تارىختىكى ئەڭ چوڭ بۇزغۇنچىلىق خاراكتىرىگە ئىگە ياخشى ئىش
گېرمانىيەلىك بىر بالا ھاياتىنىڭ خەۋپكە ئۇچرىشىغا قارىماي، سۇغا چۈشۈپ كەتكەن تۆت ياشلىق بىر بالىنى قۇتقۇزىۋالدى. بالىنى قۇتقۇزىۋالغۇچى چوڭ بولغاندىن كېيىن چارۋىچى بولدى. لېكىن ئۇ ئەينى چاغدا قۇتقۇزۇۋالغان بۇ بالا دەل ناتسىستلارنىڭ كاتتىبېشى گېتلېر ئىدى.
گېرمانىيەلىك پوپ، ياۋروپادىكى داڭلىق فىسگارمون ئورۇنلىغۇچى ماركوس تېلمىر 1980-يىلى قازا قىلغان. ئۇ ھايات ۋاقتىدا ئۇستازى كۇخبوگنىڭ بىر ھېكايىنى سۆزلەپ بەرگەنلىكىنى ئاشكارىلىغان. ھېكايىدە: كۇخبوگ بالىلىق چاغلىرىدا سۇغا چۈشۈپ كەتكەن تۆت ياشلىق بىر بالىنى قۇتقۇزۇۋالغان، ئۇ قۇتقۇزۇۋالغان بالا كېيىن ناتسىستلارنىڭ كاتتىبېشى بولغان، ئۇ دەل گېتلېر ئىكەن. ئەينى چاغدا گېتلېر بىر قانچە دوستى بىلەن ياسساۋ شەھىرىدىكى ئېن دەرياسى بويىدا ئويناۋېتىپ، سۇغا چۈشۈپ كەتكەن، شۇنىڭ بىلەن كۇخبوگ ھاياتىنىڭ خەۋپكە ئۇچرىشىغا قارىماي ئۇنى قۇتقۇزۇۋالغان، دېيىلگەن.
كۇخبوگ چوڭ بولغاندىن كېيىن چارۋىچى بولغان، لېكىن گېتلېر 40يىلدىن كېيىن ناتسىستلارنىڭ كاتتىبېشى، شۇنداقلا ئىككىنچى دۇنيا ئۇرۇشىنى قوزغىغان ئۇرۇش جىنايەتچىسى بولۇپ قالغان. لېكىن گېتلېر ئۆزىنىڭ ئەينى چاغدا سۇغا چۈشۈپ كېتىپ باشقىلار تەرىپىدىن قۇتۇلدۇرۇۋېلىنغانلىقىنى ھېچكىمگە ئېيتمىغانلىقتىن، كۇخبوگنىڭ ھېكايىسى ئىزچىل ئىسپاتلانمىغان. يېقىندا تارىخشۇناسلار 1894-يىلىدىكى گېرمانىيە خەۋەرلەر بېتىدە گېتلېرنىڭ سۇغا چۈشۈپ كېتىپ قۇتقۇزۇۋېلىنغانلىقى توغرىسىدىكى ھېكايىنى ئوقۇغان ھەمدە بۇنى ئىسپاتلىغان.
كۇخبوگنىڭ بۇ ياخشى ئىشى ئەڭ يامان ئىشقا ئايلىنىپ قالغان.
مەنبە: شىنجاڭ قانۇنچىلىق گېزىتى (ھەمراگۈل كېرەم تەرجىمىسى)
يوللىغان ۋاقتى 2012-2-20 12:27:57
