دېھقان ئاتا (نەسىر)

omarkutyar

	دېھقان ئاتا ئۆمەر مەتنۇرى قۇتيار  قۇياش ئۇلۇغ ۋە بۈيۈك. چۈنكى، ئۇ ئانا تەبىئەتنىڭ ھاياتلىق بۇلىقى، پۈتكۈل دۇنيانىڭ تومۇرىدىكى قان. خۇددى قۇياشسىز ياشاشنى تەسەۋۋۇر قىلغىلى بولمىغىنىدەك، ئىنسانىيەت ئالىمىدە قۇياشتەك يۈكسەك ۋە تاغدەك مەزمۇت بىر ئىنسان بار. ئۇ بولسىمۇ جاپاكەش دېھقان ئاتا! دېھقان ئاتا، سەن بىپايان سۆيگۈ دېڭىزى، مۇشەققەت دەشتىدە باشقىلارغا بەخت ئىزدەپ ماڭغان ھارماس كارۋان. سەن ئۈن- تىنسىز بەدەل، سەن توپا - تۇمان ئارىسىدىن قۇت پەرىلىرىنى باشلاپ چىققان ئاپئاق ساقاللىق خىزىر. شۇڭا، سەن تۇتقان كەتمەندىن گىياھسىز چۆل - باياۋانلار گۈلىستانلىق باغلارغا ئايلانسا، سەن ئېيتقان ناخشىلاردىن گۈل - گىياھلار شادىيانە ئۇسسۇلغا چۈشۈشىدۇ. سېنىڭ ھەر بىر قەدىمىڭدىن مېھىر - مۇھەببەت تۆكۈلۈپ تۇرىدۇ. ئۇچار قۇشلار، جان - جانىۋارلار قاداق باسقان ئالقىنىڭدىن نۇر ئېمىپ كۆكلەيدۇ. شۇڭىمۇ مېنىڭ نەزىرىمدە دېھقان - نان، دېھقان - جان. دېھقان ئاتا، سەن چاڭقاپ كەتكەن تۇپراقنىڭ باغرىغا شارقىراپ ياغقان شىپالىق يامغۇر. سەن مېھنەت دالاسىدىكى بىر سەيياھ. سۈبھى پەيتىدىكى تاڭ خورىزىنىڭ چىللىشىغا بېشارەت بەرگۈچى قۇڭغۇراق ساداسى. سەن سازىڭنى چەككەندە، ئۇيقۇچان يۈرەكلەر ئۆزىنىڭ جىمجىتلىقىنى بۇزۇپ تاشلايدۇ. دەل شۇ چاغدا يورۇقلۇقنىڭ سالامى ئۆيۈڭگە يېتىپ كېلىدۇ. سەن بىر ھەسەل ھەرىسى بولۇپ، زەررەڭ سەھەرنىڭ قۇچىقىدا ئېغىناپ ئوينايسەن. قاناتلىرىڭ شۇ سەھەرنىڭ گۈل − شىرنىلىرىگە مىلىنىپ، چاراقلاپ نۇر چاچىدۇ. تەرلىرىڭدىن زېمىن تاتلىق لەززەتكە چۆمۈلىدۇ. بۇ سېنىڭ ئىشقىڭ ئەمەسمۇ؟ شۇڭىمۇ مېنىڭ نەزىرىمدە دېھقان - شادلىق ئەلچىسى، دېھقان - قەيسەر جەڭچى. دېھقان ئاتا، سەن تۇپراق ئاستىدا قالغان قانداقتۇر قەدىرسىز بىر خىش پارچىسى ئەمەس، بەلكى ئىنسانلارنى مۆھتاجلىق كوچىسىدىن مەئىشەت دۇنياسىغا باشلاپ بارغۇچى ئەۋلىيا. سېنىڭ روھىڭدا قىشۇ ياز باھار ئاپتىپى نۇر چېچىپ تۇرىدۇ، گۈزەللىك سەندىن رەڭ ئالىدۇ. چۈنكى، قەلبىڭ پاك ئەقىدە ۋە سەمىمىيەتنىڭ ھىدى بىلەن تولغان. مەن بىلىمەن: شاماللار سۆزلىمەيدۇ، ئەمما ئىلھامبەخش. تاغلار سۆزلىمەيدۇ، چىداملىق. گۈللەر سۆزلىمەيدۇ، مېھىرلىك. ئېيتقىنا دېھقان ئاتا، ئۇلار سەندىن رەڭ ئالغانمۇ ياكى سەن ئۇلاردىن ئۆگەنگەنمۇ؟ شۇڭىمۇ مېنىڭ نەزىرىمدە دېھقان - كەمتەر، دېھقان - مەۋجۇتلۇق. دېھقان ئاتا، سەن ئانا زېمىن باغرىنى مەھكەم قۇچاقلاپ ياتقان يىلتىز، قارا تۇپراقتىن بىھېساپ گۆھەر قازغۇچى خالىس شەپقەتچى. سېنىڭ قان - تەر بەدىلىگە ياراتمىشىڭ كىچىككىنە نەپسىڭ ئۈچۈن ئەمەس، بەلكى ۋەتەن سەلتەنىتىنىڭ شانۇ شەۋكىتى، ئېلىڭنىڭ سائادىتى ئۈچۈندۈر. شۇڭا، سەن بولغاچقىلا مەھمۇد بوۋام تىل دۇنياسىدا ساما سالغان، يۈسۈپ بوۋام دۆلەتنى ئىدارە قىلىشنىڭ ئەڭ ياخشى نەمۇنىسى، شاھانە ئەسەر «قۇتادغۇبىلىك» نى ياراتقان؛ ئابدۇخالىق ئۇيغۇرى جاھالەتلىك دۇنيانىڭ قاراڭغۇ ئاسمىنىدا چولپاندەك چاقنىيالىغان؛ مەمتېلى ئەپەندىلەر مەرىپەت مەشئىلىنى ياندۇرالىغان؛ خەلق ئازادلىق، ئەركىنلىك ئۈچۈن جەڭ ئاتلىرىدا خۇددى كۆكتىكى بۈركۈتتەك پەرۋاز قىلىپ، ئاسارەتنىڭ دەرەخلىرىگە تىغ ئۇرالىغان. سەن بولغاچقا، ئىلىمنىڭ بۈگۈنكىدەك شان- شەرىپى دۇنياغا تارالىغان. بۇ سېنىڭ ئېتىقادىڭ ئەمەسمۇ؟ شۇڭىمۇ مېنىڭ نەزىرىمدە دېھقان -تارىخ، دېھقان - ۋەتەن. دېھقان ئاتا، سان كۈچ ۋە مادارىمنىڭ مەنبەسى، چەكسىز خوشاللىقىمنىڭ ھارارەتلىك ئوچىقى، قەلب ئاسمىنىمدا چاقناپ تۇرغۇچى يېگانە يۇلتۇز بولۇپلا قالماستىن، دۇنيا كۈلكىسىنىڭ پىرى. چۈنكى، سەن كۈلسەڭ، پۈتكۈل ھاياتلىق كۈلىدۇ. سەن يىغلىساڭ، پۈتكۈل ھاياتلىق يىغلايدۇ. سەۋەبى، سېنىڭ كۈلكەڭ ئەجرۇئەزىم كۈلكىسى، سېنىڭ كۈلكەڭ قۇت كۈلكىسى، سېنىڭ كۈلكەڭ مۇھەببەت كۈلكىسى، سېنىڭ كۈلكەڭ ئۈمىد كۈلكىسى، سېنىڭ كۈلكەڭ مۇكەررەم ھايات. سېنىڭ بۇ كۈلكەڭ قىشنىڭ سۆڭەكتىن ئۆتكۈدەك سوغۇقلىرىدا، يازنىڭ تونۇر تەپتىدەك ئىسسىقىدا، يامغۇر، قار، شىۋىرغان، جۇدۇندا بىر ئۆمۈر دادلىماي ئىشلەشتىن كەلگەن. شۇڭا، سەن ھېچكىمگە يېلىنمايسەن، باشقىلارنىڭ ئالتۇن قەسرىنى تەمە قىلمايسەن. بۇ سېنىڭ مەردلىكىڭ ئەمەسمۇ! شۇڭىمۇ مېنىڭ نەزىرىمدە دېھقان - مېھنەتكەش