كىمنىڭ باھاسى ئەڭ مۇھىم

سۈمەييە

	كىمنىڭ باھاسى ئەڭ مۇھىم؟ ئاينۇر دولقۇن                    −ئەگەر چىرايلىقراق كىيىنىپ، ياسىنىپ يۈرسىڭىز تېخى «ۋىيەي، قاراڭ ھالىنىڭ چوڭلۇقىنى، بوينىنى غازدەك سوزۇپ، سەھنىگە چىقىدىغاندەك ياسىنىپ كەتكىنىنى» دەيدۇ. ئەتىگەندە ئالدىراپ چالا-پۇلا گىرىم قىلىپلا ئىشقا كەلسىڭىز «قاراڭلار، بوپ كەتكىنىنى، ئېرى بىلەن ئۇرۇشۇپ قالغان چېغى، ئەپتىگە قاراپ باقمايلا كەپتۇ-دە» دەيدۇ. سەل سەمىرىپ كەتسىڭىز، تېخى بىر نېمە دېگەن، سەل ئورۇقلاپ قالسىڭىز يەنە بىر نېمە دېگەن. بۇ جاھاندا ياشىماق نېمانداق تەسلىشىپ كەتتى،−دەپ قاقشىدى دوستۇم بىر قېتىم ھېيتلىق كىيىملىرىنى ماڭا كۆرسەتكەچ. بۇنداق ئىشلار تۇرمۇشىمىزدا دائىم ئۇچراپ تۇرىدۇ. ھەر كىم ھەر نېمە دەيدۇ. ھەممە گەپكە قۇلاق سالايلى دېسەك، ھەر كىم ھەر خىل باھا بېرىدۇ. ئۇنداقتا، زادى كىمنىڭ باھاسى ئەڭ مۇھىم؟     باھا بىر كىشىنىڭ ئۆزى شەكىللەندۈرگەن قىممەت قارىشى، تۇرمۇش ئۇسۇلى ۋە شۇ ۋاقىتتىكى پوزىتسىيەسى بويىچە مەلۇم ئادەم ياكى شەيئى، ھادىسىگە بولغان كۆز-قارىشى، مەيدانى بولۇپ، ئۇ كۆپىنچە ياخشى ياكى يامان ئارقىلىق  ئىپادىلىنىدۇ. باھا شۇ شەيئى ياكى ھادىسىنىڭ تەرەققىياتى ۋە مەۋجۇتلۇقىغا ئوخشىمىغان تەسىر كۆرسىتىدۇ. شۇڭا، بىز باھاغا قاراشتىن بۇرۇن، باھا بەرگۈچى ۋە ئۇنىڭ شۇ باھاسىغا ئاساس قىلىۋاتقان ئۆلچەم-قائىدىلەرگىمۇ ئەھمىيەت بېرىشىمىز زۆرۈر. باشقىلارنىڭ باھاسى شۇ كىشى ۋە شەيئىنىڭ مەۋجۇتلۇقى ۋە تەرەققىياتى ئۈچۈن پايدىلىق بولسا، بۇ باھانى ئىجادىي قوبۇل قىلىش كېرەك. ھەر بىر ئادەم ئۆز ئالدىغا ئايرىم مەۋجۇت بولۇش سۈپىتى بىلەن، ئۆزىنىڭ تەربىيەلەنگەن ۋە ياشاۋاتقان مۇھىتى، مىجەز-خاراكتېرىنىڭ ئوخشىماسلىقىغا ئاساسەن، باشقىلارغا بېرىدىغان تەسىرى ئوخشىمايدۇ. شۇڭا، ئادەم ۋە شەيئىلەرگە باھا بەرگەندە بىر تەرەپلىمە قارار چىقىرىشمۇ ئاقىلانىلىك ئەمەس. بىر قېتىم سوقراتنىڭ بىر ئوقۇغۇچىسى ئۇنىڭغا: −دوگرىت ئاجايىپ ئادەمكەن،-دەپتۇ. سوقرات «بۇ نېمە دېگىنىڭ؟» دەپ سورىغاندا، ئوقۇغۇچى: -ئۇ دائىم سۆزىڭىزدىن قۇسۇر تېپىپلا يۈرىدۇ، ئۇنىڭ ئۈستىگە  بۇرنىڭىزنى ياقتۇرمايدۇ،-دەپتۇ. سوقرات كۈلۈمسىرەپ تۇرۇپ: −ھېس قىلشىمچە دوگرىت يامان ئادەم ئەمەس،−دەپتۇ. ئوقۇغۇچى ھەيران بولۇپ: −قانداقىسىگە بۇنداق قارايسىز؟