەن  يەكلەنسەممۇ  قانچە مەن.             باركەن ماڭا جانلىقلارنىڭ  ھاجىتى.             كېرەك بولغاچ قۇربان بولسام نىمىتى ؟             بۇ جاھاندا كېرەكلىك  بىز ھەممىمىز.             تولۇقلىنار ئۆز-ئارا كەم يېرىمىز.             ئىناقلىقتا بىللە مەۋجۇت بولايلى.             مەۋجۇتلۇققا  ھاياتى كۈچ قوشايلى.             دۇنيا ھىكمەت،سىرلارغا لىق-پەۋەستە.             شۇڭا باقار كۆك ئاسمانمۇ ھەۋەستە.             سۆزلەي دىسەم ئۈزۈلمەيدۇ سۆز-كالام.             قىلاي ئەمدى تۈگەل تامام-ۋەسسىلام.»

m1989

	رەھمەت تېمىڭىزغا ،ياخشى يىزىپسىز...ھەمىمىز ئۆزىمىزنى ئىتىراپ قىلساقلا ،باشقىلارمۇ ھەم بىزنى ئىتىراپ قىلىدۇ؛ رىۋايەت قىلنىشىچە شۇنداق بىرزامانلار كىلەرمىش،كىشلەرشۇنداق بىر جۈملەسۆز قىلارمىش:«ئۈنچە مارجان تاش ئىكەن،ئارپا-تېرىق ئاش ئىكەن»دېمەك ھەرشەيئى ئۆز نۆۋىتىدە دۇنيانى  سورايدۇ........

lostba

	ئۈنچە مارجان تاش ئىكەن،ئارپا-تېرىق ئاش ئىكەن ئالتۇننى يىگىلى بولمايدۇ، بۇلتۇرقى ياپۇنىيىدىكى يەر تەۋرەشتىن كېيىن كىشىلەر تۇزنىڭ مۇھىملىقىنى ئاندىن بىلدى

ArislanMemet

	ھەجەپ ياخشى يېزىپسىز.

abdurehim

	راس، ياخشى شىئېركەن،رەھمەت!

badam0998

	كونىلار بىكار ئىيىتمىغان  :  تۈز ئۈستىدىكى قەسەم - يىگىت قەسىمى !  دەپ ...

يالغان-0999

	بەك ياخشى يىزىپسىز رەخمەت سىزگە....؟ ئاددىغىنە شۇ مىسالارنى چۇششەنمەي ياشاۋاتقان شۇ ئادەملەرنى ئويلىسام...............؟

arxang

	ھەر نەرسىنىڭ ئۆزىگە لايىق رەۋىشتە ئارتۇقچقلىقى ۋە ئالاھىدىلىكى بولىدۇ ،شۇنىڭ بىلەن بىرگە كەمچىلىكىنىمۇ يوق دىگىلى بولمايدۇ ، ئاشۇنداق ئارلىشىپ كەلمىسە تىرىسىگە پاتماي قالىدۇ ،ئازراق نۇخسانى بار نەرسىنى كۆرسە پۇتىغا دەسسەپ قويىدىغان ئىش چىقىدۇ.

elan

	شۇۋاقىتتا 50يۇەنلىك 1خالتا ئاش تۇزىنى 200يۇەنگە ئالدۇق

kurt

	ھەر نەرسىنىڭ جاھاندا مەۋجۇت بولۇپ تۇرۇش قىممىتى بولىدۇ، ھەتتا بايقىيالىساڭ توپىمۇ ئالتۇن، گەپ بايقاشتا،تونۇشتا.