ئانا، دېھقان - سېخىي ھاتەم. دېھقان ئاتا، سەن تارىمنىڭ يۈرىكى. سېنىڭ نەپەسلىرىڭ بىلەن توغراقلار قۇم كۆكسىدە مەغرۇر قەد كېرىپ تۇرالايدۇ. سەن بولغاچقىلا، يېشىللىق كۈندىن- كۈنگە بوي تارتىدۇ. سەن بولغاچقىلا، يىللارنىڭ ئالتۇن پەسلىدە قۇشلىرىڭ ئەركىن، ئازادە سايرىيالايدۇ. چۈنكى، سەن قۇربان بېرىش روھىغا باي، ئەتە ئۈچۈن تىنىمسىز ھەرىكەت قىلىدىغان ئىشچان قارا چۈمۈلىسەن. سېنىڭ ۋۇجۇدۇڭدا قۇدرەتلىك بىر كۈچ گويا دېڭىز دولقۇنىدەك تەۋرەپ تۇرىدۇ. بىلىمەن، سەن مۇھەببەت بىلەن تۇغۇلۇپ مۇھەببەت بىلەن كېتىسەن. سەن بېرىشتە بار، ئېلىشتا يوق ئەزىمەت. سەن رۇستەمى پالۋان، سەن مال - دۇنيا، پۇل - پۇچەك بىلەن ئۆزىنى بۇلغىمايدىغان، ھالال بىلەن ھارامنى ئايرىيالايدىغان، يالغانچىلىق، ئالدامچىلىقلاردىن يىراق تۇرالايدىغان، قىلغان - ئەتكىنىدىن پەزىلەت گۈللىرى خۇش ھىد تارىتىپ تۇرىدىغان ئەڭ ساددا، سەمىمىي ئىنسان. سېنىڭ قولۇڭ تەگكەن تاشمۇ مېھىر - مۇھەببەتنىڭ تىل بىلەن ئىپادىلىگۈسىز ئەسەبىي كۈيلىرىنى چالالايدۇ. چۈنكى، سەن راستنى راست، يالغاننى يالغان دېيەلەيدىغان، ئېگىلگەنگە ئېگىلىپ، غادايغانغا غادىيالايدىغان ھەقىقىي ئىنسان. شۇڭىمۇ مېنىڭ نەزىرىمدە دېھقان - چېپىپ تۇرغان تۇلپار، دېھقان - جاھاننامە ئەينىكى. دېھقان ئاتا، سەن ھەر بىر كۈنۈمنىڭ ئىللىق تەبەسسۇمى، سېنىڭ داستىخىنىڭ كەڭرى. شۇڭا، نازۇ نېمەتلىرىڭنى ئايىماي يايىسەن. لېكىن، مەڭگۈ پۇشايمان ئوتلىرىدا پۇچۇلانمايسەن. چۈنكى، سەن بىر ئۆمۈر ئېقىپ توختىمايدىغان ئەزىم دەريا. ئېسىڭدىمۇ دېھقان ئاتا؟ باھار قارلىغاچلىرى ۋىچىرلىشىپ ئۇچۇۋاتقان، دەل- دەرەخلەر پوتلا چىقىرىشىپ، ئىللىق شامال يۈزلەرنى يۇمران ئالىقانلىرى بىلەن يېنىك سىلاۋاتقان، بۇغدايزارلار دولقۇنلاۋاتقان، ئېرىقلاردا سۇلار شىلدىرلاپ ئېقىۋاتقان، ئۈجمىلەر مەي باغلاپ پىشىۋاتقان ئاشۇ چاغدا، بىز سېنىڭ مېھمىنىڭ بولغان! ئۈجمە شاخلىرىغا ئاق قۇشقاچتەك قونۇۋېلىپ، مەي باغلاپ پىشقان ئاپئاق، بودەك ئۈجمىلىرىڭنى تويغۇچە يېگەن، راست، بىز سېنىڭ مېھمىنىڭ بولغان: ئۇ چاغدا ئۆرۈكلەر ئالتۇندەك سارغىيىشقا