مومامنىڭ دۇئاسى

سۈمەييە

	مومامنىڭ دۇئاسى       جاينامازدا دۇئادا ئولتۇرغان مومامنىڭ كۆزلىرىدە لىغىر-لىغىر ياش، لەۋلىرى تىتىرەيدۇ: جېنىم مومام باللىرى ئۈچۈن دۇئا قىلىدۇ، ئۇلارننىڭ ھەر ئىككى دۇنيالىق سائادىتى ئۈچۈن قوللىرى تېخىمۇ يۇقىرى ئۆرلەيدۇ، ئوغۇللىرىغا قەد، قىزلىرىغا بەخت تىلەيدۇ. ئاندىن روھلارغا ئاتاپ دۇئا قىلىدۇ، ئاللاھتىن ئۆزىگە ۋە باللىرىغان، قىرىنداشلىرىغا مەغفىرەت تىلەيدۇ. يۇرتنىڭ ئامانلقى ئۈچۈن، بارىلىق مۆئمىنلەر ئۈچۈن دۇئا قىلىدۇ.   مومام لوندون، نيويوركنى بىلمەيدۇ، بىلىدىغنى كوپىراتسىيە چاغلىرىدا قانداق تاغار يۈدگىنى، ئاچلىقنى قانداق يەڭگەنلىكى، چۆچۈرىدەك باللىرى ئۈچۈن قانچىلىك جان قاققانلىقى، بۈگۈن ئەنە شۇ چۆجىلىرىنىڭ قولىدىن ئىش چىقىپ، بالا-چاقىلىق بولۇپ ئەتراپىنى ئاۋۇندۇرۇپ تۇرغىنى ئۈچۈن ياراتقۇچىغا بولغان چەكسىز ھەمدۇ-سانالىرى، مۇقەددەس مەككىدىكى ئۇنتۇلغۇسىز كۈنلەر... ******* -ناننى پۈتۈن يېسە بولمايدۇ بالام، باغرى پۈتۈن بولۇپ مېھىرسىز بولۇپ قالىدۇ ئادەم دەيدۇ مومام. -ئاشنى بۆلۈپ ئىچمەڭ بالام، ئۇرۇغ-تۇغقانلار بۆلۈنۈپ كېتىدۇ- دەيدۇ مومام. مومام نەزەرىيەلەرنى بىلمەيدۇ. ئەمما «يېرىلىڭ تېشىم» بىلەن قىرىنداشلىق مېھىر ئالدىدا قاتتىق تاشنىڭمۇ يېرىلىدىغنىنى، قىرىنداشلارغا يۈرىكى ھامان ئېچىق تۇرۇشى لازىملىقىنى بىلدۈرۈپ تۇرغان ئىدى مومام. جېنىم مومام مانا مۇشۇنداق ئاددى سۆزلىرى بىلەن قەلبىمىزگە قىرىنداشلىقنىڭ نەقەدەر مۇھىملىقىنى سىڭدۈرۈپ كەلگەن. ******* -ناماز شامدىن كېيىن ئىشىك ئوچۇق قالمىسۇن جېنىم قىزىم، دۈشمەنلەرنىڭ ئېغىزى ئېچىلىپ قالىدۇ. -دۈشمەننىڭ ئېغىزى ئېچىلىپ قالسا نېمە بولىدۇ؟ -ئۇرۇش – جىدەل بولىدۇ، يۇرتتا بەرىكەت بولمايدۇ بالام –دەيتتى موما. ****** -قىز بالا دېگەن سەھەر تۇرىدىغان جېنىم قىزىم، سەھەر تۇرۇپ يەرنىڭ يۈزىنى ئاچسا پەرىشتىلەر كىلىپ سىزگە دۇئا قىلىدۇ، قىيامەتتە ھەم يۈزى ئېچىلغان يەر كەبى يۈزىڭىز پارلاپ تۇرىدۇ قىزىم-دەيتتى مومام. ****** -جېنىم بالام، بېشىغا رومال ئارتماي چىقسا يۇلتۇز يالىۋالىدۇ بېشىڭىزنى، تاز بولۇپ قالىدۇ. -كۈندۈزى يۇلتۇز يوققۇ موما. -جېنىم بالام، خۇدا ياراتقان يۇلتۇز كۈندۈزىمۇ بار، كۈن بەك يورۇق بولغاچقا كۆرۈنمەيدۇ-دەيتتى مومام. ****** -كىر ھەرگىزمۇ قونۇپ قالمىسۇن، قانچىلىك يىغقان بولسىڭىز ھەممىنى يۇيۇۋىتىڭ، كىرنى ياندۇرۇپ ئەكىرىپ كەتسە بولمايدۇ؟ -نېمە بولىدۇ؟ -ئۆيگە كىرگەن ئەلچى يېنىپ كېتىدۇ. -ئەتىسى يۇيسىچۇ؟ -بولمايدۇ، پاكىز يۇيۇپ كىر يۇيغان جاينى پاكىز تازىلاڭ. كىر قونسا قىز قىرى قىز بولۇپ قالىدۇ. - قىزىم، قىز-ئاياللار كېيىمىنى ئۆگىزىگە يايماڭ. خەق كۆرسە يامان بولىدۇ. -نېمە بولىدۇ موما، تىزرەك قۇرۇمامدۇ؟ - خەق كۆرسە سۆز-چۆچەك بولىدۇ. ئېسىڭىزدە بولسۇن قېزىم، ئىچ كىيىملىرىڭىز ھېچكىمنىڭ كۆزىگە چېلىقىپ قالمىسۇن، قىز بالا بەختسىز بولۇپ قالىدۇ. ******* -بىسمىللاھ، دەپ قازان بېشىغا ئۆتۈڭ. خۇدايىم بەرگەن ھالال يىمەكنى ھارام قىلىدىغان ئىشنى قىلماڭ. -قانداق؟ -ۋايساپ، غۇدۇراپ تاماق قىلمايدىغان. ھەر قەدەمدە بىسمىللاھ دەپ بەرىكەت تىلەڭ قىزىم. ***** -جېنىم بالام، تاماقنىڭ پاكىز يەڭ، بالىڭىز پۇچۇق بولۇپ قالىدۇ. پەيغەمبىرىمىز چېنىنىڭ تىگىنى يالاپ يەۋىتىدىكەنمىش. تاماق يېگەندە ئاۋاز چىقارمايدىغان. تاماق يەپ بولۇپ ئاۋازلىق كىكەرمەيدىغان، قورساقنى سىيلاپ تويغىنىنى بىلدۈرمەڭ. ******* -قىز بالا زىيادە ياسانمايدىغان قىزىم، ھەممە چىرايلىق يېرىڭىزنى يۆگەڭ، چېچىڭىز ئوچۇق قالمىسۇن. چاچلىرىڭىز زىننىتىڭىز قىزىم، ئۇنى خالىغانچە تاماشا قىلغۇرۇش گۇناھ، ئۇ دۇنياغا بارغاندا ئوت ئەشۇ ئوچۇق قالغان چاچتىن تۇتۇشىدۇ-دەيتتى مومام. -نېمىشقا چىرايلىقلىقىمنى خەقتىن يوشۇرىمەن مومام. مەھەللىمىزدىكى قىزلار چىرايلىق ياسىنىپ يۈرىدىغۇ قىزىم. -جېنىم قىزىم. ھويلىدىكى گۈلنى كۆردىڭىزمۇ قىزىم، رىشاتكىلار بىلەن ئوراپ قويغاچ پورەككىدە ئېچىلىپ تۇرۇپتۇ. ئۇنى مانا سىزدەك بىر پەرۋىشكار كۈندە سۇغۇرىدۇ. يول بويىدىكى  گۈللەرنى كىم ئۈزگىسى كەلسە ئۈزىدۇ، تاشلىۋىتىدۇ، چەيلىنىدۇ. سىز دېگەن ئېگىسى بار گۈل قىزىم، ھەممىگە ئۆزىنى كۆرسىتىش ياخشى ئەمەس، كېيىن سىزنى پەرۋىش قىلىدىغان، تاماشا قىلىدىغان ئېگىڭىزگە كۆرسىتىسىز.   ****** پەرىشتە مومام مىللەت تارىخىنى بىلمەيدۇ، سۇلتان سۇتۇق بۇغراخاننىڭ كىملىكىنى، قىلغان ئىشلىرىنى بىلمەيدۇ. شىڭ شىسەينىڭ كىملىكى، ئابدۇخالىق ئۇيغۇرنىڭ كىملكىنى بىلمەيدۇ. يۈسۈپ خاس ھاجىپ مەھمۇد قەشىقىرىلەرنى بىلمەيدۇ. بىراق، ئادەم ئاتام زامانىسىن ھازىرغىچە ھەممە ھىكايەتنى سۆزلەيدۇ، سۇلايمەن پەيغەمبىرىمىزنىڭ قالپىقىنىڭ سىھرىنى، مۇسا ئەلەيھىسالامنىڭ ھاسىسىنى، پەيغەمبىرىمىز مۇھەممەد سەللەللاھۇ ئەلەيھى ۋەسسەللەمنىڭ گۈزەل پەزىلەتلىرىنى يىپىدىن يېڭىنىسىغىچە سۆزلەيدۇ. باغرىدا ئۆرتەۋاتقان تەشۋىشتىن ياپراقتەك تىتىرەيدۇ مومام. نەۋرىلىرىنىڭ ئىنسابى ئۈچۈن، ئەۋلاد پۇشتىنى ئۆز پاناھىدا ساقلىشى ئۈچۈن ياراتقۇچىغا يېلىنىپ تىلەيدۇ. «مۇسۇلمان تۇرۇپ خەقتىن ھېيقماي كوچىغا چىقىۋالىدىغان ئىشنى قىلماڭ قىزىم، ئۇيغۇر تۇرۇپ دوپپىسىدىن نومۇس قىلىدىغان، غىتىنى چىڭ قىستۇرۇپ تۇرىدىغان غىتمەك ئىشتانلارنى كەيمە ئوغلۇم» دەيدۇ مومام. ئۆزىنى بارغانسىرى ماغدۇرسىز ھېس قىلىۋاتقان مومام كۈن-تۈنىنى دۇئا بىلەن ئۆتكۈزىدۇ، باللىرى، قىرنداشلىرى، قولۇم-قوشنىلىرى، يۇرتداشلىرى، مىللىتى، مۇسۇلمان مۆئمىنلەر ئۈچۈن دۇئا قىلىدۇ ...