−دەپ سوراپتۇ. سوقرات مۇنداق دەپتۇ: −ئۇ ئانىسىغا ئىنتايىن كۆيۈنىدۇ، ھەر كۈنى ئۇنىڭ ھالىدىن ئوبدان خەۋەر ئالىدۇ، ئوقۇتقۇچىسىنى بەكلا ھۆرمەتلەيدۇ، ئەزەلدىن ئوقۇتقۇچىسغا ھۆرمەتسىزلىك قىلغىنى يوق. ئۇ ئەزەلدىن دوستلىرىغا سادىق. باشقىلارنىڭ كەمچىلىكىنى ئۆز ۋاقتىدا كۆرسىتىدۇ ھەم ئۇلارنىڭ تۈزىتېۋېلىشىغا ياردەم قىلىدۇ، ئۇ بالىلارغا ئىنتايىن مۇلايىم، ئۇلار بىلەن بىللە ئوينايدۇ، كەمبەغەللەرگە ياردەم بېرىدۇ. سوقراتنىڭ ئوقۇغۇچىسى يەنە مۇنداق دەپتۇ: −بىراق سىزنى ئۇنچىۋالا ھۆرمەتلەپ كەتمەيدۇ. سوقرات مۇنداق دەپتۇ: −بالام، مەسىلە دەل مۇشۇ يەردە، بىر ئادەم ئەگەر ئۆز مەيدانىدا تۇرۇپ باشقىلارغا باھا بەرگەندە  ئاسانلا خاتالىشىدۇ. شۇڭا مەن ئەزەلدىن باشقىلارغا باھا بەرگەندە، ئۇنىڭ ماڭا قانداق قارايدىغىنىغا ئەمەس، بەلكى ئۇنىڭ باشقىلارغا قانداق قارايدىغىنىغا دىققەت قىلىمەن. كۆرۈنۈپ تۇرۇپتۇكى، بىزنىڭ باشقىلارغا قانداق باھا بېرىشىمىزمۇ بىزنىڭ قانداق ئادەملىكىمىزنى ئۆزگىلەرگە بىلدۈرۈپ تۇرىدىغان بىر بەلگە بولۇپ، بۇمۇ بىزگە بولغان باھالارغا تەسىر يەتكۈزىدۇ...     باھا بەرگۈچىلەرنىڭ باھاسىنىڭ ھەممىسى ئۆزى ئۈچۈن توغرا. بىراق، ھەر بىر ئادەمدە ئۆزىگە خاس مەيدان ۋە قىممەت قارىشى بولۇشى كېرەك. ئىدىيە جەھەتتە مۇستەقىل بولالماسلىق ئۇلارنىڭ ئۆزىگە بولغان ئىشەنچىسىنى ئاجىزلاشتۇرىدۇ. شۇنىڭ بىلەن يا ئۆزىگە، يا ئۆزگىگە ئوخشىمايدىغان غەلىتە بولۇپ قالىدۇ. كىشىلەردىكى ئىدىيە بېقىنىشى ئۇلارنىڭ خاسلىقى ۋە ئۆز يولىنى يوقىتىپ، خەقنىڭ سەنىمىگە ئۇسسۇل ئوينايدىغان قىلىپ قويىدۇ. شۇڭا، ئەڭ مۇھىمى، ھەر بىر كىشىنىڭ ئۆزىگە خاس مۇستەقىل ھايات نىشانى، ئۆگىنىدىغان ۋە قىممەت يارىتىدىغان كەسپى ياكى قىزىقىشى بولۇشى كېرەك. چۈنكى ئۇلارنىڭ نېمە قىلماقچى ئىكەنلىكى كۆڭلىگە ئايان، باشقىلارنىڭ كۆز قارىشى، باھاسى ئالدىدا ئاسانلا تەۋرىنىپ قالمايدۇ. ئۇلار مۇستەھكەم ئىرادىگە، مۇستەقىل كۆز قاراشقا ئىگە، ئۆزىگە ئىشىنىدۇ، مودا قوغلاشمايدۇ، بەلكى ئۆزىنىڭ خاسلىقىنى ساقلايدۇ ۋە ئۇنى نامايان قىلىپ نۇرلاندۇرالايدۇ.     بىرەيلەن سىزگە باھا بەرگەندە، ئۇنىڭ قانداق ئادەملىكىگە، نېمىنى ئاساس قىلىپ باھا بېرىۋاتقىنىغا، بۇ باھانىڭ سىزگە ماس كېلىدىغان-كەلمەيدىغانلىقىغا قاراڭ. ئەگەر ئۇستازلىرىمىز ۋە چوڭلار ئومۇم نۇقتىدىن چىقىپ سىزگە باھا بېرىۋاتقان بولسا، بۇنى چوقۇم ئويلىنىش ۋە قوبۇل قىلىش كېرەك. سىز مۇستەقىل بىر ئادەم بولۇش سۈپىتىڭىز بىلەن، جەمئىيەتتە ئۆزىڭىزگە خاس ئورنىڭىز ۋە ئوبرازىڭىز بولىدۇ. ئەگەر سىز بىر ئوقۇتقۇچى بولۇپ، باشقىلار سىزنى بىر مودىلنىڭ كۆزى بويىچە باھالاپ، كىيىملىرىڭىزنىڭ مودىغا ماسلاشمىغىنىنى ئېيتقاندا كۈلۈپلا قويۇڭ. چۈنكى، جەمئىيەت ۋە باشقىلارنىڭ ئوقۇتقۇچى بىلەن مودىلدىن كۈتىدىغىنى ئوخشىمايدۇ. مۇھىمى، ئۆزىڭىزدە ئۆزىڭىزنى ۋە ئۆزگىنى باھالىيالايدىغان مۇستەقىل بىر كۆز بولسۇن. مەنبە: شىنجاڭ گېزىتى 2011-يىل 11-نويابىردىكى سانىدىن