باشلىغان، جىنەستە، ئالۇچىلار قىزغۇچ رەڭگە كىرگەن، قوغۇن - تاۋۇزنىڭ شېرىن ھىدى زېمىننى بىر ئالغان. بىز مانا مۇشۇنداق چاغدا، ئېرىقلىرىڭدا راھەتبەخش سۇلىرىڭغا چۆمۈلۈپ، كۆلچىكىڭدىكى بېلىقلىرىڭدەك ئۈزگەن. قوزىچاقلاردەك تاقلاپ قىقاس، چوقانلار ئىچىدە ئوينىغان، كۈلگەن ۋە نېمەتلىرىڭگە ئېغىز تەگكەن. بىز سېنىڭ مېھمىنىڭ بولغان :ئۇ چاغدا ئۈزۈملەر كەھرىۋادەك چاقنىغان، قوناقلار موزاي چىش بولغان، ئالما، ئانارلارغا تەم كىرگەن، كېۋەزلەر ئېچىلغان ئالتۇن پەسل ئىدى. بىز شۇ چاغدا قۇناقلىق ئارىسىدا «ھەربىي- دۈشمەن» بولۇپ نەقەدەر كۆڭۈللۈك ئوينىغان - ھە؟! بىز سېنىڭ مېھمىنىڭ بولغان: ئۇ چاغدا جاھاننى مامۇقتەك يۇمشاق قار قاپلىغان، كۆل يۈزىدە ئەينەكتەك مۇز تۇتقان ئىدى. بىز ساپ ھاۋادىن نەپەس ئېلىپ، قارلىق دالىلاردا ئىز قالدۇرغان، چانىلاردا مۇز گۈللىرىنى بەرپا قىلغان. سەن سالغان پاقلان گۆشىنىڭ شورپىسىدىن قانغۇچە ئىچكەن. قىشنىڭ ئۇزۇن كېچىلىرى ئاڭلاپ قانمايدىغان قىزىقارلىق چۆچەكلىرىڭ دۇنياسىغا غەرق بولغان. ئۆز قولۇڭ بىلەن ياققان زاغرا ناننى تونۇردىن ئىسسىق قومۇرۇپ ئېلىپ، ئىشتىھا بىلەن يېگەن؛ چار ساقاللىرىڭنى سىيلاپ، قۇچىقىڭدا ئەركىلىگەن. شۇڭىمىكىن، مېنىڭ نەزىرىمدە دېھقان - مۇنبەت يايلاق، دېھقان - ئورىغانسېرى ياشىرىپ تۇرىدىغان بېدە. دېھقان ئاتا، سېنىڭ نەشتىرىڭ يوق چېقىۋالىدىغان؛ ئىچىڭ تار ئەمەس چىمدىۋالىدىغان؛ سېنىڭ قايچاڭ يوق كېسىۋالىدىغان. شۇڭىمۇ بىز سېنىڭ مېھمىنىڭ بولغان. لېكىن، سەن قايسىبىرنى يامان كۆرگەن، قايسىبىرىگە باغلىرىڭدىن ئۇۋا بەرمىگەن؟ قايسىبىرىنى تومۇزدا ئىسسىققا، قىشتا سوغۇققا قويغان؟ قايسىبىرىنى بوسۇغاڭغا يولاتمىغان؟ ئېھ دېھقان ئاتا، بۈگۈن ئۆز ئوغلۇڭنىڭ ئالدىدا ئەيمىنىپ تۇرۇشۇڭ نە ۋەجىدىن؟ ئېھتىمال: «بۇ تۇرقۇم بىلەن ئالدىغا بارسام قانداق بولار؟» دەپ ئويلاۋاتامسەن؟ ياق، ياق! ھەرگىز ئۇنداق ئويلىما! ئۈستىۋېشىڭدىكى توزانلارنى قاقماي تۇر. مۇھەببەت ۋە ئىپتىخار بىلەن چوغدەك باغرىڭغا تاشلىناي! سەن ئېلىپ كەلگەن ئانا تۇپراقنىڭ ھىدىدىن ئالەم شېرىن دەملەرگە چۆمۈلسۇن!