yasira

	ھۆرمەتكە سازاۋەر مومىلارنىڭ دوئاسىنى ئولوغ ئاللاھ ئىجابەت قىلغاي.

wenas

	نىمە دىگەن ئۇلۇغ،پاساھەتلىك سۆزلەر ھە!

mustabit

	مۇشۇنداق ياخشى دۇالارنى  بوۋا- مومىزدىنلا  كۈتۈپ تۇرماي ياشلارمۇ ئۆزىمىزدىن باشلىساق ئىش ھەرىكەتتە ئەمەل قىلساق قادىر ئاللاھ تائالا بىزنىڭ ئىشلىرىمىزغا  بەرىكەت ئىككى دۇنيالىق مۇكاپات بېرىدۇ بىزمۇ  بوۋا - موما ،ئاتا - ئانا ،ئۇرۇق - تۇققان قېرىنداشلارغا يۇرتىمىزغا بەخىت تىلەپ ئاللا تائالاھقا دۇا قىلايلى.ئاللاھۇمە رەببىنا ئاتىنا فىدۇنيا ھەسەنەتەن ۋە فىل ئاخرەتى  ھەسەنەتەن ۋەقىنا ئەزابەننار. ئامىن ...

mustabit

	دۇئانى ئالدى بىلەن ئۆزىمىزدىن باشلاپ قىلىمىز.