torqi1

	ئادەم ۋە شەيئىلەرگە  باھا بېرىش باھا بەرگۇچىنىڭ ساپاسى ۋە دۇنيا قارىشىغا بىۋاستە مۇناسىۋەتلىك بۇلۇپ مەلۇم بىر خىل شەيئىگە ئوخشاش بولمىغان كىشىلەر ئوخشاش بولىمىغان نوقتىدا تۇرۇپ ئوخشاش بولىمىغان  باھالارنى بېرىشى مۇمكىن.

xahTuran

	ئىت   ھۈرەر   كارۋان   يۈرەر                      !

yuraklawilda

	دىمىسىمۇ بىز تۇرمۇشىمىزدا بۇنداق ئىشلارغا بەك كۆپ ئۇچىراپ تۇرىمىز ،لىكىن مەن كۆپ چاغلاردا باشقىلارنىڭ نىمە دىيىشى بىلەن كارىم يوق ئۆزەم ياقتۇرغان ئىشلارنى قىلىمەن

guldurmama

	قىسقىغىنە ھاياتىمىزدا خەقنىڭ باھاسى ئۈچۈن ياشامدۇق، ئەخلاق مىزانمىزغا، ئادىميلىكمىزگە خىلاپ بولمىسلا باشقىلارنىڭ باھاسى بەربىر. ياشاۋېرىمىز ئۆلگۈچە.

Amul

	بىرەر يېرىم ئادەمنىڭ باھاسى موھىم ئەمەس،موھىمى كۆپچىلىكنىڭ باھاسى.ئەگەر ئەتراپىڭىزدىكى كۆپ قىسىم ئادەملەر سىزنى ياخشى ئادەم دەپ قارىغان بولسا،ئۇنداقتا سىز ياخشى ئادەم،كۆپچىلىكنىڭ يامان دەپ قېلىشىدىن خۇدايىم ساقلىسۇن.

سۈمەييە

	Amul يوللىغان ۋاقتى  2012-1-30 18:41 بىرەر يېرىم ئادەمنىڭ باھاسى موھىم ئەمەس،موھىمى كۆپچىل ... بۇنداق دېگىلى بولمايدۇ. بۇ يەردىمۇ كۆپ قىسىم كىشىلەرنىڭ سىزنى باھالاش ئۆلچىمىگە قاراش مۇھىم.

Amul

	مەن بۇ يەردە دېگەن كۆپچىلىك _ خوشنىلار، خىزمەتداشلار، دوست-بۇرادەرلەرنى كۆرسىتىدۇ.مېنىڭچە ئۇلارنىڭ ياخشى باھاسىغا ئېرىشىش ئاسان ئەمەس

gulyurak

	ھەممىمىز ئۇزىمىزدىن كىلەيلى .ھىچكىمنىڭ ھىچكىمنى بىر نەسە دەيدىخانخا ھەققى يوق.ئادەم بولماق ئەڭ تەس .

abdurehim

	مەن ئەزەلدىن باشقىلارغا باھا بەرگەندە، ئۇنىڭ ماڭا قانداق قارايدىغىنىغا ئەمەس، بەلكى ئۇنىڭ باشقىلارغا قانداق قارايدىغىنىغا دىققەت قىلىمەن. مەنمۇ ئادەتتە باشقىلارنى باھالايمەنۇ لېكىن بىراۋغا بىراۋنى باھالاپ بەرمەيمەن.ئەگەر مەن باشقىلار تەرىپىدىن بىراۋنى باھالاشقا مەجبۇر بولغىنىمدىمۇ پەيلاسوپ سوقراتنىڭ سۆزى بويىچە جاۋاپ بېرىمەن. ھەر ھالدا دانالارنىڭ بىر ئېغىز ھېكمەتلىك سۆزىنى بولسىمۇ بەجا كەلتۈرەلەپتىمەن