atikam1

	بۇ نەسرى ئەسىرىڭىز شۇنداق تەسىرلىك يېزىلىپتۇ ،،ئەسەرنىڭ ھەر بىر بۆلەكلىرىنى ئۇقۇغان چاغلىرىمدا مەرھۇم دادام  يادىمدىن كەچتى ،،،ئۇنىڭ شۇ كەتمەن تۇتۇقان قامىتى ،ئۇستى بېشىدىكى تۇپا -چاڭلارنى قېقىشى مىننەتسىز ھاردىم تالدىم دېمەي  ئېتىزلىقلاردىن كىرمەي ئىشلەشلىرى كۆز ئالدىمدىن ئۆتتى ،،،،شۇ ئۇلۇغ ئاتىلارنى قانچىلەك مەدىلىسەكمۇ ئازلىق قىلىدۇ ،،،ئۇلارنىڭ روھى بىزگە مەڭگۇ مەدەتكار

pazilat2004

	بۇ   تېمىنى  ئوقىۋىتىپ   كاللامغا    ،  ئابدىكىرىم   ئابلىزنىڭ     ھېلىقى   بىر   ئىتوتىدا  <<   مىللى   ئۆرپى - ئادەتنى  ،   كىيىم  -  كېچەك   مەدىنىيىتىنى   ،  ئادىمىگەرچىلىك  ئەخلاقىنى    ،   دىنى   ئېتىقاتنى   ساقلاپ   كېلىۋاتقان   يەنە   بىز   دېھقانلار    جۇما   >>    دىگەن   سۆزى  كىرۋالدى    .

aitürk

	دېھقاننى قانچە كۈيلىسەكمۇ تىلىمىز ئاجىزلىق قىلىدۇ.....

turditohti

	دېھقىنى بار مىللەت مەڭگۈ يوقالمايدۇ دىگەن ھۈكۈمنى ئەسلەپ قالدىم.

gullala

	دېھقاننى تەسۋىرلەشكە تىلىمىز ئاجىزلىق قىلىدۇ ئەلۋەتتتە ،،،،،،،،،،ئۇنىڭ ئەجىرى بىباھدۇر ،،

matursun

	ھەقىيقەتەن ياخشى يېزلغان نەسىر ئىكەن

kaxkarye

	كەچۈرۈڭلار دوستلار مۇناسىۋەتسىز ئىنكاستىن بىرسى كەتتى ... پەخىرلىك ئوغلانىمىز دىلشات ھازىر  كۈنەس ناھىيەسىگە ئاز قالدى . خۇدايىم بۇيرىسا ئەتە چۈشتە يىتىپ بىرىشى مۇمكىن ، يەنە 8-ئاينىڭ 16-كۈنى بۇ قېتىملىق سەپىرى ئاخىرلىشىدۇ .         كۈنەس ناھىيەسىدىكى دوستلارنىڭ دىلشاتنى قىزغىن كۈتۈۋېلشىنى تۆۋەنچىلىك بىلەن ئۈمۈت قىلىمەن.           تەپسلاتىگە قىزىقسىڭىز بۇ يەرگە مەرھەمەت  : http://www.qimbulak.com/pic.asp?id=1152&tpg=picvis.asp

otyurakohlan

	ھەقىقەتەن ياخشى يىزىلغان نەسىر بۇپتۇ

muhabat

	بىزنىڭ دېھىقان ئاتىلىرىمىزنى قانچە كۈيلىسمۇ ئازىللق قىلىدۇ، ئۇ ئەڭ مۆكتىرەم كىشلىرىمىز.