koygandengiz

	« دۇئا بىلەن ئەر كۆكىرەر ، يامغۇر بىلەن يەر كۆكىرەر » دىگەن ئىكەن كونىلار ........ تېمىنى ئوقۇپ بولۇپ ئويلىنىپ قالدىم ، بىزگىغۇ شۇ مېھرىبان مومىلىرىمىز دۇئا قىلىۋېتىپتۇ، ئاللاھ بىزدىنمۇ نەۋرىلىرىمىزگە ، يۇرتقا ، قەۋمىمىزگەشۇنداق دۇئا قىلغۇدەك ئىمان ، ئېتىقاتنى  ئايرىمىسۇن ، دۇئالىرىمىز ئىجابەت بولغۇدەك شەرمىي - ھايانى ئايرىمىسۇن . مانا مۇشۇ كىشىنى سۆيۈندۈرىدىغان تېمىنىڭ ئۆزىدىنلا چىقىپ تۇرۇپتۇ ، ئۇيغۇر خەلقى ناھايىتى ئۇزۇن زامانلاردىن بېرى مۇكەممەل ئائىلە كۆز قارىشىنى  شەكىللەندۈرگەن . بۇ مۇكەممەللىك تارىخنىڭ تالاي سىناقلىرىدا تاۋلىنىپ ، سىناقتىن ئۆتۈپ ۋايىغا يەتكەن ، بۇگۈنگە ئۇلاشقان .      ئەپسۇسكى ، مۇشۇ كۈنلەردە قوللىرىنى دۇئاغا كۆتىرەلەيدىغان ، كۆتۇرگەن بىلەنمۇ نىمىلەرنى تىلىشى لازىملىقىنى ھەقىقىي مەنىسى بىلەن بىلەلەيدىغان مومىلىرىمىز ئازلاپ كەتتى . بەلكىم شۇنىڭ ئۈچۈن قىلىۋاتقان نۇرغۇن ئىشلىرىمىزدىن بەرىكەت يۈز ئۆرىۋاتقاندۇ ........    « سۈمەييە » ، راست ئۆز مومىڭىزنى يازغاندۇرسىز ۋەياكى شۇنداق مومىلارنى يازغاندۇرسىز ، مەيلى كىمنى يازماڭ  موماينىڭ دۇئاسىدىكى مەنىۋى يۈكسەكلىكتىن سۆيۈندۈم ، ئەگەر ئۆز مومىڭز بولسا تىلىكىمنى يەتكۈزۈپ قويۇڭ ، ئۇ قەۋمى ئۈچۈن بۇ دۇئانىمۇ قوشۇپ قويسۇن : « قەۋمىمنىڭ كىشىلىرى ئاچلىق ئىچىدە بەردەملىكىنى تاپسۇنكى ، توقلۇق ئىچىدە زەيپانىلىشىپ  كەيمىسۇن » ........ تولۇقلىما مەزمۇن (2012-2-8 15:30): كەچۈرۈڭلار ئەزىزلەر ،« كەتمىسۇن » ،« كەيمىسۇن» بولۇپ قاپتۇ ........

سۈمەييە

	koygandengiz يوللىغان ۋاقتى  2012-2-8 13:54 « دۇئا بىلەن ئەر كۆكىرەر ، يامغۇر بىلەن يەر كۆكىرەر » ... راستىنلا مومامنى يازدىم. يازسام چىقىۋىرىدۇ...

urukjan

	شەخسەن، بوۋا-مومام يۈزى كۆرمىگەچكە (مەن 3 ياشقا كىرىشتىن بۇرۇن قازا قىپ بوپتىكەن) ...باشقىلارنىڭ چوڭ دادا- ئانىلىرىنىڭ ئالدىدا تۇرغۇنىنى كۆرسەم قاراپلا قالىمەن.

taxnayi-a

	ئاللاھ مومىڭىزنىڭ ئۆمرىنى زىيادە قىلغاي! نېمە دېگەن ئىسىل دۇردانىلەر... ئاللاھ ھەممىمىزنىڭ كۆڭلىگە ئىنساپ - دىيانەت ئاتا قىلغاي!   ئۇيغۇرلار ئەنە شۇنداق گۈزەل ئەخلاقلارغا ئىگە خەلق ئىدۇق، ئەپسۇس، نۇرغۇن كىشىلەر بۇ خىل گۈزەللىكلەردىن يىراقلاپ كەتتى. ئەمەلىيەتتە قىزلار قوغلىشىۋاتقان گۈزەللىك موشۇ ئەدەپ-ئەخلاقلارنىڭ كەينىدە ئىدى؛ ئوغۇللار ئارزۇ قىلغان سۇباتلىق قەلىب پاكلىقىدا ئىدى ... نۇرغۇنلىغان يات مىللەت كىشىلىرىدىن ئۇيغۇر قىزلىرىنىڭ ئىنتايىن چىرايلىق ئىكەنلىكى توغرىسىدا تەرىپلەرنى ئاڭلاپ  قالىمىز، ئىنچىكىلەپ كۈزەتسەك ئۇلارنىڭ چىرايلىق دېگىنى قانداقتۇر گۈزەللىك قوغلىشىپ يات مىللەتلەرگە ئوخشاپ قالغان قىزلار بولماستىن بەلكى، تەبئىي گۈزەللىكىنى شەرم-ھايا ئاساسىدا پىنھاندا ساقلىيالىغان، ئۆز قەۋمىگە خاس كىيىنىپ، گۈزەللىكىگە سىرلىق تۈس بىرەلىگەن قىزلار ئىكەنلىكىنى بايقايمىز.

tniq

	ئاتاممۇ  شۇنداق  دەيدىغان       زەن  سالماپتكەنمەن     ھەي  ئىسست  .........